ಇಬ್ರಿಯೆರೆಗ್ 5 - ಪೊಸ ಒಡಂಬಡಿಕೆ

¹ ಪ್ರತಿಯೊರಿ ಪ್ರಧಾನಯಾಜಕೆ ಜನೊಕುಲೆಡ್ದ್ ಅಜತ್ ದೆತ್ತಿನಾಯೆ ಆದಿತ್ತ್‌ದ್ ಜನೊಕುಲೆಗಾದ್ ದೇವೆರೆ ಕಾರ್ಯೊಲೆನ್ ಮಲ್ಪೆರೆಗಾದ್ ನೇಮಕ ಆದುಪ್ಪುವೆ ಅತ್ತಾ? ಆಯೆ ಅಕ್ಲೆಗಾದ್ ಕಾಣಿಕೆಲೆನ್ಲಾ ಪಾಪ ಮಾಜಾವುನೆಕ್ಕಾದ್ ಬಲಿಲೆನ್ಲಾ ಅರ್ಪಣೆ ಮಲ್ಪೊಡು.

² ತಾನ್‌ಲಾ ಬಲಹೀನೆ ಆದುಪ್ಪುನೆಡ್ದ್ ಆಯೆ ಬುದ್ಧಿದಾಂತಿನಾಕುಲೆನ್ಲಾ, ಮಾರ್ಗ ತತ್ತ್‌ದ್ ನಡಪುನಾಕುಲೆನ್ಲಾ ತಾಳ್ಮೆಡ್ ತರಕೊನಿಯೆರೆ ಶಕ್ತೆ ಆದುಲ್ಲೆ.

³ ಆ ಬಲಹೀನತೆದ ಕಾರಣೊಡ್ದು ಆಯೆ ಜನೊಕುಲೆಗಾದ್ ಎಂಚನಾ ಅಂಚೆನೇ ತನ್ಕಾದ್‌ಲಾ ಪಾಪ ಮಾಜಾವುನೆಕ್ಕಾದ್ ಬಲಿ ಅರ್ಪಣೆ ಮಲ್ಪೊಡಾಯಿನಾಯೆ ಆದುಲ್ಲೆ.

⁴ ಉಂದತ್ತಂದೆ ಏರ್ಲಾ ತನ್ನಾತೆಗೆ ತಾನ್ ಈ ಮಾನೊನು ವೈಸೊನಂದೆ ದೇವೆರೆಡ್ದ್ ನೇಮಕಾದ್ ವೈಸೊನ್ವೆ. ಆರೋನೆಲಾ ದೇವೆರೆಡ್ದೇ ನೇಮಕ ಆದ್ ಆ ಮಾನೊನು ವೈಸೊಂಡೆ ಅತ್ತಾ?

⁵ ಅಂಚೆನೆ ಕ್ರಿಸ್ತೆಲಾ ತನ್ಕ್ ತಾನ್ ಪ್ರಧಾನಯಾಜಕೆ ಆಪಿನ ಈ ಮಾನೊನು ವೈಸೊಂಡ್ಜೆ, ಆಂಡ, “ಎಂಕ್ ಈಯೇ ಮಗೆ; ಇನಿ ಯಾನೇ ನಿನನ್ ಪಡೆತೆ.”

⁶ ಪಂಡ್ದ್ ಪಂಡಿನಾಯೆನೇ ಈ ಮಾನೊನು ಆಯಗ್ ಕೊರಿಯೆ. ಆಯೆ ಬೊಕ್ಕೊಂಜಿ ಕಡೆಟ್ಟ್, “ಈ ಸದಾಕಾಲೊಗು ಮೆಲ್ಕೀಜೆದೇಕ್‌ನ ತರತ ಯಾಜಕೆ ಆದುಲ್ಲ,” ಪಂಡ್ದ್ ಪನ್ಪೆ.

