ಕೊಲೊಸ್ಸಿಯೆರೆಗ್ 2 - ಪೊಸ ಒಡಂಬಡಿಕೆ

¹ ನಿಕ್ಲೆಗಾದ್‌ಲಾ ಲವೊದಿಕೀಯದ ಸಭೆಕಾದ್‌ಲಾ ಎನನ್ ಕಣ್ಣಾರೆ ತೂವಂದಿನಾಕುಲೆಗಾದ್‌ಲಾ ಏತೊಂಜಿ ಉರ್ಡಾಟ ಮಲ್ತೊಂದುಲ್ಲೆ ಇನ್ಪಿನೆನ್ ನಿಕುಲು ತೆರಿಯೊಡು ಅಂದ್‌ದ್ ಯಾನ್ ಆಸೆ ಮಲ್ಪುವೆ.

^2-3 ದಾಯೆಗಂದ್ಂಡ, ನಿಕುಲು ಮಾತೆರ್ಲಾ ಪ್ರೀತಿಡ್ ಒಂಜಾದಿತ್ತ್‌ದ್ ಬುದ್ಧಿಡ್ ದಿಂಜಿದ್ ನಿಚ್ಚಯ ಇನ್ಪಿನ ಭಾಗ್ಯೊನು ಪಡೆವೊಂದು ದೇವೆರ್ ತೋಜಾದ್ ಕೊರಿ ಗುಟ್ಟುನು ಅಂದ್ಂಡ, ತನಡೇ ಬುದ್ಧಿಗ್ಲಾ ಗೇನೊಗ್ಲಾ ಸಮ್ಮಂಧವಾಯಿನ ಸಂಪೊತ್ತು ಮಾತೆನ್ಲಾ ಪಡೆಯೊಂದಿ ಕ್ರಿಸ್ತನ್ ತೆರಿಯೊಂಡಿನೆಕ್ಕಾದ್ ಉಡಲ್‌ಡ್ ಸ್ಥಿರ ಆದ್ ಉಪ್ಪೊಡಿನ್ಪಿನ ಉತ್ತೇಜನ ಎಂಕುಂಡು.

⁴ ಏರಾಂಡಲಾ ಚಕ್ಕಂದ ಪಾತೆರೊಲೆಡ್ದ್ ನಿಕ್ಲೆನ್ ಮೋಸೊಗು ಪಾಡ್ವೆರ್ ಪನ್ಪಿನ ಪೋಡಿಗೆ ಎಂಕುಪ್ಪುನೆಡ್ದ್ ಉಂದೆನ್ ಪನೊಂದುಲ್ಲೆ.

⁵ ಯಾನ್ ಶರೀರೊಡು ನಿಕ್ಲೆಡೊಪ್ಪ ಇಜ್ಜಿಡಲಾ ಆತ್ಮೊಡು ನಿಕ್ಲೆಡೊಪ್ಪನೇ ಉಲ್ಲೆ. ನಿಕುಲು ಕ್ರಮೊಟು ನಡಪುನೆನ್ಲಾ ಕ್ರಿಸ್ತ ನಂಬಿಕೆಡ್ ಸ್ಥಿರಾದ್ ಉಂತುನೆನ್ಲಾ ತೂದು ಸಂತೋಷ ಪಡೆಪೆ.

ಕ್ರಿಸ್ತಡ್ ಪರಿಪೂರ್ಣ ಜೀವನ

⁶ ಅಂಚಾಯಿನೆಡ್ದ್ ಕ್ರಿಸ್ತ ಯೇಸುನು ನಿಕ್ಲೆ ಕರ್ತವೆ ಅಂದ್‌ದ್ ಸ್ವೀಕಾರ ಮಲ್ತಿ ಲೆಕ್ಕನೇ, ಆಯಡೊಪ್ಪ ಬದುಕೊಂದುಪ್ಪುಲೆ.

⁷ ಆಯಡ್ ಬದುಕೊಂದಿತ್ತ್‌ದ್ ಭಕ್ತಿಡ್ ಅಭಿವೃದ್ಧಿ ಆದ್ ನಿಕ್ಲೆಗ್ ಕಲ್ಪಾದಿನ ಬೋಧನೆಗ್ ಸರಿಯಾದ್ ಕ್ರಿಸ್ತ ನಂಬಿಕೆಡ್ ದೃಢ ಆದ್ ದೇವೆರೆಗ್ ಹೆಚ್ಚಾದ್ ಉಪಕಾರ ಸ್ತುತಿ ಮಲ್ಪುನಾಕುಲು ಆದುಪ್ಪುಲೆ.

