ಇಬ್ರಿಯೆರೆಗ್ 11 - ಪೊಸ ಒಡಂಬಡಿಕೆ

ನಂಬಿಕೆ

¹ ನಂಬಿಕೆ ನಮ ನಿರೀಕ್ಷೆ ಮಲ್ಪುನೆತ ಸಂಗತಿಡ್ ಭರವಸೊಡು ಉಪ್ಪುನವುಲಾ ಕಣ್ಣ್‌ಗ್ ತೋಜಂದಿನೆನ್ ನಿಜ ಅಂದ್‌ದ್ ತೆರಿಯೊನುನವುಲಾ ಆದುಂಡು.

² ನಮ ಹಿರಿಯಾಕುಲು ನಂಬಿಕೆಡ್ದೇ ದೇವೆರೆನ ಎಡ್ಡೆ ಪುದರ್‌ನ್ ಪಡೆಯೊಂಡೆರ್.

³ ಈ ಲೋಕ ದೇವೆರೆ ಪಾತೆರೊಡ್ದು ಉಂಡಾಯಿನವು ಪಂಡ್ದ್ ನಂಬಿಕೆಡ್ದೇ ಎಂಕುಲು ತೆರಿಯೊಂದು ತೋಜುನ ಈ ಲೋಕ ತೂಪಾಠಿಕೆದ ವಸ್ತುಲೆಡ್ದ್ ಉಂಡಾತಿಜಿ ಅಂದ್‌ದ್ ತೆರಿಯೊನುವ.

⁴ ನಂಬಿಕೆಡ್ದಾದೇ ಹೇಬೆಲ್ ಕಾಯಿನನ ಯಜ್ಞೊಡ್ದು ಎಡ್ಡೆಂತಿ ಯಜ್ಞೊನು ದೇವೆರೆಗ್ ಅರ್ಪಣೆ ಮಲ್ತೆ. ದೇವೆರ್ ಆಯ ಕಾಣಿಕೆನ್ ಮೆಚ್ಚಿನೆಡ್ದ್ ನೀತಿವಂತೆ ಪನ್ಪಿ ಸಾಕ್ಷಿ ಹೊಂದಿಯೆ. ಆಯೆ ಸೈತ್ ಪೋಯೆಡಲಾ ಆಯ ನಂಬಿಕೆ ನನಲಾ ಪಾತೆರುಂಡು.

⁵ ಹನೋಕೆ ಮರಣೊನು ಅನುಭವ ಮಲ್ಪಂದೆ ಮಿತ್ತ್ ಪೋಯಿನಿ ನಂಬಿಕೆಡ್ದಾದೇ, ದೇವೆರ್ ಆಯನ್ ದೆತ್ತೊಂದು ಪೋಯಿನೆಡ್ದ್ ಆಯೆ ಏರೆಗ್ಲಾ ತಿಕ್ಕಿಜೆ. ಆಯೆ ದೆತ್ತೊಂದು ಪೋಪಿನೆಡ್ದ್ ದುಂಬೇ ಆಯೆ ದೇವೆರೆಗ್ ಮೆಚ್ಚಿಗೆ ಆದಿತ್ತಿನಾಯೆ ಅಂದ್‌ದ್ ಸಾಕ್ಷಿ ಉಂಡು.

⁶ ಆಂಡ ನಂಬಿಕೆದಾಂತೆ ದೇವೆರೆನ್ ಮೆಚ್ಚಾವುನವು ಅಸಾದ್ಯದವು. ದೇವೆರೆ ಕೈತಲ್‌ ಬರ್ಪಿನಾಯೆ ದೇವೆರ್ ಉಲ್ಲೆ ಬೊಕ್ಕ ತನನ್ ನಾಡುನಾಕುಲೆಗ್ ಪ್ರತಿಫಲೊನು ಕೊರ್ಪೆ ಪಂಡ್ದ್ ನಂಬುನವು ಅಗತ್ಯ.

