ಎಫೆಸ್ಯೆರೆಗ್ 5 - ಪೊಸ ಒಡಂಬಡಿಕೆ

¹ ನಿಕುಲು ದೇವೆರೆನ ಪ್ರೀತಿದ ಜೋಕುಲು ಆದುಪ್ಪುನೆಡ್ದ್ ದೇವೆರೆಗ್ ಸರಿಯಾದ್ ನಡತೊನ್ಲೆ.

² ಕ್ರಿಸ್ತೆ ನಮನ್ ಪ್ರೀತಿ ಮಲ್ತ್‌ದ್ ನಂಕ್ ಬೋಡಾದ್ ಕಮ್ಮೆನ ಇತ್ತಿ ಕಾಣಿಕೆ ಆದ್‌ಲಾ ಬಲಿ ಆದ್‌ಲಾ ದೇವೆರೆಗ್ ಒಚ್ಚಿದ್ ಕೊರಿಯೆ ಅತ್ತಾ. ಅಂಚೆನೇ ನಿಕುಲುಲಾ ಪ್ರೀತಿಡ್ ನಡತೊನ್ಲೆ.

³ ಹಾದ್ರತನ, ನೀಚತನ, ಲೋಭಿತನ ಇಂಚಿತ್ತಿನವು ನಿಕ್ಲೆ ನಡುಟು ಉಪ್ಪೆರೆ ಬಲ್ಲಿ. ದಾಯೆಗಂದ್ಂಡ ಉಂದು ಪೂರ ದೇವಜನೊಕುಲೆಗ್ ಯೋಗ್ಯದವು ಅತ್ತ್,

⁴ ಕುರ್ತೆಲ್ ಪಾತೆರೊಲು, ಹೆಡ್ಡ್‌ತನದ ಪಾತೆರೊಲು, ತಮಾಸೆದ ಪಾತೆರೊಲು, ಉಂದು ಪೂರ ದೇವಜನೊಕುಲೆಗ್ ತಕ್ಕದವು ಅತ್ತ್. ಉಂದೆತ್ತ ಪಗತೆಗ್ ದೇವೆರೆಗ್ ಉಪಕಾರ ಸ್ತುತಿ ಮಲ್ಪುನವೇ ಎಡ್ಡೆ ಆದುಂಡು.

⁵ ವಾ ಹಾದ್ರದಾಯಗಾವಡ್, ಅಶುದ್ಧದಾಯಗಾವಡ್, ಮೂರ್ತಿಪೂಜೆಗ್ ಸಮ ಆದುಪ್ಪು ಲೋಭಿಲೆಗಾವಡ್, ಮೊಕ್ಲೆಗ್ ಮಾತೆರೆಗ್ಲಾ ಕ್ರಿಸ್ತನ ಬೊಕ್ಕ ದೇವೆರೆ ರಾಜ್ಯೊಡು ಪಾಲ್‌ದಾರೆರ್ ಆಯೆರೆ ಸಾದ್ಯೆನೇ ಇಜ್ಜಿ ಅಂದ್‌ದ್ ನಿಕ್ಲೆಗ್ ತೆರಿದುಂಡು ಅತ್ತಾ?

⁶ ಪ್ರಯೋಜನಗ್ ಬರಂದಿ ಪಾತೆರೊಲೆಡ್ದ್ ಮೋಸೊಗು ಬೂರಡೆ. ದಾಯೆಗಂದ್ಂಡ ಇಂಚಿತ್ತಿ ಕಾರ್ಯೊಲೆಡ್ದ್ ದೇವೆರೆ ಕೋಪ ಪಾತೆರ ಕೇನಂದಿನಾಕುಲೆ ಮಿತ್ತ್ ಬರು.

⁷ ಅಂಚಾದ್ ಅಕ್ಲೆ ಒಟ್ಟುಗು ಕೂಡೊಡ್ಚಿ.

