ಅಪೊ.ಕ್ರಿ 6 - ಪೊಸ ಒಡಂಬಡಿಕೆ

ಏಳ್ ಜನ ಸಹಾಯಕೆರ್‌

¹ ಆ ದಿನೊಕುಲೆಡ್ ಯೇಸುನ ಶಿಷ್ಯೆರ್ ಹೆಚ್ಚೊಂದಿತ್ತೆರ್. ಅಕ್ಲೆ ನಡುಟು ಗ್ರೀಕ್ ಭಾಷೆ ಪಾತೆರುನಾಕುಲು ಇಬ್ರಿಯ ಭಾಷೆ ಪಾತೆರುನಾಕುಲೆ ಮಿತ್ತ್ ದಿನದಿನತ ಉಪಚಾರೊಡು ವಿಧವೆರೆನ್ ಸಜ್ಜಿಡ್ ಚಾಕ್ರಿ ಮಲ್ಪುಜೆರ್ ಅಂದ್‌ದ್ ಅಪೊಸ್ತಲೆರೆಡ ದೂರು ಕೊರಿಯೆರ್

² ಅಪಗ ಪದ್ರಾಡ್ ಮಂದಿ ಅಪೊಸ್ತಲೆರೆ ಶಿಷ್ಯೆರೆ ಕೂಟೊನು ಲೆತ್ತ್‌ದ್, “ನಮ ದೇವೆರೆನ ವಾಕ್ಯೊಪದೇಶೊನು ಬುಡ್ದು ಚಾಕ್ರಿ ಮಲ್ಪುನ ಸರಿ ಅತ್ತ್;

³ ಅಂಚಾಯಿನೆಡ್ದಾವರ ಸಹೋದ್ರೆರೇ, ಪರಿಶುದ್ಧಾತ್ಮೊಡು ದಿಂಜಿದ್, ಜ್ಞಾನ ಇತ್ತಿ ಗುಣವಂತೆರಾಯಿ ಏಳ್ ಜನೊಕುಲೆನ್ ಅಜತ್‌ದ್ ಅಕ್ಲೆನ್ ಈ ಬೇಲೆದ ಮಿತ್ತ್ ನೇಮಕ ಮಲ್ಪುಗ.

⁴ ಅಪಗ ನಮ ಸಮಯೊನು ಪೂರ ಪ್ರಾರ್ಥನೆಗ್ಲಾ ವಾಕ್ಯೊನು ಸಾರಿಯೆರೆಗ್ಲಾ ಕೊರಿಯೆರೆ ಸಾದ್ಯ ಆಪುಂಡು,” ಅಂದ್‌ದ್ ಪಂಡೆರ್.

⁵ ಈ ಪಾತೆರ ಇಡೀ ಗುಂಪುಗು ಎಡ್ಡೆ ಅಂದ್‌ದ್ ತೋಜ್ಂಡ್. ಐಡ್ದಾವರ ಅಕುಲು ಏಳ್ ಜನೊಕುಲೆನ್ ಅಜತ್‌ದ್ ದೆತ್ತೊಂಡೆರ್. ನಂಬಿಕೆಡ್ಲಾ ಪರಿಶುದ್ಧಾತ್ಮಡ್ದ್‌ಲಾ ದಿಂಜಿದಿ ನರಮಾನಿ ಆದುಪ್ಪು ಸ್ತೇಫನನ್, ಫಿಲಿಪ್ಪು ಪ್ರೊಕೋರೆ, ನಿಕನೋರೆ, ತೀಮೋನೆ, ಪರ್ಮೇನೆ, ಯೆಹೂದ್ಯ ಮತೊಕು ಸೇರ್ದಿನಾಯೆ ಅಂತಿಯೋಕ್ಯದ ನಿಕೊಲಾಯನ್ ಅಪೊಸ್ತಲೆರೆನ ಎದುರುಡು ಉಂತಾಯೆರ್.

⁶ ಅಪೊಸ್ತಲೆರ್ ಪ್ರಾರ್ಥನೆ ಮಲ್ತ್‌ದ್ ಅಕ್ಲೆ ತರೆತ ಮಿತ್ತ್ ಕೈ ದೀದ್ ನೇಮಕ ಮಲ್ತೆರ್.

⁷ ಬೊಕ್ಕ ದೇವೆರೆ ವಾಕ್ಯ ಹೆಚ್ಚಾದ್ ಜನೊಕುಲೆಗ್ ತಿಕ್ಕ್ಂಡ್. ಶಿಷ್ಯೆರ್‌ನ ಸಂಖ್ಯೆ ಯೆರೂಸಲೇಮುಡು ಹೆಚ್ಚೊಂದು ಬತ್ತ್ಂಡ್. ಯಾಜಕೆರೆಡ್ದ್‌ಲಾ ದಿಂಜ ಜನ ನಂಬಿಕೆಗ್ ಬರೊಂದಿತ್ತೆರ್.

