ಅಪೊ.ಕ್ರಿ 9 - ಪೊಸ ಒಡಂಬಡಿಕೆ

ಸೌಲು ಯೇಸುನ ಶಿಷ್ಯೆ ಆಯಿನವು

¹ ಆಂಡ ಸೌಲು ಕರ್ತವ ಶಿಷ್ಯೆರೆ ಮಿತ್ತ್ ನನಲಾತ್ ಗರ್ವೊಡು ಪೋಡಿಯವೊಂದುಲಾ ಅಕ್ಲೆನ್ ಕೆರೊಡಂದ್‌ದ್‌ಲಾ ಪ್ರಧಾನಯಾಜಕನ ಕೈತಲ್‌ ಪೋಯೆ.

² ಈ ಪೊಸ ಮಾರ್ಗೊಗು ಸೇರಿನಾಕುಲು ಏರಾಂಡಲಾ ತಿಕ್ಕ್ಂಡ ಅಕುಲು ಅಂಜೊವುಲಾಂಡಲಾ ಸರಿ, ಪೊಂಜೊವುಲಾಂಡಲಾ ಸರಿ, ಯಾನ್ ಅಕ್ಲೆಗ್ ಕೋಳ ಪಾಡ್ದ್ ಯೆರೂಸಲೇಮುಗು ಕನಪಿಲೆಕ್ಕ ದಮಸ್ಕೊಡುಪ್ಪುನ ಮಾತ ಸಭಾಮಂದಿರೊಲೆಗ್ ಈ ಪತ್ರ ಕೊರೊಡು ಅಂದ್‌ದ್ ಆಯಡ ನಟ್ಟೊಂಡೆ.

³ ಆಯೆ ಪ್ರಯಾಣ ಮಲ್ತೊಂದು ದಮಸ್ಕದ ಕೈತಲ್‌ ಬನ್ನಗ ಒರನೆ ಬಾನದ ಉಲಯಿಡ್ದ್ ಒಂಜಿ ಬೊಲ್ಪು ಆಯನ ಸುತ್ತಲಾ ಮಿಂಚಿಂಡ್.

⁴ ಅಪಗನೆ ಸೌಲು ನೆಲಕ್ ಬೂರಿಯೆ, ಸೌಲಾ, ಸೌಲಾ, ಈ ಎಂಕ್ ದಾಯೆಗ್ ಭಂಗ ಕೊರ್ಪ ಅಂದ್‌ದ್ ಪನ್ಪಿನ ಸ್ವರೊನು ಕೇಂಡೆ.

⁵ ಐಕ್ ಸೌಲೆ, “ಕರ್ತವಾ ಈ ಏರ್?” ಕೇಂಡಿನೆಕ್ಕ್ ಕರ್ತವೆ, “ಈ ಭಂಗ ಕೊರ್ಪಿನ ಯೇಸು ಯಾನ್.

⁶ ಈ ಇತ್ತೆ ಲಕ್ಕ್‌ದ್ ಊರುದುಲಯಿ ಪೋಲ. ಈ ಮಲ್ಪೊಡಾಯಿನ ಬೇಲೆ ಅಲ್ಪ ನಿಕ್ಕ್ ತೆರಿದ್ ಬರು,” ಅಂದ್‌ದ್ ಪಂಡೆ.

⁷ ಆಯನ ಒಟ್ಟುಗು ಪ್ರಯಾಣ ಮಲ್ತೊಂದಿತ್ತಿನಾಕುಲು ಸ್ವರೊನು ಮಾತ್ರ ಕೇಂಡ್ದ್ ಏರೆನ್ಲಾ ತೂವಂದೆ ಬೆಪ್ಪೆರಾದ್ ಉಂತಿಯೆರ್.

⁸ ಸೌಲು ನೆಲಡ್ದ್ ಲಕ್ಕ್‌ದ್ ಉಂತುದು ಕಣ್ಣ್ ಜಪ್ಪುನಗ ದಾಲಾ ತೋಜಿಜಿ. ಅಪಗ ಅಕುಲು ಆಯನ್ ಕೈ ಪತ್ತ್‌ದ್ ದಮಸ್ಕದ ಉಲಯಿ ಲೆತ್ತೊಂದು ಪೋಯೆರ್.

