ಎಫೆಸ್ಯೆರೆಗ್ 1 - ಪೊಸ ಒಡಂಬಡಿಕೆ1 ದೇವೆರೆ ಚಿತ್ತದ ಪ್ರಕಾರ, ಕ್ರಿಸ್ತ ಯೇಸುನ ಅಪೊಸ್ತಲೆ ಆಯಿ ಪೌಲು, ಎಫೆಸೊಡುಪ್ಪುನ ದೇವಜನೊಕುಲೆಗ್ಲಾ ಕ್ರಿಸ್ತ ಯೇಸುಡು ನಂಬುನಾಕುಲೆಗ್ಲಾ ಬರೆಪಿನಿ ದಾನೆಂದ್ಂಡ, 2 ನಮ ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್. ಕ್ರಿಸ್ತಡ್ ಆತ್ಮೀಕ ಆಶೀರ್ವಾದೊಲು 3 ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದೇವೆರ್‌ಲಾ, ಅಮ್ಮೆಲಾ ಆದುಪ್ಪುನಾಯಗ್ ಉಪಕಾರ ಸ್ತುತಿ. ನಮ ಕ್ರಿಸ್ತಡ್ ಒಂಜಾದುಪ್ಪುನೆಡ್ದಾದ್ ನಂಕ್ ಪರಲೋಕದ ಮಾತ ಆತ್ಮೀಕ ವರೊಲೆನ್ ಒದಗಾದ್ ಕೊರ್ತೆ. 4 ಎಂಚಂದ್ಂಡ ನಮ ಆಯನ ಸನ್ನಿಧಾನೊಡು ಪರಿಶುದ್ಧೆರ್ಲಾ ದೋಷದಾಂತಿನಾಕುಲುಲಾ ಆದುಪ್ಪೊಡಂದ್‌ದ್ ಲೋಕೊನು ಉಂಡು ಮಲ್ಪುನೆಡ್ದ್ ದುಂಬೇ ಕ್ರಿಸ್ತಡ್ ನಮನ್ ಅಜತ್ ದೆತ್ತೊಂಡೆ. 5 ದೇವೆರ್ ನಮನ್ ಯೇಸು ಕ್ರಿಸ್ತಡ್ ತನ ಸ್ವಂತ ಜೋಕುಲು ಆವೊಡು ಅಂದ್‌ದ್ ಪ್ರೀತಿಡ್ ದುಂಬೇ ನಿರ್ಧಾರ ಮಲ್ತ್‌ದಿತ್ತೆ. ಉಂದು ಆಯನ ಸಂತೋಷ ಬೊಕ್ಕ ಚಿತ್ತ ಆದಿತ್ತ್ಂಡ್. 6 ಅಂಚಾದ್ ನಮ ಆಯನ ಪ್ರೀತಿದ ಮಗಕ್ಕ್ ಸೇರ್ದಿನಾಕುಲಾದ್, ನಂಕ್ ಉಂಬೊಲಿ ಆದ್ ಕೊರಿನ ಮೈಮೆದ ದಯೊಕಾದ್, ನಮ ದೇವೆರೆನ್ ಪುಗರುವ. 7 ಅಂಚಾಯಿನೆಡ್ದ್ ಆಯನ ನೆತ್ತೆರೆಡ್ದ್ ನಮ ಪಾಪೊಲು ಪರಿಹಾರ ಆದ್ ನಂಕ್ ಬುಡುಗಡೆ ಆಂಡ್. ಉಂದು ದೇವೆರೆನ ದಯತ ಐಶ್ವರ್ಯನೇ ಆದುಂಡು. 8 ದೇವೆರ್ ತನ ಚಿತ್ತದ ಗುಟ್ಟುನು ತೆರಿಪಾಯಿನೆಡ್ದ್, ನಂಕ್ ಗೇನ, ಬುದ್ಧಿನ್ ಕೊರ್ದು, ಆಯನ ದಯೊನು ಬೊಕ್ಕಲಾ ಹೆಚ್ಚಾದ್ ತೋಜಾಯೆ. 