⁷ ನಂಬಿಕೆಡ್ದಾದೇ ನೋಹೆ ಅದಮುಟ್ಟ ತೋಜಂದಿನ ಸಂಗತಿಲೆ ಬಗೆಟ್ ದೇವೆರೆ ಪಾತೆರೊನು ಪಡೆದ್ ಭಯ ಭಕ್ತಿ ಇತ್ತಿನಾಯೆ ಆದ್ ತನ ಇಲ್ಲದಾಕುಲೆನ್ ಒರಿಪಾವೆರೆಗಾದ್ ಮಲ್ಲ ಕಪ್ಪಲ್‌ನ್ ಕಟ್ಟ್‌ದ್ ತಯಾರ್ ಮಲ್ತೆ. ಅಂಚಾಯಿನೆಡ್ದ್ ಆಯೆ ಲೋಕದಾಕುಲೆನ್ ತೀರ್ಪುಗು ತಕ್ಕದಾಕುಲು ಪಂಡ್ದ್ ನಿಗಂಟ್ ಮಲ್ತೊಂದು ನಂಬಿಕೆದ ಫಲವಾಯಿನ ನೀತಿಗ್ ಹಕ್ಕ್‌ದಾರೆ ಆಯೆ.

ಅಬ್ರಹಾಮುನ ನಂಬಿಕೆ

⁸ ನಂಬಿಕೆಡ್ದಾದೇ, ಅಬ್ರಹಾಮು ಲೆಪ್ಪು ಕೇಂಡಿ ಕೂಡ್ಲೆ ಲೆತ್ತಿನಾಯನ ಪಾತೆರೊನು ಕೇಂಡ್ದ್ ತಾನ್ ಹಕ್ಕ್‌ಡ್ ಪಡೆಯೊಡಾಯಿ ಜಾಗ್‌ಗ್ ಪಿದಾಡ್ದ್ ಪೋಯೆ. ತಾನ್ ಪೋವೊಡಾಯಿನ ಜಾಗ್ ಒವು ಪಂಡ್ದ್ ತೆರಿಯಂದೆ ಪೋಯೆ.

⁹ ನಂಬಿಕೆಡ್ದಾದೇ, ಆಯೆ ವಾಗ್ದಾನ ಮಲ್ತ್‌ದಿನ ದೇಶೊಗು ಬತ್ತಿನಪಗ ಅಲ್ಪ ಬಾಕಿ ದೇಶೊಡು ಇತ್ತಿನಾಯಲೆಕ್ಕ ಡೇರೆಲೆಡ್ ಇತ್ತೊಂದು ಒಂಜಿ ಪ್ರವಾಸಿಲೆಕ್ಕನೇ ಬದ್‌ಕಿಯೆ. ಅವ್ವೇ ವಾಗ್ದಾನೊಗು ಪಾಲುದಾರೆರ್ ಆದುಪ್ಪುನ ಇಸಾಕೆಲಾ ಯಾಕೋಬೆಲಾ ಆಯ ಲೆಕ್ಕನೆ ಡೇರೆಲೆಡ್ ವಾಸ ಮಲ್ತೆರ್.

¹⁰ ದಾಯೆಗಂದ್ಂಡ ಆಯೆ ಸ್ಥಿರವಾಯಿನ ಅಡಿಪಾಯೊಲಿತ್ತಿನ ಪೇಂಟೆನ್‌ ಪಂಡ್ಂಡ ದೇವೆರ್ ತಯಾರ್ ಮಲ್ತಿ ಪೇಂಟೆನ್‌ ಎದುರು ತೂವೊಂದಿತ್ತೆ.

¹¹ ಉಂದತ್ತಂದೆ ಸಾರಲಾ ವಾಗ್ದಾನ ಮಲ್ತಿನಾಯನ್ ನಂಬಿಕೆಗ್ ತಕ್ಕದಾಯೆ ಅಂದ್‌ದ್ ಎನ್ನ್‌ದ್ ತಾನ್ ಪ್ರಾಯ ಕರಿದಿನಾಲ್ ಆದಿತ್ತ್‌ಂಡಲಾ ನಂಬಿಕೆಡ್ದೇ ಬಂಜಿನಾಲ್ ಆವೆರೆ ಶಕ್ತಿನ್ ಪಡೆವೊಂಡಲ್.

