ಗಲಾತ್ಯೆರೆಗ್ 3 - ಪೊಸ ಒಡಂಬಡಿಕೆ

ನ್ಯಾಯಕಟ್ಟ್ ಅತ್ತ್‌ಡ ನಂಬಿಕೆ

¹ ಓ, ಬುದ್ಧಿದಾಂತಿ ಗಲಾತ್ಯದಾಕುಲೇ! ನಿಕ್ಲೆನ್ ಏರ್ ಮರ್ಲ್ ಮಲ್ತೆರ್? ಕ್ರುಸ್ಸುಗು ಪತ್ತಾದಿ ಯೇಸು ಕ್ರಿಸ್ತನ ಮರಣೊನು ನಿಕುಲು ಕಣ್ಣೆದುರು ಸ್ಪಷ್ಟಾದ್ ತೂತರತ್ತಾ

² ಒಂಜಿ ಸಂಗತಿನ್ ನಿಕ್ಲೆಡ ಕೇನ್ವೆ. ಮೋಶೆನ ನ್ಯಾಯಕಟ್ಟ್‌ನ್ ಕೈಕೊನುನೆಡ್ದಾವರ ನಿಕ್ಲೆಗ್ ದೇವೆರಾತ್ಮ ತಿಕ್ಕ್‌ಂಡಾ? ಇಜ್ಜಿಂಡ ಕ್ರಿಸ್ತನ ಸುವಾರ್ತೆ ಕೇಂಡ್ದ್ ನಂಬಿನೆಡ್ದ್ ನಿಕ್ಲೆಗ್ ದೇವೆರಾತ್ಮ ತಿಕ್ಕ್‌ಂಡಾ?

³ ನಿಕುಲು ಈತ್ ಬುದ್ಧಿದಾಂತಿನಾಕುಲು ಆದುಲ್ಲರಾ? ದೇವೆರಾತ್ಮೊಡು ಕ್ರೈಸ್ತ ಜೀವನೊನು ಸುರು ಮಲ್ತ್‌ದ್ ಇತ್ತೆ ದಾಯೆಗ್ ನಿಕುಲು ಸ್ವಂತ ಶಕ್ತಿಡ್ದ್ ಪೂರ್ತಿ ಮಲ್ಪೆರೆ ತೂವೊಂದುಲ್ಲರಾ?

⁴ ನಿಕ್ಲೆಗಾಯಿನ ಈತ್ ಮಾತ ಅನುಭವ ವ್ಯರ್ಥ ಆಂಡಾ? ಅವು ಕಂಡಿತಾದ್ ವ್ಯರ್ಥ ಆತಿಜತ್ತಾ?

⁵ ದೇವೆರ್ ತನ ಆತ್ಮೊನು ಕೊರ್ದು, ನಿಕ್ಲೆ ನಡುಟು ಬಲತ್ತ ಕಾರ್ಯೊಲೆನ್ ಮಲ್ಪುನ ಅಧಿಕಾರ ನಿಕುಲು ನ್ಯಾಯಕಟ್ಟ್‌ನ್ ಕೈಕೊನುನೆಡ್ದಾವರ ತಿಕ್ಕ್‌ಂಡಾ ಇಜ್ಜಿಂಡ ನಿಕುಲು ಕ್ರಿಸ್ತನ ಸುವಾರ್ತೆ ಕೇಂಡ್ದ್ ನಂಬಿನೆಡ್ದೇ ತಿಕ್ಕ್‌ಂಡಾ?

⁶ ಅಂಚೆನೇ ಅಬ್ರಹಾಮು ದೇವೆರೆನ್ ನಂಬಿಯೆ, ಆ ನಂಬಿಕೆನೇ ಆಯನ ಲೆಖ್ಖೊಗು ನೀತಿದವು ಅಂದ್‌ದ್ ಗೆನ್ತ್‌ದ್ಂಡ್ ಅಂದ್‌ದ್ ಬರೆತ್ಂಡ್ ಅತ್ತಾ?

⁷ ಆ ನಂಬಿಕೆಡ್ದೇ, ನಿಕುಲು ಅಬ್ರಹಾಮುನ ಜೋಕುಲು ಅಂದ್‌ದ್ ತೆರಿಯೊನ್ಲೆ.

