ಕೊಲೊಸ್ಸಿಯೆರೆಗ್ 1 - ಪೊಸ ಒಡಂಬಡಿಕೆ

^1-2 ದೇವೆರೆ ಚಿತ್ತದ ಪ್ರಕಾರ ಕ್ರಿಸ್ತ ಯೇಸುನ ಅಪೊಸ್ತಲೆ ಆಯಿ ಪೌಲುಲಾ ನಮ ಸಹೋದರೆ ತಿಮೋಥಿಲಾ ಕೊಲೊಸ್ಸಿಡುಪ್ಪು ದೇವಜನೊಕುಲೆಗ್ಲಾ ಕ್ರಿಸ್ತಡ್ ನಂಬಿಗಸ್ತೆರಾಯಿ ಸಹೋದ್ರೆರ್‌ಲೆಗ್ಲಾ ಬರೆಪಿನಿ ದಾನೆಂದ್ಂಡ, ನಮ ಅಮ್ಮೆ ಆದುಪ್ಪು ದೇವೆರೆಡ್ದ್ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.

ಉಪಕಾರದ ಪ್ರಾರ್ಥನೆ

^3-4 ನಿಕುಲು ಕ್ರಿಸ್ತ ಯೇಸುಡು ದೀತಿನ ನಂಬಿಕೆದ ವಿಷಯೊಡ್ಲಾ ದೇವಜನೊಕುಲೆಡ್ ದೀತಿನ ಪ್ರೀತಿದ ವಿಷಯೊಡ್ಲಾ ಎಂಕುಲು ಕೇಂಡ್ದ್ ಎಂಕುಲು ಪ್ರಾರ್ಥನೆ ಮಲ್ಪುನಗ ಏಪಲಾ ನಿಕ್ಲೆನ ಸಂಗತಿಡ್ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಅಮ್ಮೆ ಆದುಪ್ಪು ದೇವೆರೆಗ್ ಉಪಕಾರ ಮಲ್ಪುವ.

⁵ ಪರಲೋಕೊಡು ನಿಕ್ಲೆಗಾದ್ ತಯಾರಾತಿನ ಮಿತ್ತ್‌ದ ನಿರೀಕ್ಷೆನ್ ಸುವಾರ್ತೆದ ಸತ್ಯ ಪಾತೆರೊಡು ಸುರುಟೆ ಕೇಂಡ್ದರ್.

⁶ ನಿಕುಲು ಸತ್ಯೊಡು ದೇವೆರೆ ದಯೊನು ಕೇಂಡ್ದ್ ಅರ್ಥ ಮಲ್ತೊಂದಿನ ದಿನೊಡ್ದಿಂಚಿ, ಈ ಸುವಾರ್ತೆ ಫಲ ಕೊರ್ದು ಬುಲೆಪುಲೆಕ್ಕನೇ ಇಡೀ ಲೋಕೊಡು ದಿಂಜಿದ್ ಫಲ ಕೊರ್ದು ಬುಲೆವೊಂದುಂಡು.

⁷ ಎಂಕುಲೆ ಪ್ರೀತಿದ ಜತೆಸೇವಕೆ ಆಯಿ ಎಪಫ್ರಡ್ದ್ ನಿಕುಲು ಈ ಸತ್ಯದ ಬೋಧನೆನ್ ಕಲ್ತೊಂಡರ್. ಆಯೆ ನಿಕ್ಲೆಗಾದ್ ಕ್ರಿಸ್ತನ ನಂಬಿಗಸ್ತೆ ಸೇವಕೆ ಆದುಲ್ಲೆ.

⁸ ಪರಿಶುದ್ಧಾತ್ಮೊಡುಪ್ಪು ನಿಕ್ಲೆ ಪ್ರೀತಿದ ವಿಷಯೊನು ಎಂಕ್ ತೆರಿಪಾಯಿನಿ ಆಯೆನೇ.