¹² ಅಂಚಾಯಿನೆಡ್ದ್ ಸೈಪಿನ ಪ್ರಾಯ ಆತಿನ ಒರಿಯಡ್ದ್ ಬಾನದ ಬೊಳ್ಳಿಲೆ ಲೆಕ್ಕಲಾ ಕಡಲ್ದ ಬರಿತ ಪೊಯ್ಯೆದ ಲೆಕ್ಕಲಾ ಲೆಕ್ಕದಾಂತಿನಾತ್ ಸಂತಾನದ ಜೋಕುಲು ಪುಟ್ಟಿಯೆರ್.

¹³ ಮೊಕುಲು ಮಾತೆರ್ಲಾ ವಾಗ್ದಾನದ ಫಲೊಕ್ಲೆನ್ ಪಡೆವಂದೆ ಐಕ್ಲೆನ್ ದೂರೊಡ್ದು ತೂದು ಸಂತೋಷೊಡು ಸೊಲ್ಮೆ ಸಂದಾದ್ ನಂಬಿಕೆ ಇತ್ತಿನಕುಲಾದ್ ಸೈತ್ ಪೋಯೆರ್. ತನ್ಕುಲು ಭೂಮಿದ ಮಿತ್ತ್ ಪರದೇಶಿದಾಕುಲುಲಾ ಪ್ರವಾಸಿಲುಲಾ ಆದುಲ್ಲ ಅಂದ್‌ದ್ ಒಪ್ಪಿಯೊಂಡೆರ್.

¹⁴ ಇಂಚಿತ್ತಿನ ಪಾತೆರೊಲೆನ್ ಪಾತೆರುನಾಕುಲು ತನ್ಕುಲು ಸ್ವದೇಶೊನು ನಾಡುನಾಕುಲು ಪನ್ಪಿ ಅರ್ಥೊನು ತೋಜಾವೆರ್.

¹⁵ ತನ್ಕುಲು ಪಿದಾಡ್ದ್ ಬೈದಿ ದೇಶದ ಮಿತ್ತ್ ಮನಸ್ ದೀತಿನಾಕುಲು ಆದಿತ್ತ್ಂಡ ಪಿರ ಅಡೆಗ್ ಪೋಪಿನೆಕ್ಕ್ ಅಕ್ಲೆಗ್ ಏಪಲಾ ಅವಕಾಸ ಇತ್ತ್ಂಡ್.

¹⁶ ಆಂಡ ಅಕುಲು ಪರಲೋಕ ಇನ್ಪಿ ಎಡ್ಡೆ ದೇಶೊನು ಎದುರು ತೂಪಿನಾಕುಲು ಆದುಪ್ಪುನೆಡ್ದ್ ದೇವೆರ್ ಅಕ್ಲೆನ ದೇವೆರ್ ಪಂಡ್ದ್ ಪಂಡೊನಿಯೆರೆ ನಾಚಿಗೆ ಮಲ್ಪಂದೆ ಅಕ್ಲೆಗಾದ್ ಪೇಂಟೆನ್‌ ತಯಾರ್ ಮಲ್ತೆ.

^17-18 ಅಬ್ರಹಾಮುನು ಶೋಧಿಯುನಗ ಆಯೆ ನಂಬಿಕೆಡ್ದೇ ಇಸಾಕನ್ ಅರ್ಪಣೆ ಮಲ್ತೆ. ಇಸಾಕೆ ಆಯನ ಒರಿಯೇ ಮಗೆ ಆದಿತ್ತ್‌ಂಡಲಾ ಬೊಕ್ಕ ಇಸಾಕುಡ್ದು ಪುಟ್ಟುನಾಕುಲೇ ನಿನ ಸಂತಾನದಾಕುಲು ಪಂಡೊನ್ವೆರ್ ಅಂದ್‌ದ್ ದೇವೆರ್ ಆಯಗ್ ಪನ್ತ್ಂಡಲಾ ಆ ವಾಗ್ದಾನೊಲೆನ್ ಪಡೆಯಿನಾಯೆ ಆದ್ ಆ ಒರಿಯೇ ಮಗನ್ ಬಲಿ ಅರ್ಪಣೆ ಮಲ್ಪೆರೆ ಇತ್ತೆ.

¹⁹ ತನ ಮಗೆ ಸೈತ್ಂಡಲಾ ದೇವೆರ್ ಆಯನ್ ಬದ್‌ಕಾಯೆರೆ ಸಾದ್ಯದಾಯೆ ಅಂದ್‌ದ್ ತೆರಿಯೊಂಡೆ. ಬೊಕ್ಕ ಸೈತಿನಾಕುಲೆಡ್ದ್ ಇಸಾಕ್‌ನ್ ಕುಡ ಬದ್‌ಕಾದ್ ಬತ್ತಿನಾಯಲೆಕ್ಕ ಪಡೆಯೆ.

