ಅಪೊ.ಕ್ರಿ 8 - ಪೊಸ ಒಡಂಬಡಿಕೆ

¹ ಸ್ತೇಫನನ್ ಕೆರಿಯೆರೆ ಸೌಲುನ ಒಪ್ಪಿಗೆ ಇತ್ತ್ಂಡ್. ಆ ದಿನೊಟು ಯೆರೂಸಲೇಮುಡು ಇತ್ತಿನ ಸಭಾಮಂದಿರೊಗು ಮಲ್ಲ ಕಷ್ಟ ಬತ್ತ್ಂಡ್. ಅಪೊಸ್ತಲೆರೆನ್ ಬುಡ್ದು, ನಂಬುನಾಕುಲು ಮಾತೆರ್ಲಾ ಯೂದಾಯ ಬೊಕ್ಕ ಸಮಾರ್ಯದ ಸೀಮೆಲೆಡ್ ಪರಡ್ದ್ ಪೋಯೆರ್.

ಸೌಲು ಸಭಾಮಂದಿರೊಗು ಭಂಗ ಕೊರ್ಪಿನಿ

² ಭಕ್ತೆರಾಯಿನ ಜನೊಕುಲು ಸ್ತೇಫನನ್ ಕೌಂತುದು ಆಯಗಾದ್ ಮಸ್ತ್ ದುಃಖ ಮಲ್ತೆರ್.

³ ಆಂಡ ಸೌಲು ಇಲ್ಲ್ ಇಲ್ಲಗ್ ಪೊಗ್ಗುದು ಅಂಜೊವುಲೆನ್ಲಾ ಪೊಂಜೊವುಲೆನ್ಲಾ ಪಿದಾಯಿ ಒಯ್ತೊಂದು ಸೆರೆಮನೆಗ್ ಪಾಡ್ದ್ ಸಭೆನ್ ಹಾಳ್ ಮಲ್ತೊಂದಿತ್ತೆ.

ಫಿಲಿಪ್ಪೆ ಸಮಾರ್ಯೊಡು ಸುವಾರ್ತೆ ಸಾರುನವು

⁴ ಪರಡ್ದ್ ಪೋಯಿನಾಕುಲು ಅಲ್ಪಲ್ಪ ಪೋದು ಯೇಸುನ ಸುವಾರ್ತೆನ್ ಸಾರೊಂದಿತ್ತೆರ್.

⁵ ಫಿಲಿಪ್ಪು ಸಮಾರ್ಯ ಇನ್ಪಿ ಪಟ್ಟಣೊಗು ಪೋದು ಅಲ್ತಕುಲೆಗ್ ಕ್ರಿಸ್ತನ್ ಸಾರಿಯೆ.

⁶ ಗುಂಪಾದ್ ಸೇರ್ದಿನ ಜನೊಕುಲು ಫಿಲಿಪ್ಪನ ಪಾತೆರೊಲೆನ್ ಕೇಂಡ್ದ್ ಬೊಕ್ಕ ಆಯೆ ಮಲ್ತಿನ ಕಾರ್ನಿಕೊಲೆನ್ ತೂದು, ಆಯೆ ಪಂಡಿನೆನ್ ಒಂಜೇ ಮನಸಾದ್ ಕೆಬಿ ಕೊರ್ದು ಕೇನಿಯೆರ್.

⁷ ದಾಯೆಗ್ ಪಂಡ ಮಸ್ತ್ ಜನೊಕುಲೆ ಉಲಯಿಡ್ದ್ ದೆವ್ವೊಲು ದೊಂಡೆ ಬಾಯಿ ದೀದ್ ಪಿದಯಿ ಬತ್ತ್ಂಡ್; ಬೊಕ್ಕ ಮಸ್ತ್ ಜನ ವಾತದಾಕುಲುಲಾ ಕುಂಟೆರ್‌ಲಾ ಗುಣ ಪಡೆಯೆರ್.

⁸ ಆ ಪೇಂಟೆಡ್ ಮಸ್ತ್ ಸಂತೋಷ ಉಂಡಾಂಡ್.