⁹ ಅಂಚಾಯಿನೆಡ್ದ್ ಎಂಕುಲು ನಿಕ್ಲೆನ ಸಂಗತಿಲೆನ್ ಕೇಂಡ್ದಿನ ದಿನೊಡ್ದಿಂಚಿ ನಿಕ್ಲೆಗಾದ್ ಬುಡಂದೆ ಪ್ರಾರ್ಥನೆ ಮಲ್ತೊಂದುಲ್ಲ. ನಿಕುಲು ಮಾತ ಆತ್ಮೀಕ ಗೇನೊನ್ಲಾ ಗ್ರಹಿಕೆನ್ಲಾ ಪಡೆಯೊಂದು ದೇವೆರೆ ಚಿತ್ತದ ತಿಳುವಳಿಕೆಡ್ ದಿಂಜೊಂದು ಬರೊಡು

¹⁰ ಬೊಕ್ಕ ಕರ್ತವಗ್ ಮೆಚ್ಚಿಗೆಯಾದ್ ಏಪಲಾ ಯೋಗ್ಯೆರಾದ್ ನಡತ್‌ದ್ ಪ್ರತಿ ಒಂಜಿ ವಿಷಯೊಡ್ಲಾ ಸಂತೋಷ ಕೊರ್ಪಿನಕುಲಾದುಪ್ಪುಲೆ. ನಿಕ್ಲೆ ಎಡ್ಡೆ ಕೆಲಸೊಡು ಫಲ ಕೊರ್ದು ದೇವೆರೆ ಗೇನೊಡು ಬಲತೊಂದು ಪೋಲೆ.

¹¹ ಬೊಕ್ಕ ಆಯನ ಮೈಮೆದ ಬಲೊಡ್ದಾದ್ ಬಲ ಪಡೆದ್, ಮಾತೆನ್ಲಾ ಸಂತೋಷೊಡ್ಲಾ ತಾಳ್ಮೆಡ್ಲಾ ಉಪ್ಪುನಾಕುಲು ಆಲೆ.

¹² ಬೊಕ್ಕ ಬೊಲ್ಪುದ ರಾಜ್ಯೊಡು ದೇವಜನೊಕುಲೆ ಬಾಧ್ಯಸ್ತಿಗೆದ ಪಾಲ್‌ಗ್ ನಿಕ್ಲೆನ್ ತಕ್ಕದಾಕುಲಾದ್ ಮಲ್ತ್‌ದಿನ ಅಮ್ಮೆ ಆದುಪ್ಪು ದೇವೆರೆಗ್ ಉಪಕಾರ ಸ್ತುತಿ ಮಲ್ಪುನಾಕುಲು ಆದುಪ್ಪೊಡು ಅಂದ್‌ದ್ ದೇವೆರೆನ್ ನಟ್ಟೊನ್ವೆ.

¹³ ದೇವೆರ್ ನಮನ್ ಕತ್ತಲೆದ ಅಧಿಕಾರೊಡ್ದು ಬುಡ್ಪಾದ್ ತನ ಪ್ರೀತಿದ ಮಗನ ರಾಜ್ಯೊಗು ಸೇರಿಸಾಯೆ.

¹⁴ ಆ ಮಗಡ್ದ್ ನಮ ಪಾಪೊಲು ಪರಿಹಾರ ಆದ್ ನಂಕ್ ಬುಡುಗಡೆ ಆಂಡ್.

ಕ್ರಿಸ್ತೆ ಸರ್ವಶ್ರೇಷ್ಠದಾಯೆ

¹⁵ ಕ್ರಿಸ್ತೆ ಕಣ್ಣ್‌ಗ್ ತೋಜಂದಿ ದೇವೆರೆ ಸ್ವರೂಪ ಆದುಲ್ಲೆ, ಮಾತ ಸೃಷ್ಟಿದ ಸರ್ವಶ್ರೇಷ್ಠ ಕಡೀರ್‌ದ ಮಗನ ಸ್ಥಾನ ಪಡೆಯಿನಾಯೆ ಆದುಲ್ಲೆ.

¹⁶ ಪರಲೋಕ ಭೂಲೋಕೊಡುಪ್ಪು ಮಾತಲಾ ಕಣ್ಣ್‌ಗ್ ತೋಜುನವು, ತೋಜಂದಿನವು ಪಂಡ್ಂಡ ಗದ್ದಿಗೆಲಾವಡ್, ಮಲ್ಲಾದಿಗೆ ಆವಡ್, ದೊರೆತನೊಲಾವಡ್, ಅಧಿಕಾರೊಲಾವಡ್ ಆಯಡ್ದೇ ಸೃಷ್ಟಿ ಆತಿನಾದುಂಡು. ಮಾತಲಾ ಆಯಡ್ದೇ ಆಯಗಾದ್‌ಲಾ ಸೃಷ್ಟಿ ಆತಿನಾದುಂಡು.