²⁰ ನಂಬಿಕೆಡ್ದೇ ಇಸಾಕೆ ಯಾಕೋಬನ್ಲಾ ಏಸಾವನ್ಲಾ ಆಶೀರ್ವದಿಪುನಗ ದುಂಬು ಆವೊಡ್ಡಿತ್ತಿನ ಸಂಗತಿಲೆನ್ ತೆರಿಪಾಯೆ.

²¹ ಯಾಕೋಬು ತಾನ್ ಸೈಯೊಂದುಪ್ಪುನಗ ನಂಬಿಕೆಡ್ದೇ ಯೋಸೇಫುನ ರಡ್ಡ್ ಆಣ್ ಬಾಲೆಲೆಗ್ ಆಶೀರ್ವಾದ ಕೊರಿಯೆ. ತನ ದಂಟೆದ ಮಿತ್ತ್ ಬಗ್ಗ್‌ದ್ ದೇವೆರೆಗ್ ಸೊಲ್ಮೆ ಸಂದಾಯೆ.

²² ಯೋಸೇಫೆ ಸೈಪಿನೆಡ್ದ್ ದುಂಬು ಇಸ್ರಾಯೇಲ್ಯೆರ್ ಐಗುಪ್ತ ದೇಶೊಡ್ದು ಪಿದಾಡುನೆನ್ ನಂಬಿಕೆಡೇ ಪಾತೆರ್‌ದ್ ತನ ಪುಣೊನು ದೆತ್ತೊಂದು ಪೋಪಿನ ಸಂಗತಿಡ್ ಅಪ್ಪಣೆ ಕೊರಿಯೆ.

²³ ಮೋಶೆ ಪುಟ್ಟಿನಪಗ ಆಯನ ಅಪ್ಪೆಅಮ್ಮೆ ಬಾಲೆ ಪೊರ್ಲುಂಡು ಅಂದ್‌ದ್ ತೂದು ಅರಸು ಅಪ್ಪಣೆಗ್ ಪೋಡಿಯಂದೆ ಆಯನ್ ನಂಬಿಕೆಡೇ ಮೂಜಿ ತಿಂಗೊಲು ದೆಂಗಾದ್ ದೀಯೆರ್.

²⁴ ಮೋಶೆ ಮಲ್ಲಾಯಿ ಬೊಕ್ಕ ಫರೋಹನ ಮಗಲೆನ ಮಗೆ ಅಂದ್‌ದ್ ಪಂಡೊನ್ನವು ಬೊಡ್ಚಿ ಪಂಡಿನಿ ನಂಬಿಕೆಡ್ದೇ.

²⁵ ಒಂತೆ ಕಾಲ ಪಾಪ ಭೋಗೊನು ಅನುಭವ ಮಲ್ಪುನೆಡ್ದ್ ದೇವೆರೆ ಜನೊಕುಲೆಡೊಪ್ಪ ಕಷ್ಟೊಲೆನ್ ಅನುಭವಿಪುನವು ಎಡ್ಡೆಂದ್‌ದ್ ತೀರ್ಮಾನ ಮಲ್ತೊಂಡೆ.

²⁶ ಐಗುಪ್ತ ದೇಶದ ಮಾತ ಐಶ್ವರ್ಯೊಡ್ದುಲಾ ಕ್ರಿಸ್ತಡ್ದ್ ಉಂಡಾಪಿ ನಿಂದೆಲೇ ಎಡ್ಡೆಂತಿನವು ಅಂದ್‌ದ್ ಎನ್ನೊಂಡೆ. ದಾಯೆಗಂದ್ಂಡ ಬರ್ಪಿನ ಪ್ರತಿಫಲದ ಮಿತ್ತ್ ಕಣ್ಣ್ ದೀದಿತ್ತೆ.

