ಇಬ್ರಿಯೆರೆಗ್ 2 - ಪೊಸ ಒಡಂಬಡಿಕೆ

ಮಲ್ಲ ರಕ್ಷಣೆ

¹ ಅವೆಡ್ದಾವರ ನಮ ಕೇಂಡಿನ ಪಾತೆರೊಲೆಗ್ ನಮ ತತ್ತ್‌ದ್ ಪೋವಂದಿಲೆಕ್ಕ ಪೋಡಿದ್ ಐಕ್ ಹೆಚ್ಚಾದ್ ಬುದ್ಧಿ ಕೊರ್ಪಿನಕುಲಾದುಪ್ಪೊಡು.

² ದಾಯೆಗ್ ಪಂಡ, ದೇವದೂತೆರೆಡ್ದ್ ಪಂಡಿ ಪಾತೆರೊಲು ದೃಢಾದ್ ಇತ್ತಿನೆಡ್ದ್ ಅವೆನ್ ಮೀರ್‌ದ್ ಮಲ್ತಿ ಪ್ರತಿಯೊಂಜಿ ತಪ್ಪುಗ್ಲಾ, ಅಲಕ್ಷ ಮಲ್ಪುನಾಕುಲೆಗ್ಲಾ ನೀತಿ ಇತ್ತಿ ಶಿಕ್ಷೆ ತಿಕ್ಕುಂಡು.

³ ಇಂಚಿತ್ತಿ ಮಲ್ಲ ರಕ್ಷಣೆನ್ ನಮ ಅಲಕ್ಷ ಮಲ್ತ್ಂಡ ಎಂಚ ತಪ್ಪಾವೊನ್‌ಂಬ? ಉಂದು ಕರ್ತವಡ್ದ್ ಸುರುಡ್ದೇ ತೆರಿಪಾದಿನವು ಆದುಂಡು. ಆಯಡ್ದ್ ಕೇಂಡಿನಾಕುಲು ಅವೆನ್ ನಂಕ್ ದೃಢ ಮಲ್ತೆರ್.

⁴ ಬೊಕ್ಕ ದೇವೆರ್ ಅಕ್ಲೆನ ಕೈಡ್ದ್ ಗುರ್ತೊಲೆನ್ಲಾ ಕಾರ್ನಿಕೊಲೆನ್ಲಾ ತರತರತ ಬಲತ್ತ ಕಾರ್ಯೊಲೆನ್ಲಾ ನಡಪಾದ್ ಪರಿಶುದ್ಧಾತ್ಮನ ವರೊಕ್ಲೆನ್ ತನ ಚಿತ್ತೊಗು ಸರಿಯಾದ್ ಪಟ್ಟ್‌ದ್ ಕೊರಿನೆಡ್ದ್ ಐಕ್ ಸಾಕ್ಷಿ ಕೊರಿಯೆ.

ರಕ್ಷಣೆಗ್ ನಡಪಾವುನಾಯೆ

⁵ ಎಂಕುಲು ಪನ್ಪಿನವು ಬರಿಯೆರೆ ಉಪ್ಪು ಆ ಲೋಕೊನು ಆಯೆ ದೇವದೂತೆರೆಗ್ ಅಧೀನ ಮಲ್ತ್‌ದ್‌ಜೆ ಅತ್ತಾ.

⁶ ಶಾಸ್ತ್ರದ ಒಂಜಿ ಕಡೆಟ್ಟ್, “ನರಮಾನಿ ಎಂಚಿತ್ತಿನಾಯೆ? ಆಯನ್ ಈ ದಾಯೆ ನೆನೆಪೊಡು? ನರಮಾನಿ ಮಗೆ ಏತೆತ್ತಾಯೆ ಆಯನ್ ದಾಯೆಗ್ ಗೆನ್ಪೊಡು?

⁷ ಆಯನ್ ದೂತೆರೆಡ್ದ್ ಒಂತೆನೇ ಕಡಿಮೆ ಮಲ್ತ್‌ದತ್ತಾ, ಪ್ರಭಾವೊನ್ಲಾ ಮಾನೊನ್ಲಾ ಆಯಗ್ ಕಿರೀಟ ಆದ್ ದೀದ್,

⁸ ಮಾತೆನ್ಲಾ ಆಯನ ಕಾರ್‌ದಡಿಕ್ ಪಾಡ್ದ್ ಆಯಗ್ ಅಧೀನ ಮಲ್ತತ್ತಾ?” ಪಂಡ್ದ್ ಸ್ಪಷ್ಟಾದ್ ಪನ್ತ. ಆಯೆ ಮಾತೆನ್ಲಾ ನರಮಾನಿಗ್ ಅಧೀನ ಮಲ್ತ್‌ದೆ ಪನ್ಪಿನೆಟ್ ಆಯಗ್ ಒಂಜೆನಾಂಡಲಾ ಅಧೀನ ಮಲ್ಪಂದೆ ಬುಡ್ತುಜೆ ಪಂಡ್ದ್ ಪಂಡಿಲೆಕ್ಕ ಆಂಡ್. ಆಂಡ ಮಾತಲಾ ಆಯಗ್ ಅಧೀನ ಆದುಪ್ಪುನೆನ್ ನಮ ನನಲಾ ತೂತಿಜ.

