ಇಬ್ರಿಯೆರೆಗ್ 10 - ಪೊಸ ಒಡಂಬಡಿಕೆ

¹ ನ್ಯಾಯಕಟ್ಟ್‌ಡ್ ದುಂಬಗ್ ಬರಿಯರೆ ಉಪ್ಪು ಎಡ್ಡೆಂತಿನ ಪ್ರತಿಬಿಂಬನೇ ಅತ್ತಂದೆ ಐಕ್ಲೆ ನಿಜ ರೂಪದವು ಅತ್ತಂದಿನೆಡ್ದ್ ಆ ನ್ಯಾಯಕಟ್ಟ್ ವರ್ಸವರ್ಸೊಗು ಕುಡ ಕುಡ ಅರ್ಪಣೆ ಆಪಿನ ಒಂಜೇ ತರತ ಬಲಿಲೆನ್ ಅರ್ಪಣೆ ಮಲ್ತ್‌ದ್ ದೇವೆರೆ ಕೈತಲ್‌ಗ್ ಬರ್ಪಿನಾಕುಲೆಗ್ ಏಪೊಗ್ಲಾ ಪರಿಪೂರ್ಣತೆಗ್ ಕನವಂದ್.

² ಕಂತಿನ ಪಕ್ಷೊಡು ಆ ಯಜ್ಞದ ಅರ್ಪಣೆ ಮಲ್ಪುನವು ಉಂತುದು ಪೋತು. ದಾಯೆ ಪಂಡ ದೇವಾರಾಧನೆ ಮಲ್ಪುನಾಕುಲು ಒಂಜೇ ಸರಿ ಶುದ್ಧ ಆಯಿ ಬೊಕ್ಕ ಅಕ್ಲೆಗ್ ಪಾಪ ಉಂಡು ಅಂದ್‌ದ್ ಅಕ್ಲೆನ ಮನಸ್ ನನಲಾ ಸಾಕ್ಷಿ ಕೊರ್ಪಿನಿ ದಾಯೆಗ್?

³ ಆಂಡ ಆ ಬಲಿ ಅರ್ಪಣೆಲೆಡ್ದ್ ಪ್ರತಿ ವರ್ಸೊಡ್ಲಾ ಪಾಪೊಲೆ ನೆನೆಪು ಆಪುಂಡು.

⁴ ಬೋರಿಲೆ ಬೊಕ್ಕ ಏಡ್‌ಲೆ ನೆತ್ತೆರ್‌ಡ್ದ್ ಪಾಪೊಲು ಪರಿಹಾರ ಆಪಿನವು ಸಾದ್ಯದಾಂತಿನವು ಆದುಂಡತ್ತಾ.

⁵ ಅಂಚಾಯಿನೆಡ್ದ್ ಕ್ರಿಸ್ತೆ ಭೂಲೋಕದ ಉಲಯಿ ಬನ್ನಗ, “ದೇವೆರೇ ಬಲಿ ಅರ್ಪಣೆಲು ನಿಕ್ಕ್ ಇಷ್ಟ ಆದಿತ್ತಿಜಿ. ಎಂಕ್ ಶರೀರೊನು ತಯಾರ್ ಮಲ್ತ್ ಕೊರಿಯ.

⁶ ಸರ್ವಾಂಗ ಹೋಮೊಲೆಡ್ದ್‌ಲಾ ಪಾಪ ಪರಿಹಾರದ ಬಲಿಡ್ದ್‌ಲಾ ಈ ಸಂತೋಷ ಪಡೆಯಿಜ.

