ಗಲಾತ್ಯೆರೆಗ್ 6 - ಪೊಸ ಒಡಂಬಡಿಕೆ

ಒರಿಯನ್ ಒರಿ ಪುದೆ ತುಂಬುನವು

¹ ಸಹೋದ್ರೆರೇ, ಒರಿ ಏರಾಂಡಲಾ ಪಾಪೊಡು ತಿಕ್ಕೊಂಡೆಡ, ಆತ್ಮಭಾವದಾಕುಲಾಯಿ ನಿಕುಲು ಅಂಚಿತ್ತಿನಾಯನ್ ಸಜ್ಜನಿಗೆದ ಆತ್ಮೊಡು ಶಾಂತ ರೀತಿಡ್ ಪಾಪೊಡ್ದು ಪಿದಾಯಿ ಕನವೊಡು. ನಿಕುಲುಲಾ ಅವ್ವೇ ಶೋಧನೆಗ್ ಬೂರಂದಿಲೆಕ್ಕ ಎಚ್ಚರಿಕೆ ಆದುಪ್ಪುಲೆ.

² ಒರಿ ಬೊಕ್ಕೊರಿಯನ ಪುದೆನ್ ತುಂಬೊಂದು, ಕ್ರಿಸ್ತ ನ್ಯಾಯಕಟ್ಟ್‌ನ್ ಪೂರ್ತಿ ಮಲ್ಪುಲೆ.

³ ಒರಿ ದಾಲಾ ಆದುಪ್ಪಂದೆ ತನನ್ ತಾನ್ ಮಲ್ಲಾಯೆ ಅಂದ್‌ದ್ ಎನ್ನುವೆಡ, ತನ್ಕ್ ತಾನೇ ಮೋಸ ಮಲ್ತೊನ್ವೆ.

⁴ ಪ್ರತಿ ಒರಿಲಾ ಆಯೆ ಮಲ್ತಿನ ಕೆಲಸೊನು ಪರೀಕ್ಷೆ ಮಲ್ತ್‌ದ್ ತೂವಡ್. ಅಂಚಾಂಡ ಮಾತ್ರ ಆಯೆ ಮಲ್ತಿನ ಕೆಲಸೊಲೆಡ್ ಪುಗರಿಗೆ ಪಡೆಯೊಲಿ ಬೇತೆಕ್ಲು ಮಲ್ತಿನ ಕೆಲಸೊಗು ಅತ್ತ್.

⁵ ದಾಯೆಗಂದ್ಂಡ ನಮ ಪ್ರತಿ ಒರಿಲಾ ಆಯಾಯನ ಪುದೆನ್ ತುಂಬೊನೊಡು.

⁶ ದೇವೆರೆ ಪಾತೆರದ ಬೋಧನೆನ್ ಕೇನುನಾಯೆ, ಬೋಧನೆನ್ ಮಲ್ಪುನಾಯಗ್ ತನಡುಪ್ಪುನ ಮಾತ ಎಡ್ಡೆಂತಿನೆಟ್ಟ್ ಪಾಲ್ ಕೊರಡ್.

⁷ ಮೋಸೊಗು ತಿಕ್ಕ್‌ದ್ ಬೂರೊಡ್ಚಿ, ದೇವೆರ್ ತಿರಸ್ಕಾರ ಸಹಿಸೊನುನಾಯೆ ಅತ್ತ್. ನರಮಾನಿ ಎಂಚಿನ ಬಿತ್ತುವೆನಾ ಅವೆನೇ ಕೊಯ್ಪೆ.

⁸ ತನ್ಕುಲೆ ಸ್ವಂತ ಶರೀರಭಾವೊನು ಬಿತ್ತುನಾಯೆ ಶರೀರಭಾವೊಡ್ದು ನಾಶನೊನು ಕೊಯ್ಪೆ. ಆಂಡ ಆತ್ಮನ ವಿಷಯೊಡು ಬಿತ್ತುನಾಯೆ ಆತ್ಮಡ್ದೇ ನಿತ್ಯಜೀವೊನು ಕೊಯ್ಪೆ.

⁹ ಅಂಚಾದ್ ಎಡ್ಡೆ ಮಲ್ಪುನೆಟ್ಟ್ ನಮ ಬೇಜಾರ್ ಮಲ್ಪಂದೆ ಉಪ್ಪುಗ. ನಮ ಬೇಜಾರ್ ಮಲ್ಪುಜಡ, ತಕ್ಕ ಸಮಯೊಡು ಆಶೀರ್ವಾದದ ಬುಲೆನ್ ಕೊಯ್ಪ.

¹⁰ ಅಂಚಾದ್ ಎಡ್ಡೆ ಮಲ್ಪೆರೆ ನಂಕ್ ಅವಕಾಸ ಉಪ್ಪುನಗ ಮಾತೆರೆಗ್ಲಾ ಎಡ್ಡೆನೇ ಮಲ್ಪುಗ. ಮುಖ್ಯಾದ್ ಒಂಜೇ ಇಲ್ಲದಾಕುಲೆಲೆಕ್ಕ ಕ್ರಿಸ್ತ ನಂಬಿಕೆಡ್ ಉಪ್ಪುನಾಕುಲೆಗ್ ಮಲ್ಪುಗ.

