ಎಫೆಸ್ಯೆರೆಗ್ 3 - ಪೊಸ ಒಡಂಬಡಿಕೆ

ಪಿದಯಿದ ಜನೊಕುಲೆಗ್ ಪೌಲುನ ಬೋಧನೆ

¹ ಉಂದೆಕ್ಕಾದ್ ಪೌಲು ಇನ್ಪಿನಾಯೆ ಯಾನ್, ಪಿದಯಿದ ಜನೊಕುಲೆಗಾದ್ರ ಕ್ರಿಸ್ತ ಯೇಸುನ ವಶ ಆದುಲ್ಲೆ.

² ನಿಕುಲು ಕಂಡಿತಾದ್ ಇದ ಮುಟ್ಟ ಕೇಂಡ್ದ್ ಉಪ್ಪರ್, ಎಂಚ ದೇವೆರೆನ ದಯೊಟು ಸಾರಿಯುನ ಬೇಲೆ ನಿಕ್ಲೆ ಎಡ್ಡೆಗಾದ್ ಎಂಕ್ ಕೊರ್ತುಂಡುತ್ತಾ?

³ ದೇವೆರ್ ತನ ಗುಟ್ಟುದ ಯೋಜನೆನ್ ಎಂಕ್ ತೆರಿಪಾದಿನೆನ್ ಯಾನ್ ದುಂಬು ಒರ ನಿಕ್ಲೆಗ್ ಸೂಕ್ಷ್ಮಾದ್ ಬರೆತೆ.

⁴ ಯಾನ್ ಬರೆತಿನೆನ್ ನಿಕುಲು ಓದುನಗ ಕ್ರಿಸ್ತನ ವಿಷಯದ ಈ ಗುಟ್ಟು ಎಂಕ್ ಎಂಚ ತೆರಿದ್‌ಂಡ್ ಅಂದ್‌ದ್ ನಿಕ್ಲೆಗ್ ಗೊತ್ತಾಪುಂಡು.

⁵ ಆ ಗುಟ್ಟುನು ಈ ಕಾಲೊಲೆಡ್ ಪರಿಶುದ್ಧ ಅಪೊಸ್ತಲೆರೆಗ್ಲಾ ಪ್ರವಾದಿಲೆಗ್ಲಾ ಪರಿಶುದ್ಧಾತ್ಮೊಡು ತೆರಿಪಾಯಿಲೆಕ್ಕ ಬೇತೆ ಕಾಲೊಡು ಇತ್ತಿನ ಜನೊಕುಲೆಗ್ ತೆರಿಪಾದಿಜಿ.

⁶ ಅವು ದಾನೆಂದ್ಂಡ ಪಿದಯಿದ ಜನೊಕುಲು ಸುವಾರ್ತೆಡ್ದ್ ಕ್ರಿಸ್ತ ಯೇಸು ಒಟ್ಟುಗು ಸೇರ್ದಿನಾಕುಲಾದ್ ಯೆಹೂದ್ಯೆರೆ ಒಟ್ಟುಗು ಬಾಧ್ಯೆರ್ ಆದ್ ಒಂಜೇ ಶರೀರದ ಅಂಗೊಲುಲಾ ಅಬ್ರಹಾಮುಗು ಆತಿನ ವಾಗ್ದಾನೊಡು ಪಾಲ್‌ದಾರೆರ್‌ಲಾ ಆದುಲ್ಲೆರ್ ಇನ್ಪಿನವೇ.

^7-9 ದೇವೆರ್‌ ತನ ಬಲೊಡ್ದು ಎಡ್ಡೆ ಬೇಲೆ ಮಲ್ತ್‌ದ್ ದಯತ ಉಡಿಗೆರೆನ್ ಎಂಕ್ ಕೊರಿನೆಡ್ದ್ ಯಾನ್ ಈ ಸುವಾರ್ತೆಗ್ ಚಾಕ್ರಿದಾಯೆ ಆಯೆ. ಯಾನ್ ಕ್ರಿಸ್ತನ ಶೋಧಿಯೆರೆ ತಿರಂದಿ ಐಶ್ವರ್ಯದ ಸುವಾರ್ತೆನ್ ಪಿದಯಿದ ಜನೊಕುಲೆಗ್ ತೆರಿಪಾವೆರೆಗಾದ್ರ ಮಾತೆನ್ ಉಂಡು ಮಲ್ತಿನ ದೇವೆರ್ ಆದಿಡ್ದಿಂಚಿ ತೋಜಂದಿನ ಗುಟ್ಟುನು ತೆರಿಪಾವುನ ರೀತಿ ಎಂಚಿನ ಅಂದ್‌ದ್ ಸಾರಿಯೆರೆಗಾದ್ ದೇವಜನೊಕುಲೆಡ್ ಅಲ್ಪದಾಯೆ ಆದುಪ್ಪು ಎಂಕ್ ಈ ದಯ ಕೊರ್ತುಂಡು.