⁹ ಆಂಡ ಮಸ್ತ್ ಸಮಯೊಡ್ದಿಂಚಿ ಆ ಪೇಂಟೆಡ್ ಸೀಮೋನೆ ಪನ್ಪಿನಾಯೆ ಒರಿ ನರಮಾನಿ ತಾನ್ ಬಾರೀ ಮಲ್ಲ ಜನ ಅಂದ್‌ದ್ ಎನ್ನೊಂದು ಮಂತ್ರವಾದ ಮಲ್ತೊಂದು ಸಮಾರ್ಯದ ಜನೊಕುಲೆನ್ ಬೆರ್ಮೆ ಮಲ್ತೊಂದಿತ್ತೆ.

¹⁰ ಎಲ್ಯಾಕುಲೆಡ್ದ್ ಮುಖ್ಯಸ್ಥೆರೆ ಮುಟ್ಟ ಮಾತೆರ್ಲಾ ಇಂಬ್ಯಡ ಮಲ್ಲ ಶಕ್ತಿ ಪಂಡ ದೇವೆರೆ ಶಕ್ತಿ ಉಂಡು ಅಂದ್‌ದ್ ಆಯಗೇ ಗಮನ ಕೊರೊಂದಿತ್ತೆರ್.

¹¹ ಮಸ್ತ್ ದಿನೊಡ್ದು ಆಯೆ ಮಂತ್ರವಾದ ಮಲ್ತೊಂದು ಜನೊಕುಲೆನ್ ಮರ್ಲ್ ಮಲ್ಪಾಯಿನೆಡ್ದ್ ಅಕುಲು ಆಯನ ಪಾತೆರೊಗು ಕೆಬಿ ಕೊರೊಂದಿತ್ತೆರ್.

¹² ಆಂಡ ಫಿಲಿಪ್ಪು ದೇವೆರೆ ರಾಜ್ಯದ ವಿಷಯೊಡ್ಲಾ ಯೇಸು ಕ್ರಿಸ್ತನ ಪುದರ್‌ಡ್ಲಾ ಸುವಾರ್ತೆನ್ ಸಾರಿನಗ ಫಿಲಿಪ್ಪು ಪಂಡಿನೆನ್ ನಂಬುದು ಅಂಜೊವೊಲುಲಾ ಪೊಂಜೊವೊಲುಲಾ ನೀರ್‌ದ ದೀಕ್ಷಾಸ್ನಾನ ಮಲ್ತೊಂಡೆರ್.

¹³ ಆ ಸೀಮೋನೆಲಾ ನಂಬುದು ನೀರ್‌ದ ದೀಕ್ಷಾಸ್ನಾನ ಮಲ್ತೊಂದು ಫಿಲಿಪ್ಪು ಒಟ್ಟುಗು ಏಪಲಾ ಇತ್ತ್‌ದ್ ಆಯೆ ಮಲ್ಪುನ ಕಾರ್ನಿಕೊಲೆನ್ಲಾ ಮಲ್ಲಕಾರ್ಯೊಲೆನ್ಲಾ ತೂದು ಅಚ್ಚಿರ ಆಯೆ.

¹⁴ ಸಮಾರ್ಯದಾಕುಲು ದೇವೆರೆ ಪಾತೆರೊನು ಸ್ವೀಕಾರ ಮಲ್ತಿನ ವರ್ತಮಾನೊನು ಯೆರೂಸಲೇಮುಡಿತ್ತಿ ಅಪೊಸ್ತಲೆರ್ ಕೇಂಡ್ದ್ ಪೇತ್ರೆ ಯೋಹಾನನ್ ಅಕ್ಲೆ ಕೈತಲ್‌ ಕಡಪುಡಿಯೆರ್.

¹⁵ ಮೊಕುಲು ಅಡೆಗ್ ಬತ್ತ್‌ದ್ ಆ ಜನೊಕುಲೆಗ್ ಪರಿಶುದ್ಧಾತ್ಮ ತಿಕ್ಕೊಡು ಅಂದ್‌ದ್ ಅಕ್ಲೆಗಾದ್ ಪ್ರಾರ್ಥನೆ ಮಲ್ತೆರ್.

¹⁶ ದಾಯೆಗಂದ್ಂಡ ಆನಿ ಮುಟ್ಟ ಪರಿಶುದ್ಧಾತ್ಮ ಒರಿಯ ಮಿತ್ತ್‌ಲಾ ಬತ್ತ್‌ದಿಜ್ಜಾಂಡ್. ಆಂಡ ಅಕುಲು ಕರ್ತವೆ ಆದುಪ್ಪು ಯೇಸುನ ಪುದರ್‌ಡ್ ನೀರ್‌ದ ದೀಕ್ಷಾಸ್ನಾನ ಮಾತ್ರ ಮಲ್ಪಾವೊಂದಿತ್ತೆರ್.