⁸ ದೇವೆರ್ ದುಂಬೇ ಶಾಸ್ತ್ರೊಡು ಪಂಡಿಲೆಕ್ಕ, ನಂಬಿಕೆದ ಮಿತ್ತ್ ಪಿದಯಿದ ಜನೊಕುಲೆನ್ ನೀತಿವಂತೆರ್ ಅಂದ್‌ದ್ ತೀರ್ಪು ಮಲ್ಪುವೆ. ಐಕ್ ದೇವೆರ್, “ಅಬ್ರಹಾಮುಡ್ದು ಮಾತ ಜನಾಂಗದಾಕುಲೆಗ್ಲಾ ಆಶೀರ್ವಾದ ಉಂಡಾಪುಂಡು,” ಪನ್ಪಿನ ಸುವಾರ್ತೆ ದುಂಬೇ ತೆರಿಪಾದೆ.

⁹ ಅಂಚಾಯಿನೆಡ್ದ್ ನಂಬುನಾಕುಲೆಗ್ ನಂಬಿಕೆ ಇತ್ತಿ ಅಬ್ರಹಾಮುಡೊಪ್ಪ ಆಶೀರ್ವಾದ ತಿಕ್ಕುಂಡು.

¹⁰ ಆಂಡ ದೇವೆರೆಡೊಪ್ಪ ನೀತಿವಂತೆ ಆಪಿನೆಕ್ಕ್ ನ್ಯಾಯಕಟ್ಟ್‌ನ್ ಆಧಾರ ಮಲ್ತೊನುನಾಕುಲು ಶಾಪಗ್ರಸ್ತೆರೆ. ದಾಯೆಗ್ ಪಂಡ ಶಾಸ್ತ್ರೊಡು ಪನ್ಪುಂಡು, “ದೇವೆರ್ ನ್ಯಾಯಕಟ್ಟ್‌ದ ಪುಸ್ತಕೊಡು ಬರೆತಿನವು ಮಾತೆನ್ಲಾ ಪ್ರತಿದಿನಲಾ ಕೈಕೊನೊಂದು ನಡಪಂದಿನಾಕುಲು ಪ್ರತಿಯೊರಿಲಾ ಶಾಪಗ್ರಸ್ತೆರಾದುಲ್ಲೆರ್.”

¹¹ ಅಂಚಾದ್ ನ್ಯಾಯಕಟ್ಟ್‌ನ್ ಕೈಕೊನುನೆಡ್ದ್ ಏರ್ಲಾ ದೇವೆರೆ ಎದುರುಗ್ ನೀತಿವಂತೆರ್ ಅಂದ್‌ದ್ ತೀರ್ಪು ಆವೆರೆಗ್ ಸಾದ್ಯ ಇಜ್ಜಿ ಪನ್ಪಿನವು ಸ್ವಷ್ಟಾದುಂಡು. ದಾಯೆಗ್ ಪಂಡ “ನೀತಿವಂತೆ ನಂಬಿಕೆಡ್ದೇ ಬದುಕುವೆ.” ಅಂದ್‌ದ್ ಬರೆತ್ಂಡ್.

¹² ಅಂಚೆನೇ ನ್ಯಾಯಕಟ್ಟ್ ನಂಬಿಕೆದ ಮಾರ್ಗ ಅತ್ತ್, “ಐತ ನಿಯಮೊಲೆನ್ ಸರಿಯಾದ್ ಆಚರಣೆ ಮಲ್ಪುನಾಯೆನೇ ಬದುಕುವೆ,” ಅಂದ್‌ದ್ ಬರೆತ್ಂಡ್.

¹³ ಕ್ರಿಸ್ತೆ ನಮನ್ ಶಾಪೊಡ್ದು ಬುಡ್ಪಾವೆರೆಗಾದ್ ತಾನೇ ಶಾಪಗ್ರಸ್ತೆ ಆಯೆ. ದಾಯೆಗ್ ಪಂಡ ನ್ಯಾಯಕಟ್ಟ್‌ಡ್ ಬರೆತ್ಂಡ್, “ಮರತ ಕಂಬೊಡು ನೇಲ್‌ದ್ ಸೈತಿನ ಪ್ರತಿಯೊರಿ ಶಾಪಗ್ರಸ್ತೆನೇ.”

¹⁴ ದೇವೆರ್ ಅಬ್ರಹಾಮುಗು ವಾಗ್ದಾನ ಮಲ್ತಿನ ಅವ್ವೇ ಆಶೀರ್ವಾದೊನು ಕ್ರಿಸ್ತ ಯೇಸುಡ್ದು ಪಿದಯಿದ ಜನೊಕುಲೆಗ್ಲಾ ಕೊರಿಯೆ. ಅಂಚಾಯಿನೆಡ್ದ್ ನಮ ನಂಬುನಾಕುಲೆಗ್ಲಾ ನಂಬಿಕೆಡ್ದೇ ವಾಗ್ದಾನದ ಆತ್ಮೊನ್ಲಾ ತಿಕ್ಕುಲೆಕ್ಕ ಮಲ್ತೆ.