⁸ ನಿಕುಲು ದುಂಬು ಕತ್ತಲೆಡಿತ್ತರ್, ಆಂಡ ಇತ್ತೆ ನಿಕುಲು ಕರ್ತವಡ್ ಬೊಲ್ಪು ಆದುಲ್ಲರ್. ಬೊಲ್ಪುಡು ಉಪ್ಪುನಾಕುಲಾದ್ ನಡತೊನ್ಲೆ.

⁹ ದಾಯೆಗಂದ್ಂಡ ನಿಕ್ಲೆ ಉಲಯಿಡುಪ್ಪುನ ಈ ಬೊಲ್ಪು ಎಡ್ಡೆಂತಿನೆನ್ಲಾ ನೀತಿನ್ಲಾ, ಸತ್ಯೊನ್ಲಾ ಮಾತ್ರ ಉಂಡು ಮಲ್ಪುಂಡು.

¹⁰ ಕರ್ತವಗ್ ಮೆಚ್ಚಿಗೆ ಇತ್ತಿನವು ಒವ್ವು ಅಂದ್‌ದ್ ಕಲ್ತೊನ್ಲೆ.

¹¹ ಕತ್ತಲೆಗ್ ಸಮ್ಮಂಧವಾಯಿನ ವಾ ಬೇಲೆಲಾ, ಪ್ರಯೋಜನೊಗು ಬರ್ಪುಜಿ. ಐಟ್ಟ್ ಪಾಲ್‌ದಾರೆರ್ ಆದುಪ್ಪಂದೆ ಅವೆನ್ ಎದುರು ಕನತ್‌ದ್ ಕಂಡಿಸಾಲೆ.

¹² ದಾಯೆಗಂದ್ಂಡ ಆ ಜನೊಕುಲು ದೆಂಗ್‌ದ್ ಮಲ್ಪುನ ಕಾರ್ಯೊಲೆ ಬಗೆಟ್ ಪಾತೆರುನವು ನಾಚಿಗೆ ಆದುಂಡು.

¹³ ಆಂಡ ಬೊಲ್ಪುಡು ಮಾತ ಕಾರ್ಯದ ನಿಜ ಗುಣ ತೋಜಿದ್ ಬರ್ಪುಂಡು. ಐಡ್ದಾವರ ಪಡಿಕೆಂತಿನವು ಪಡಿಕೆಂತಿನವೇ ಅಂದ್‌ದ್ ತೋಜಿದ್ ಬರ್ಪುಂಡು.

¹⁴ ಆ ಬೊಲ್ಪುಗು ಬರ್ಪಿನವು ಮಾತಲಾ ತೋಜುಂಡು. ಐಡ್ದಾವರ, “ನಿದ್ರೆ ಮಲ್ಪುನಾಯ ಎಚ್ಚರಿಕೆ ಆಲ, ಸೈತಿನಾಕುಲೆಡ್ದ್ ಲಕ್ಕ್‌ಲ, ಕ್ರಿಸ್ತೆ ನಿಕ್ಕ್ ಬೊಲ್ಪು ಕೊರ್ಪೆ,” ಅಂದ್‌ದ್ ಪನ್ತ್ಂಡತ್ತಾ.

¹⁵ ಅಂಚಾದ್ ನಿಕುಲು ಬದುಕುನ ರೀತಿನ್ ಜೋಕೆಡ್ ತೂವೊನ್ಲೆ. ಬುದ್ಧಿದಾಂತಿನಾಕುಲು ಆವಂದೆ ಬುದ್ಧಿ ಇತ್ತಿನಾಕುಲಾದುಪ್ಪುಲೆ.

¹⁶ ದಾಯೆಗಂದ್ಂಡ ಆ ದಿನೊಕುಲು ಪಡ್ಕೆಂತಿನವು, ಅಂಚಾದ್ ತಿಕ್ಕುನ ಪ್ರತಿಯೊಂಜಿ ಗಳಿಗೆನ್ಲಾ ಎಡ್ಡೆ ರೀತಿಡ್ ಉಪಯೋಗ ಮಲ್ತೊನ್ಲೆ.

