ಇಬ್ರಿಯೆರೆಗ್ 13 - ಪೊಸ ಒಡಂಬಡಿಕೆ

ದೇವೆರೆನ್ ಎಂಚ ಮೆಚ್ಚಾವೊಲಿ

¹ ಸಹೋದ್ರ ಪ್ರೀತಿ ನಿಲೆ ಆದುಪ್ಪಡ್.

² ಬಿನ್ನೆರೆನ್ ಸುದಾರಿಪುನೆನ್ ಮದತ್ ಬುಡಡೆ. ಅವೆನ್ ಮಲ್ಪುನೆಟ್ಟ್ ಕೆಲೆವೆರ್ ತೆರಿಯಂದೆ ದೂತೆರೆನ್ಲಾ ಸುದಾರಿತ್‌ದೆರ್.

³ ಸೆರೆಮನೆಟ್ಟುಪ್ಪುನಾಕುಲೆ ಒಟ್ಟುಗು ನಿಕುಲುಲಾ ಸೆರೆಮನೆಟ್ ಉಲ್ಲರ್ ಇನ್ಪಿಲೆಕ್ಕ ತರಕೊನ್ಲೆ. ನಿಕುಲು ನನಲಾ ಶರೀರೊಡು ಉಪ್ಪುನಾಕುಲು ನಿಕ್ಲೆಗ್ಲಾ ಅನ್ಯಾಯ ಆವು ಅಂದ್‌ದ್ ತೆರಿದ್ ಅನ್ಯಾಯ ಅನುಭವ ಮಲ್ಪುನಾಕುಲೆನ್ ನೆನೆಪು ಮಲ್ತೊನ್ಲೆ.

⁴ ಮದ್ಮೆನ್ ಮಾನ್ಯದವು ಪಂಡ್ದ್ ಎನ್ನೊಡು. ಕಂಡನಿ ಬೊಡೆದಿನ ಸಮ್ಮಂಧೊಲು ಮೈಲೆದಾಂತಿನವು ಆದುಪ್ಪೊಡು. ದಾಯೆಗ್ ಪಂಡ ನಡತೆ ಸರಿದಾಂತಿನಾಕುಲೆಗ್ಲಾ ವ್ಯಭಿಚಾರಿಲೆಗ್ಲಾ ದೇವೆರ್ ನ್ಯಾಯತೀರ್ಪು ಕೊರುವೆ ಅಂದ್‌ದ್ ತೆರಿಯೊನ್ಲೆ.

⁵ ಕಾಸ್‌ದಾಸೆ ಇಜ್ಜಾಂದಿನಕುಲಾದುಪ್ಪುಲೆ. ನಿಕ್ಲೆಗ್ ಇತ್ತಿನೆಟ್ಟ್ ತೃಪ್ತಿ ಪಡೆಲೆ. “ಯಾನ್ ನಿಕ್ಲೆನ್ ಏಪಲಾ ಕೈ ಬುಡಯೆ, ಏಪಲಾ ಬುಡ್ದು ಪಾಡಯೆ,” ಅಂದ್‌ದ್ ದೇವೆರ್ ತಾನೇ ಪನ್ತೆ.

⁶ ಅಂಚಾದ್ “ಕರ್ತವೆ, ಎನ ಸಹಾಯಕೆ, ಪೋಡಿಯಯೆ. ನರಮಾನಿ ಎಂಕ್ ದಾನೆ ಮಲ್ಪೆ?” ಅಂದ್‌ದ್ ಧೈರ್ಯೊಡು ಪನೊಲಿ.

⁷ ನಿಕ್ಲೆಗ್‌ ದೇವೆರೆ ಪಾತೆರೊನು ತೆರಿಪಾಯಿನ ಸಭೆತ ನಾಯಕೆರೆನ್ ನೆನೆತೊನ್ಲೆ. ಅಕುಲು ವಾ ರೀತಿಡ್ ಬದ್‌ಕ್‌ದ್ ಪ್ರಾಣ ಬುಡಿಯೆರ್ ಪನ್ಪಿನೆನ್ ಆಲೋಚನೆ ಮಲ್ಪುಲೆ. ಅಕ್ಲೆನ ನಂಬಿಕೆನ್ ಮಾದ್ರಿಯಾದ್ ದೆತ್ತೊನ್ಲೆ.

⁸ ಯೇಸು ಕ್ರಿಸ್ತೆ ಕೋಡೆ ಇತ್ತಿಲೆಕ್ಕನೆ ಇನಿಲಾ ಉಲ್ಲೆ, ಏಪೊಗ್ಲಾ ಅಂಚನೇ ಉಪ್ಪುವೆ.

