ಇಬ್ರಿಯೆರೆಗ್ 6 - ಪೊಸ ಒಡಂಬಡಿಕೆ

^1-2 ಅವೆಡ್ದಾವರ ಜೀವದಾಂತಿ ಕೆಲಸೊಲೆ ಮಿತ್ತ್ ನಂಬಿಕೆನ್ ಬುಡ್ದು ದೇವೆರೆಡನೇ ನಂಬಿಕೆ ದೀವೊಡಾಯಿನವು, ಪಶ್ಚಾತಾಪ ಪಡೆಪಿನ, ದೀಕ್ಷಾಸ್ನಾನ, ಹಸ್ತಾರ್ಪಣೆದ ಬೋಧನೆ, ಸೈತಿನಾಕುಲೆಡ್ದ್ ಲಕ್ಕುನವು, ನಿತ್ಯನ್ಯಾಯತೀರ್ಪು ಉಂಡು ಪನ್ಪಿನವು. ಇಂಚಿತ್ತಿನೆತ್ತ ಕ್ರಿಸ್ತಡುಪ್ಪು ಅಡಿಪಾಯೊನು ಗಡಿಗಡಿ ಪಾಡಂದೆ ಪೂರ್ತಿ ಆಯಿ ತಿಳುವಳಿಕೆಗ್ ಸಾಗೊಂದು ಪೋಯಿ.

³ ಬೊಕ್ಕ ದೇವೆರೆ ಚಿತ್ತ ಇತ್ತ್ಂಡ, ಇಂಚನೆ ಸಾಗೊಂದು ಪೋಯಿ.

⁴ ಒಂಜಿ ಸರ್ತಿ ಗೇನದ ಬೊಲ್ಪುಗು ಸೇರಿ ಬೊಕ್ಕ ಪರಲೋಕೊಡ್ಡಾಯಿನ ದಾನದ ಅನುಭವೊನು ಮಲ್ತ್‌ದ್ ಪರಿಶುದ್ಧಾತ್ಮಡ್ ಪಾಲ್‌ದಾರೆರಾದ್

⁵ ದೇವೆರೆ ಎಡ್ಡೆ ಪಾತೆರೊಲೆನ್ಲಾ ಬರ್ಪಿ ಯುಗತ್ತ ಬಲೊನ್ಲಾ ಅನುಭವ ಮಲ್ತಿನಾಕುಲು ಪಿರ ಜಾರುವೆರ್‌ಡ,

⁶ ಅಕ್ಲೆಡ ಕುಡೊರ ಪಶ್ಚಾತಾಪ ಪುಟ್ಟಾಯೆರೆ ಸಾದ್ಯ ಇಜ್ಜಿ. ದಾಯೆಗಂದ್ಂಡ ಅಕುಲು ತನ್ಕುಲೆ ಪಾಲ್‌ಗ್ ದೇವೆರೆ ಮಗನ್ ಕುಡೊರ ಕ್ರುಸ್ಸುಗು ಪಾಡುನಾಕುಲುಲಾ ಆಯನ್ ಅವಮಾನ ಮಲ್ಪುನಾಕುಲುಲಾ ಆದುಲ್ಲೆರ್.

⁷ ಭೂಮಿ ತನ ಮಿತ್ತ್ ದಿಂಜ ಸರ್ತಿ ಬೂರುನ ಬರ್ಸೊನು ಒಯ್ತೊಂದು ಅವು ಏರೆಗಾದ್ ಬೆನ್ನಿ ಮಲ್ಪಾವುಂಡಾ ಅಕ್ಲೆಗ್ ಎಡ್ಡೆ ಬುಲೆ ಕೊರ್‌ಂಡ ದೇವೆರೆ ಆಶೀರ್ವಾದೊನು ಹೊಂದುಂಡು.