⁹ ಆಯೆ ಮೂಜಿ ದಿನ ಕಣ್ಣ್ ತೋಜಂದೆ ದಾಲಾ ತಿನಂದೆ, ಪರಂದೆ ಇತ್ತೆ.

¹⁰ ದಮಸ್ಕಡ್ ಅನನೀಯಾ ಪನ್ಪಿ ಒರಿ ಶಿಷ್ಯೆ ಇತ್ತೆ; ಕರ್ತವೆ ದರ್ಶನೊಡು, “ಅನನೀಯಾ,” ಅಂದ್‌ದ್ ಆಯನ್ ಲೆಪ್ಪುನಗ, ಆಯೆ, “ಕರ್ತವಾ, ಇಂದಾ ಯಾನ್ ಉಲ್ಲೆ,” ಪಂಡೆ.

¹¹ ಕರ್ತವೆ ಆಯಗ್ ಪಂಡೆ, “ಈ ಲಕ್ಕ್‌ದ್ ಸರ್ತ ಸಾದಿ ಪನ್ಪಿ ಓಣಿಗ್ ಪೋದು ಯೂದನ ಇಲ್ಲಡ್ ತಾರ್ಸುದ ಸೌಲು ಪನ್ಪಿನಾಯನ ಸುದ್ಧಿನ್ ಕೇನ್ಲ; ಆಯೆ ಪ್ರಾರ್ಥನೆ ಮಲ್ತೊಂದುಲ್ಲೆ.

¹² ಬೊಕ್ಕ ದರ್ಶನೊಡು ಅನನೀಯಾ ಪನ್ಪಿ ಒರಿ ನರಮಾನಿ ಉಲಯಿ ಬತ್ತ್‌ದ್ ತನ್ಕ್ ಕುಡ ಕಣ್ಣ್ ತೋಜುಲೆಕ್ಕ ಆಯನ ಮಿತ್ತ್ ಕೈ ದೀದ್ ಪ್ರಾರ್ಥನೆ ಮಲ್ಪುನೆನ್ ತೂಯೆ.”

¹³ ಐಕ್ ಅನನೀಯೆ, “ಕರ್ತವಾ, ಈ ನರಮಾನಿ ಯೆರೂಸಲೇಮುಡು ನಿನನ್ ನಂಬಿನ ದೇವಜನೊಕುಲೆಗ್ ಮಸ್ತ್ ಕಷ್ಟ ಕೊರೊಂದುಲ್ಲೆ ಪನ್ಪಿನ ಮಸ್ತ್ ಜನೊಕುಲೆಡ್ದ್ ಕೇಂಡ್ದೆ.

¹⁴ ಬೊಕ್ಕ ಮುಲ್ಪಲಾ ನಿನ ಪುದರ್‌ಡ್ ಅರಿಕೆ ಮಲ್ಪುನಾಕುಲೆಗ್ ಕೋಳ ಪಾಡ್ಪಾವುನ ಅಧಿಕಾರೊನು ಪ್ರಧಾನಯಾಜಕೆರೆಡ್ದ್ ಒಪ್ಪಿಗೆ ದೆತ್ತೊಂದು ಬೈದೆ,” ಪಂಡೆ.

¹⁵ ಕರ್ತವೆ ಆಯಗ್, “ಈ ಪೋಲ; ಆ ನರಮಾನಿ ಪಿದಯಿದ ಜನೊಕುಲೆಗ್ಲಾ ಅರಸರೆಗ್ಲಾ ಇಸ್ರಾಯೇಲ್ಯೆರೆಗ್ಲಾ ಎನ ಪುದರ್‌ಡ್ ಸೇವೆ ಮಲ್ಪೆರೆಗಾದ್ ಬೊಕ್ಕ ಎನ ಪುದರ್ ಸಾರಿಯೆರೆಗಾದ್‌ಲಾ ಯಾನ್ ಆಯನ್ ಅಜತ್ ದೆತ್ತೊಂದಿನಾಯೆ ಆದುಲ್ಲೆ.