²⁷ ಆಯೆ ಅರಸುನ ಕೋಪೊಗು ಪೋಡಿಯಂದೆ ಐಗುಪ್ತ ದೇಶೊನು ಬುಡ್ದು ಪೋಯಿನವು ನಂಬಿಕೆಡ್ದೇ. ಆಯೆ ಕಣ್ಣ್‌ಗ್ ತೋಜಂದಿನಾಯನ್ ತೂಪೆನಾ ದಾನ್ನ ಪನ್ಪಿಲೆಕ್ಕ ಸ್ಥಿರೊಟ್ಟಿತ್ತೆ.

²⁸ ಸುರುತ್ತ ಬಾಲೆಲೆನ್ ಕೆರ್ಪುನಾಯೆ ಇಸ್ರಾಯೇಲ್ಯೆರೆನ್ ಮುಟ್ಟಂದಿ ಲೆಕ್ಕ ಆಯೆ ಪಸ್ಕ ಇನ್ಪಿ ವಣಸ್‌ನ್ಲಾ ನೆತ್ತೆರ್ ತಲಿಪುನಾ ಆಚಾರೊನ್ಲಾ ನೇಮಕ ಮಲ್ತಿನಿ ನಂಬಿಕೆಡ್ದೇ.

²⁹ ನಂಬಿಕೆಡ್ದೇ ಇಸ್ರಾಯೇಲ್ಯೆರ್ ಕೆಂಪು ಕಡಲ್‌ನ್ ನುಂಗು ಪೋತಿ ನೆಲತ್ತ ಮಿತ್ತ್ ನಡಪುಲೆಕ್ಕ ದಾಂಟಿಯೆರ್. ಆಂಡ ಐಗುಪ್ತ್ಯೆರ್ ಬೆರಿಯೆ ಬತ್ತ್‌ದ್ ಮಾತೆರ್ಲಾ ಮುರ್ಕುದು ಸೈತೆರ್.

³⁰ ನಂಬಿಕೆಡ್ದೇ ಇಸ್ರಾಯೇಲ್ಯೆರ್ ಏಳ್ ದಿನ ಮುಟ್ಟ ಯೆರಿಕೊ ಪಟ್ಟಣದ ಗೋಡೆಲೆನ್ ಸುತ್ತು ಬನ್ನಗ ಗೋಡೆಲು ಬೂರ್ದು ಪೋಂಡು.

³¹ ನಂಬಿಕೆಡ್ದೇ, ರಹಾಬ್ ಪನ್ಪಿ ಸೂಳೆ ಗೂಢಾಚಾರೆರೆನ್ ಸಮಾಧಾನೊಡು ಸೇರಾವೊಂದು ನಂಬಂದಿನಾಕುಲೆಡೊಪ್ಪ ನಾಶ ಆದುಪ್ಪುಜಲ್.

ಬೇತೆ ಎಡ್ಡೆ ಜನೊಕುಲೆನ ನಂಬಿಕೆ

³² ನನಲಾ ದಾನೆ ಪನೊಡು? ಗಿಡಿಯೋನೆ ಬಾರಾಕೆ ಸಂಸೋನೆ ಎಪ್ತಾಹೆ, ದಾವೀದೆ, ಸಮುವೇಲೆ ಇನ್ಪಿನಾಕುಲೆನ ಚರಿತ್ರೆನ್ಲಾ ಪ್ರವಾದಿಲೆನ ಚರಿತ್ರೆನ್ಲಾ ಬುಡ್ಪಾದ್ ಪನೊಡಾಂಡ ಎಂಕ್ ಸಮಯ ಯಾವಂದ್.

³³ ನಂಬಿಕೆಡ್ದೇ ಅಕುಲು ರಾಜ್ಯೊಲೆನ್ ಜೈಸಿಯೆರ್, ನೀತಿಡ್ ಆಳಿಯೆರ್, ವಾಗ್ದಾನೊಲೆನ್ ಪಡೆಯೊಂಡೆರ್. ಸಿಮ್ಮೊಲೆ ಬಾಯಿ ಕಟ್ಟಿಯೆರ್.

³⁴ ತೂತ ಬಲೊನು ತೆಕ್ಕಾಯೆರ್; ಕತ್ತಿದ ಬಾಯಿಗ್ ತಪ್ಪಾವೊಂಡೆರ್, ಬಲದಾಂತಿನಾಕುಲಾದ್ ಬಲತ್ತಾಕುಲು ಆಯೆರ್. ಲಡಾಯಿಡ್ ಗೆಂದುನಾಕುಲಾಯೆರ್, ಬಾಕಿದಾಕುಲೆನ ದಂಡ್‌ಲೆನ್ ಗಿಡ್ತ್ ಬುಡಿಯೆರ್.

