ಅಪೊ.ಕ್ರಿ 5 - ಪೊಸ ಒಡಂಬಡಿಕೆ

ಅನನೀಯೆ ಬೊಕ್ಕ ಸಪ್ಫ್ಯೆರ

¹ ಅನನೀಯೆ ಪನ್ಪಿನಾಯೆ ಒರಿ ನರಮಾನಿ ತನ ಬೊಡೆದಿ ಸಪ್ಫೈರನ ಒಪ್ಪಿಗೆಡ್ದ್ ಒಂಜಿ ಜಾಗ್‌ನ್ ಮಾರಿಯೆ.

² ಆಂಡ ಮಾರ್ದ್ ಬತ್ತಿನ ಕಾಸ್‌ಡ್ದ್ ಒಂತೆ ಪಾಲ್‌ನ್ ಮಾತ್ರ ಅಪೊಸ್ತಲೆರೆನ ಕಾರ ಮುದೆಲ್‌ಡ್ ದೀಯೆ. ಒಂತೆ ಕಾಸ್‌ನ್ ಗುಟ್ಟುಡು ದೀಯೆ. ಆಯನ ಬೊಡೆದಿಗ್ಲಾ ಗೊತ್ತಿತ್ತ್ಂಡ್.

³ ಅಪಗ ಪೇತ್ರೆ, “ಅನನೀಯಾ, ಈ ಆ ಕಂಡದ ಕ್ರಯೊಡ್ದು ಒಂಜಿ ಪಾಲ್ ಗುಟ್ಟುಡು ದೀದ್ ಪರಿಶುದ್ಧಾತ್ಮನ್ ಮೋಸ ಮಲ್ಪುಲೆಕ್ಕ ಸೈತಾನನ್ ನಿನ ಉಡಲ್‌ಡ್ ದಾಯೆಗ್ ದಿಂಜಾದ.

⁴ ಆ ಆಸ್ತಿ ಮಾರುನೆಡ್ದ್ ದುಂಬು ನಿನ್ನವು ಆದಿತ್ತ್ಂಡ್‌ತ್ತಾ, ಮಾರ್ದ್ ಬತ್ತಿನ ಕಾಸ್‌ಲಾ ನಿನಡನೇ ಇತ್ತ್ಂಡತ್ತಾ? ಈ ಬೊಡ್ಚಾಂದಿನ ಕಾರ್ಯೊನು ನಿನ ಉಡಲ್‌ಡ್ ದಾಯೆಗ್ ಮಲ್ತೊಂಡ? ಈ ಸುಳ್ಳು ಪಂಡಿನಿ ನರಮಾನಿಲೆಗ್ ಅತ್ತ್ ದೇವೆರೆಗ್.” ಅಂದ್‌ದ್ ಪಂಡೆ.

⁵ ಈ ಪಾತೆರೊನು ಅನನೀಯೆ ಕೇಂಡಿನಪಗನೇ ಬೂರ್ದು ಪ್ರಾಣ ಬುಡಿಯೆ. ಕೇಂಡಿನಾಕುಲೆಗ್ ಮಾತೆರೆಗ್ಲಾ ಬಾರಿ ಪೋಡಿಗೆ ಪತ್ತ್ಂಡ್.

⁶ ಅಪಗ ಜವನ್ಯೆರ್ ಲಕ್ಕ್‌ದ್ ಆಯನ್ ಕುಂಟುಡು ಸುತ್ತುದು ಪಿದಯಿ ಪೋದು ಕೌಂತೆರ್.

⁷ ಸುಮಾರ್ ಮೂಜಿ ಗಂಟೆ ಆಯಿ ಬೊಕ್ಕ ಆಯನ ಬೊಡೆದಿಗ್ ನಡತಿನ ಸಂಗತಿ ತೆರಿಯಂದೆ ಉಲಯಿ ಬತ್ತಲ್.