¹⁷ ಬುದ್ಧಿಕೆಟ್ಟಿನಾಕುಲು ಆದುಪ್ಪಂದೆ, ಕರ್ತವ ಚಿತ್ತ ಎಂಚಿನ ಅಂದ್‌ದ್ ತೆರಿಯೊಂದು ಐಕ್ ಸರಿಯಾದ್ ನಡಪುಲೆ.

^18-19 ಗಂಗಸರ ಪರ್ದ್ ಅಮಲ್ ಆವೊಡ್ಚಿ. ದಾಯೆಗಂದ್ಂಡ ಅವು ಪಟಿಂಗತನೊನು ಪುಟ್ಟಾವುಂಡು. ಆಂಡ ಪರಿಶುದ್ಧಾತ್ಮಡ್ ದಿಂಜಿದಿನಾಕುಲಾದ್ ಕೀರ್ತನೆ, ರಾಗ, ಆತ್ಮಭಾವದ ಪದ ಮಲ್ತೊಂದು, ಒರಿಯಡೊರಿ ಪಾತೆರೊಂದು, ನಿಕ್ಲೆ ಉಡಲ್‌ಡ್ ಕರ್ತವಗ್ ರಾಗ ಮಲ್ತೊಂದು ಪುಗರೊಂದುಪ್ಪುಲೆ.

²⁰ ಬೊಕ್ಕ ಮಾತೆಟ್ಲಾ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತ ಪುದರ್‌ಡ್ ಅಮ್ಮೆ ಆದುಪ್ಪು ದೇವೆರೆಗ್ ಉಪಕಾರ ಸ್ತುತಿ ಪನೊಂದುಪ್ಪುಲೆ.

²¹ ಒರಿಯಗ್ ಒರಿ ತಗ್ಗೊಂದು, ಕ್ರಿಸ್ತಗ್ ಪೋಡಿಯೊಂದುಪ್ಪುಲೆ.

ಕಂಡನಿ ಬೊಡೆದಿ ಉಪ್ಪುನ ರೀತಿ

²² ಬೊಡೆದಿಯಾಡ್ಲೇ, ಕರ್ತವಗ್ ವಶ ಆದುಪ್ಪುಲೆಕ್ಕ ನಿಕ್ಲೆ ಕಂಡನಿಯಾಡ್ಲೆಗ್ ವಶ ಆದುಪ್ಪುಲೆ.

²³ ದಾಯೆಗಂದ್ಂಡ ಕ್ರಿಸ್ತೆ ಸಭೆಕ್ ತರೆ ಆದಿತ್ತಿಲೆಕ್ಕನೇ ಕಂಡನಿ ತನ ಬೊಡೆದಿಗ್ ತರೆ ಆದುಲ್ಲೆ. ಕ್ರಿಸ್ತೆ ತನ ಶರೀರ ಆದುಪ್ಪು ಸಭೆಕ್ ರಕ್ಷಕೆ ಆದುಲ್ಲೆ.

²⁴ ಸಭೆ ಕ್ರಿಸ್ತಗ್ ಎಂಚ ವಶ ಆದುಪ್ಪುಂಡ ಅಂಚೆನೇ ನಿಕುಲು ಬೊಡೆದಿಯಾಡ್ಲು ಮಾತೆಟ್ಲಾ ನಿಕ್ಲೆ ಕಂಡನಿಯಾಡ್ಲೆಗ್ ವಶ ಆದುಪ್ಪುಲೆ.

²⁵ ಕಂಡನಿಯಾಡ್ಲೇ, ಕ್ರಿಸ್ತೆ ಸಭೆನ್ ಎಂಚ ಪ್ರೀತಿ ಮಲ್ತ್‌ದ್ ಜೀವ ಕೊರ್ದಿತ್ತೆನಾ ಅಂಚೆನೇ ಕಂಡನಿಯಾಡ್ಲು ಬೊಡೆದಿಯಾಡ್ಲೆನ್ ಪ್ರೀತಿ ಮಲ್ಪುಲೆ.