¹⁶ ಆಯೆ ಎನ ಪುದರ್‌ಡ್ದ್ ಮಸ್ತ್ ಭಂಗ ಅನುಭವ ಮಲ್ಪೊಡು ಪನ್ಪಿನೆನ್ ಯಾನೇ ಆಯಗ್ ತೋಜಾವೆ,” ಅಂದ್‌ದ್ ಪಂಡೆ.

¹⁷ ಅಪಗ ಅನನೀಯೆ ಪಿದಾಡ್ದ್ ಆ ಇಲ್ಲದ ಉಲಯಿ ಪೋದು ಸೌಲುನ ಮಿತ್ತ್ ತನ ಕೈ ದೀದ್ ಸೌಲಾ, ಎನ ಸಹೋದ್ರಾ, ಈ ಬತ್ತಿ ಸಾದಿಡ್ ನಿನಡ ಪಾತೆರಿನ ಕರ್ತವೆ ಆದುಪ್ಪು ಯೇಸು ನಿಕ್ಕ್ ಕಣ್ಣ್ ತೋಜುಲೆಕ್ಕಲಾ ಈ ಪರಿಶುದ್ಧಾತ್ಮೊಡು ದಿಂಜಿನಾಯೆ ಆವೊಡು ಅಂದ್‌ದ್‌ಲಾ ಎನನ್ ನಿನ ಕೈತಲ್‌ ಕಡಪುಡ್ದೆ.

¹⁸ ಅಪಗನೆ ಆಯನ ಕಣ್ಣ್‌ಡ್ದ್ ಪರೆ ತಿರ್ತ್ ಬೂರ್ದು ಆಯಗ್ ಕಣ್ಣ್ ತೋಜ್ಂಡ್. ಆಯೆ ಲಕ್ಕ್‌ದ್ ಪೋದು ನೀರ್‌ದ ದೀಕ್ಷಾಸ್ನಾನ ದೆತ್ತೊಂಡೆ.

¹⁹ ಐಡ್ದ್ ಬೊಕ್ಕ ವಣಸ್ ಮಲ್ತ್‌ದ್ ಬಲ ಪಡೆಯೆ. ಬೊಕ್ಕ ಆಯೆ ದಮಸ್ಕೊಡಿತ್ತಿನ ಶಿಷ್ಯೆರ್‌ನ ಒಟ್ಟುಗು ಒಂತೆ ದಿನ ಇತ್ತೆ.

ಸೌಲು ದಮಸ್ಕೊಡು ಸಾರಿಯುನವು

²⁰ ಆಯೆ ತಡ ಮಲ್ಪಂದೆ ಸಭಾಮಂದಿರೊಲೆಡ್ ಯೇಸುನ ಬಗೆಟ್ ಆಯೆನೇ ದೇವೆರೆ ಮಗೆ ಅಂದ್‌ದ್ ಸಾರಿಯೆರೆ ಸುರು ಮಲ್ತೆ.

²¹ ಕೇಂಡಿನಾಕುಲು ಮಾತೆರ್ಲಾ ಕಂಗಾಲಾದ್ ಈ ಪುದರ್ ಅರಿಕೆ ಮಲ್ಪುನಾಕುಲೆನ್ ಯೆರೂಸಲೇಮುಡು ಹಾಳ್ ಮಲ್ತಿನಾಯೆ ಇಂಬೆ ಅತ್ತಾ? ಅಂಚಿನಾಕುಲೆನ್ ಕೋಳ ಪಾಡ್ದ್ ಪ್ರಧಾನಯಾಜಕೆರೆ ಕೈತಲ್‌ ಲೆತ್ತೊಂದು ಪೋವೊಡಂದ್ದೇ ಇಡೆಗ್ ಬೈದೆ ಅತ್ತಾ ಅಂದ್‌ದ್ ಪಾತೆರೊಂಡೆರ್.