⁷ ಅಪಗ ಯಾನ್, ‘ಇಂದಾ ದೇವೆರೇ, ಯಾನ್ ನಿನ ಚಿತ್ತೊನು ಮಲ್ಪೆರೆಗಾದ್ ಬೈದೆ.’ ಗ್ರಂಥದ ಸುರುಳಿಡ್ ಎನ ಬಗೆಟ್ ಬರೆತ್ಂಡ್,” ಪಂಡೆ

⁸ ನ್ಯಾಯಕಟ್ಟ್‌ದ ಪ್ರಕಾರ ಸಮರ್ಪಣೆ ಆವೊಂದು ಬರ್ಪಿ ಬಲಿ ಅರ್ಪಣೆಲುಲಾ ಸರ್ವಾಂಗ ಹೋಮೊಲುಲಾ ಪಾಪ ಪರಿಹಾರ ಯಜ್ಞೊಲುಲಾ ನಿಕ್ಕ್ ಇಷ್ಟ ಆದಿತ್ತಿಜಿ. ಈ ಐಡ್ದ್ ಸಂತೋಷ ಪಡೆಪುಜ ಪಂಡ್ದ್ ಪಂಡಿನಪಗನೇ,

⁹ “ಇಂದಾ ನಿನ ಚಿತ್ತೊನು ಮಲ್ಪೆರೆ ಬೈದೆ,” ಪಂಡ್ದ್ ಪನ್ತೆ. ಆಯೆ ರಡ್ಡನೆದೆನ್ ಸ್ಥಾಪನೆ ಮಲ್ಪೆರೆಗಾದ್ ಸುರುತ್ತೆನ್ ದೆತ್ತ್‌ದ್ ಬುಡ್ಪೆ.

¹⁰ ಯೇಸು ಕ್ರಿಸ್ತೆ ಒಂಜೇ ಸರಿ ತನ ಶರೀರೊನು ಅರ್ಪಣೆ ಮಲ್ತ್‌ದ್ ದೇವೆರೆ ಚಿತ್ತೊನು ನಡಪಾಯಿನೆಡ್ದೇ ನಮ ಶುದ್ಧ ಆಯ.

¹¹ ಉಂದತ್ತಂದೆ ಮಾತ ಯಾಜಕೆರ್ ದಿನಾಲ ಸೇವೆ ಮಲ್ತೊಂದು ಏಪೊಗ್ಲಾ ಪಾಪ ನಿವಾರಣೆ ಮಲ್ಪರೆ ಆವಂದಿ ಒಂಜೇ ತರತ ಬಲಿಲೆನ್ ಗಡಿಗಡಿ ಅರ್ಪಣೆ ಮಲ್ತೊಂದು ಉಂತೊಂದುಪ್ಪುವೆರ್.

¹² ಆಂಡ ಈ ಕ್ರಿಸ್ತೆ ಪಾಪ ಪರಿಹಾರೊಗಾದ್ ಉಂತೊಂದುಪ್ಪುನ ಒಂಜೇ ಯಜ್ಞೊನು ಅರ್ಪಣೆ ಮಲ್ತ್‌ದ್ ದೇವೆರೆ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂಡೆ.

¹³ ಆನಿಡ್ದ್ ತನ ವೈರಿಲೆನ್ ತನ ಪಾದಪೀಠ ಆದ್ ಪಾಡುನೆಟ್ಟ ಆಯೆ ಕಾತೊಂದುಪ್ಪುವೆ.

¹⁴ ಪರಿಶುದ್ಧೆರಾಪಿನಾಕುಲೆನ್ ಒಂಜೆ ಬಲಿಡ್ದ್ ನಿತ್ಯೊಗ್ಲಾ ಪರಿಪೂರ್ಣತೆಗ್ ಕನೈದೆ.

¹⁵ ಪರಿಶುದ್ಧಾತ್ಮೆಲಾ ನಂಕ್ ಸಾಕ್ಷಿ ಕೊರ್ಪಿನಾಯೆ ಆದ್,

¹⁶ “ಆ ದಿನೊಕುಲು ಬತ್ತಿ ಬೊಕ್ಕ ಯಾನ್ ಅಕ್ಲೆಡೊಪ್ಪ ಮಲ್ತೊನುನ ಒಡಂಬಡಿಕೆ ಇಂಚ ಉಪ್ಪುಂಡು. ಎನ ನ್ಯಾಯಕಟ್ಟ್‌ಲೆನ್ ಅಕ್ಲೆನ ಮನಸ್‌ಡ್ ದೀಪೆ. ಅಕ್ಲೆನ ಉಡಲ್‌ಡ್ ಅವೆನ್ ಬರೆಪೆ. ಪಂಡ್ದ್ ಕರ್ತವೆ ಪನ್ಪೆ,” ಪಂಡ್ದ್ ಪಂಡಿ ಬೊಕ್ಕ,