⁷ ಕ್ರಿಸ್ತೆ ತಾನ್ ಭೂಲೋಕೊಡುಪ್ಪುನಗ ಮರಣೊಗು ತಪ್ಪಾದ್ ಕಾಪುನ ಶಕ್ತಿ ಇತ್ತಿನಾಯಗ್ ಮಲ್ಲ ಬುಲ್ಪುಡ್ದುಲಾ ಕಣ್ಣ್ ನೀರ್ ಜಪುಡಾದ್‌ಲಾ ಪ್ರಾರ್ಥನೆ ಕೋರಿಕೆಲೆನ್ ಸಂದಾದ್ ದೇವೆರೆ ಮಿತ್ತ್ ಭಯ ಭಕ್ತಿ ದೀಯಿನೆಡ್ದ್ ದೇವೆರ್ ಆಯನ ಪ್ರಾರ್ಥನೆಲೆನ್ ಕೇಂಡೆ.

⁸ ಇಂಚ ಆಯೆ ದೇವೆರೆ ಮಗೆ ಆದಿತ್ತೆಡಲಾ ತನ್ಕ್ ಆದುಪ್ಪು ಕಷ್ಟೊಲೆಡ್ದೇ ತಗ್ಗ್‌ತನೊನು ಕಲ್ತೊಂಡೆ.

^9-10 ಉಂದತ್ತಂದೆ ಆಯೆ ಪರಿಪೂರ್ಣೆ ಆದ್ ದೇವೆರೆಡ್ದ್ ಮೆಲ್ಕೀಜೆದೇಕ್‌ನ ತರತ ಪ್ರಧಾನಯಾಜಕೆ ಪಂಡ್ದ್ ಪನ್ಪಾವೊಂಡಿನಾಯೆ ಆಯೆ. ತನ ಪಾತೆರೊನು ತಗ್ಗ್‌ತನೊಟು ಕೇನುನಾಕುಲೆಗ್ ಮಾತೆರೆಗ್ಲಾ ನಿತ್ಯ ರಕ್ಷಣೆ ತಿಕ್ಕುಲೆಕ್ಕ ಕಾರಣ ಆಯೆ.

ನಂಬಿಕೆನ್ ಬುಡ್ಪಿನೆತ್ತ ಬಗೆಟ್ ಎಚ್ಚರಿಕೆ

¹¹ ನೆತ್ತ ಸಂಗತಿಡ್ ಎಂಕುಲು ಪನಿಯೆರೆ ಉಪ್ಪುನ ಪಾತೆರೊಲು ಮಸ್ತ್ ಉಂಡು; ಆಂಡ ನಿಕ್ಲೆನ ಕೆಬಿ ಮಂದ ಆದುಪ್ಪುನೆಡ್ದ್ ಅವೆನ್ ಬುಡ್ಪಾದ್ ತೆರಿಪಾವುನವು ಕಷ್ಟ ಆದುಂಡು.

¹² ಕಾಲೊನು ತೂಂಡ ನಿಕುಲು ಈತ್‌ನೆಟ್ಟ ಬೋಧಕೆರಾದ್ ಉಪ್ಪೊಡಿತ್ತ್‌ಂಡಲಾ ಒರಿ ನಿಕ್ಲೆಗ್ ದೇವೆರೆ ಪಾತೆರೆದ ಮೂಲ ಪಾಠೊಲೆನ್ ಕುಡಲಾ ಕಲ್ಪಾವೊಡಾಪುಂಡು. ನಿಕುಲು ಪೇರ್ ಪರ್ಪಿನಾಕುಲೇ ಅತ್ತಂದೆ ಗಟ್ಟಿದ ತಿನಸ್ ತಿನ್ಪಿನಾಕುಲು ಅತ್ತ್.

¹³ ಪೇರ್ ಬೋಡಾಯಿನಾಯೆ ಬಾಲೆದಲೆಕ್ಕ ಇತ್ತ್‌ದ್ ನೀತಿದ ವಾಕ್ಯೊಲೆಡ್ ಅನುಭವದಾಂತಿನಾಯೆ ಆದುಲ್ಲೆ.

¹⁴ ಗಟ್ಟಿದ ತಿನಸ್ ಪ್ರಾಯಸ್ಥೆರೆಗ್ ಅಂದ್ಂಡ ಗೇನ ಸಾದನೆಡ್ದ್ ಉಂದು ಎಡ್ಡೆಂತಿನ ಉಂದು ಹಾಳ್ ಇನ್ಪಿ ಭೇದೊನು ತೆರಿದಿನಾಕುಲೆಗಾದುಂಡು.