⁸ ಕ್ರಿಸ್ತ ಬೆರಿಯೆ ಪೋವಂದೆ ನರಮಾನಿಲೆ ಆಚಾರ ವಿಚಾರೊನ್ಲಾ ಈ ಲೋಕದ ಬಾಲ ಬೋಧನೆನ್ ಕೈಕೊನುನಾಕುಲು ನಿಕ್ಲೆನ ನಡುಕು ಬತ್ತ್‌ದ್ ಮೋಸೊಡು ದಿಂಜಾದ್ ಅಗತ್ಯದಾಂತಿನ ತತ್ವಜ್ಙಾನ ಬೋಧನೆಡ್ದ್ ಮನಸ್‌ನ್ ತೆಟ್ಟಾದ್ ನಿಕ್ಲೆನ್ ವಶೀಕರಣ ಮಲ್ತೊನ್ವೆರ್, ಜಾಗ್ರತೆ ಆದುಪ್ಪುಲೆ.

⁹ ದಾಯೆಗಂದ್ಂಡ ದೇವೆರೆ ಸದ್ಗುಣೊಲು ಕ್ರಿಸ್ತನ ಶರೀರೊಡೇ ನಿಲೆ ಆದುಂಡು.

¹⁰ ಬೊಕ್ಕ ನಿಕ್ಲೆನ ಜೀವನ ಕ್ರಿಸ್ತಡ್ ಒಂಜಾದುಪ್ಪುನೆಡ್ದ್ ಪರಿಪೂರ್ಣ ಆದುಲ್ಲರ್. ದಾಯೆಗಂದ್ಂಡ ಕ್ರಿಸ್ತೆ ಮಾತ ಅಧಿಕಾರೊಗ್ಲಾ ಅಧಿಪತಿಲೆಗ್ಲಾ ತರೆ ಆದುಲ್ಲೆ.

¹¹ ನಿಕುಲು ಆಯಡ್ದೇ ಸುನ್ನತಿ ಪಡೆತರ್ ಈ ಸುನ್ನತಿ ಕೈಡ್ದ್ ಮಲ್ತ್‌ದಿನ ಅತ್ತ್ ಉಂದು ಶರೀರಭಾವೊನು ಬುಡ್ದು ಬುಡ್ಪಿನವೇ ಉಂದೇ ಕ್ರಿಸ್ತಡ್ದ್ ಆತಿನ ಸುನ್ನತಿ.

¹² ಅವತ್ತಂದೆ ನಿಕುಲು ದೀಕ್ಷಾಸ್ನಾನೊಡು ಕ್ರಿಸ್ತಡೊಪ್ಪ ಕೌಂತುದಿನಾಕುಲು ಆಯಿನೆಡ್ದ್ ಆ ಸುನ್ನತಿನ್ ಪಡೆಯರ್. ಉಂದತ್ತಂದೆ ಆಯನ್ ಸೈತಿನಾಕುಲೆಡ್ದ್ ಲಕ್ಕಾದಿನ ದೇವೆರೆ ಬಲೊಟು ನಿಕುಲು ನಂಬಿಕೆ ದೀಯಿನೆಡ್ದ್ ಕ್ರಿಸ್ತನ ಒಟ್ಟುಗು ಕುಡ ಲಕ್ಕ್‌ದ್ ಬೈದರ್.

^13-14 ಅಪರಾಧೊನು ಮಲ್ಪುನೆಡ್ದ್‌ಲಾ ಅಂಚೆನೆ ಸುನ್ನತಿದಾಂತಿ ಶರೀರಬಾವೊಡ್ದುಲಾ ಸೈತಿನಾಕುಲಾದಿತ್ತಿ ನಿಕ್ಲೆನ್ಲಾ ದೇವೆರ್ ಕ್ರಿಸ್ತಡೊಪ್ಪ ಬದ್‌ಕಾಯೆ. ಆಯೆ ನಮ ಮಾತ ಅಪರಾಧೊಲೆನ್ ಮಾಪು ಮಲ್ತ್‌ದ್ ನಮ ಮಿತ್ತ್ ಇತ್ತಿನ ದೂರು ಪಾಡುನ ಬೊಕ್ಕ ನಂಕ್ ವಿರೋಧ ಆದುಪ್ಪು ನಿಯಮೊಲು ಇನ್ಪಿ ಕಾನೂನು ಪತ್ರೊನು ರದ್ದ್ ಮಲ್ತ್‌ದ್ ಅವೆನ್ ಕ್ರುಸ್ಸುಗು ಪಾಡ್ದ್ ದಾಂತಿಲೆಕ್ಕ ಮಲ್ತೆ.

¹⁵ ಆಯೆ ಮಾತ ದೊರೆತನೊನ್ಲಾ ಅಧಿಕಾರೊಲೆನ್ಲಾ ಬಲ ಇಜ್ಜಂದಿಲೆಕ್ಕ ಮಲ್ತ್‌ದ್ ಜಯತ ಉತ್ಸಾಹ ಮಲ್ಪುಲೆಕ್ಕನೇ ಮಾತೆನ್ಲಾ ತನ ಕ್ರುಸ್ಸುದ ಮಿತ್ತ್ ಅವೆನ್ ಗೆಂದಿನಾಯೆ ಆದ್ ಮೆರೆವೊಂದು ತೋಜಾಯೆ.