²² ಆಂಡ ಸೌಲು ನನಲಾ ಹೆಚ್ಚ್ ಬಲ ಪಡೆದ್ ಯೇಸು ಆಯೆನೇ ಕ್ರಿಸ್ತೆ ಆದುಲ್ಲೆ ಅಂದ್‌ದ್ ದೃಢ ಮಲ್ತ್‌ದ್ ದಮಸ್ಕೊಡಿತ್ತಿನ ಯೆಹೂದ್ಯೆರೆನ್ ಪಿರ ಪಾತೆರಂದಿಲೆಕ್ಕ ಮಲ್ತೆ.

²³ ಕೆಲವು ದಿನ ಕರಿಬೊಕ್ಕ ಯೆಹೂದ್ಯೆರ್ ಆಯನ್ ಕೆರೊಡು ಅಂದ್‌ದ್ ಉಪಾಯ ಮಲ್ತೊಂಡೆರ್.

²⁴ ಅಕ್ಲೆನ ಉಪಾಯ ಸೌಲುಗು ತೆರಿದ್ ಬತ್ತ್ಂಡ್. ಆಯನ್ ಕೆರ್ಪಿನೆಕ್ಕಾದ್ ಅಕುಲು ರಾತ್ರೆ ಪಗೆಲ್ ಊರುದ ಬಾಕಿಲ್‌ಡ್ ಕಾತೊಂದಿತ್ತೆರ್.

²⁵ ಆಂಡ ಆಯನ ಶಿಷ್ಯೆರ್ ರಾತ್ರೆದ ಪೊರ್ತುಡು ಆಯನ್ ಲೆತ್ತೊಂದು ಪೋದು ಒಂಜಿ ಪುಡಯಿಡ್ ಕುಲ್ಲಾದ್ ಗೋಡೆಡ್ದ್ ತಿರ್ತ್ ಜಪುಡಾಯೆರ್.

ಯೆರೂಸಲೇಮುಡು ಪೌಲು

²⁶ ಆಯೆ ಯೆರೂಸಲೇಮುಗು ಬತ್ತ್‌ದ್ ಶಿಷ್ಯೆರೆ ಒಟ್ಟುಗು ಕೂಡಿಯೆರೆ ತೂನಗ ಮಾತೆರ್ಲಾ ಆಯನ್ ಯೇಸುನ ಶಿಷ್ಯೆ ಅತ್ತ್ ಅಂದ್‌ದ್ ನಂಬಂದೆ ಆಯಗ್ ಪೋಡಿಯೆರ್.

²⁷ ಆಂಡ ಬಾರ್ನಬೆ ಆಯನ್ ಲೆತ್ತೊಂದು ಅಪೊಸ್ತಲೆರೆನ ಕೈತಲ್‌ ಪೋಯೆ. ಸೌಲು ಸಾದಿಡ್ ಕರ್ತವನ್ ತೂಯಿನೆನ್ಲಾ ಕರ್ತವೆ ಆಯನ ಒಟ್ಟುಗು ಪಾತೆರ್ದಿನೆನ್ಲಾ ದಮಸ್ಕದ ಉಲಯಿ ಧೈರ್ಯೊಡು ಯೇಸುನ ಪುದರ್‌ಡ್ ಸಾರಿನೆನ್ಲಾ ಅಕ್ಲೆಗ್ ಬುಡ್ಪಾದ್ ಪಂಡೆ.

^28-29 ಐಡ್ದ್ ಬೊಕ್ಕ ಸೌಲು ಅಪೊಸ್ತಲೆರೆ ಒಟ್ಟುಗು ಯೆರೂಸಲೇಮುಡು ಇತ್ತೆ. ಆಯೆ ಕರ್ತವನ ಪುದರ್‌ಡ್ ಧೈರ್ಯೊಡು ಸಾರಿಯೆ. ಬೊಕ್ಕ ಗ್ರೀಕ್ ಭಾಷೆ ಪಾತೆರುನ ಯೆಹೂದ್ಯೆರೆನ ಒಟ್ಟಗು ಪಾತೆರ್‌ದ್ ತರ್ಕ ಮಲ್ತೊಂದಿತ್ತೆ. ಆಂಡ ಅಕುಲು ಆಯನ್ ಕೆರಿಯೆರೆ ತೂಯೆರ್.