ನ್ಯಾಯಕಟ್ಟ್ ಬೊಕ್ಕ ವಾಗ್ದಾನ

¹⁵ ಸಹೋದ್ರೆರೇ, ನಮ ಜೀವನದ ಒಂಜಿ ದೃಷ್ಟಾಂತೊನು ಯಾನ್ ಪನ್ಪೆ. ಒಂಜಿ ಒಡಂಬಡಿಕೆ ಬಜೀ ನರಮಾನಿನವೇ ಆದಿತ್ತ್‌ಂಡಲಾ ಅವೆನ್ ಏರ್ಲಾ ದೆತ್ತ್‌ದ್ ಪಾಡುಜೆರ್, ಏರ್ಲಾ ಐಕ್ ದಾಲಾ ಹೆಚ್ಚಿದೆನ್ ಕೂಡಾವುಜೆರ್.

¹⁶ ಅಂಚೆನೇ ದೇವೆರ್ ಅಬ್ರಹಾಮುಗ್ಲಾ, ಆಯನ ಸಂತಾನೊಗ್ಲಾ ವಾಗ್ದಾನ ಮಲ್ತ್‌ದಿತ್ತೆ. ದೇವೆರ್ ನಿನ ಸಂತಾನದಾಕುಲೆಗ್ ಪಂಡ್ದ್ ಮಾತೆರೆನ್ಲಾ ಸೇರಿಸಾವಂದೆ, ನಿನ ಸಂತಾನೊಗು ಪಂಡ್ದ್ ಒರಿಯನೇ ಸೇರಿಸಾವೊಡು ಪಂಡ್ದ್ ಪಂಡೆ. ಆ ಒರಿಯೇ ಕ್ರಿಸ್ತೆ ಆದುಲ್ಲೆ.

¹⁷ ಬೊಕ್ಕ ಯಾನ್ ನಿಕ್ಲೆಗ್ ಪನ್ಪಿನವು ಉಂದೇ. ದೇವೆರ್ ಅಬ್ರಹಾಮುಡೊಪ್ಪ ಮಲ್ತ್‌ದಿನ ಒಡಂಬಡಿಕೆನ್ ನಾಲ್ನೂತ್ತ ಮುಪ್ಪ ವರ್ಸೊಡ್ದು ಬೊಕ್ಕ ಬತ್ತಿನ ನ್ಯಾಯಕಟ್ಟ್ ದೆತ್ತ್ ಪಾಡಂದೆ ಆ ವಾಗ್ದಾನೊನು ವ್ಯರ್ಥ ಮಲ್ಪುಜೆ.

¹⁸ ಬಾಧ್ಯಸ್ತಿಗೆ ನ್ಯಾಯಕಟ್ಟ್‌ಡ್ದ್ ತಿಕ್ಕುನಾಂಡ, ದೇವೆರೆ ವಾಗ್ದಾನೊಡ್ದು ಅತ್ತ್ ಪಂಡ್ದಾಂಡ್. ಆಂಡ ದೇವೆರ್ ಅಬ್ರಹಾಮುಗು ಕೊರ್ತಿನ ಬಾಧ್ಯಸ್ತಿಗೆನ್ ವಾಗ್ದಾನೊಡ್ದೇ ದಯ ಮಲ್ತೆ.

¹⁹ ಅಂಚಾಂಡ ಮೋಶೆನ ನ್ಯಾಯಕಟ್ಟ್ ದಾಯೆಗ್? ವಾಗ್ದಾನದ ಸಂತಾನದಾಯೆ ಬನ್ನಮುಟ್ಟ ದೇವೆರ್ ಪಾಪ ಪಂಡ ದಾನೆ ಅಂದ್‌ದ್ ತೋಜಾವೆರೆಗಾದ್ ಅವೆನ್ ವಾಗ್ದಾನೊಡು ನೇಮಕ ಮಲ್ತ್‌ದ್ ದೂತೆರೆಡ್ದ್ ಮೋಶೆಗ್ ಕೊರಿನೆಡ್ದ್ ಮೋಶೆ ದೇವೆರೆಗ್ಲಾ ಜನೊಕುಲೆಗ್ಲಾ ನಡುತ ಮದ್ಯಸ್ತೆಗಾರೆ ಆಯೆ.

²⁰ ಒಂಜೆ ಪಕ್ಷ ಇತ್ತ್ಂಡ ಮದ್ಯಸ್ತೆ ಬೋಡಂದ್ ಇಜ್ಜಿ. ಆಂಡ ದೇವೆರಾಂಡಲಾ ಒರಿಯೇ.

