ಗಲಾತ್ಯೆರೆಗ್ 1 - ಪೊಸ ಒಡಂಬಡಿಕೆ

ವಂದನೆಲು

^1-2 ನರಮಾನಿಲೆಡ್ದಾವಡ್, ನರಮಾನಿಲೆ ಅಧಿಕಾರೊಡ್ದಾವಡ್ ಅಪೊಸ್ತಲೆ ಆವಂದೆ ಯೇಸು ಕ್ರಿಸ್ತಡ್ದ್‌ಲಾ ಆಯನ್ ಸೈತಿನಾಕುಲೆಡ್ದ್ ಲಕ್ಕಾದಿ ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ಅಪೊಸ್ತಲ ಬೇಲೆನ್ ಪಡೆಯಿನ ಪೌಲು ಇನ್ಪಿ ಯಾನ್ಲಾ ಎನಡೊಪ್ಪ ಉಪ್ಪು ಮಾತ ಸಹೋದ್ರೆರ್‌ಲಾ ಗಲಾತ್ಯೊಡುಪ್ಪು ಸಭೆತಾಕುಲೆಗ್ ಬರೆಪಿನಿ ದಾನೆಂದ್ಂಡ,

³ ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.

⁴ ಆಯೆ ಇತ್ತೆದ ದುಷ್ಟ ಲೋಕೊಡ್ದು ನಮನ್ ಬುಡ್ಪಾವೆರೆಗಾದ್, ನಮ ಅಮ್ಮೆ ಆದುಪ್ಪು ದೇವೆರೆ ಚಿತ್ತೊಗು ಸರಿಯಾದ್ ನಮ ಪಾಪೊಲೆಗ್ ಬೋಡಾದ್ ತನನ್ ತಾನೇ ಬಲಿಯಾದ್ ಅರ್ಪಿಸಾಯೆ.

⁵ ಅಂಚಾದ್ ದೇವೆರೆಗ್ ಏನಿತ್ಯೇನಿಗ್ಲಾ ಮೈಮೆ ಆವಡ್; ಆಮೆನ್.

ಒಂಜೇ ಸುವಾರ್ತೆ

⁶ ಕ್ರಿಸ್ತನ ದಯೊಡ್ದು ನಿಕ್ಲೆನ್ ಲೆತ್ತಿನಾಯನ್ ನಿಕುಲು ಈತ್ ಬೇಗ ಬುಡ್ದು ಬೇತೆ ಸುವಾರ್ತೆ ಪತ್ತೊಂಡಿನೆಕ್ಕ್ ಅಚ್ಚಿರ ಆಪುಂಡು.

⁷ ಅವು ಸುವಾರ್ತೆನೇ ಅತ್ತ್, ಆಂಡ ಕೆಲೆವೆರ್ ನಿಕ್ಲೆ ನಡುಟು ಗಲಿಬಿಲಿ ಪುಟ್ಟಾದ್ ಕ್ರಿಸ್ತನ ಸುವಾರ್ತೆ ಬೇತೆ ಮಲ್ಪೆರೆಗ್ ಪ್ರಯತ್ನ ಮಲ್ತೊಂದುಲ್ಲೆರ್.

⁸ ಆಂಡ ಎಂಕುಲು ನಿಕ್ಲೆಗ್ ಸಾರಿನ ಸುವಾರ್ತೆಗ್ ವಿರೋಧಾದ್ ಎಂಕುಲಾವಡ್ ಪರಲೋಕೊಡ್ದು ಬತ್ತಿನ ಒರಿ ದೂತೆನೇ ಆವಡ್ ನಿಕ್ಲೆಗ್ ಸಾರಿಯೆಡ, ಆಯೆ ಶಾಪಗ್ರಸ್ತೆ ಆವಡ್.