¹⁷ ಆಯೆ ಮಾತೆಡ್ದ್‌ಲಾ ದುಂಬು ಇತ್ತಿನಾಯೆ, ಮಾತೆಕ್ಲಾ ಆಯೆನೇ ಆಧಾರ.

¹⁸ ಸಭೆ ಇನ್ಪಿ ಶರೀರೊಗು ಆಯೆ ತರೆ ಆದುಲ್ಲೆ. ತಾನ್ ಮಾತೆಟ್ಟ್ ದುಂಬುದಾಯೆ ಆಪಿಲೆಕ್ಕ ಆಯೆ ಸುರುತ್ತಾಯೆಲಾ ಸೈತಿನಾಕುಲೆಡ್ದ್ ದುಂಬತ್ತ ಲಕ್ಕ್‌ದ್ ಕಡೀರ್‌ದಾಯೆಲಾ ಮಾತೆಟ್ಲಾ ಸರ್ವಶ್ರೇಷ್ಠದಾಯೆಲಾ ಆದುಲ್ಲೆ.

¹⁹ ದಾಯೆಗಂದ್ಂಡ ದೇವೆರ್ ಆಯಡ್ ತನ ಪರಿಪೂರ್ಣತೆಡ್ ವಾಸ ಮಲ್ಪೆರೆ ಇಷ್ಟ ಮಲ್ತೊಂಡೆ.

²⁰ ಬೊಕ್ಕ ಆಯನ ಕ್ರುಸ್ಸುಡ್ ಗುತ್ತುದಿನ ನೆತ್ತೆರ್‌ಡ್ದ್ ಸಮಾಧಾನ ಉಂಡು ಮಲ್ತ್‌ದ್ ಪರಲೋಕೊಡ್ಲಾ ಭೂಲೋಕೊಡ್ಲಾ ಉಪ್ಪುನ ಮಾತಲಾ ತನ ಮಗಡ್ದ್ ರಾಜಿ ಆವೊಡು ಅಂದ್‌ದ್ ದೇವೆರೆನ ಚಿತ್ತ ಆದಿತ್ತ್ಂಡ್.

²¹ ಉಂದತ್ತಂದೆ ನಿಕುಲು ಒಂಜಿ ಕಾಲೊಡು ಪಿದಯಿದ ಜನೊಕುಲುಲಾ ಹಾಳ್ ಬೇಲೆ ಮಲ್ಪುನಾಕುಲಾದ್ ಪಗೆತ ಮನಸ್‌ದಾಕುಲು ಆದಿತ್ತರ್.

²² ಆಂಡ ಇತ್ತೆ ದೇವೆರ್ ತನ ಮಗನ ಶರೀರದ ಮರಣೊಡ್ದಾದ್ ನಿಕ್ಲೆನ್ ತನಡೊಪ್ಪ ರಾಜಿ ಮಲ್ತೊಂಡೆ. ಉಂದೆಡ್ದಾದ್ ಆಯೆ ನಿಕ್ಲೆನ್ ತನ ಕೈತಲ್‌ ಕನತ್‌ದ್ ಆಯನ ಸನ್ನಿಧಾನೊಡು ಪರಿಶುದ್ಧೆರ್ಲಾ ದೋಷದಾಂತಿನಾಕುಲುಲಾ ಕುಂದೆಲ್‌ದಾಂತೆಲಾ ಆದ್ ಉಂತುದರ್.

²³ ಆಂಡ ನಿಕುಲು ಬಾನದ ತಿರ್ತ್ ಉಪ್ಪು ಮಾತ ಸೃಷ್ಟಿಗ್ ಸಾರಿನ ಸುವಾರ್ತೆಡ್ದ್ ಉಂಡಾಯಿನ ಭರವಸೆನ್ ಬುಡ್ದು ಪೋವಂದೆ ಪಾಡ್ದಿ ಪಂಚಾಂಗದ ಮಿತ್ತ್ ಸ್ಥಿರಾದಿತ್ತ್‌ದ್ ನಂಬಿಕೆಡ್ ನಿಲೆ ಆದಿತ್ತರ್ಡ ಆ ಸ್ಥಾನ ನಿಕ್ಲೆಗ್ ಒದಗ್‌ದ್ ಬರ್ಪುಂಡು. ಪೌಲು ಇನ್ಪಿ ಯಾನ್ ಸುವಾರ್ತೆದ ಸೇವಕೆ ಆದುಲ್ಲೆ.