¹⁷ ಪೇತ್ರೆ ಯೋಹಾನೆ ಅಕ್ಲೆ ತರೆ ಮಿತ್ತ್ ಕೈ ದೀನಗ ಅಕುಲು ಪರಿಶುದ್ಧಾತ್ಮ ಪಡೆವೊಂಡೆರ್.

¹⁸ ಅಪೊಸ್ತಲೆರ್ ಕೈ ದೀಪಿನೆಡ್ದ್ ಪರಿಶುದ್ಧಾತ್ಮ ಬರ್ಪಿನೆನ್ ಸೀಮೋನೆ ತೂದು ದುಡ್ಡು ತೋಜಪಾದ್

¹⁹ ಯಾನ್ ಏರೆನ ಮಿತ್ತ್ ಕೈ ದೀಪೆನಾ ಅಕುಲುಲಾ ಪರಿಶುದ್ಧಾತ್ಮ ಪಡೆಪಿಲೆಕ್ಕ ಈ ಅಧಿಕಾರೊನು ಎಂಕ್‌ಲಾ ಕೊರ್ಲೆ ಪಂಡೆ.

²⁰ ಆಂಡ ಪೇತ್ರೆ ಆಯಗ್, ನಿನ ದುಡ್ಡು ನಿನಡೊಪ್ಪನೇ ಹಾಳಾದ್ ಪೋವಡ್. ದೇವೆರೆ ಉಡಿಗೆರೆನ್ ದುಡ್ಡುಡು ದೆತ್ತೊನೊಲಿ ಅಂದ್‌ದ್ ಎನ್ನಿಯನಾ?

²¹ ಈ ಸೇವೆಡ್ ನಿಕ್ಕ್ ವಾ ಪಾಲ್‌ಲಾ ಇಜ್ಜಿ, ವಾ ಹಕ್ಕ್‌ಲಾ ಇಜ್ಜಿ. ನಿನ ಉಡಲ್ ದೇವೆರೆ ಎದುರು ಸರಿ ಇಜ್ಜಿ.

²² ಅಂಚಾಯಿನೆಡ್ದ್ ಈ ನಿನ ದುಷ್ಟತನೊಡ್ದು ಪಶ್ಚಾತಾಪ ಪಡೆಲ. ಕರ್ತವೆ ನಿನ ಉಡಲ್‌ದ ದುಷ್ಟ ಆಲೋಚನೆನ್ ಮಾಪು ಮಲ್ಪೆರೆ ಆಯಡ ಪ್ರಾರ್ಥನೆ ಮಲ್ಪುಲ.

²³ ದಾಯೆಗ್ ಪಂಡ ಈ ಪಡಿಕೆಂತಿನ ವಿಷೊಟ್ಲಾ ಅನ್ಯಾಯದ ಬಲೆಟ್ಲಾ ತಿಕ್ಕ್‌ದುಲ್ಲ ಅಂದ್‌ದ್ ತೋಜುಂಡು.

²⁴ ಐಕ್ ಸೀಮೋನೆ, ನಿಕುಲು ಪಂಡಿನ ಸಂಗತಿಲೆಡ್ ಒವುಲಾ ಎನ ಮಿತ್ತ್ ಬರಂದಿಲೆಕ್ಕ ಎಂಕಾದ್ ನಿಕುಲೇ ಕರ್ತವಡ ಪ್ರಾರ್ಥನೆ ಮಲ್ಪುಲೆ ಅಂದ್‌ದ್ ಪಂಡೆ.

²⁵ ಇಂಚಾದುಪ್ಪುನಗ ಅಕುಲು ಕರ್ತವ ಪಾತೆರೊಲೆನ್ ಪಾತೆರ್‌ದ್ ಎಡ್ಡೆ ಸಾಕ್ಷಿ ಕೊರ್ದು ಸಮಾರ್ಯದಾಕುಲೆನ ಕೆಲವು ಊರುಡು ಸುವಾರ್ತೆನ್ ಸಾರಿಯೊಂದು ಯೆರೂಸಲೇಮುಗು ಪಿರ ಬತ್ತೆರ್.