⁹ ನಾನಾ ತರತ ಬೋಧನೆಲೆ ಸುಳಿಕ್ ತಿಕ್ಕ್‌ದ್ ಬೂರಡೆ. ದೇವೆರೆ ದಯೊನು ಪಡೆವೊಂದು ಉಡಲ್‌ನ್ ಗಟ್ಟಿ ಮಲ್ತೊನವು ಎಡ್ಡೆನೇ. ತಿನ್ಪಿನ ತಿನಸ್‌ಲೆನ್ ವಿಶೇಷ ಮಲ್ಪಡೆ. ತಿನ್ಪಿನ ತಿನಸ್‌ಲೆನ್ ವಿಶೇಷ ಮಲ್ತಿನಾಕುಲು ವಾ ಪ್ರಯೋಜನಲಾ ಪಡೆಯಿಜೆರ್.

¹⁰ ಎಂಕುಲೆಗೊಂಜಿ ಬಲಿಪೀಠ ಉಂಡು, ಈ ಬಲಿಪೀಠದ ತಿನಸ್‌ಲೆನ್ ತಿನಿಯೆರೆಗ್ ಗುಡಾರೊಡು ಸೇವೆ ಮಲ್ಪುನಾಕುಲೆಗ್ ಹಕ್ಕ್ ಇಜ್ಜಿ.

¹¹ ದಾಯೆಗಂದ್ಂಡ, ಪಾಪ ಪರಿಹಾರೊಗಾದ್ ಪಶುತ ನೆತ್ತೆರ್‌ನ್ ಪ್ರಧಾನಯಾಜಕೆ ಪರಿಶುದ್ಧ ಜಾಗ್‌ಗ್ ಕೊನುಪೋದು ಬೊಕ್ಕ ಆ ಪಶುತ ಪುಣೊನು ದಂಡ್‌ಡ್ದ್ ಪಿದಯಿ ಪೊತ್ತಾದ್ ಬುಡ್ಪುಂಡು.

¹² ಐತ ಲೆಕ್ಕನೆ ಯೇಸುಲಾ ತನ ಸ್ವಂತ ನೆತ್ತೆರೆಡ್ದ್ ತನ ಜನೊಕುಲೆನ್ ಪರಿಶುದ್ಧ ಮಲ್ಪೆರೆಗಾದ್ ಪಟ್ಟಣದ ಪಿದಯಿ ಸೈತೆ.

¹³ ಅಂಚಾಯಿನೆಡ್ದ್ ನಮ ಆಯಡ್ದಾದ್ ಬರ್ಪಿನ ಅವಮಾನೊನು ತಾಳೊಂದು ಅಕ್ಲೆ ಕೂಟೊಡ್ದು ಪಿದಾಡ್ದ್ ಆಯ ಕೈತಲ್‌ಗ್ ಪೋಯಿ.

¹⁴ ದಾಯೆಗಂದ್ಂಡ ಲೋಕೊಡು ನಂಕ್ ಶಾಶ್ವತ ಪಟ್ಟಣ ಇಜ್ಜಿ. ನಮ ನನ ದುಂಬಗ್ ಆಪಿ ಪೇಂಟೆನ್‌ ಕಾತೊಂದುಲ್ಲ.

¹⁵ ಅಂಚಾಯಿನೆಡ್ದ್ ಆಯಡ್ದ್ ದೇವೆರೆಗ್ ಸುಗಿಪುನ ಬಲಿನ್ ಬುಡಂದೆ ಅರ್ಪಣೆ ಮಲ್ಪುಗ. ಆಯೆ ಕರ್ತವೆ ಅಂದ್‌ದ್ ನಮ ಬಾಯಿಡ್ದ್ ಅರಿಕೆ ಮಲ್ಪುನವೇ ನಮ ಕೊರ್ಪಿನ ಫಲ ಆದುಂಡು.

¹⁶ ಉಂದತ್ತಂದೆ ಪರೋಪಕಾರೊನ್ಲಾ ದಾನಧರ್ಮ ಮಲ್ಪುನೆನ್ಲಾ ಮದಪಡೆ, ಉಂದು ದೇವೆರ್ ಮೆಚ್ಚುನ ಬಲಿ.

¹⁷ ನಿಕ್ಲೆ ಸಭಾನಾಯಕೆರೆ ಪಾತೆರೊನು ಕೇನ್ಲೆ, ಅಕ್ಲೆಗ್ ಅಧೀನೆರಾದುಪ್ಪುಲೆ. ಅಕುಲು ನಿಕ್ಲೆನ ಆತ್ಮೊಲೆನ್ ಕಾಪುನಾಕುಲಾದ್ ನಿಕ್ಲೆ ಸಂಗತಿಡ್ ಲೆಖ್ಖ ಕೊರ್ಪಿನಕುಲಾದುಲ್ಲೆರ್. ಅಕುಲು ಬೇಜಾರ್ ಮಲ್ಪಂದೆ ಸಂತೋಷೊಡು ಉಂದೆನ್ ಮಲ್ಪುಲೆಕ್ಕ ತೂವೊನ್ಲೆ. ಅಕುಲು ಬೇಜಾರ್‌ಡ್ ಉಪ್ಪುನವು ನಿಕ್ಲೆಗ್ ಪ್ರಯೋಜನ ಆಪಿನವು ಅತ್ತ್.