⁹ ಆಂಡಲಾ ದೂತೆರೆಡ್ದ್ ಒಂತೆ ಕಡಿಮೆ ಮಲ್ಪಾಯಿ ಒರಿ ಅಂದ್ಂಡ ಯೇಸು, ಪ್ರಭಾವೊನ್ಲಾ ಮಾನೊನ್ಲಾ ಕಿರೀಟ ಆದ್ ಪಡೆದುಪ್ಪುನೆನ್ ನಮ ತೂಪ. ಆಯೆ ಸೈತಿನೆಡ್ದೇ ಮಾನ ಪ್ರಭಾವೊನು ಹೊಂದಿಯೆ. ಆಯೆ ದೇವೆರೆ ದಯೊಡ್ದು ಮಾತೆರೆಗಾದ್ ಮರಣೊನು ಅನುಭವ ಮಲ್ಪೊಡೇ ಆದಿತ್ತ್ಂಡ್.

¹⁰ ಸಮಸ್ತಲಾ ಏರೆಡ್ದ್ ಏರೆಗಾದ್ ಉಂಡಾಂಡ, ಆಯೆ ದಿಂಜ ಬಾಲೆಲೆನ್ ತನ ಮೈಮೆಗ್ ಸೇರಾವೊಡಂದ್‌ದ್ ಉಪ್ಪುನಗ, ಅಕ್ಲೆ ರಕ್ಷಣೆದ ಕರ್ತವನ್ ಕಷ್ಟೊಲೆಡ್ದ್ ಗೆಂದಾವುನವು ಆಯಗ್ ತಕ್ಕದವು ಆದಿತ್ತ್ಂಡ್.

¹¹ ದಾಯೆಗಂದ್ಂಡ ಪರಿಶುದ್ಧ ಮಲ್ಪುನಾಯಗ್ಲಾ ಪರಿಶುದ್ಧ ಆಪಿನ ಮಾತೆರೆಗ್ಲಾ ಒರಿಯೇ ಅಮ್ಮೆ ಉಲ್ಲೆ. ಈ ಕಾರಣೊಡ್ದು ಪರಿಶುದ್ಧ ಮಲ್ಪುನಾಯೆ ಪರಿಶುದ್ಧ ಆಪಿನಾಕುಲೆನ್ ಸಹೋದ್ರೆರ್ ಪನ್ಪಿನೆಕ್ಕ್ ನಾಚಿಗೆ ಮಲ್ಪುಜೆ.

¹² ಕೀರ್ತನೆಡ್ ಇಂಚ ಪನ್ಪೆ, “ನಿನ ಪುದರ್‌ದ ಮೈಮೆನ್ ಎನ ಸಹೋದ್ರೆರೆಗ್ ತೆರಿಪಾವೆ. ಯಾನ್ ಸಭೆತ ಮದ್ಯೊಡು ನಿಕ್ಕ್ ಸ್ತುತಿಪದೊಕುಲೆನ್ ಪನ್ಪೆ.”

¹³ “ಯಾನ್ ದೇವೆರೆ ಮಿತ್ತ್ ಭರವಸ ದೀಯಿನಾಯೆ ಆದುಲ್ಲೆ.” “ಇಂದಾ! ಯಾನ್ಲಾ ದೇವೆರ್ ಎಂಕ್ ಒದಗಾದ್ ಕೊರ್ತಿ ಬಾಲೆಲುಲಾ ಉಲ್ಲೆರ್,” ಅಂದ್‌ದ್ ಪನ್ಪೆ.

¹⁴ ಉಂದತ್ತಂದೆ ಜೋಕುಲು ನೆತ್ತೆರ್ ಮಾಸ ಇತ್ತಿನ ನರಮಾನಿ ಆದುಪ್ಪುನೆಡ್ದ್ ಯೇಸುಲಾ ಅಕ್ಲೆಲೆಕ್ಕನೇ ಆಯೆ. ತನ ಮರಣೊಡ್ದೇ ಮರಣಾಧಿಕಾರಿನ್ ಅಂದ್ಂಡ ಸೈತಾನನ್ ನಾಶ ಮಲ್ತೆ.

¹⁵ ಮರಣದ ಪೋಡಿಗೆದ ದಿಸೆಡ್ದ್ ಗುಲಾಮತನೊಟು ಇತ್ತಿನಾಕುಲೆನ್ ಬುಡ್ಪಾವರೆಗ್ ಅಕ್ಲೆ ಲೆಕ್ಕ ನರಮಾನಿ ಆಯೆ.

¹⁶ ನಿಜಾದ್ ಆಯೆ ದೂತೆರೆಗ್ ಸಹಾಯ ಮಲ್ಪೆರೆಗ್ ಅತ್ತ್, ಅಬ್ರಹಾಮುನ ಸಂತಾನೊಗು ಸಹಾಯ ಮಲ್ಪೆರೆಗಾದ್ ಬೈದಿನಾಯೆ ಅತ್ತಾ.

¹⁷ ಅಂಚಾಯಿನೆಡ್ದ್ ಆಯೆ ಮಾತ ಸಂಗತಿಡ್ ತನ ಸಹೋದ್ರೆರೆಗ್ ಸಮಾದುಪ್ಪುನ ಅಗತ್ಯ ಇತ್ತ್ಂಡ್. ಇಂಚ ಆಯೆ ನರಮಾನಿಲೆನ ಪಾಪೊಲೆನ್ ಮಾಜಾವುನೆಕ್ಕಾದ್ ದೇವೆರೆ ಕಾರ್ಯೊಲೆಡ್ ಕನಿಕರಲಾ ನಂಬಿಕೆಲಾ ಇತ್ತಿ ಪ್ರಧಾನಯಾಜಕೆ ಆಯೆ.

¹⁸ ತಾನೇ ಸ್ವತಃ ಶೋಧನೆ ಶ್ರಮೆಲೆನ್ ಅನುಭವ ಮಲ್ತಿನೆಡ್ದ್ ನಂಕ್ ಶೋಧನೆ ಆನಗ ಸಹಾಯ ಮಲ್ಪೆರೆಗ್ ಸಮರ್ಥೆ ಆದುಲ್ಲೆ.