ಸಭೆಕಾದ್ ಪೌಲುನ ಕೆಲಸೊಲು

²⁴ ಯಾನ್ ಇತ್ತೆ ನಿಕ್ಲೆಗಾದ್ ಅನುಭವ ಮಲ್ತಿ ಭಂಗೊಲೆಡ್ ಸಂತೋಷ ಪಡೆಯೊಂದುಲ್ಲೆ. ಕ್ರಿಸ್ತನ ಭಂಗೊಲೆಡ್ ಬಾಕಿ ಒರಿದಿನೆನ್ ಸಭೆ ಇನ್ಪಿ ಆಯನ ಶರೀರೊಗಾದ್ ಎನ ಶರೀರೊಡು ಅನುಭವ ಮಲ್ತ್‌ದ್ ತೀರಿಸಾವೆ.

²⁵ ಯಾನ್ ಸಭಾಸೇವಕೆ ಆಯೆ; ದೇವೆರೆ ಪಾತೆರೊನು ಪೂರ್ತಿ ಆದ್ ತೆರಿಪಾವು ಕೆಲಸೊನು ನಿಕ್ಲೆನ ಪ್ರಯೋಜನೊಗಾದ್ ಎಂಕ್ ಒದಗಾಯೆ.

²⁶ ಈ ಪಾತೆರ ಯುಗಯುಗೊಡ್ದು ತರೆತರೆಡ್ದಿಂಚಿ ದೆಂಗ್‌ದಿತ್ತ್‌ಂಡ್. ಅವು ಇತ್ತೆದ ಕಾಲೊಲೆಡ್ ಪರಿಶುದ್ಧ ದೇವಜನೊಕುಲೆಗ್ ತೋಜಿದ್ ಬತ್ತ್ಂಡ್.

²⁷ ದಾಯೆಗಂದ್ಂಡ ಕ್ರಿಸ್ತನ ಮೈಮೆಲಾ ಐಶ್ವರ್ಯಲಾ ಪಿದಯಿದ ಜನೊಕುಲೆಗ್ಲಾ ಉಂಡು ಇನ್ಪಿನೆನ್ ಅಕುಲುಲಾ ತೆರಿಯೊನೊಡು ಅಂದ್‌ದ್ ದೇವೆರ್ ಬಯಕಿಯೆ. ಈ ಮರ್ಮ ದಾನೆಂದ್ಂಡ ಕ್ರಿಸ್ತೆ ನಿಕ್ಲೆಡೊಪ್ಪ ಇತ್ತ್‌ದ್ ಮೈಮೆದ ನಿರೀಕ್ಷೆಗ್ ಉಪ್ಪುನವೇ.

²⁸ ಆಯನ್ ಎಂಕುಲು ಸಾರಿಯುನಾಕುಲಾದ್ ಮಾತೆರೆಗ್ಲಾ ಬುದ್ಧಿದ ಪಾತೆರ ಪನೊಂದು ಮಾತೆರೆಗ್ಲಾ ಪೂರ್ತಿ ಗೇನದ ಬೋಧನೆ ಮಲ್ತೊಂದು ದೇವೆರೆ ದುಂಬು ಮಾತೆರೆನ್ಲಾ ಕ್ರಿಸ್ತನ ತಿಳುವಳಿಕೆಡ್ ಪೂರ್ತಿ ಆದ್ ಉಂತಾವೆರೆ ಪ್ರಯತ್ನ ಮಲ್ತೊಂದುಲ್ಲ.

²⁹ ಎನಡ್ ಕಾರ್ಯ ಮಲ್ಪುನ ದೇವೆರೆ ಬಲೊನು ಉಪಯೋಗ ಮಲ್ತೊಂದು ಐಕಾದೇ ಉರ್ಡೊಂದು ಕಷ್ಟ ಬರೊಂದುಲ್ಲೆ.