9 ಬೊಕ್ಕ ದೇವೆರೆನ ಉಲಯಿದ ಚಿತ್ತದ ಗುಟ್ಟುನು ಆಯನ ಇಷ್ಟದ ಪ್ರಕಾರ ಕ್ರಿಸ್ತಡ್ ನಂಕ್ ದುಂಬೇ ತೋಜಾದ್ ಕೊರಿಯೆ. 10 ಆ ಗುಟ್ಟು ಉಂದೇ, ಕಾಲ ಸಂದ್‌ನಗ, ಪರಲೋಕೊಡ್ಲಾ ಭೂಲೋಕೊಡ್ಲಾ ಉಪ್ಪುನ ಮಾತಲಾ ಕ್ರಿಸ್ತಡ್ ಒಂಜಾದುಪ್ಪೊಡಂದೇ ನಿರ್ಧಾರ ಆದಿತ್ತ್ಂಡ್. 11-12 ಉಂದತ್ತಂದೆ, ನಮ ಆಯಡ್ದ್ ದೇವೆರೆನ ಸ್ವಂತ ಜನೊಕುಲಾಯ. ಬರ್ಪಿಂಚಿತ್ತಿ ಕ್ರಿಸ್ತನ್ ಭರವಸೊಡು ಎದುರು ತೂವೊಂದಿತ್ತ. ನಮ ಆಯನ ಮೈಮೆನ್ ಲೋಕೊಗು ತೆರಿಪಾವೊಡು ಅಂದ್‌ದ್ ಮಾತ ಕಾರ್ಯೊಲೆನ್ ತನ ಇಷ್ಟೊಗು ಸರಿಯಾದ್ ನಡಪುನ ದೇವೆರ್ ನಮನ್ ಆದಿಡ್ದೇ ಅಜತ್ ದೆತ್ತೊಂಡೆ. 13 ಬೊಕ್ಕ ನಿಕುಲುಲಾ ನಿಕ್ಲೆ ರಕ್ಷಣೆದ ಸುವಾರ್ತೆ ಇನ್ಪಿನ ಸತ್ಯದ ಪಾತೆರೊನು ಕೇಂಡ್ದ್, ಕ್ರಿಸ್ತನ್ ನಂಬುನಕುಲಾದ್ ವಾಗ್ದತ್ತ ಆದುಪ್ಪು ಪರಿಶುದ್ಧಾತ್ಮಡ್ದ್ ಮುದ್ರೆಲಾ ಹೊಂದಿಯರ್. 14 ದೇವೆರ್ ತನ ಸ್ವಂತ ಜನೊಕುಲೆನ ಬುಡುಗಡೆಗಾದ್ ಪರಿಶುದ್ಧಾತ್ಮೆನೇ ನಮ ಬಾಧ್ಯಸ್ತಿಗೆದ ಆಧಾರ ಆದುಲ್ಲೆ. ಈ ಕಾರಣೊಡ್ದು ನಮ ದೇವೆರೆನ್ ಪುಗರೊಂದು ಮೈಮೆನ್ ಸಂದಾಗ. ಪೌಲುನ ಪ್ರಾರ್ಥನೆ 15-16 ಇಂಚಾದುಪ್ಪುನಗ, ಕರ್ತವೆ ಆದುಪ್ಪು ಯೇಸುಡು ದೀತಿನ ನಂಬಿಕೆನ್ಲಾ ಮಾತ ದೇವಜನೊಕುಲೆಗ್ ನಿಕುಲು ತೋಜಾವುನ ಪ್ರೀತಿನ್ಲಾ ಯಾನ್ ಕೇನಿನೆಡ್ದಿಂಚಿ, ನಿಕ್ಲೆಗ್ ಬೋಡಾದ್ ಎನ ಪ್ರಾರ್ಥನೆಲೆಡ್ ಬುಡಂದೆ ಉಪಕಾರ ಸ್ತುತಿ ಮಲ್ತ್‌ದ್ ನಿಕ್ಲೆನ್ ನೆನೆಪು ಮಲ್ತೊಂದುಲ್ಲೆ. 