¹⁷ “ನನ ಅಕ್ಲೆನ ಪಾಪೊಲೆನ್ಲಾ ಅನ್ಯಾಯೊಲೆನ್ಲಾ ಯಾನ್ ನನ ಏಪೊಗ್ಲಾ ನೆನೆಪುಗು ಕನವಯೆ,” ಪಂಡ್ದ್ ಪನ್ಪೆ.

¹⁸ ಪಾಪೊಲು ಪರಿಹಾರ ಆಂಡ ನನಲಾ ಐತ ಸಂಗತಿಡ್ ಅರ್ಪಣೆ ಮಲ್ಪುನ ಅಗತ್ಯ ಇಜ್ಜಿ.

ನಮ ದೇವೆರೆ ಕೈತಲ್‌ ಬರ್ಕ

^19-20 ಇಂಚ ಉಪ್ಪುನಗ ಸಹೋದ್ರೆರೇ, ಯೇಸು ನಂಕಾದ್ ಬಲಿ ಆಯಿನ ಜೀವ ಇತ್ತಿ ಪೊಸ ಸಾದಿಡ್ ಆಯ ನೆತ್ತೆರ್‌ಡ್ದಾದ್ ಆಯನ ಶರೀರ ಪನ್ಪಿ ಪರದೆಡ್ದಾದ್ ದೇವೆರೆ ಪರಿಶುದ್ಧ ಸನ್ನಿಧಾನದ ಉಲಯಿ ಪೋವೆರೆ ನಂಕ್ ಧೈರ್ಯ ಉಂಡಾಂಡ್.

²¹ ದೇವೆರೆ ಇಲ್ಲದ ಮಿತ್ತ್ ಅಧಿಕಾರಿ ಆಯಿ ಮಲ್ಲ ಯಾಜಕೆ ನಂಕುಪ್ಪುವೆ.

²² ಅವೆಡ್ದಾವರ ಹಾಳ್ ಉಡಲ್‌ನ್ಲಾ ನಮ ಶರೀರೊನ್ಲಾ ತಲಿಪಾವೊಂದು ಶುದ್ಧ ನೀರ್‌ಡ್ದ್ ದೆಕ್ಕೊಂದು ಪರಿಪೂರ್ಣವಾಯಿನ ನಂಬಿಕೆ ಇತ್ತಿನಾಕುಲಾದ್‌ಲಾ ಸತ್ಯ ಮನಸಿತ್ತಿನಾಕುಲಾದ್‌ಲಾ ದೇವೆರೆ ಕೈತಲ್‌ ಬರ್ಕ.

²³ ನಮ ನಿರೀಕ್ಷೆದ ಸಂಗತಿಡ್ ನಮ ಮಲ್ತಿನ ವಾಗ್ದಾನೊನು ಚಂಚಲಾವಂದೆ ದೃಢಾದ್ ಪತ್ತೊನುಗ. ವಾಗ್ದಾನ ಮಲ್ತಿನಾಯೆ ನಂಬಿಗಸ್ತೆ.

²⁴ ಎಂಕುಲು ಒರಿಯನ್ ಒರಿ ಚಿಂತೆಕೆರಾದ್ ಪ್ರೀತಿ ಮಲ್ಪುನಾಕುಲಾದ್‌ಲಾ ಎಡ್ಡೆ ಬೇಲೆಲೆನ್ ಮಲ್ಪುನಾಕುಲಾದ್‌ಲಾ ಒರಿಯಗ್ ಒರಿ ಉಮೇದ್ ಕೊರ್ಕ.