¹⁶ ಅಂಚಾದ್ ತಿನ್ಪಿನ, ಪರ್ಪಿನ ಸಂಗತಿಗಾವಡ್, ಅತ್ತ್‌ಡ ಪರ್ಬ, ಅಮಾಸೆ, ಅಂಚೆನೆ ಸಬ್ಬತ್ತ್‌ನ್ ಆಚರಣೆ ಮಲ್ಪಂದಿನೆಕ್ಕಾವಡ್ ಏರ್ಲಾ ನಿಕ್ಲೆನ್ ತೀರ್ಪು ಮಲ್ಪಂದಿಲೆಕ್ಕ ತೂವೊನ್ಲೆ.

¹⁷ ಉಂದು ಮಾತ ನನ ದುಂಬಗ್ ಬರಿಯೆರೆ ಉಪ್ಪುನ ಕಾರ್ಯೊಲೆ ನಿರೆಲ್ ಆದುಂಡು. ಉಂದೆತ್ತ ನಿಜ ಸ್ವರೂಪ ಕ್ರಿಸ್ತೆನೇ!

¹⁸ ಕೆಲೆವೆರ್ ತೀರಾ ತಗ್ಗಾವೊನ್ನೆಟ್ಲಾ ದೂತೆರೆ ಪೂಜೆ ಮಲ್ತ್‌ದ್ ತನ್ಕುಲೆಗ್ ದರ್ಶನ ಆತ್ಂಡ್ ಅಂದ್‌ದ್ ಪುಗರೊನ್ವೆರ್ ಬೊಕ್ಕ ಲೌಕೀಕ ಬುದ್ಧಿಡ್ ಆಧಾರದಾಂತೆ ಸೊರ್ಕುದು ಪೋತೆರ್.

¹⁹ ಆಂಡ ಕ್ರಿಸ್ತೆ ಇನ್ಪಿ ತರೆತ ಸಮ್ಮಂಧೊನು ಬುಡ್ದು ಬುಡ್ತೆರ್. ಇಂಚಿತ್ತಿನಾಕುಲು ನಿಕ್ಲೆಗ್ ಬತ್ತಿ ಪುದರ್‌ನ್ ದೆತ್ತ್ ಪಾಡ್ಯೆರೆ ಇಂಬು ಕೊರಡೆ. ಆ ತರೆಡ್ದೆ ಇಡೀ ಶರೀರಲಾ ಸಂದ್‌ದ ನರಂಬುಲೆಡ್ದ್ ಬೋಡಾಯಿನ ಸಹಾಯೊನು ಪಡೆವೊಂದು ದೇವೆರ್ ಕೊರ್ಪಿನ ಸತ್ವೊಡ್ದು ಅವು ಬಳಪುಂಡು.

ಕ್ರಿಸ್ತಡೊಪ್ಪ ಸೈಪಿನವುಲಾ ಬದುಕುನವುಲಾ

²⁰ ಲೌಕಿಕತ್ವದ ಬಾಲ ಬೋಧನೆದ ಮಟ್ಟ್‌ಗ್ ನಿಕುಲು ಕ್ರಿಸ್ತ ಒಟ್ಟುಗು ಸೈತಿನೆಡ್ದ್ ನನಲಾ ಲೋಕೊಡು ಬದುಕುನಾಕುಲೆಲೆಕ್ಕನೆ ನರಮಾನಿಲೆ ಆಜ್ಞೆಲೆಗ್ಲಾ ಬೋಧನೆಗ್ಲಾ ಒಳಗಾದುಲ್ಲರ್.

²¹ ಉಂದೆನ್ ಮುಟ್ಟೊಡ್ಚಿ, ಐತ ರುಚಿ ತೂವೊಡ್ಚಿ

²² ಬೊಕ್ಕೊಂಜೆನ್ ಮುಟ್ಟೊಡ್ಚಿ ಇನ್ಪಿನ ಕಟ್ಟ್‌ಪಾಡ್‌ಲೆಗ್ ನಿಕುಲು ದಾಯೆಗ್ ಸೇರೊಂದುಲ್ಲರ್? ಅವು ಮಾತ ವಸ್ತುಲ್ಲಾ ಉಪಯೋಗ ಮಲ್ಪುನಗನೇ ನಾಶ ಆದ್ ಪೋಪುಂಡು.

²³ ಇಂಚಿನ ಬೋಧನೆಲು ಸ್ವಂತ ಕಲ್ಪನೆದ ಆಚಾರೊಲೆನ್ಲಾ, ವಿಪರೀತ ತಗ್ಗ್‌ತನೊನ್ಲಾ, ಶರೀರದ ದಂಡನೆನ್ಲಾ ಪಂಡೊಂದು ಪುದರ್‌ಗ್ ಮಾತ್ರನೇ ಗೇನ ಅಂದ್‌ದ್ ಪನ್ಪಾವೊಂದು, ಐಡ್ದ್ ಶರೀರದ ಇಚ್ಚೆಲೆನ್ ದೆತ್ತ್‌ದ್ ಪಾಡಿಯೆರೆ ವಾ ಒಂಜಿ ಪ್ರಯೋಜನೊಗ್ಲಾ ಬರ್ಪಿನವು ಅತ್ತ್.