⁸ ಆಂಡ ಅವು ಮುಳ್ಳುಗಿಡೊಕ್ಲೆನ್ಲಾ ಕಳ್ಳಿಲೆನ್ಲಾ ಬುಲೆಪಾಂಡ ತಕ್ಕಂತಿನವು ಆವಂದೆ ಶಾಪದವು ಆಪುಂಡು. ಐತ ಅಂತ್ಯ ಪೊತ್ತುದು ಪೋಪಿನವೇ.

⁹ ಆಂಡ ಪ್ರೀತಿದಾಕುಲೇ, ಈ ರೀತಿಯಾದ್ ಎಂಕುಲು ಪಾತೆರ್‌ಂಡಲಾ ನಿಕುಲು ಉಂದೆಡ್ದ್ ಎಡ್ಡೆ ರೀತಿಡ್ಲಾ ರಕ್ಷಣೆಡ್ಲಾ ಉಲ್ಲರಂದ್‌ದ್ ದೃಢಾದ್ ನಂಬುದ.

¹⁰ ನಿಕುಲು ದೇವಜನೊಕುಲೆಗ್ ಉಪಚಾರ ಮಲ್ತ್‌ದರ್ ನನಲಾ ಮಲ್ತೊಂದುಲ್ಲರ್. ಈ ಕೆಲಸೊನ್ಲಾ ನೆಟ್ಟ್ ನಿಕುಲು ದೇವೆರೆನ ಪುದರ್‌ದ ಮಿತ್ತ್ ತೋಜಾಯಿನ ಪ್ರೀತಿನ್ಲಾ ಆಯೆ ಮದತ್‌ದ್ ಬುಡ್ಪುಜೆ, ದಾಯೆಗ್ ಪಂಡ ದೇವೆರ್ ಅನ್ಯಾಯಗಾರೆ ಅತ್ತ್.

¹¹ ನಿಕುಲು ಉಪಚಾರ ಮಲ್ಪುನೆಟ್ಟ್ ವಾ ಆಸಕ್ತಿನ್ ತೋಜಾದರಾ, ನಿಕ್ಲೆನ ನಿರೀಕ್ಷೆ ದೃಢ ಮಲ್ತೊಂದು ಕಡೆ ಮುಟ್ಟ ಪತ್ತೊನ್ನೆಟ್ಟ್‌ಲಾ ನಿಕ್ಲೆಡ್ ಪ್ರತಿ ಒರಿ ಅವ್ವೇ ಆಸಕ್ತಿನ್ ತೂಪಾವೊಡು ಅಂದ್‌ದ್ ಬಯಕುವೆ.

¹² ನಿಕುಲು ಉದಾಸೀನೆರ್ ಆದುಪ್ಪಂದೆ, ವಾಗ್ದಾನೊಲೆನ್ ನಂಬುದು ಐತ ಫಲೊಕ್ಕಾದ್ ಮಸ್ತ್ ದಿನ ಮುಟ್ಟ ಕಾತೊಂದಿತ್ತ್‌ದ್ ಆ ಫಲೊನು ಪಡೆವೆರೆ ಪ್ರಯತ್ನ ಮಲ್ತೊಂದು ಉಪ್ಪೊಡಂದ್‌ದ್ ಬಯಕುವೆ.

ದೇವೆರೆ ವಾಗ್ದಾನೊಲು ಏಪೊಗ್ಲಾ ತಪ್ಪಂದಿನವು

¹³ ದೇವೆರ್ ಅಬ್ರಹಾಮುಗು ವಾಗ್ದಾನ ಮಲ್ತಿನಪಗ ತನಡ್ದ್ ಹೆಚ್ಚಿಗೆದಾಯನ ಆಜ ದೀವೆರೆ ಆವಂದೆ ಇತ್ತಿನೆಡ್ದ್ ತನ ಮಿತ್ತೇ ಆಜ ದೀವೊಂಡೆ.