¹⁸ ಎಂಕ್ಲೆಗಾದ್ ಪ್ರಾರ್ಥನೆ ಮಲ್ಪುಲೆ. ಎಂಕುಲು ಮಾತ ವಿಚಾರೊಲೆಡ್ ಸಜ್ಜನೆರಾದ್ ನಡಪೊಡು ಪಂಡ್ದ್ ಅಪೇಕ್ಷ ಮಲ್ಪುನಾಕುಲಾದ್ ಎಂಕುಲೆ ಉಡಲ್‌ಡ್ ಎಡ್ಡೆ ಸಾಕ್ಷಿ ಪಡೆಯೊಂದ ಪಂಡ್ದ್ ನಿಚ್ಚಯ ಮಲ್ತೊಂದ.

¹⁹ ಎಂಕ್ಲೆಗಾದ್ ಪ್ರಾರ್ಥನೆ ಮಲ್ಪೊಡು ಅಂದ್‌ದ್ ನಿಕ್ಲೆಡ ದಿಂಜ ನಟ್ಟೊನ್ವೆ, ದಾಯೆಗಂದ್ಂಡ ನಿಕ್ಲೆನ ಪ್ರಾರ್ಥನೆಡ್ದ್ ಯಾನ್ ಆಯಿನಾತ್ ಬೇಗ ನಿಕ್ಲೆ ಕೈತಲ್‌ ಕುಡೊರ ಬರುವೆ.

ಕಡೆತ ಪ್ರಾರ್ಥನೆ

^20-21 ಸಭೆ ಪನ್ಪಿ ಕುರಿಕುಲೆ ಮಲ್ಲ ಕುರುಬೆ ಆದುಪ್ಪು ಯೇಸು ಕ್ರಿಸ್ತೆ ನಿತ್ಯವಾಯಿನ ಒಡಂಬಡಿಕೆನ್ ನಿಚ್ಚಯ ಮಲ್ಪೆರೆಗಾದ್ ತನ ನೆತ್ತೆರ್‌ನ್ ಗುತ್ತುದೆ. ಸಮಾಧಾನದ ದೇವೆರ್ ನಮ ಕರ್ತವೆ ಆದುಪ್ಪು ಯೇಸುನು ಸೈತಿನಾಕುಲೆಡ್ದ್ ಜೀವೊಡು ಲಕ್ಕಾಯೆ. ನಿಕುಲು ಇಂಚಿತ್ತಿ ದೇವೆರೆ ಚಿತ್ತೊನು ಮಲ್ಪುಲೆಕ್ಕ ಮಾತ ಎಡ್ಡೆ ಕಾರ್ಯೊಲೆಗ್ ಬೋಡಾಪಿ ಅಗತ್ಯೊಲೆನ್ ನಿಕ್ಲೆಗ್ ಕೊರಡ್. ಯೇಸು ಕ್ರಿಸ್ತಡ್ ತನ್ಕ್ ಸರಿ ತೋಜುನೆನ್ ನಮಡ ನಡಪಾವಡ್. ಆಯಗ್ ಏನಿತ್ಯೇನಿಗ್ಲಾ ಮೈಮೆ ಉಂಡಾವಡ್. ಆಮೆನ್.

ಕಡೆತ ಪಾತೆರೊಲು

²² ಸಹೋದ್ರೆರೇ, ಈ ಎಚ್ಚರಿಕೆದ ಪಾತೆರೊನು ಸಹಿಸೊನೊಡು ಪಂಡ್ದ್ ನಿಕ್ಲೆಡ ಕೇಂಡೊನ್ವೆ, ನಿಕ್ಲೆಗ್ ಒಂತೆಡ್ ಬರೆತೆ.

²³ ನಮ ಸಹೋದರೆ ಆಯಿ ತಿಮೋಥಿಗ್ ಬುಡುಗಡೆ ಆಂಡ್ ಪನ್ಪಿನವು ನಿಕ್ಲೆಗ್ ತೆರಿದುಪ್ಪಡ್, ಆಯೆ ಬೇಗ ಬತ್ತೆಡ ಯಾನ್ಲಾ ಆಯಡೊಪ್ಪ ಬತ್ತ್‌ದ್ ನಿಕ್ಲೆನ್ ತೂಪೆ.

²⁴ ನಿಕ್ಲೆನ ಸಭೆತ ಮಾತ ನಾಯಕೆರೆಗ್ಲಾ ಮಾತ ದೇವಜನೊಕುಲೆಗ್ಲಾ ವಂದನೆ ತೆರಿಪಾಲೆ. ಇತಾಲ್ಯ ದೇಶೊಡ್ದು ಬೈದಿನಾಕುಲು ನಿಕ್ಲೆಗ್ ವಂದನೆ ಪನ್ಪೆರ್.

²⁵ ದೇವೆರೆ ದಯ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್.