ಗಲಾತ್ಯೆರೆಗ್ 2 - ಪೊಸ ಒಡಂಬಡಿಕೆಪೌಲು ಬೊಕ್ಕ ಬೇತೆ ಅಪೊಸ್ತಲೆರ್ 1 ಪದ್ನಾಲ್ ವರ್ಸೊಡ್ದು ಬೊಕ್ಕ ಯಾನ್ ಬಾರ್ನಬಡೊಪ್ಪ ತೀತನ್ಲಾ ಲೆತ್ತೊಂದು ಕುಡ ಯೆರೂಸಲೇಮುಗು ಪೋಯೆ. 2 ದೇವೆರೆನ ಪ್ರೇರಣೆಡ್ದಾವರ ಪಿದಯಿದ ಜನೊಕುಲೆ ನಡುಟು ಯಾನ್ ಸಾರಿಯುನ ಸುವಾರ್ತೆನ್ ಎಂಚಿನ ಅಂದ್‌ದ್ ಅಲ್ಪದಾಕುಲೆಗ್ ತೆರಿಪಾಯೆ. ಯಾನ್ ಮಲ್ತಿನ ಬೇಲೆ ಆವಡ್, ಪ್ರಯಾಸ ಆವಡ್ ವ್ಯರ್ಥ ಆವೆರೆ ಬಲ್ಲಿ ಅಂದ್‌ದ್ ಪ್ರತ್ಯೇಕಾದ್ ಅಲ್ಪದ ಪುದರ್ ಪೋಯಿನಾಕುಲೆ ದುಂಬುಲಾ ದೀಯೆ. 3 ಎನಡೊಪ್ಪ ಇತ್ತಿ ತೀತೆ ಗ್ರೀಕೆ ಆದಿತ್ತ್‌ಂಡಲಾ ಆಯಗ್ ಸುನ್ನತಿ ಆವೊಡು ಅಂದ್‌ದ್ ಏರ್ಲಾ ಬಲತ್ಕಾರ ಮಲ್ತಿಜೆರ್. 4 ಸಭೆಕ್ ಕಲ್ವತನೊಟು ಸೇರ್ದಿನ ಕೆಲವು ಸುಳ್ಳು ಸಹೋದ್ರೆರ್ ಅಲ್ಪ ಇತ್ತಿನೆಡ್ದಾವರ ಬಲತ್ಕಾರ ಆವು ಇನ್ಪಿನ ಪೋಡಿಗೆ ಇತ್ತ್ಂಡ್. ಅಕುಲು ಕ್ರಿಸ್ತ ಯೇಸುನ ಬಲಿದಾನೊಡ್ದು ಎಂಕುಲೆಗುಪ್ಪುನ ಸ್ವತಂತ್ರೊನು ದೆತ್ತ್ ಪಾಡ್ದ್ ಯೆಹೂದಿ ಆಚಾರೊಲೆನ್ ಕೈಕೊಂದು ಗುಲಾಮತನೊಡು ಉಪ್ಪೊಡು ಅಂದ್‌ದ್ ಪ್ರಯತ್ನ ಮಲ್ತೊಂದಿತ್ತೆರ್. 5 ಆಂಡ ಸುವಾರ್ತೆದ ಸತ್ಯಾರ್ಥ ನಿಕ್ಲೆಡ್ ಸ್ಥಿರಾದುಪ್ಪೊಡು ಅಂದ್‌ದ್ ಎಂಕುಲು ಒಂಜಿ ಕ್ಷಣೊಕಾಂಡಲಾ ಅಕ್ಲೆಗ್ ಒಪ್ಪಿಜ. 6 ಆಂಡ ಪುದರ್ ಪೋಯಿನಾಕುಲೆಡ್ದ್ ಎಂಕ್ ದಾಲಾ ತಿಕ್ಕ್‌ದಿಜಿ. ಅಕುಲು ಪಿರಕ್‌ಡ್ ಎಂಚಿತ್ತಿನಾಕುಲು ಆದಿತ್ತೆರಾ ಎಂಕ್ ಗೊತ್ತಿಜಿ. ದೇವೆರೆಗ್ ವಾ ಪಕ್ಷಪಾತಲಾ ಇಜ್ಜಿ. ಅಕುಲು ಎನ ಪಾತೆರೊಗು ಒಪ್ಪಿಯೆರ್ ಆಂಡ ಎಂಕ್ ದಾಲಾ ಕಲ್ಪಾದ್ ಕೊರ್ಜೆರ್. 