ಫಿಲಿಪ್ಪು ಐಥಿಯೋಪ್ಯದಾಯಗ್ ಸುವಾರ್ತೆ ತೆರಿಪಾಯಿನವು

²⁶ ಆತಾನಗ ಕರ್ತವನ ದೂತೆ ಫಿಲಿಪ್ಪುಗು, “ಈ ಲಕ್ಕ್‌ದ್ ತೆನ್‌ಕಯಿಗ್ ಪೋದು ಯೆರೂಸಲೇಮುಡ್ದು ಗಾಜಗ್ ಪೋಪಿನ ಕಾಡ್ ಸಾದಿಡ್ ಪೋಲ” ಪಂಡ್ದ್ ಪಂಡೆ.

²⁷ ಆಯೆ ಪಿದಾಡ್ದ್ ಪೋಯೆ; ಪೋವೊಂದುಪ್ಪುನಗ ಐಥಿಯೋಪ್ಯದ ಒರಿ ನರಮಾನಿನ್ ತೂಯೆ. ಆಯೆ ಕಂಚುಕಿ ಐಥಿಯೋಪ್ಯದ ರಾಣಿ ಆದಿತ್ತಿನ ಕಂದಾಕೆನ ಕೈ ತಿರ್ತ್ ಮಲ್ಲ ಅಧಿಕಾರಿಲಾ ಆಲೆನ ಮಾತ ಖಜಾನೆದ ಉಸ್ತುವಾರಿ ತೂಪಿನಾಯೆಲಾ ಆದಿತ್ತೆ. ಆಯೆ ಆರಾಧನೆಗಾದ್ ಯೆರೂಸಲೇಮುಗು ಬತ್ತ್‌ದಿತ್ತೆ

²⁸ ಆಯೆ ಪಿರ ಪೋವೊಂದುಪ್ಪುನಗ ತನ ರಥೊಟು ಕುಲ್ಲೊಂದು ಯೆಶಾಯೆ ಪ್ರವಾದಿನ ಗ್ರಂಥೊನು ಓದೊಂದಿತ್ತೆ.

²⁹ ದೇವೆರಾತ್ಮ ಫಿಲಿಪ್ಪುಗು ಈ ಆ ರಥಥ ಕೈತಲ್‌ ಪೋದು ಐತ ಒಟ್ಟುಗೇ ನಡಪುಲ ಅಂದ್‌ದ್ ಪಂಡೆ.

³⁰ ಫಿಲಿಪ್ಪು ಪಾರ್‌ಪೋದು ಆ ಕಂಚುಕಿ ಯೆಶಾಯೆ ಪ್ರವಾದಿನ ಗ್ರಂಥೊನು ಓದುನೆನ್ ಕೇಂಡ್ದ್ ಅಂದಾ ಈ ಓದುನವು ನಿಕ್ಕ್ ಅರ್ಥ ಆಪುಂಡಾ?

³¹ ಅಂದ್‌ದ್ ಕೇನ್ನಗ ಆಯೆ, “ಏರಾಂಡಲಾ ಐತ ಅರ್ಥ ಎಂಕ್ ಪಂಡಿಜಾಂಡ ಎಂಕ್ ಎಂಚ ಅರ್ಥ ಆಪುಂಡು?” ಅಂದ್‌ದ್ ಈ ರಥೊನು ಮಿತ್ತಾರ್ದ್ ಎನ ಕೈತಲ್‌ ಕುಲ್ಲು ಅಂದ್‌ದ್ ಫಿಲಿಪ್ಪುಡ ನಟ್ಟೊಂಡೆ.

³² ಆಯೆ ಓದೊಂದಿತ್ತಿನ ಶಾಸ್ತ್ರದ ಬರವು ಇಂಚ ಉಂಡು, “ಕುದ್ಪೆರೆ ಕೊನೊಪಿನ ಕುರಿತಲೆಕ್ಕ ಆಯನ್ ಕೊನೊಯೆರ್; ಕುರಿತ್ತ ಕಿನ್ನಿ ಕುಜಲ್‌ನ್ ಕತ್ತೆರ್‌ನಾಯನ ಎದುರುಡು ಮನಿಪಂದೆ ಉಂತುಲೆಕ್ಕ ಆಯೆ ಬಾಯಿ ಜತ್ತಿನೆ ಇಜ್ಜಿ.

