ಎಫೆಸ್ಯೆರೆಗ್ 6 - ಪೊಸ ಒಡಂಬಡಿಕೆಜೋಕುಲುಲಾ ಅಪ್ಪೆಅಮ್ಮೆಲಾ 1 ಜೋಕುಲೇ, ನಿಕುಲು ಕರ್ತವಗ್ ಸೇರ್ದಿನಾಕುಲು ಆದುಪ್ಪುನೆಡ್ದ್ ನಿಕ್ಲೆನ ಅಪ್ಪೆಅಮ್ಮಾಡ್ಲೆಗ್ ಒಳಗಾದುಪ್ಪುಲೆ. ಉಂದು ನೀತಿ ಆದುಂಡು. 2 ಉಂದು ವಾಗ್ದಾನ ಇತ್ತಿನ ಸುರುತ್ತ ಅಪ್ಪಣೆ ಇಂಚ ಉಂಡು, “ನಿನ ಅಪ್ಪೆಅಮ್ಮಾಡ್ಲೆಗ್ ಸನ್ಮಾನ ಮಲ್ಪುಲ. 3 ಸನ್ಮಾನ ಮಲ್ತಡ ನಿಕ್ಕ್ ಮಾತಲಾ ಎಡ್ಡೆ ಆಪುಂಡು ಬೊಕ್ಕ ಈ ಭೂಮಿದ ಮಿತ್ತ್ ದಿಂಜಕಾಲ ಬದುಕುವ.” 4 ಅಪ್ಪೆಅಮ್ಮಾಡ್ಲೇ, ನಿಕ್ಲೆ ಜೋಕುಲೆಗ್ ಕೋಪ ಲಕ್ಕಾವಂದೆ, ಕರ್ತವಡ್ದ್ ಬರ್ಪಿನ ಬೋಧನೆನ್ಲಾ ಶಿಸ್ತ್‌ನ್ಲಾ ಅಕ್ಲೆಗ್ ಕಲ್ಪಾದ್ ತಾಂಕ್ಲೆ. ಚಾಕ್ರಿದಾಕುಲುಲಾ ಯಜಮಾನೆರ್‌ಲಾ 5 ಚಾಕ್ರಿದಾಕುಲೇ, ಈ ಲೋಕದ ನಿಕ್ಲೆ ಯಜಮಾನೆರೆಗ್ ಮಾರ್ಯಾದಿಡ್ಲಾ, ಪೋಡಿಗೆಡ್ಲಾ ತಗ್ಗ್‌ಬಗ್ಗ್‌ದಿನಾಕುಲಾದ್‌ಲಾ ಉಪ್ಪುಲೆ. ಕ್ರಿಸ್ತಗ್ ಸೇವೆ ಮಲ್ಪುಲೆಕ್ಕನೇ ಅಕ್ಲೆನ ಸೇವೆನ್ ಉಡಲ್ ದಿಂಜಿದ್ ಮಲ್ಪುಲೆ. 6 ನರಮಾನಿಲೆನ್ ಮೆಚ್ಚಾವುನಾಕುಲು ಮಲ್ಪುಲೆಕ್ಕ ಯಜಮಾನ್ಯೆರ್ ತೂವೊಂದುಪ್ಪುನಗ ಮಾತ್ರ ಚಾಕ್ರಿ ಮಲ್ಪಂದೆ ಕ್ರಿಸ್ತನ ಚಾಕ್ರಿದಾಕುಲಾದ್ ದೇವೆರೆನ ಚಿತ್ತೊಗು ಸರಿಯಾದ್ ಉಡಲ್ ದಿಂಜಿದ್ ಚಾಕ್ರಿ ಮಲ್ಪುಲೆ. 7 ನರಮಾನಿಲೆಗಾದ್ ಅತ್ತ್, ಕರ್ತವನ ಚಿತ್ತೊಗು ಸರಿಯಾದ್ ದಿಂಜಿದಿ ಉಡಲ್‌ಡ್ದ್ ಸೇವೆ ಮಲ್ಪುಲೆ. 8 ದಾಯೆಗಂದ್ಂಡ, ನಮ ಚಾಕ್ರಿದಾಕುಲಾಂಡಲಾ, ಯಜಮಾನೆರಾಂಡಲಾ ನಮ ಮಲ್ತಿನ ಎಡ್ಡೆ ಬೇಲೆಗಾದ್ ಕರ್ತವೆ ನಂಕ್ ಉಡಿಗೆರೆ ಕೊರ್ಪೆ ಇನ್ಪಿನೆನ್ ಮದಪಡೆ. 