7 ಐತ ಪಗತೆಗ್ ಸುನ್ನತಿದಾಕುಲೆಗ್ ಸುವಾರ್ತೆ ಸಾರಿಯುನ ಜವಾಬ್ದಾರಿನ್ ದೇವೆರ್ ನಂಬಿಕೆಡ್ ಪೇತ್ರಗ್ ಕೊರಿಲೆಕ್ಕನೇ, ಸುನ್ನತಿದಾಂತಿನಾಕುಲೆಗ್ ಸುವಾರ್ತೆ ಸಾರಿಯುನ ಜವಾಬ್ದಾರಿನ್ ಎಂಕ್‌ಲಾ ಕೊರ್ದಿತ್ತೆ. 8 ದಾಯೆಗಂದ್ಂಡ ಸುನ್ನತಿದಾಕುಲೆಗ್ ಅಪೊಸ್ತಲ ಕೆಲಸೊನು ಪೇತ್ರಗ್ ಒದಗಾಯಿನ ದೇವೆರ್ ಎಂಕ್‌ಲಾ ಪಿದಯಿದ ಜನೊಕುಲೆಗ್ ಸುವಾರ್ತೆ ಸಾರಿಯುನ ಕೆಲಸೊನು ಒದಗಾಯೆ. 9 ಉಂದತ್ತಂದೆ, ಸಭೆತಕಂಬೊಲು ಅಂದ್‌ದ್ ಪುದರ್ ಪೋಯಿ ಯಾಕೋಬುಲಾ ಪೇತ್ರೆಲಾ ಯೋಹಾನೆಲಾ ದೇವೆರ್ ಎಂಕ್ ಕೊರ್ತಿನ ದಯೊನು ತೆರಿಯೊಂದು ಬಾರ್ನಬನ್ಲಾ ಎನನ್ಲಾ ತನ್ಕುಲೆ ಜತೆಸೇವಕೆರ್ ಅಂದ್‌ದ್ ದೆತ್ತೊಂಡೆರ್. ಪಿದಯಿದ ಜನೊಕುಲೆಗ್ ಸುವಾರ್ತೆ ಸಾರಿಯೊಂದೇ ಉಪ್ಪುಲೆ ಅಂದ್‌ದ್ ಎಂಕ್ಲೆಗ್ ಉತ್ತೇಜನ ಮಲ್ತೆರ್; ಆಂಡ ತನ್ಕುಲು ಸುನ್ನತಿದಾಕುಲೆ ನಡುಟು ಬೇಲೆ ಮಲ್ಪುವ ಅಂದ್‌ದ್ ಅನ್ಯಮನ್ಯದ ಬಲತ್ತ ಕೈ ಕೊರಿಯೆರ್. 10 ಆಂಡ ನಿಕುಲು ಎಂಕ್ಲೆ ಒಟ್ಟುಗುಪ್ಪುನ ಬಡವೆರೆನ್ ನೆನೆಪು ಮಲ್ತೊನೊಡು ಪಂಡ್ದ್ ಒಂಜೇ ಸಂಗತಿನ್ ನಟ್ಟೊಂಡೆರ್; ಅವೆನ್ ಮಲ್ಪೆರೆ ಯಾನ್ ಉಮೇದ್‌ಡ್ ಇತ್ತೆ. ಪೌಲು ಪೇತ್ರನ್ ಅಂತಿಯೋಕ್ಯಡ್ ಎದುರಿಸಾವುನವು 11 ಪೇತ್ರೆ ಅಂತಿಯೋಕ್ಯಗ್ ಬತ್ತಿನಪಗ ಆಯೆ ತಪ್ಪುಗಾರೆ ಆದ್ ತೋಜಿದ್ ಬತ್ತಿನೆಡ್ದ್ ಯಾನ್ ಆಯನ್ ಎದುರುಡೇ ಜೋರ್ ಮಲ್ತೆ. 