²⁵ ಸಭೆಯಾದ್ ಕೂಡ್ದು ಬರ್ಪಿನೆನ್ ಕೆಲೆವೆರ್ ರೂಢಿಯಾದ್ ಬುಡ್ತಿ ಪ್ರಕಾರ ಎಂಕುಲು ಬುಡ್ದು ಬುಡಂದೆ ಒರಿಯಗ್ ಒರಿ ಎಚ್ಚರಿಕೆ ಮಲ್ತೊನುಗ, ಕರ್ತವೆ ಬರ್ಪಿನ ದಿನ ಕೈತಲಾವೊಂದು ಬರ್ಪುಂಡು ಪಂಡ್ದ್ ನಿಕುಲು ತೂಪಿನೆಡ್ದ್ ಉಂದೆನ್ ಬೊಕ್ಕಲಾ ಮಲ್ಪುಲೆ.

²⁶ ದಾಯೆ ಪಂಡ ಸತ್ಯದ ಗೇನೊನು ನಮ ಪಡೆಯಿ ಬೊಕ್ಕ ಬೋಡಂದ್ ಪಾಪ ಮಲ್ತ್ಂಡ, ಪಾಪ ಪರಿಹಾರೊಗಾದ್ ನನ ವಾ ಬಲಿಲಾ ಉಪ್ಪುಜಿ.

²⁷ ಬಾರಿ ಪೋಡಿಗೆಡ್ ಕಾತೊಂದುಪ್ಪುನ ನ್ಯಾಯತೀರ್ಪುಲಾ ದೇವೆರೆ ವಿರೋಧಿಲೆನ್ ಪೊತ್ತಾವುನ ತೂತ ಉರಿಲಾ ಉಂದೇ ಎಂಕ್ಲೆನ ಎದುರು ಉಪ್ಪುನವು.

²⁸ ಮೋಶೆನ ನ್ಯಾಯಕಟ್ಟ್‌ನ್ ಅಸಡ್ಡೆ ಮಲ್ತಿನಾಯಗ್ ಇರ್ವೆರ್ ಇಜ್ಜಾಂಡ ಮೂವೆರೆ ಸಾಕ್ಷಿಲೆ ಪಾತೆರದ ಮಿತ್ತ್ ಕನಿಕರದಾಂತೆ ಮರಣ ದಂಡನೆ ಆಪುಂಡಾತೆ.

²⁹ ಏರ್ ದೇವೆರೆ ಮಗನ್ ದೊಂಕುದು, ನಮನ್ ಪರಿಶುದ್ಧ ಮಲ್ಪುನ ಒಡಂಬಡಿಕೆದ ನೆತ್ತೆರ್‌ನ್ ಅಶುದ್ಧ ಅಂದ್‌ದ್ ಎನ್ನ್‌ದ್, ದೇವೆರೆ ದಯತ ಆತ್ಮನ್ ತಿರಸ್ಕಾರ ಮಲ್ತ್‌ದೆನಾ ಆಯೆ ನನಲಾ ಏತೋ ಹೆಚ್ಚಿಗೆದ ಶಿಕ್ಷೆ ಹೊಂದುವೆ ಅಂದ್‌ದ್ ಆಲೋಚನೆ ಮಲ್ಪುಲೆ.

³⁰ “ಪಗತೆಗ್ ಪಗತೆ ಕೊರ್ಪಿನವು ಎನ ಬೇಲೆ. ಯಾನೇ ಪ್ರತಿಫಲೊನು ಕೊರ್ಪೆ,” ಪಂಡ್ದ್ ಪಂಡಿನಾಯನ್ ತೆರಿದ. ಉಂದತ್ತಂದೆ, “ಕರ್ತವೆ ತನ ಜನೊಕುಲೆ ನ್ಯಾಯೊನು ವಿಚಾರ ಮಲ್ಪುವೆ,” ಪಂಡ್ದ್‌ಲಾ ಪನ್ತ್ಂಡ್.