⁹ ಇತ್ತೆ ನಿಕುಲು, ಒಪ್ಪಿನ ಸುವಾರ್ತೆಗ್ ವಿರೋಧವಾಯಿನೆನ್ ಬೇತೆ ಒವ್ವೆನಾಂಡಲಾ ಏರಾಂಡಲಾ ನಿಕ್ಲೆಗ್ ಸಾರಿಯೆಡ, ಆಯೆ ಶಾಪಗ್ರಸ್ತೆ ಆದುಪ್ಪಡ್ ಅಂದ್‌ದ್ ಎಂಕುಲು ದುಂಬು ಪಂಡಿಲೆಕ್ಕನೆ ಇತ್ತೆಲಾ ಕುಡ ಯಾನ್ ಪನ್ಪೆ.

¹⁰ ಯಾನ್ ಇತ್ತೆ ಏರೆನ್ ಒಪ್ಪಿಯಾವೆರೆ ಪ್ರಯತ್ನ ಮಲ್ತೊಂದುಲ್ಲೆ? ನರಮಾನಿಲೆನಾ? ದೇವೆರೆನಾ? ಅತ್ತ್‌ಡ ಯಾನ್ ನರಮಾನಿಲೆನ್ ಮೆಚ್ಚಾವೆರೆ ತೂಪೆನಾ? ನನಲಾ ಯಾನ್ ನರಮಾನಿಲೆನ್ ಮೆಚ್ಚಾವೊಡಂದ್ ಇತ್ತೆಡ ಯಾನ್ ಕ್ರಿಸ್ತನ ದಾಸೆ ಅತ್ತ್.

ಪೌಲು ಎಂಚ ಅಪೊಸ್ತಲೆ ಆದುಪ್ಪುನವು

¹¹ ಸಹೋದ್ರೆರೇ, ಯಾನ್ ಸಾರಿದಿ ಸುವಾರ್ತೆ ನರಮಾನಿ ಆಲೋಚನೆದವು ಅತ್ತ್ ಅಂದ್‌ದ್ ನಿಕ್ಲೆಗ್ ತೆರಿಯೊಡು.

¹² ಯಾನ್ ಅವೆನ್ ನರಮಾನಿಲೆಡ್ದ್ ಹೊಂದುದಿಜಿ, ಎಂಕ್ ಏರ್ಲಾ ಬೋಧನೆ ಮಲ್ತ್‌ದಿಜೆರ್, ಯೇಸು ಕ್ರಿಸ್ತೆನೇ ಎಂಕ್ ತೆರಿಪಾದೆ.

¹³ ಎಂಚಂದ್ಂಡ ದುಂಬು ಯಾನ್ ಯೆಹೂದ್ಯ ಮತೊಟು ಉಪ್ಪುನಗ ಎನ ನಡತೆನ್ ಕೇಂಡ್ದರತ್ತಾ. ಯಾನ್ ದೇವೆರೆ ಸಭೆನ್ ಭಂಗ ಬರ್ಪಾದ್ ಅವೆನ್ ಹಾಳ್ ಮಲ್ತೊಂದಿತ್ತೆ.

¹⁴ ಉಂದತ್ತಂದೆ ಯಾನ್ ಎನ ಹಿರಿಯೆರೆಡ್ದ್ ಬೈದಿನ ಆಚಾರ ವಿಚಾರೊಡು ಬಾರಿ ಪ್ರೀತಿಡ್ ಇತ್ತ್‌ದ್ ಎನ ಸಮಪ್ರಾಯದ ಜನೊಕುಲೆ ಒಟ್ಟುಗು ಮಾತೆರೆಡ್ದ್ ಹೆಚ್ಚ್ ಯೆಹೂದಿ ಮತತ ಆಚಾರೊಡು ಆಸಕ್ತಿದಾಯೆ ಆದಿತ್ತೆ.

¹⁵ ಆಂಡ ಯಾನ್ ಅಪ್ಪೆ ಬಂಜಿಡ್ಡುಪುನಗನೇ ಪ್ರತ್ಯೇಕ ಮಲ್ತ್‌ದ್ ತನ ದಯೊಟು ಲೆತ್ತಿನ ದೇವೆರ್ ಎನನ್ ಅಜತ್ ದೆತ್ತೊಂಡೆ.