³³ ಆಯಗ್ ಉಂಡಾಯಿ ಕಷ್ಟದ ಮಿತ್ತ್ ನ್ಯಾಯದಾಂತೆ ಪೋಂಡು; ಆಯನ ಸಂತಾನದ ಸಂಗತಿಡ್ ಪನಿಯೆರೆ ದಾದ ಉಂಡು? ಆಯನ ಜೀವೊನು ಈ ಭೂಮಿಡ್ದ್ ದೆತ್ತ್‌ದ್ ಬುಡಿಯರತ್ತಾ.”

³⁴ ಕಂಚುಕಿ, “ಈ ಪಾತೆರದ ಸಂಗತಿಡ್, ಪ್ರವಾದಿ ಉಂದೆನ್ ಏರೆನ ಸಂಗತಿಡ್ ಪನ್ಪೆ? ತನ ವಿಷಯೊಡಾ ಇಜ್ಜಿಂಡ ಬೊಕ್ಕೊರಿಯನ ವಿಷಯೊಡಾ? ದಯ ಮಲ್ತ್‌ದ್ ಪನೊಡು,” ಅಂದ್‌ದ್ ಫಿಲಿಪ್ಪುನು ನಟ್ಟೊನ್ವೆ.

³⁵ ಫಿಲಿಪ್ಪು ಅವ್ವೇ ಶಾಸ್ತ್ರದ ಆಧಾರ ಮಲ್ತೊಂದು ಪಾತೆರಿಯೆರೆ ಸುರು ಮಲ್ತ್‌ದ್ ಆಯಗ್ ಯೇಸುನ ವಿಷಯದ ಸುವಾರ್ತೆ ತೆರಿಪಾಯೆ.

³⁶ ಅಕುಲು ಸಾದಿಡ್ ಪೋವೊಂದುಪ್ಪುನಗ ನೀರ್‌ದ ಕೈತಲ್‌ ಬತ್ತೆರ್. ಕಂಚುಕಿ, “ತೂಲ, ಮೂಲು ನೀರ್ ಉಂಡು; ಎಂಕ್ ನೀರ್‌ದ ದೀಕ್ಷಾಸ್ನಾನ ಆಪಿನೆಕ್ಕ್ ಅಡ್ಡಿ ದಾಲ ಉಂಡಾ?” ಅಂದ್‌ದ್

^37-38 ರಥೊನು ಉಂತಾಯೆರೆ ಅಪ್ಪಣೆ ಕೊರಿಯೆ. ಫಿಲಿಪ್ಪುಲಾ ಕಂಚುಕಿಲಾ ಇರ್ವೆರ್‌ಲಾ ನೀರ್‌ದ ಉಲಯಿ ಜತ್ತೆರ್. ಫಿಲಿಪ್ಪು ಆಯಗ್ ನೀರ್‌ದ ದೀಕ್ಷಾಸ್ನಾನ ಮಲ್ಪಾಯೆ.

³⁹ ಅಕುಲು ನೀರ್ ಬುಡ್ದು ಮಿತ್ತ್ ಬನ್ನಗ ಕರ್ತವ ಆತ್ಮೆ ಫಿಲಿಪ್ಪುನು ದೆರ್ತೊಂದು ಪೋಂಡು. ಕಂಚುಕಿ ಆಯನ್ ಬೊಕ್ಕ ತೂಯಿನೇ ಇಜ್ಜಿ. ಕಂಚುಕಿ ಸಂತೋಷೊಡು ತನ ಸಾದಿ ಪತ್ತೊಂದು ದುಂಬು ಪೋಯೆ.

⁴⁰ ಬೊಕ್ಕ ಫಿಲಿಪ್ಪು ಅಜೋತುಡು ತೂವೆರೆ ತಿಕ್ಕಿಯೆ, ಅಲ್ತ್‌ಡ್ದ್ ಕೈಸರೆಯಗ್ ಮುಟ್ಟುನೆಂಗೆ ಮಾತ ಊರುಲೆಡ್ ತಿರ್ಗೊಂದು ಸುವಾರ್ತೆ ಸಾರಿಯೆ.