17 ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತ ದೇವೆರ್ ಆದುಪ್ಪು ಮೈಮೆದ ಅಮ್ಮೆ, ನಿಕ್ಲೆಗ್ ತಿಳುವಳಿಕೆದ ಆತ್ಮೊನ್ಲಾ ಪ್ರಕಟನೆನ್ಲಾ ಕೊರ್ದು, ನಿಕುಲು ದೇವೆರೆ ಗೇನೊಡು ಬುಲೆವೊಡು ಅಂದ್‌ದ್ ಯಾನ್ ನಟ್ಟೊನ್ವೆ. 18 ಈ ಗೇನದ ಬೊಲ್ಪು ನಿಕ್ಲೆ ಉಡಲ್‌ದ ಕಣ್ಣ್‌ನ್ ಜಪ್ಪಡ್. ಅಪಗ ಆಯೆ ತಾನ್ ಲೆತ್ತ್‌ದಿನ ದೇವಜನೊಕುಲೆಡ್, ತನ ಮೈಮೆದಲಾ ಐಶ್ವರ್ಯದಲಾ ಆಸ್ತಿ ಏತ್ ಅಂದ್‌ದ್‌ಲಾ ಬೊಕ್ಕ ನಿಕ್ಲೆಗುಪ್ಪುನ ನಿರೀಕ್ಷೆ ದಾನೆ ಪಂಡ್ದ್‌ಲಾ ನಿಕುಲು ತೆರಿಯೊನ್ವರ್. 19 ಬೊಕ್ಕ ನಂಬುನಾಕುಲಾಯಿ ನಮಡ್ ಕಾರ್ಯ ಸಾದನೆ ಮಲ್ಪುನ ಆಯನ ಶಕ್ತಿ, ತ್ರಾಣದ ಪ್ರಕಾರ ಮಿತಿಮೀರು ಮಲ್ಲಾದಿಗೆ ಏತ್ ಅಂದ್‌ದ್ ನಿಕ್ಲೆಗ್ ತೆರಿಯುಲೆಕ್ಕ ಮಲ್ಪಡ್ ಅಂದ್‌ದ್ ನಟ್ಟೊನ್ವೆ. 20-21 ಈ ಬಲ ಶಕ್ತಿಡ್ದೇ ದೇವೆರ್ ಕ್ರಿಸ್ತನ್ ಸೈತಿನಾಕುಲೆಡ್ದ್ ಲಕ್ಕಾದ್ ಮಾತ ಕಾನೂನು, ಅಧಿಕಾರ, ದೊರೆತನ, ಬೊಕ್ಕ ಮಾತ ಅಧಿಕಾರದ ಮಿತ್ತ್‌ಲಾ ಈ ಲೋಕೊಡು ಮಾತ್ರತ್ತಂದೆ, ನನ ಬರಿಯೆರೆ ಉಪ್ಪುನ ಲೋಕೊಡ್ಲಾ ಪುದರ್ ಪೋಯಿನಾಕುಲೆನ ಮಾತ ಪುದರ್‌ದ ಮಿತ್ತ್‌ಲಾ ಪರಲೋಕೊಡು ಆಯನ್ ತನ ಬಲತ್ತ ಮರ್ಗಿಲ್‌ಡ್ ಕುಲ್ಲಾಯೆ. 22 ಉಂದತ್ತಂದೆ ದೇವೆರ್ ಮಾತೆನ್ಲಾ ಕ್ರಿಸ್ತನ ಕಾರ್‌ದಡಿಕ್ ಪಾಡ್ದೆ. ಬೊಕ್ಕ ಸಭೆತ ಪ್ರಯೋಜನೊಗಾದ್ ಆಯೆ ಮಾತೆತ್ತಲಾ ತರೆ ಆದುಲ್ಲೆ. 23 ಬೊಕ್ಕ ಸಭೆ ಕ್ರಿಸ್ತನ ಶರೀರ ಆದುಂಡು, ಮಾತೆನ್ಲಾ ಮಾತ ರೀತಿಡ್ಲಾ ಪೂರೈಸುನಾಯಡ್ದ್ ಪರಿಪೂರ್ಣತೆ ಆದುಂಡು. ಆಮೆನ್. |
New Life Literature