9 ಯಜಮಾನೆರೇ, ನಿಕ್ಲೆ ಚಾಕ್ರಿದಾಕುಲೆನ್ಲಾ ಅಂಚೆನೇ ತೂವೊನ್ಲೆ. ಅಕ್ಲೆನ್ ಪೋಡಿಯಾವಡೆ. ನಿಕ್ಲೆಗ್ ಇರ್ವೆರೆಗ್ಲಾ ಪರಲೋಕೊಡು ಒರಿ ಯಜಮಾನೆ ಉಲ್ಲೆ. ಆಯಡ ಯಜಮಾನೆ ಬೊಕ್ಕ ಚಾಕ್ರಿದಾಯೆ ಪನ್ಪಿನ ಪಕ್ಷಪಾತ ಇಜ್ಜಿ ಇನ್ಪಿನೆನ್ ಮದಪಡೆ. ದೇವೆರೆನ ಪೂರ ಆಯುಧೊಲು 10 ಕಡೆತ ಪಾತೆರ ದಾನೆಂದ್ಂಡ, ನಿಕುಲು ಕರ್ತವಡ್ಲಾ ಆಯನ ಶಕ್ತಿಡ್ಲಾ ಬಲ ಪಡೆಲೆ. 11 ಸೈತಾನನ ಮಾತ ತಂತ್ರೊಲೆನ್ ಎದುರಿಸಾದ್ ಗಟ್ಟಿಯಾದ್ ಉಂತೆರೆ ಆಪಿಲೆಕ್ಕ ದೇವೆರೆನ ಮಾತ ಆಯುಧೊಲೆನ್ ಪಾಡೊನ್ಲೆ. 12 ನಮ ಲಡಯಿ ಮಲ್ಪುನು ನರಮಾನಿಲೆಡ ಅತ್ತಂದೆ ತೋಜಂದಿನ ದುಷ್ಟ ಲೋಕದ ಅಧಿಕಾರಿಲೆ ವಿರೋಧಲಾ, ಈ ಕತ್ತಲೆದ ಲೋಕದ ಅಧಿಪತಿಲೆ ವಿರೋಧಲಾ, ಪರಲೋಕೊಲೆಡುಪ್ಪು ದುಷ್ಟ ಆತ್ಮೊಲೆ ವಿರೋಧಲಾ ಲಡಯಿ ಮಲ್ಪುನಾಕುಲು ಆದುಲ್ಲ. 13 ಉಂದೆಕ್ಕಾದ್ ಹಾಳ್ ದಿನೊಟು ವೈರಿಲೆನ ಎದುರು ಉಂತೆರೆ ಬೋಡಿತ್ತಿನೆನ್ ತಯಾರ್ ಮಲ್ತ್‌ದ್ ಜಯಶಾಲಿಲು ಆವೆರೆ, ದೇವೆರ್ ನಂಕ್ ಒದಗಾದಿನ ಪೂರ ಆಯುಧೊಲೆನ್ಲಾ ದೆತ್ತೊನ್ಲೆ. 14 ಸತ್ಯ ಇನ್ಪಿ ಸೊಂಟ ಪಟ್ಟಿನ್ ಕಟ್ಟೊಂದು, ಗಟ್ಟಿಯಾದ್ ಉಂತುಲೆ. ದೇವೆರೆ ನೀತಿ ಇನ್ಪಿ ಶರೀರದ ಕವಚೊನು ಪಾಡೊನ್ಲೆ. 15 ಸುವಾರ್ತೆಡ್ದ್ ಬರ್ಪಿನ ಸಮಾಧಾನ ಇನ್ಪಿ ಜೋಡುಲೆನ್ ಪಾಡೊನ್ಲೆ. 16 ಈ ಹಾಳ್ ದಿನೊಕುಲೆಡ್ ಈತೇ ಅತ್ತ್, ನೆಡ್ದ್ ಬೊಕ್ಕ ನಂಬಿಕೆ ಇನ್ಪಿನ ಅಡ್ಡಣೊನು ಪತ್ತೊಂದುಪ್ಪುಲೆ, ದಾಯೆಗಂದ್ಂಡ ಈ ಅಡ್ಡಣೊಡು ಸೈತಾನೆ ಕಡಪುಡುನ ತೂತ ಬಾಣೊಲೆನ್ ತೆಕ್ಕಾವೆರೆ ಸಾದ್ಯ ಆಪುಂಡು. 17 ಉಂದೇ ಅತ್ತ್, ರಕ್ಷಣೆ ಪನ್ಪಿನ ಟೊಪ್ಪಿ ತರೆತ ಮಿತ್ತ್ ದೀವೊನ್ಲೆ. ದೇವೆರೆ ಪಾತೆರ ಇನ್ಪಿನ ಆತ್ಮನ ಕತ್ತಿನ್ ಪತ್ತೊನ್ಲೆ. 