⁸ ಪೇತ್ರೆ ಆಲೆನ್ ತೂದು, “ನಿಕುಲು ಆ ಜಾಗ್‌ನ್ ಮಾರ್ದಿನಿ ಈತೇ ಕಾಸ್‌ಗಾ,” ಅಂದ್‌ದ್ ಕೇನ್ನಗ ಆಲ್, “ಅಂದ್, ಈತೆಕ್ಕೇ,” ಅಂದ್‌ದ್ ಪಂಡಲ್.

⁹ ಅಪಗ ಪೇತ್ರೆ ಆಲೆಗ್, ನಿಕುಲು ಇರ್ವೆರ್‌ಲಾ ಕರ್ತವನ ಆತ್ಮೊನು ಪರೀಕ್ಷೆ ಮಲ್ಪೆರೆ ದಾಯೆಗ್ ಮನಸ್ ಮಲ್ತೊಂಡರ್? ತೂಲ, ನಿನ ಕಂಡನಿನ್ ಕೌಂತುದಿನಾಕುಲು ಬತ್ತ್‌ದ್ ಬಾಕಿಲ್‌ಡ್ ಕಾರ್ ದೀತೆರ್, ನಿನನ್ಲಾ ತುಂಬೊಂದು ಪೋಪೆರ್ ಅಂದ್‌ದ್ ಪಂಡೆ.

¹⁰ ಅಪಗನೆ ಆಲ್ ಆಯನ ಕಾರ್‌ದ ಕೈತಲ್‌ ಬೂರ್ದು ಪ್ರಾಣ ಬುಡಿಯಲ್. ಆ ಜವನ್ಯೆರ್ ಉಲಯಿ ಬತ್ತ್‌ದ್ ಆಲ್ ಸೈತ್‌ದುಪ್ಪುನೆನ್ ತೂದು, ಆಲೆನ್ ತುಂಬೊಂದು ಪೋದು ಕಂಡನಿನ ಬರಿಟ್ಟೇ ಕೌಂತೆರ್.

¹¹ ಇಡೀ ಸಭೆಕ್ಲಾ ಉಂದೆನ್ ಕೇಂಡಿನಾಕುಲೆಗ್ ಮಾತೆರೆಗ್ಲಾ ಬಾರೀ ಪೋಡಿಗೆ ಪುಟ್ಟುಂಡು.

ಗುರ್ತೊಲು ಬೊಕ್ಕ ಕಾರ್ನಿಕೊಲು

¹² ಉಂದತ್ತಂದೆ ಅಪೊಸ್ತಲೆರೆ ಕೈಡ್ದ್ ಮಸ್ತ್ ಗುರ್ತೊಲು ಕಾರ್ನಿಕೊಲು ಜನೊಕುಲೆ ಮದ್ಯೊಡು ಆವೊಂದಿತ್ತ್ಂಡ್ ಬೊಕ್ಕ ಮಾತೆರ್ಲಾ ಒಗ್ಗಟ್ಟಾದ್ ಸೊಲೊಮೋನನ ಮಂಟಪೊಡು ಕೂಡೊಂದಿತ್ತೆರ್.

¹³ ಬಾಕಿದ ಜನೊಕುಲೆಡ್ ಒರಿಯಗ್ಲಾ ಅಕ್ಲೆ ಒಟ್ಟುಗು ಕೂಡೊನಿಯೆರೆ ಧೈರ್ಯ ಇತ್ತ್‌ಜಿ. ಆಂಡಲಾ ಜನೊಕುಲು ಅಕ್ಲೆನ್ ಬಾರೀ ಪುಗರೊಂದಿತ್ತೆರ್.

¹⁴ ಆಂಡ ನನಲಾ ಏತೋ ಜನ ಅಂಜೊವುಲುಲಾ ಪೊಂಜೊವುಲುಲಾ ಕರ್ತವಡ್ ನಂಬಿಕೆ ದೀಪಿನಾಕುಲಾದ್ ಸಭೆಕ್ ಸೇರೊಂದಿತ್ತೆರ್.