²⁶ ಕ್ರಿಸ್ತೆ ಸಭೆನ್ ನೀರ್‌ಡ್ದ್ ದೆಕ್ಕಿಲೆಕ್ಕ ಪಾತೆರೊಡ್ದು ಶುದ್ಧ ಮಲ್ತ್‌ದ್ ಅರ್ಪಣೆ ಮಲ್ತೆ.

²⁷ ಅವೆನ್ ಕಲಂಕ್, ನೆರಿ ಇಂಚಿತ್ತಿ ಒವುಲಾ ಇಜ್ಜಂದೆ, ಪರಿಶುದ್ಧೆರ್ಲಾ ದೋಷದಾಂತಿನಾಕುಲುಲಾ ಮೈಮೆದವುಲಾ ಇತ್ತಿ ಸಭೆತ ಲೆಕ್ಕನೇ ತನ್ಕಾದ್ ಅರ್ಪಣೆ ಮಲ್ತೆ.

²⁸ ಅವ್ವೇ ರೀತಿಡ್ ಕಂಡನಿ ತನ ಬೊಡೆದಿನ್ ತನ ಶರೀರ ಅಂದ್‌ದ್ ಪ್ರೀತಿ ಮಲ್ಪಡ್. ತನ ಬೊಡೆದಿನ್ ಪ್ರೀತಿ ಮಲ್ಪುನಾಯೆ ತನನ್ ತಾನೇ ಪ್ರೀತಿ ಮಲ್ತೊನುಲೆಕ್ಕ ಆಪುಂಡು.

^29-30 ಏರ್ಲಾ ತನ ಸ್ವಂತ ಶರೀರೊನು ಪಗೆ ಮಲ್ಪುಜೆ, ಪ್ರತೀ ಒರಿಲಾ ತನ ಶರೀರೊನು ತಾಂಕ್‌ದ್ ಜೋಕೆ ಮಲ್ಪುವೆ. ನಮಲಾ ಕ್ರಿಸ್ತನ ಶರೀರದ ಅಂಗೊಲು ಆದುಲ್ಲ. ಅಂಚೆನೇ ಕ್ರಿಸ್ತೆ ಸಭೆನ್ ತಾಂಕ್‌ದ್ ಜೋಕೆ ಮಲ್ಪುವೆ.

³¹ ಉಂದೆಡ್ದಾದ್, “ಒರಿ ಅಂಜೊವು ತನ ಅಪ್ಪೆಅಮ್ಮಾಡ್ಲೆನ್ ಬುಡ್ದು ತನ ಬೊಡೆದಿನ್ ಸೇರೊನ್ವೆ. ಅಕುಲು ಇರ್ವೆರ್‌ಲಾ ಒಂಜೇ ಶರೀರ ಆಪೆರ್,” ಅಂದ್‌ದ್ ಶಾಸ್ತ್ರೊಡ್ಲಾ ಪನ್ಪುಂಡು.

³² ಯಾನ್ ಕ್ರಿಸ್ತಗ್ಲಾ ಸಭೆಕ್ಲಾ ಇತ್ತಿನ ಸಮ್ಮಂಧದ ಬಗೆಟ್ ಪಾತೆರೊಂದುಲ್ಲೆ. ಉಂದು ಇನಿ ಮುಟ್ಟ ಬಾರೀ ಗುಟ್ಟುಡು ಇತ್ತಿನ ಗಂಭೀರ ಆದಿತ್ತಿನ ಸತ್ಯಾರ್ಥ ಆದುಂಡು.

³³ ಅಂಚಾದ್ ನಿಕ್ಲೆಡ್ ಪ್ರತೀ ಕಂಡನಿ, ಬೊಡೆದಿನ್ ತನಲೆಕ್ಕನೇ ಪ್ರೀತಿ ಮಲ್ಪಡ್. ಅಂಚೆನೇ ಬೊಡೆದಿ ಕಂಡನಿಗ್ ಮರ್ಯಾದಿ ಕೊರಡ್.