ಇಬ್ರಿಯೆರೆಗ್ 1 - ಪೊಸ ಒಡಂಬಡಿಕೆಮಗಡ್ದ್ ದೇವೆರೆ ವಾಕ್ಯ 1 ದೇವೆರ್ ಆದಿ ಕಾಲೊಡು ಎಂಕ್ಲೆನ ಪಿತೃಲೆ ಒಟ್ಟುಗು ಪ್ರವಾದಿಲೆ ಬಾಯಿಡ್ದ್ ದಿಂಜ ಸರ್ತಿ ಬೇತೆ ಬೇತೆ ರೀತಿಡ್ ಪಾತೆರ್ದೆರ್. 2 ಆಂಡ ಈ ಕಡೇ ದಿನೊಕುಲೆಡ್ ಆಯೆ ತನ ಮಗಡ್ದ್ ನಮಡ ಪಾತೆರ್ವೆ. ಆಯನ್‌ ಮಾತೆತ್ತಲಾ ಹಕ್ಕ್‌ದಾಯೆ ಮಲ್ತ್‌ದ್ ಆಯಡ್ದೇ ಮಾತ ಲೋಕೊನು ಉಂಡು ಮಲ್ತ್‌ದೆ. 3 ಇಂಬೆ ದೇವೆರೆ ಮೈಮೆದ ಬೊಲ್ಪುಲಾ ಆಯ ಸ್ವಭಾವದ ಪ್ರತಿರೂಪಲಾ ಆದಿತ್ತ್‌ದ್ ತನ ಬಾಯಿ ಪಾತೆರದ ಶಕ್ತಿಡ್ದ್ ಮಾತೆಕ್ ಆಧಾರ ಆದುಲ್ಲೆ. ಆಯೆ ಜನೊಕುಲೆನ್ ಪಾಪೊಲೆಡ್ದ್ ಶುದ್ಧ ಮಲ್ತಿ ಬೊಕ್ಕ ಪರಲೋಕೊಡು ಮಲ್ಲಾದಿಗೆದ ಸ್ಥಾನೊಡು ದೇವೆರೆ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂಡೆ. ದೇವೆರೆ ಮಗೆ ದೂತೆರೆಡ್ದ್‌ಲಾ ಮಲ್ಲಾಯೆ 4 ಆಯೆ ದೂತೆರೆಡ್ದ್‌ಲಾ ಏತೋ ಮಲ್ಲಾಯೆ. ಅಕ್ಲೆಡ್ದ್ ಏತೋ ಮಲ್ಲ ಪುದರ್‌ನ್ಲಾ ದೆತ್ತೊಂದೆ ಅತ್ತಾ? 5 ದಾಯೆಗಂದ್ಂಡ, “ಎಂಕ್ ಈಯೇ ಮಗೆ; ಇನಿ ಯಾನೇ ನಿನನ್ ಪಡೆತೆ.” ಅಂದ್‌ದ್‌ಲಾ ಕುಡ “ಯಾನ್ ಆಯಗ್ ಅಮ್ಮೆ ಆದುಪ್ಪುವೆ; ಆಯೆ ಎಂಕ್ ಮಗೆ ಆದುಪ್ಪುವೆ.” ಅಂದ್‌ದ್‌ಲಾ ದೇವೆರ್ ವಾ ದೂತಡಲಾ ಏಪಾಂಡಲಾ ಪಂಡಿನವು ಉಂಡಾ? 6 ಬೊಕ್ಕ ಆಯೆ ತನ ಸುರುತ್ತ ಮಗನ್ ಈ ಲೋಕೊಗು ಕಡಪುಡುನಗ “ದೇವೆರೆ ದೂತೆರ್ ಮಾತೆರ್ಲಾ ಆಯಗ್ ಅಡ್ಡಬೂರಡ್,” ಅಂದ್‌ದ್ ಪನ್ಪೆ. 7 ದೂತೆರೆನ ಸಂಗತಿಡ್, “ಆಯೆ ತನ ದೂತೆರೆನ್ ಗಾಳಿದ ಲೆಕ್ಕಲಾ ತನ ಸೇವಕೆರೆನ್ ತೂತ ನಾಲಯಿದ ಲೆಕ್ಕಲಾ ಕಡಪುಡ್ವೆ.” 8 ಆಂಡ ಮಗನ ಸಂಗತಿಡ್, “ದೇವೆರೇ, ನಿನ ಗದ್ದಿಗೆ ಸದಾಕಾಲೊಗು ಉಪ್ಪುನವು, ನಿನ ರಾಜ್ಯದ ಕೋಲು ನೀತಿದ ಕೋಲು ಆದುಂಡು.” 9 ಈ ನೀತಿನ್ ಪ್ರೀತಿ ಮಲ್ತ್‌ದ, ಅನ್ಯಾಯೊನು ಪಗೆ ಮಲ್ತ. ಅಂಚಾದ್ ದೇವೆರ್ ನಿನ ದೇವೆರೇ, ನಿನನ್ ನಿನ ಪಾಸಡಿದಾಕುಲೆಡ್ದ್ ಮಲ್ಲ ಸ್ಥಾನೊಗು ಏರಾದ್ ಸಂತೋಷದ ಎಣ್ಣೆನ್ ಮೈತ್‌ದ್ ನಿನನ್ ಅಭಿಷೇಕ ಮಲ್ತ್‌ದೆ. 10 ಉಂದತ್ತಂದೆ, “ಕರ್ತವಾ, ಈ ಆದಿಡ್ ಭೂಮಿಗ್ ಅಡಿಪಾಯೊನು ಪಾಡ್ದ್ ಪರಲೋಕ ನಿನ ಕೈಬೇಲೆ ಆದುಂಡು. 11 ಅವು ಆಳಿದ್ ಪೋವು; ಆಂಡ ಈ ಮಾತ್ರ ಏನಿತ್ಯೇನಿಗ್ಲಾ ಉಪ್ಪುವ. ಅವು ಮಾತಲಾ ಕುಂಟುದಲೆಕ್ಕನೇ ಪರತ್ತಾವು. 12 ಈ ಅವೆನ್ ಅಂಗಿದಲೆಕ್ಕ ಮಡ್ತ್‌ದ್ ದಕ್ಕ್‌ದ್ ಪೊಸತ್ತ್ ಅಂಗಿನ್ ಪಾಡಿಲೆಕ್ಕ ಆವು. ಆಂಡ ಈ ಏಪಲಾ ಇತ್ತಿಲೆಕ್ಕನೆ ಉಪ್ಪುವ; ನಿನ ವರ್ಸೊಲು ಮುಗಿಯಂದ್,” ಅಂದ್‌ದ್ ಪನ್ಪೆ. 13 ಬೊಕ್ಕ ದೇವೆರ್ ವಾ ದೂತೆರೆಗ್ಲಾ ಇಂಚ ಪನ್ತಿಜೆ, “ಯಾನ್ ನಿನ ವೈರಿಲೆನ್ ನಿಕ್ಕ್ ಪಾದಪೀಠ ಮಲ್ಪುನ ಮುಟ್ಟ, ಎನ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದುಪ್ಪುಲ, ಇನ್ಪಿನೆನ್ ಏಪಲಾ ಪನ್ತಿನ ಉಂಡಾ?” 14 ಅಕುಲು ಮಾತೆರ್ಲಾ ಬುಡುಗಡೆ ತಿಕ್ಕುನಾಕುಲೆನ ಸೇವೆಗಾದ್ ಕಡಪುಡ್ದಿನ ಸೇವಾತ್ಮೊಲು ಆದುಲ್ಲೆರತ್ತಾ? |
New Life Literature