³⁰ ಉಂದು ಸಹೋದ್ರೆರೆಗ್ ತೆರಿನೆಡ್ದ್ ಅಕುಲು ಆಯನ್ ಕೈಸರೆಯಗ್‌ ಲೆತ್ತೊಂದು ಪೋದು ಅಲ್ತ್‌ಡ್ದ್ ತಾರ್ಸೊಗು ಕಡಪುಡಿಯೆರ್.

³¹ ಇಂಚಾದುಪ್ಪುನಗ ಯೂದಾಯ ಗಲಿಲಾಯ ಸಮಾರ್ಯೊಡಿತ್ತಿನ ಸಭೆಟ್ ಸಮಾಧಾನ ಉಂಡಾಂಡ್. ಅಕುಲು ತನ್ಕುಲೆ ಉಲಯಿ ಭಕ್ತಿಡ್ ಅಭಿವೃದ್ಧಿ ಆದ್, ಕರ್ತವ ಪೋಡಿಗೆಡ್ ನಡತೊಂದು ಪರಿಶುದ್ಧಾತ್ಮದ ಸಮಜಯಿಸಿಗೆಡ್ ಬಲ ಪಡೆದ್ ಸಭೆ ಹೆಚ್ಚಾಂಡ್.

ಲುದ್ಧಡ್ ಬೊಕ್ಕ ಯೊಪ್ಪಡ್ ಪೇತ್ರೆ

³² ಪೇತ್ರೆ ಮಾತ ಕಡೆಟ್ಲಾ ಪ್ರಯಾಣ ಮಲ್ತೊಂದುಪ್ಪುನಗ ಲುದ್ಧೊಡುಪ್ಪು ದೇವಜನೊಕುಲೆನ ಕೈತಲ್‌ ಬತ್ತೆ.

³³ ಅಲ್ಪ ಸಂದ್‌ವಾತದಾಯೆ ಎಣ್ಮ ವರ್ಸೊಡ್ದಿಂಚಿ ಪಜೆತ ಮಿತ್ತ್‌ ಇತ್ತಿನ ಐನೇಯೆ ಪನ್ಪಿನ ಒರಿ ನರಮಾನಿನ್ ತೂಯೆ.

³⁴ ಪೇತ್ರೆ ಆಯಗ್, “ಐನೇಯಾ, ಯೇಸು ಕ್ರಿಸ್ತೆ ನಿನನ್ ಗುಣ ಮಲ್ಪುವೆ. ಈ ಲಕ್ಕ್‌ದ್ ನಿನ ಪಜೆನ್ ಸಮ ಮಲ್ತೊನ್ಲ,” ಅಂದ್‌ದ್ ಪಂಡೆ. ಅಪಗನೆ ಆಯೆ ಲಕ್ಕಿಯೆ.

³⁵ ಬೊಕ್ಕ ಲುದ್ಧಡ್ಲಾ ಸಾರೋನುಡ್ಲಾ ಉಪ್ಪುನಾಕುಲು ಮಾತೆರ್ಲಾ ಆಯನ್ ತೂದು ಕರ್ತವ ಕಡೆಕ್ಕ್ ತಿರ್ಗಿಯೆರ್.

³⁶ ಯೊಪ್ಪೊಡು ತಬಿಥಾ ಪನ್ಪಿನ ಒರ್ತಿ ಶಿಷ್ಯೆದಿ ಇತ್ತಲ್. ಆ ಪುದರ್‌ಗ್ ಗ್ರೀಕ್ ಭಾಷೆಡ್ ದೊರ್ಕ ಪನ್ನಗ ಜಿಂಕೆ. ಆಲ್ ಏಪಲಾ ಎಡ್ಡೆ ಕಾರ್ಯೊಲೆನ್ ಬೊಕ್ಕ ಬಡವೆರೆಗ್ ದಾನ ಧರ್ಮೊಲೆನ್ ಮಲ್ತೊಂದಿತ್ತಲ್.