¹⁴ “ನಿಜಾದ್ ಯಾನ್ ನಿನನ್ ಆಶೀರ್ವದಿಪುವೆ. ನಿನ ಸಂತಾನದಾಕುಲೆನ್ ಲೆಖ್ಖ ಮಲ್ಪೆರೆ ಆವಂದಿನಾತ್ ಹೆಚ್ಚ್ ಮಲ್ಪುವೆ.”

¹⁵ ಆ ವಾಗ್ದಾನದ ಫಲೊಕ್ಕಾದ್ ಅಬ್ರಹಾಮು ಮಸ್ತ್ ದಿನ ಕಾತೊಂದಿತ್ತ್‌ದ್ ಆ ಫಲೊನು ದೇವೆರ್ ಪಂಡಿಲೆಕ್ಕನೇ ಪಡೆಯೆ.

¹⁶ ನರಮಾನಿಲು ತನ್ಕುಲೆಡ್ದ್ ಹೆಚ್ಚ್‌ದಾಯನ ಮಿತ್ತ್ ಆಜ ಪಾಡ್ದ್ ನಿಗಂಟ್ ಮಲ್ತಿ ಬೊಕ್ಕ ಅಕ್ಲೆನ ಉಲಯಿ ವಾದ ದಾಲಾ ಉಪ್ಪುಜಿ.

^17-18 ಅಂಚೆನೇ ದೇವೆರ್ ತನ ಮನಸ್ ಸ್ಥಿರವಾಯಿನವು ಪನ್ಪಿನೆನ್ ವಾಗ್ದಾನದ ಫಲೊಕ್ಕು ಹಕ್ಕ್‌ದಾರೆರಾಪಿನಾಕುಲೆಗ್ ಸರಿಯಾದ್ ತೋಜಾವೊಡು ಅಂದ್‌ದ್ ಆಜ ದೀದ್ ತನ ಪಾತೆರೊನು ಗಟ್ಟಿ ಮಲ್ತೊಂಡೆ. ನಿಲೆ ತಿಕ್ಕೊಡು ಪಂಡ್ದ್ ಪಾರ್ ಬತ್ತ್‌ದ್ ನಮ ಎದುರುಡು ದೀತಿನ ಕಾತೊಂದಿತ್ತಿನೆನ್ ಪತ್ತೊಂಡಿನಕುಲಾಯಿ ಎಂಕ್ಲೆಗ್ ರಡ್ಡ್ ಸ್ಥಿರವಾಯಿನ ಆಧಾರೊಲು ಉಪ್ಪುನೆಡ್ದ್ ಧೈರ್ಯ ಉಂಡಾಂಡ್.

¹⁹ ಈ ಆಧಾರೊಲೆನ್ ಕೊರಿನೆಡ್ದಲಾ ದೇವೆರ್ ಸುಳ್ಳು ಪನ್ತ್‌ಜೆ. ಆ ನಿರೀಕ್ಷೆಲಾ ನಮ ಪ್ರಾಣದ ಲಂಗರ್‌ದ ಲೆಕ್ಕ ಇತ್ತ್‌ದ್ ಭರವಸೊಗು ಯೋಗ್ಯಾದಿತ್ತಿನಲಾ ಸ್ಥಿರವಾದಿತ್ತಿನಲಾ ಆದುಂಡು. ಅವು ನಮನ್ ಪರದೆದ ಉಲಯಿದ ದೇವೆರೆ ಸನ್ನಿಧಾನೊಗು ನಡಪುಡುನವು.

²⁰ ಯೇಸು ಸದಾಕಾಲೊಗು ಮೆಲ್ಕೀಜೆದೇಕ್‌ನ ತರತ ಪ್ರಧಾನಯಾಜಕೆ ಆದಿತ್ತ್‌ದ್ ನಂಕಾದ್ ದುಂಬೇ ಆ ಸನ್ನಿಧಾನದ ಉಲಯಿ ಪೋತೆ.