³¹ ಜೀವ ಇತ್ತಿ ದೇವೆರೆ ಕೈಟ್ ಬೂರುನವು ಏತೋ ಭಯಂಕರವಾಯಿನವು.

³² ಅಂಚಾಯಿನೆಡ್ದ್ ನಿಕುಲು ಗೇನದ ಬೊಲ್ಪುಗು ಸೇರ್ದ್ ಕಷ್ಟ ಅನುಭವ ಪನ್ಪಿ ಮಲ್ಲ ಹೋರಾಟೊನು ಸಹಿಸೊಂದಿನ ಪಿರವುದ ದಿನೊಲೆನ್ ನೆನೆಪು ಮಲ್ತೊನ್ಲೆ.

³³ ಮಸ್ತ್ ಸರ್ತಿ ನಿಕುಲು ನಿಂದೆ ಭಂಗ ಅನುಭವ ಮಲ್ತ್‌ದ್ ಹಾಸ್ಯೊಗು ಒಳಗಾಯರ್. ಕೆಲವು ಸರಿ ಅಂಚಿತ್ತಿನೆನ್ ಅನುಭವ ಮಲ್ಪುನಾಕುಲೆಡೊಪ್ಪ ಸೇರ್ದಿನಾಕುಲಾದ್ ಭಂಗ ಅನುಭವ ಮಲ್ಪುನಾಕುಲು ಆಯರ್.

³⁴ ಸೆರೆಮನೆಟ್ ಬೂರಿನಾಕುಲೆನ ಭಂಗೊನು ತೂದು ಅಕ್ಲೆಡೊಪ್ಪ ನಿಕುಲು ಕನಿಕರ ಪಡೆಯಿನಿ ಅತ್ತಂದೆ ನಂಕ್ ಎಡ್ಡೆಂತಿನವುಲಾ ಸ್ಥಿರವಾದ್‌ಲಾ ಇತ್ತಿನ ಆಸ್ತಿ ಉಂಡು ಪಂಡ್ದ್ ಸರಿಯಾದ್ ತೆರಿಯೊಂದು ನಿಕ್ಲೆನ ಸೊತ್ತುಲೆನ್ ಒಯ್ತೊನುನಾಕುಲೆಗ್ ಸಂತೋಷೊಡು ಬುಡಿಯರ್.

³⁵ ಅಂಚಾಂಡ ನಿಕ್ಲೆನ ಧೈರ್ಯೊನು ಬುಡ್ದು ಬುಡಡೆ. ಐಕ್ ಮಲ್ಲ ಪ್ರತಿಫಲ ಉಂಡು.

³⁶ ದೇವೆರೆ ಚಿತ್ತೊನು ತೀರಿಸಾದ್ ವಾಗ್ದಾನದ ಫಲೊನು ಪಡೆವೊಡಾಂಡ ನಿಕ್ಲೆಗ್ ತಾಳ್ಮೆ ಬೋಡು.

³⁷ “ಬರ್ಪಿನಾಯೆ ನನ ಒಂತೆ ಸಮಯೊಡು ಬರ್ಪೆ ತಡ ಮಲ್ಪುಜೆ.”

³⁸ ಆಂಡ, “ಎನ್ನಾಯೆ ಆದುಪ್ಪು ನೀತಿವಂತೆ ನಂಬಿಕೆಡ್ದೇ ಬದುಕುವೆ. ಆಯೆ ಪಿರ ಜಾರಿಯೆಡ ಎನ ಪ್ರಾಣೊಗು ಆಯಡ ಮೆಚ್ಚಿಗೆ ಇಜ್ಜಿ,” ಅಂದ್‌ದ್ ಬರೆತ್ಂಡ್.

³⁹ ಎಂಕುಲಾಂಡಲಾ ಪಿರಜಾರ್ದ್ ನಾಶ ಆಪಿನಾಕುಲತ್ತ್, ನಂಬುನಾಕುಲಾದ್ ಪ್ರಾಣ ರಕ್ಷಣೆನ್ ಪಡೆಪಿನಾಕುಲಾದುಲ್ಲಾ.