²¹ ಅಂಚಾಂಡ ನ್ಯಾಯಕಟ್ಟ್‌ಗ್ಲಾ ದೇವೆರೆನ ವಾಗ್ದಾನೊಗ್ಲಾ ವಿರೋಧ ಉಂಡಾ? ಅಂಚ ಏಪಲಾ ತೆರಿಯೊನರೆ ಬಲ್ಲಿ, ಒರಿಯನ್ ಬದ್‌ಕಿಯೆರೆ ನ್ಯಾಯಕಟ್ಟ್ ಕೊರ್ದಿತ್ತ್‌ಂಡ, ಕಂಡಿತಾದ್ ನ್ಯಾಯಕಟ್ಟ್‌ಡ್ದ್ ನೀತಿ ಉಂಡಾತು.

²² ಆಂಡ ಶಾಸ್ತ್ರ ಪನ್ಪುಂಡು, ನಮ ಮಾತೆರ್ಲಾ ಪಾಪೊಗು ದಾಸೆರಾದುಲ್ಲ. ಅಂಚಾದ್ ದೇವೆರೆನ ವಾಗ್ದಾನ, ನಮ ಯೇಸು ಕ್ರಿಸ್ತ ಮಿತ್ತ್ ನಂಬಿಕೆ ದೀಪಿನೆಡ್ದ್ ಮಾತ್ರ ತಿಕ್ಕುಂಡು.

²³ ಕ್ರಿಸ್ತ ನಂಬಿಕೆದ ಕಾಲ ಬರ್ಪಿನೆಕ್ಕ್ ದುಂಬು, ನಂಕ್ ದುಂಬಗ್ ತೋಜಿಯೆರೆ ಇತ್ತಿ ಆ ನಂಬಿಕೆಗ್ ವಶ ಆಪಿನೆಕ್ಕಾದ್ ನ್ಯಾಯಕಟ್ಟ್‌ದ ಕೈ ತಿರ್ತ್ ಬಂಧನೊಡು ಇತ್ತ.

²⁴ ಅಂಚಾಯಿನೆಡ್ದ್ ನಂಕ್ ನಂಬಿಕೆಡ್ದ್ ನೀತಿವಂತೆರ್ ಅಂದ್‌ದ್ ತೀರ್ಪು ಆಪಿಲೆಕ್ಕ ನ್ಯಾಯಕಟ್ಟ್‌ದ ಕಾಲ ಕ್ರಿಸ್ತ ಕಡೆಕ್ಕ್ ಸೇರು ಮುಟ್ಟ ನಮನ್ ಕಾತ್ಂಡ್.

²⁵ ಇತ್ತೆ ನಂಬಿಕೆದ ಕಾಲ ಬತ್ತಿ ಬೊಕ್ಕ ನಂಕ್ ನ್ಯಾಯಕಟ್ಟ್ ಕಾಪುನ ಅಗತ್ಯ ಇಜ್ಜಿ.

²⁶ ಕ್ರಿಸ್ತ ಯೇಸುಡು ನಂಬಿಕೆ ದೀಪಿನೆಡ್ದಾದ್ ನಿಕುಲು ಮಾತೆರ್ಲಾ ದೇವೆರೆ ಜೋಕುಲು ಆದುಲ್ಲರ್.

²⁷ ದಾಯೆಗಂದ್ಂಡ ಕ್ರಿಸ್ತಡ್ ಸೇರಾಯೆರೆಗಾದ್ ದೀಕ್ಷಾಸ್ನಾನ ಮಲ್ತೊಂದಿನ ನಿಕುಲು ಕ್ರಿಸ್ತಡ್ ಒಂಜಾಯರ್.

²⁸ ನಿಕುಲು ಮಾತ ಕ್ರಿಸ್ತ ಯೇಸುಡ್ದು ಒಂಜೇ ಆದಿತ್ತಿನೆಡ್ದಾವರ, ಯೆಹೂದ್ಯೆರ್, ಗ್ರೀಕೆರ್, ಪನ್ಪಿನವು, ಗುಲಾಮೆ, ಸ್ವತಂತ್ರದಾಯೆ ಪನ್ಪಿನವು, ಆಣ್ ಪೊಣ್ಣು ಪನ್ಪಿನವು ಭೇದ ಇಜ್ಜಿ.

²⁹ ಇತ್ತೆ ನಿಕುಲು ಕ್ರಿಸ್ತನಾಕುಲಾದಿತ್ತ್‌ಂಡ, ನಿಕುಲು ಅಬ್ರಹಾಮುನ ಸಂತಾನಲಾ ದೇವೆರ್ ಅಬ್ರಹಾಮುಗು ಕೊರಿನ ವಾಗ್ದಾನದ ಬಾಧ್ಯಸ್ತೆರ್‌ಲಾ ಆದುಲ್ಲರ್.