³⁷ ಆ ಸಮಯೊಡು ಆಲ್ ಸೀಕ್‌ಡ್ ಬೂರ್ದು ಸೈತಲ್, ಬೊಕ್ಕ ಆಲೆನ ಪುಣೊನು ಮೀಪಾದ್ ಉಪ್ಪರಿಗೆಡ್ ದೀಯೆರ್.

³⁸ ಯೊಪ್ಪೊಗು ಲುದ್ಧ ಕೈತಲ್ ಆದಿತ್ತ್‌ದ್ ಪೇತ್ರೆ ಅಲ್ಪ ಉಲ್ಲೆ ಪನ್ಪಿನೆನ್ ಶಿಷ್ಯೆರ್ ತೆರಿದ್ ರಡ್ಡ್ ಜನೊನು ಆಯನ ಕೈತಲ್‌ ಕಡಪುಡ್ದು, “ಕೂಡ್ಲೆ ಎಂಕುಲೆ ಕೈತಲ್‌ ಬರೊಡು,” ಅಂದ್‌ದ್ ನಟ್ಟೊಂಡೆರ್.

³⁹ ಪೇತ್ರೆ ಲಕ್ಕ್‌ದ್ ಅಕ್ಲೆನ ಒಟ್ಟುಗು ಪೋಯೆ. ಆಯೆ ಬತ್ತಿನೆನ್ ತೂದು ಆಯನ್ ಉಪ್ಪರಿಗೆಗ್ ಲೆತ್ತೊಂದು ಪೋಯೆರ್. ಅಲ್ಪ ಕಂಡನಿದಾಂತಿನಾಕುಲು ಮಾತೆರ್ಲಾ ಬುಲ್ತೊಂದು ಪೇತ್ರನ ಕೈತಲ್‌ ಉಂತೊಂದು ದೊರ್ಕ ಜೀವೊಡುಪ್ಪನಗ ಮಲ್ತ್ ಕೊರ್ತಿನ ಅಂಗಿಲೆನ್ ಕುಂಟುಲೆನ್ ತೋಜಾಯೆರ್.

⁴⁰ ಪೇತ್ರೆ ಅಕ್ಲೆನ್ ಮಾತೆರೆನ್ಲಾ ಪಿದಯಿ ಕಡಪುಡ್ದು ಮುಂಡುಬೂರ್ದು ಪ್ರಾರ್ಥನೆ ಮಲ್ತ್‌ದ್ ಪುಣತ ಕಡೆಕ್ಕ್ ತೂದು, “ತಬಿಥಾ, ಲಕ್ಕ್‌ಲ,” ಪಂಡೆ. ಆಲ್ ಕಣ್ಣ್ ಜತ್ತ್‌ದ್ ಪೇತ್ರನ್ ತೂದು ಲಕ್ಕ್‌ದ್ ಕುಲ್ಲೊಂಡಲ್.

⁴¹ ಆಯೆ ಆಲೆಗ್ ಕೈ ನೀಡ್ದ್ ಲಕ್ಕಾಯೆ. ಬೊಕ್ಕ ದೇವಜನೊಕುಲೆನ್ಲಾ ಕಂಡನಿದಾಂತಿನಾಕುಲೆನ್ಲಾ ಲೆತ್ತ್‌ದ್ ಜೀವೊಡು ಲಕ್ಕಿನಲೆನ್ ಅಕ್ಲೆನ ಎದುರು ಉಂತಾಯೆ.

⁴² ಈ ಸುದ್ಧಿ ಯೊಪ್ಪೊಡು ಪೂರ ತೆರಿದ್ ದಿಂಜ ಜನ ಕರ್ತವ ಮಿತ್ತ್ ನಂಬಿಕೆ ದೀಯೆರ್.

⁴³ ಐಡ್ದ್ ಬೊಕ್ಕ ಪೇತ್ರೆ ಯೊಪ್ಪೊಡು ಚರ್ಮದ ಬೇಲೆ ಮಲ್ಪುನ ಸೀಮೋನು ಕೈತಲ್‌ ದಿಂಜ ದಿನ ಇತ್ತೆ.