ಕಡೆತ ಎಚ್ಚರಿಕೆ ಬೊಕ್ಕ ವಂದನೆಲು

¹¹ ಈ ಕಡೆತ ಪಾತೆರೊಲೆನ್ ಯಾನ್ ಎನ ಸ್ವಂತ ಕೈಟ್ ಬರೆನಗ ಏತ್ ಮಲ್ಲ ಅಕ್ಷರೊಡು ಪತ್ರಿಕೆ ಬರೆತೆ ಅಂದ್‌ದ್ ತೂಲೆ.

¹² ಶರೀರೊಡು ನಿಕ್ಲೆನ್ ಸುನ್ನತಿ ಮಲ್ತೊನಿಯೆರೆ ಒತ್ತಾಯ ಮಲ್ಪುನಾಕುಲು ಬೇತೆಕ್ಲೆ ಎದುರುಡು ಎಡ್ಡೆಂತಿನಾಕುಲಾದ್ ತೋಜಾವೊನಿಯೆರೆ ಬಯಕುವೆರ್. ದಾಯೆಗಂದ್ಂಡ ಕ್ರಿಸ್ತನ ಕ್ರುಸ್ಸುಡ್ದು ಭಂಗ ತಾಳೊನಿಯೆರೆ ಅಕ್ಲೆಗ್ ಮನಸ್ ಇಜ್ಜಿ.

¹³ ಸುನ್ನತಿ ಆತಿನಾಕುಲು, ಅಕುಲೇ ನ್ಯಾಯಕಟ್ಟ್‌ಗ್ ಸರಿಯಾದ್ ನಡತೊಂದು ಇಜ್ಜೆರ್. ಅಕುಲು ನಿಕ್ಲೆ ಶರೀರೊಡು ಪುಗರಿಗೆ ಪಡೆಯೊನಿಯೆರೆ ನಿಕ್ಲೆಗ್ ಸುನ್ನತಿ ಆವೊಡು ಅಂದ್‌ದ್ ಆಸೆ ಮಲ್ಪುವೆರ್.

¹⁴ ಎಂಕಾಂಡಲಾ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಕ್ರುಸ್ಸುಡು ಅತ್ತಂದೆ ಬೇತೆ ವಾ ಪುಗರಿಗೆಲಾ ಬೊಡ್ಚಿ. ಆಯಡ್ದಾದ್ ಯಾನ್ ಲೋಕೊನು ಕ್ರುಸ್ಸುಗು ಪಾಡೊಂದಿನಾಯೆ ಆದ್ ಎನ ಪಾಲ್‌ಗ್ ಸೈತೆ. ಬೊಕ್ಕ ಯಾನ್ ಕ್ರುಸ್ಸುಗು ಪಾಡೊಂದಿನಾಯೆ ಆದ್ ಲೋಕದ ಪಾಲ್‌ಗ್ ಸೈತೆ.

¹⁵ ಸುನ್ನತಿ ಆಪಿನೆಡ್ದ್ ದಾಲಾ ಇಜ್ಜಿ, ಸುನ್ನತಿ ಆವಂದೆ ಉಪ್ಪುನವುಲಾ ದಾಲಾ ಇಜ್ಜಿ. ನಂಕ್ ನಿಜಾದ್ ಪೊಸ ಸೃಷ್ಟಿಯೇ ಬೋಡು.

¹⁶ ಈ ಸೂತ್ರೊಗು ಸರಿಯಾದ್ ನಡಪುನಾಕುಲೆಗ್ ಮಾತೆರೆಗ್ಲಾ ಪಂಡ್ಂಡ, ನಿಜ ಇಸ್ರಾಯೇಲ್ಯೆರೆ ದೇವಜನೊಕುಲೆಗ್ ದಯಲಾ ಸಮಾಧಾನಲಾ ಉಪ್ಪಡ್.

¹⁷ ಇಂಚಿನ ಸಂಗತಿಲೆಡ್ದಾದ್ ನನ ಎಂಕ್ ಏರ್ಲಾ ತೊಂದರೆ ಕೊರಡೆ. ದಾಯೆಗಂದ್ಂಡ ಎನ ಶರೀರದ ಮಿತ್ತುಪ್ಪುನ ಗಾಯದ ಕಲೆತ ಗುರ್ತ, ಯಾನ್ ಯೇಸುನ ಸೇವಕೆ ಪಂಡ್ದ್ ತೋಜಾವುಂಡತ್ತಾ.

¹⁸ ಸಹೋದ್ರೆರೇ, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದಯ ನಿಕ್ಲೆ ಆತ್ಮಡೊಪ್ಪ ಉಪ್ಪಡ್, ಆಮೆನ್.