18 ಮಾತ ಕಾಲೊಲೆಡ್ಲಾ ಪ್ರತಿಯೊಂಜಿ ಸಂಗತಿಗಾದ್ರಲಾ, ಆತ್ಮಡ್ ಪ್ರಾರ್ಥನೆ ಮಲ್ಪುಲೆ. ಎಚ್ಚರಿಕೆ ಆದಿತ್ತ್‌ದ್ ಮಾತ ದೇವಜನೊಕುಲೆಗಾದ್ ಬುಡಂದೆ ಪ್ರಾರ್ಥನೆ ಮಲ್ಪುನಾಕುಲು ಆದುಪ್ಪುಲೆ. 19 ಯಾನ್ ಬಾಯಿ ಜಪ್ಪುನಗ ಪೂರ್ವಕಾಲೊಡು ದೆಂಗ್‌ದಿತ್ತಿನ ಸುವಾರ್ತೆದ ಸತ್ಯೊನು ಧೈರ್ಯೊಡು ತೆರಿಪಾವೆರೆ ದೇವೆರ್ ಎಂಕ್ ಒದಗಾದ್ ಕೊರಡ್ ಪಂಡ್ದ್‌ಲಾ ಪ್ರಾರ್ಥನೆ ಮಲ್ಪುಲೆ. 20 ಯಾನ್ ಸುವಾರ್ತೆಗ್ ಬೋಡಾದ್ ರಾಯಭಾರಿ ಆದ್ ಸಂಕಲೆಡ್ ಉಪ್ಪುನಗ ಯಾನ್ ಎಂಚ ಪಾತೆರೊಡು, ಆ ದೇವೆರೆ ವಿಷಯೊನು ಧೈರ್ಯೊಡು ಎಂಚ ತೆರಿಪಾವೊಡು ಅಂದ್‌ದ್ ಪ್ರಾರ್ಥನೆ ಮಲ್ತೊಂದುಪ್ಪುಲೆ. ಕಡೆತ ವಂದನೆಲು 21 ಎನ ಸಂಗತಿಲೆನ್ಲಾ ಕೆಲಸ ಕಾರ್ಯೊಲೆನ್ಲಾ ನಿಕ್ಲೆಗ್ ಗೊತ್ತಾಪಿಲೆಕ್ಕ ಎನ ಪ್ರೀತಿದ ಸಹೋದ್ರೆಲಾ, ಕರ್ತವಡ್ ನಂಬಿಗಸ್ತೆ ಚಾಕ್ರಿದಾಕುಲುಲಾ ಆದುಪ್ಪು ತುಖಿಕೆ ನಿಕ್ಲೆಗ್ ಮಾತ ತೆರಿಪಾವೆ. 22 ನಿಕುಲು ಎಂಕುಲೆ ಸ್ಥಿತಿಗತಿನ್ ತೆರಿಯುಲೆಕ್ಕಲಾ ಆಯೆ ನಿಕ್ಲೆ ಉಡಲ್‌ನ್ ಉಮೇದ್ ಕೊರ್ಪಿಲೆಕ್ಕಲಾ ಯಾನ್ ಆಯನ್ ನಿಕ್ಲೆ ಕೈತಲ್‌ಗ್ ಕಡಪುಡ್ದೆ. 23 ಸಹೋದ್ರೆರೇ, ನಿಕ್ಲೆಡ್ ಸಮಾಧಾನ ಉಪ್ಪಡ್. ಅಮ್ಮೆ ಆದುಪ್ಪು ದೇವೆರ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆಲಾ ನಿಕ್ಲೆಗ್ ಪ್ರೀತಿನ್ಲಾ ಐತ ಒಟ್ಟುಗು ನಂಬೊಲ್ಕೆನ್ಲಾ ಕೊರಡ್. 24 ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ್ ಏಪಲಾ ಪ್ರೀತಿ ಮಲ್ಪುನಾಕುಲೆಗ್ ಮಾತೆರೆಗ್ ದೇವೆರೆ ದಯ ಉಪ್ಪಡ್. ಆಮೆನ್. |
New Life Literature