ಸ್ತೇಫನಗ್ ಮರಣ ದಂಡನೆ ಕೊರ್ಪಿನವು

⁸ ಸ್ತೇಫನೆ ದೇವೆರೆ ದಯೊಡ್ದುಲಾ ಬಲೊಡ್ದುಲಾ ದಿಂಜಿದಿನಾಯೆ ಆದ್ ಜನೊಕುಲೆ ಮದ್ಯೊಡು ಬಲತ್ತ ಕಾರ್ನಿಕೊಲೆನ್ಲಾ ಗುರ್ತೊಲೆನ್ಲಾ ಮಲ್ತೊಂದಿತ್ತೆ.

⁹ ಆಂಡ ಲಿಬೆರ್ತೀನೆರ್, ಪನ್ಪಿನಾಕುಲೆನ ಸಭೆಕ್ ಸೇರ್ದಿನ ಕುರೇನ್ಯೆರ್, ಅಲೆಕ್ಸಾಂದ್ರೆಯೆರ್ ಕಿಲಿಕ್ಯ ಬೊಕ್ಕ ಆಸ್ಯ ಪ್ರದೇಶೊಡ್ದು ಬೈದಿನ ಕೆಲೆವೆರ್ ಸ್ತೇಫನಡ ತರ್ಕ ಮಲ್ತೆರ್.

¹⁰ ಸ್ತೇಫನನ ಪಾತೆರೊಲೆಡ್ ಬುದ್ಧಿ ಬೊಕ್ಕ ಆತ್ಮದ ಬಲ ಇತ್ತಿನೆಡ್ದ್ ಆಯನ್ ವಿರೋಧ ಮಲ್ಪೆರೆ ಆಯಿಜಿ.

¹¹ ಅಪಗ ಅಕುಲು ಸುಳ್ಳು ಸಾಕ್ಷಿ ಪನ್ಪಿನ ಜನೊಕುಲೆನ್ ಸೇರಾವೊಂದು ಇಂಬೇ ಮೋಶೆಗ್ಲಾ ದೇವೆರೆಗ್ಲಾ ವಿರೋಧಾದ್ ದೂಷಣೆದ ಪಾತೆರೊಲೆನ್ ಪಾತೆರುನೆನ್ ಎಂಕುಲು ಕೇಂಡ್ದ ಅಂದ್‌ದ್ ಪನ್ಪಾಯೆರ್.

¹² ಬೊಕ್ಕ ಜನೊಕುಲೆನ್ಲಾ ಹಿರಿಯೆರೆನ್ಲಾ ಶಾಸ್ತ್ರಿನಾಕುಲೆನ್ಲಾ ನೋಚಾದ್ ಆಯನ್ ಪತ್ತ್‌ದ್ ಹಿರಿಸಭೆಕ್ ಲೆತ್ತೊಂದು ಪೋದು ಸುಳ್ಳು ಸಾಕ್ಷಿ ಕೊರ್ಪಿನ ಜನೊಕುಲೆ ಎದುರು ಉಂತಾಯೆರ್.

¹³ ಆ ಸುಳ್ಳುಸಾಕ್ಷಿಲು, “ಈ ನರಮಾನಿ ಈ ಪರಿಶುದ್ಧ ದೇವಾಲಯದ ಬೊಕ್ಕ ಮೋಶೆನ ನ್ಯಾಯಕಟ್ಟ್‌ಲೆಗ್ ವಿರೋಧಾದ್ ಪಾತೆರುನೆನ್ ಬುಡ್ಪಿನೇ ಇಜ್ಜಿ,” ಅಂದ್‌ದ್ ಪಂಡೆರ್.

¹⁴ ಆ ನಜರೇತ್‌ದ ಯೇಸು ಈ ದೇವಾಲಯೊನು ದರ್ತ್‌ದ್ ಮೋಶೆ ಎಂಕ್ಲೆಗ್ ಕೊರ್ತಿನ ಆಚಾರೊಲೆನ್ ಬೇತೆ ಮಲ್ಪುವೆ ಅಂದ್‌ದ್ ಇಂಬೇ ಪನ್ಪಿನೆನ್ ಎಂಕುಲು ಕೇಂಡ್ದ ಅಂದ್‌ದ್ ಪಂಡೆರ್.

¹⁵ ಅಪಗ ಹಿರಿಸಭೆಟ್ಟ್ ಕುಲ್ಲುದಿನಾಕುಲು ಮಾತೆರ್ಲಾ ಸ್ತೇಫನನ ಮಿತ್ತ್ ದೃಷ್ಟಿದೀದ್ ತೂನಗ, ಆಯನ ಮೋನೆ ದೂತನ ಮೋನೆದ ಲೆಕ್ಕ ಉಪ್ಪುನೆನ್ ತೂಯೆರ್.