³⁵ ಪೊಂಜೊವುಲು ಸೈತ್ ಪೋದಿತ್ತಿ ಸ್ವಂತದಾಕುಲೆನ್ ಕುಡ ಜೀವಾದ್ ಪಡೆವೊಂಡೆರ್. ಕೆಲೆವೆರ್ ತನ್ಕುಲು ಭಂಗದ ಯಂತ್ರೊಗು ಕಟ್ಟಾವೊಂಡಿನಪಗ ಪುನರುತ್ಥಾನೊನು ಪಡೆವೆರೆಗಾದ್ ಬುಡುಗಡೆ ಬೊಡ್ಚಿ ಪಂಡ್ದ್ ಪನೊಂದು ಪೆಟ್ಟ್‌ಡ್ ಸೈತೆರ್.

³⁶ ಬೇತೆ ಕೆಲೆವೆರ್ ಅಪಹಾಸ್ಯ, ಕೊರಡೆದ ಪೆಟ್ಟ್, ಸರಪೊಳಿ, ಸೆರೆಮನೆಟ್ ಉಂದೆನ್ ಮಾತ ಅನುಭವ ಮಲ್ತೆರ್.

³⁷ ಕೆಲೆವೆರೆನ್ ಜನೊಕುಲು ಕಲ್ಲ್ ದಕ್ಕ್‌ದ್ ಕೆರಿಯೆರ್. ಕೆಲೆವೆರೆನ್ ಗರಗಸೊಡ್ದು ಕುತ್ತುದು ಕೆರಿಯೆರ್ ದೇವೆರೆಗ್ ವಿರೋಧಾದ್ ಪ್ರಾಣೊನು ಒರಿತೊನ್ಲೆ ಪಂಡ್ದ್ ಕೆಲೆವೆರೆನ್ ಪುಸಲಾಯಿಸಿಯೆರ್. ಕೆಲೆವೆರೆನ್ ಕತ್ತಿಡ್ ಕೆರಿಯೆರ್, ಕೆಲೆವೆರ್ ದಾಲಾದಾಂತೆ ಇತ್ತ್‌ದ್ ಭಂಗ ಕಷ್ಟೊಲೆನ್ ಅನುಭವ ಮಲ್ತಿನಾಕುಲಾದ್ ಕುರಿ ಏಡ್‌ಲೆನ ಚರ್ಮಲೆನ್ ತುತ್ತೊಂದು ತಿರ್ಗೊಂದಿತ್ತೆರ್‌

³⁸ ಇಂಚಿತ್ತಿನಾಕುಲೆಗ್ ಈ ಲೋಕ ಯೋಗ್ಯವಾಯಿನ ಜಾಗ್ ಅತ್ತ್, ಅಕುಲು ತನ್ಕುಲೆನ ದೇಶದ ಕಾಡ್, ಗುಡ್ಡೆ, ಮಾಟೆ, ತೋಡುಲೆಡ್ ತಿರ್ಗುನಾಕುಲಾದಿತ್ತೆರ್.

³⁹ ಮೊಕುಲು ಮಾತೆರ್ಲಾ ನಂಬಿಕೆಡ್ದ್ ಎಡ್ಡೆ ಪುದರ್‌ನ್ ಸಂಪಾದನೆ ಮಲ್ತೊಂದಿತ್ತ್‌ಂಡಲಾ ವಾಗ್ದಾನದ ಫಲೊನು ಪಡೆಯಿಜೆರ್.

⁴⁰ ದೇವೆರ್ ನಂಕಾದ್ ಶ್ರೇಷ್ಟವಾಯಿನ ಭಾಗ್ಯೊನು ಏರ್ಪಾಡ್ ಮಲ್ತ್‌ದ್ ಎಂಕುಲುದಾಂತೆ ಅಕುಲು ಪರಿಪೂರ್ಣ ಆವೆರೆ ಬಲ್ಲಿ ಅಂದ್‌ದ್ ನೇಮಕ ಮಲ್ತೆ.