¹⁶ ತನ ಮಗನ್, ಯಾನ್ ಪಿದಯಿದ ಜನೊಕುಲೆಗ್ ಸಾರಿಯುಲೆಕ್ಕ ಆಯನ್ ಎನಡ ತೆರಿಪಾದ್ ಕೊರಿಯೆರೆ ದೇವರೆನ ಚಿತ್ತ ಆದಿತ್ತ್ಂಡ್. ಉಂದು ಆಯಿನಪಗ ಯಾನ್ ವಾ ನರಮಾನಿಲೆ ಕೈತಡೆಗ್ಲಾ ಪೋಯಿಜಿ.

¹⁷ ಯೆರೂಸಲೇಮುಡು ಎನಡ್ದ್ ದುಂಬು ಅಪೊಸ್ತಲೆರಾಯಿನಾಕುಲೆ ಕೈತಲ್‌ ಪೋವಂದೆ ಯಾನ್ ಅರೇಬ್ಯಗ್ ಪೋದು, ಪಿರ ದಮಸ್ಕೊಗು ಬತ್ತೆ.

¹⁸ ಮೂಜಿ ವರ್ಸೊಡ್ದು ಬೊಕ್ಕ ಪೇತ್ರನ ಗುರ್ತ ಮಲ್ತೊನೊಡಂದ್‌ದ್ ಯೆರೂಸಲೇಮುಗು ಪೋದು ಆಯಡೊಪ್ಪ ಪದಿನೈನ್ ದಿನ ಇತ್ತೆ.

¹⁹ ಆಂಡ ಕರ್ತವೆ ಆದುಪ್ಪು ಯೇಸುನ ಮೆಗ್ಯೆ ಯಾಕೋಬುನು ಅತ್ತಂದೆ ಅಪೊಸ್ತಲೆರೆಡ್ ಬೇತೆ ಏರೆನ್ಲಾ ತೂತಿಜಿ.

²⁰ ಯಾನ್ ನಿಕ್ಲೆಗ್ ಬರೆಪಿನ ಸಂಗತಿಲು ಸುಳ್ಳು ಅತ್ತ್ ಅಂದ್‌ದ್ ದೇವೆರೆ ಎದುರು ಪ್ರಮಾಣ ಮಲ್ಪುವೆ.

²¹ ಐಡ್ದ್ ಬೊಕ್ಕ ಯಾನ್ ಸುರಿಯ ಬೊಕ್ಕ ಕಿಲಿಕ್ಯ ಸೀಮೆಲೆಗ್ ಪೋಯೆ.

²² ಆಂಡ ಕ್ರಿಸ್ತಡುಪ್ಪು ಯೂದಾಯದ ಸಭೆತ ಜನೊಕುಲೆಗ್ ಎನ ಗುರ್ತ ಇತ್ತ್‌ಜಿ.

²³ ಆ ಸಭೆತ ಜನೊಕುಲೆಗ್ ಈತೇ ಗೊತ್ತಿತ್ತ್ಂಡ್, “ದುಂಬು ಎಂಕ್ಲೆಗ್ ಭಂಗ ಬರ್ಪಾಯಿನಾಯೆಲಾ ಬೊಕ್ಕ ಕ್ರಿಸ್ತನ ಸಭೆನ್ ಹಾಳ್ ಮಲ್ಪೆರೆ ತೂವೊಂದು ಇತ್ತಿನಾಯೆಲಾ, ಇತ್ತೆ ಅಂಚಿನಾಯೆ ಕ್ರಿಸ್ತನ ನಂಬಿಕೆನ್ ಸಾರಿಯುವೆ ಇನ್ಪಿನೆನ್ ಮಾತ್ರ ಕೇಂಡ್ದ.”

²⁴ ಅಂಚಾದ್ ಅಕುಲು ಎನ ದಿಸೆಡ್ದ್ ದೇವೆರೆನ್ ಪುಗರಿಯೆರ್.