12 ದಾಯೆಗಂದ್ಂಡ ಯಾಕೋಬುನ ಕಡೆಡ್ದ್ ಕೆಲೆವೆರ್ ಬರೊಡ್ದು ದುಂಬು ಪೇತ್ರೆ ಪಿದಯಿದ ಜನೊಕುಲೆ ಒಟ್ಟುಗು ವಣಸ್ ಮಲ್ತೊಂದಿತ್ತೆ. ಆಂಡ ಸುನ್ನತಿ ಆವೊಡೇ ಪನ್ಪಿನಾಕುಲೆಡ್ದ್ ತನ್ಕ್ ವಿರೋಧ ಬರು ಅಂದ್‌ದ್ ಯಾಕೋಬುನ ಸ್ನೇಹಿತೆರ್ ಬತ್ತಿನಪಗ ಪೇತ್ರೆ ಪಿದಯಿದ ಜನೊಕುಲೆಡೊಪ್ಪ ವಣಸ್ ಮಲ್ಪೆರೆ ಪೋಡಿಯೆ. 13 ಅಂಚೆನೇ ಬೇತೆ ಯೆಹೂದಿ ಕ್ರೈಸ್ತೆರ್‌ಲಾ ಆಯಡೊಪ್ಪ ಸೇರೊಂದು ಅಂಚೆನೇ ನಾಟಕ ಮಲ್ತೆರ್. ಅಂಚೆನೇ ಬಾರ್ನಬೆಲಾ ನಾಟಕೊಗು ಒಳಗಾಯೆ. 14 ಅಕುಲು ಸುವಾರ್ತೆದ ಸತ್ಯೊಗು ಸರಿಯಾದ್ ನಡಪುಜೆರ್ ಅಂದ್‌ದ್ ಯಾನ್ ತೂನಗ ಮಾತೆರೆ ಎದುರು ಪೇತ್ರಡ ಪಂಡಿನಿ, “ಈ ಒರಿ ಯೆಹೂದಿ ಆದಿತ್ತ್‌ದ್ ಯೆಹೂದ್ಯೆರ್ ಲೆಕ್ಕ ನಡಪಂದೆ ಈ ಪಿದಯಿದ ಜನೊಕುಲೆ ಲೆಕ್ಕ ನಡತೊಂದು ಉಲ್ಲತ್ತಾ. ಪಿದಯಿದ ಜನೊಕುಲೆಗ್ ನಿಕುಲು ಯೆಹೂದ್ಯೆರೆ ಪದ್ದತಿನ್ ಕೈಕೊನೊಡು ಅಂದ್‌ದ್ ಈ ಒತ್ತಾಯ ಮಲ್ಪುನ ಸರಿಯಾ?” ರಕ್ಷಣೆ ನಂಬಿಕೆಡ್ದೇ ಯೆಹೂದ್ಯೆರ್‌ಗ್ಲಾ ಪಿದಯಿದ ಜನೊಕುಲೆಗ್ಲಾ 15 ನಮ ಆಂಡಲಾ ಪುಟ್ಟು ಯೆಹೂದ್ಯೆರ್. ಪಾಪಿಲು ಅಂದ್‌ದ್ ಲೆಪ್ಪುನ ಪಿದಯಿದ ಜನೊಕುಲು ಅತ್ತ್. 