^10-11 ಆಯನ ನಿತ್ಯ ನಿರ್ಧಾರದ ಪ್ರಕಾರ ಅವೆನ್ ನಮ ಕರ್ತವೆ ಆದುಪ್ಪು ಕ್ರಿಸ್ತ ಯೇಸುಡು ಪರಿಪೂರ್ಣ ಮಲ್ತೆ. ಉಂದು ಮಾತೆಟ್ಟ್ ದೇವೆರೆನ ಉದ್ದೇಶ ದಾನೆಂದ್ಂಡ ತನ ಗೇನದ ಐಶ್ವರ್ಯೊನು ಪರಲೋಕೊಡುಪ್ಪುನ ಮಾತ ಅಧಿಕಾರೊಲೆಗ್ಲಾ ಅಧಿಪತಿಲೆಗ್ಲಾ ಇತ್ತೆ ಕ್ರೈಸ್ತ ಸಭೆಡ್ದ್ ಗೊತ್ತಾವೊಡು ಇನ್ಪಿನವೇ.

¹² ಕ್ರಿಸ್ತಡ್ದಾದ್‌ಲಾ, ಆಯ ಮಿತ್ತ್‌ದ ನಮ ನಂಬಿಕೆಡ್ದಾದ್‌ಲಾ ಇತ್ತೆ ದೇವೆರೆ ಸನ್ನಿಧಾನೊಗು ನಮ ಧೈರ್ಯೊಡು ಬರೊಲಿ.

¹³ ಅಂಚಾದ್ ಯಾನ್ ನಿಕ್ಲೆಗ್ ಬೋಡಾದ್ ಬರ್ಪಿ ಭಂಗೊಲು ಅವು ನಿಕ್ಲೆ ಮೈಮೆಗಾದ್ ಅಂದ್‌ದ್ ಎನ್ನ್‌ದ್ ಸೋತುದು ಪೋವಡೆ.

ಎಫೆಸದಾಕುಲೆಗ್ ಪ್ರಾರ್ಥನೆ

^14-15 ಈ ಕಾರಣೊಗಾದ್ ಪರಲೋಕೊಡ್ಲಾ ಭೂಲೋಕೊಡ್ಲಾ ಉಪ್ಪು ಒಂಜೇ ಕುಟುಂಬೊಗು ಅಮ್ಮೆ ಆದುಪ್ಪುನಾಯಗ್ ಯಾನ್ ಮೊರಂಪೂರ್ದು ನಟ್ಟೊನ್ವೆ.

¹⁶ ನಿಕುಲು ಅಂತರ್ಯೊಡು ದೇವೆರಾತ್ಮೊಡ್ದು ಮೈಮೆದ ಐಶ್ಚರ್ಯೊಡ್ದು ಬಲವಂತೆರ್ ಆವೊಡು ಪಂಡ್ದ್, ಯಾನ್ ಪ್ರಾರ್ಥನೆ ಮಲ್ಪುವೆ.

¹⁷ ಅಪಗ ನಿಕ್ಲೆ ನಂಬಿಕೆಡ್ದಾದ್ ಕ್ರಿಸ್ತೆ ನಿಕ್ಲೆ ಉಡಲ್‌ಡ್ ವಾಸ ಮಲ್ಪುವೆ. ನಿಕ್ಲೆ ಬೇರ್ ದೇವೆರೆ ಪ್ರೀತಿಡ್ ಮಸ್ತ್ ಅಡಿಕ್ ಪೋದು ನಿಕ್ಲೆನ್ ಬಲ ಪಡೆಪಾವುಂಡು.

¹⁸ ನಿಕುಲು ದೇವೆರೆ ಪ್ರೀತಿಡ್ ನಿಲೆ ಆದ್ ಉಂತುದು ದೇವಜನೊಕುಲೆ ಒಟ್ಟುಗು ಐತ ಅಗೆಲ, ಉದ್ಧ, ಎತ್ತರ ಬೊಕ್ಕ ಗುಂಡಿ ಏತ್ ಪನ್ಪಿನೆನ್ ತೆರಿಯೊನೆಕ್ಕ್ ಶಕ್ತೆರಾಪಿಲೆಕ್ಕ

¹⁹ ಗೇನೊನು ಮೀರುನ ಕ್ರಿಸ್ತ ಪ್ರೀತಿನ್ ತೆರಿಯೊಂದು ಸಾಮರ್ಥ್ಯ ಇತ್ತಿನಕುಲಾದ್ ದೇವೆರೆ ಮಾತ ಸದ್ಗುಣೊಲೆಡ್ ದಿಂಜೊಂದು ಬರೊಡು ಅಂದ್‌ದ್ ಯಾನ್ ನಟ್ಟೊನ್ವೆ.

^20-21 ತನ ಬಲೊಡ್ದು ನಮಡ್ ಕೆಲಸ ನಡಪುಡ್ದು ನಮ ನಟ್ಟೊನುನೆಡ್ದ್‌ಲಾ, ವಿಚಾರ ಮಲ್ಪುನೆಡ್ದ್‌ಲಾ ಏತೋ ಹೆಚ್ಚಾದ್ ಮಾತೆನ್ಲಾ ಮಲ್ಪೆರೆ ಸಾಮರ್ಥ್ಯ ಇತ್ತಿ ದೇವೆರೆಗ್, ಸಭೆಟ್ಲಾ ಕ್ರಿಸ್ತ ಯೇಸುಡ್ಲಾ ಮಾತ ಸಂತಾನೊಗು ಏನಿತ್ಯೇನಿಗ್ಲಾ ಮೈಮೆ ಆವಡ್. ಆಮೆನ್.