16 ಆಂಡಲಾ ಒರಿ ನರಮಾನಿ ನೀತಿವಂತೆ ಅಂದ್‌ದ್ ತೀರ್ಪು ಆಪುಜಿ ಯೇಸು ಕ್ರಿಸ್ತ ಮಿತ್ತ್ ನಂಬಿಕೆ ದೀಪಿನೆಡ್ದೇ ಅತ್ತಂದೆ ನ್ಯಾಯಕಟ್ಟ್‌ನ್ ಕೈಕೊನುನೆಡ್ದ್ ಅತ್ತ್. ಉಂದೆನ್ ತೆರಿಯೊಂದಿನ ಎಂಕುಲುಲಾ ನ್ಯಾಯಕಟ್ಟ್‌ನ್ ಬುಡ್ದು, ಕ್ರಿಸ್ತ ಯೇಸುಡು ನಂಬಿಕೆ ದೀಪಿನಕುಲಾಯ. ದಾಯೆಗಂದ್ಂಡ ನ್ಯಾಯಕಟ್ಟ್‌ನ್ ಕೈಕೊನುನೆಡ್ದ್ ಏರ್ಲಾ ದೇವೆರೆ ಒಟ್ಟಗು ನೀತಿವಂತೆ ಅಂದ್‌ದ್ ತೀರ್ಪು ಆವೆರೆ ಸಾದ್ಯ ಇಜ್ಜಿ. 17 ಆಂಡ ನಮ ಕ್ರಿಸ್ತಡ್ ನೀತಿವಂತೆರ್ ಆವೆರೆ ಪ್ರಯತ್ನ ಮಲ್ಪುನಗ ನಮ ನ್ಯಾಯಕಟ್ಟ್‌ನ್ ಬುಡಿಯ ಪನ್ಪಿನೆಕ್ಕಾದ್ ಪಾಪಿಲಾದ್ ತೋಜಿದ್ ಬರುವನಾ? ಕ್ರಿಸ್ತೆ ನಮ ಪಾಪೊಗು ಸಹಾಯಕೆ ಅಂದ್‌ದ್ ನೆತ್ತ ಅರ್ಥನಾ? ಕಂಡಿತಾದ್ ಅತ್ತ್. 18 ಯಾನ್ ಬೂರ್ಪಾಯಿನೆನೇ ಕುಡೊರ ಕಟ್ಟಿಯೆಡ, ಎನನ್ ಯಾನೇ ಅಪರಾಧಿ ಅಂದ್‌ದ್ ತೋಜಾದ್ ಕೊರ್ಪೆತ್ತಾ? 19-20 ಯಾನಾಂಡಲಾ ದೇವೆರೆಗಾದ್ ಬದುಕುಲೆಕ್ಕ ನ್ಯಾಯಕಟ್ಟ್‌ಡ್ದ್ ನ್ಯಾಯಕಟ್ಟ್‌ದ ಪಾಲ್‌ಗ್ ಸೈತ್ ಪೋಯೆ. ಎನ ದುಂಬುದ ಸ್ವಭಾವ ಕ್ರಿಸ್ತಡೊಪ್ಪ ಕ್ರುಸ್ಸುಗು ಪಾಡ್ದಿನವು ಆದುಂಡು. ನನ ಬದುಕುನು ಯಾನತ್ತ್, ಕ್ರಿಸ್ತೆ ಎನಡ್ ಬದುಕೊಂದುಲ್ಲೆ. ಇತ್ತೆ ಶರೀರೊಡು ಯಾನ್ ಬದುಕುನು ಎಂಚಂದ್ಂಡ ದೇವೆರೆ ಮಗನ ಮಿತ್ತ್ ನಂಬಿಕೆ ದೀಯಿನೆಡ್ದ್. ಆಯೆ ಎನನ್ ಪ್ರೀತಿ ಮಲ್ತ್‌ದ್ ಎಂಕಾದ್ ತನನೇ ಒಚ್ಚಿದ್ ಕೊರಿಯೆ. 21 ದೇವೆರೆ ದಯೊನು ಯಾನ್ ಅರ್ಥದಾಂತಿನವು ಅಂದ್‌ದ್ ಎನ್ನುಜಿ. ನ್ಯಾಯಕಟ್ಟ್‌ಡ್ದ್ ನೀತಿವಂತೆ ಇನ್ಪಿ ತೀರ್ಪು ಆಪಿನಾಂಡ ಕ್ರಿಸ್ತೆ ಸೈಪಿನ ಅಗತ್ಯ ಇತ್ತ್‌ಜಿ. |
New Life Literature