¹⁵ ಇಂಚಾದುಪ್ಪುನಗ ಜನೊಕುಲು ಸೀಕ್‌ದಾಕುಲೆನ್ ಜೋಳಿಗೆಡ್ಲಾ ಪಜೆಟ್ಲಾ ದೀದ್ ಪೇತ್ರೆ ಮಾರ್ಗೊಡು ಪೋವೊಂದುಪ್ಪುನಗ ಆಯನ ನಿರೆಲಾಂಡಲಾ ಅಕ್ಲೆನ ಮಿತ್ತ್ ಬೂರಡ್ ಅಂದ್‌ದ್ ಅಕ್ಲೆನ್ ಮಾರ್ಗದ ಬರಿಕ್ಕ್ ಲೆತ್ತೊಂದು ಬರೊಂದಿತ್ತೆರ್.

¹⁶ ಯೆರೂಸಲೇಮುದ ಸುತ್ತ ಉಪ್ಪುನ ಊರುದ ಜನೊಕುಲು ಸೀಕ್‌ದಾಕುಲೆನ್ಲಾ ದೆವ್ವೊಲೆ ಉಪದ್ರ ಇತ್ತಿನಾಕುಲೆನ್ಲಾ ದೆರ್ತೊಂದು ಗುಂಪುಗುಂಪಾದ್ ಬರೊಂದಿತ್ತೆರ್, ಮಾತೆರ್ಲಾ ಗುಣ ಆವೊಂದಿತ್ತೆರ್.

ಅಪೊಸ್ತಲೆರ್ ಸೆರೆಮನೆಟ್

¹⁷ ಆಂಡ ಪ್ರಧಾನಯಾಜಕೆಲಾ ಆಯ ಒಟ್ಟುಗು ಇತ್ತಿ ಸದ್ದುಕಾಯೆರ್ ಮತಾಭಿಮಾನಿಲು ಮಾತೆರ್ಲಾ ಲಕ್ಕ್‌ದ್ ನಂಜಿಡ್ ದಿಂಜಿದ್

¹⁸ ಅಪೊಸ್ತಲೆರೆನ್ ಪತ್ತ್‌ದ್ ಊರುದ ಸೆರೆಮನೆಟ್ ಪಾಡಿಯೆರ್.

^19-20 ಆಂಡ ಕರ್ತವನ ದೂತೆ ರಾತ್ರೆಡ್ ಸೆರೆಮನೆತ ಬಾಕಿಲ್‌ನ್ ಜತ್ತ್‌ದ್ ಅಕ್ಲೆನ್ ಪಿದಯಿ ಕನತ್‌ದ್, “ನಿಕುಲು ದೇವಾಲಯೊಡು ಉಂತುದು ಈ ಪೊಸ ಜೀವನದ ಮಾತ ವಿಷಯೊನು ಜನೊಕುಲೆಗ್ ಪೋದು ಪನ್ಲೆ.” ಅಂದ್‌ದ್ ಪಂಡೆ.

²¹ ಅಕುಲು ಈ ಅಪ್ಪಣೆನ್ ಕೇಂಡ್ದ್ ಬೊಲ್ಪು ಆವೊಡ್ಡನೇ ದೇವಾಲಯೊಗು ಪೋದು ಬೋಧನೆ ಕೊರಿಯೆರ್. ಇಂಚಿಡ್ದ್ ಪ್ರಧಾನಯಾಜಕೆಲಾ ಆಯನ ಒಟ್ಟುಗು ಇತ್ತಿನಾಕುಲುಲಾ ಬತ್ತ್‌ದ್ ಹಿರಿಸಭೆಟುಪ್ಪುನ ಮಾತ ಇಸ್ರಾಯೇಲ್ಯೆರೆ ಮಖ್ಯಸ್ಥೆರೆನ್‌ ಕೂಡಾದ್ ಅಪೊಸ್ತಲೆರೆನ್ ಲೆತ್ತೊಂದು ಬರಿಯೆರೆ ಸೆರೆಮನೆಗ್ ಕಡಪುಡಿಯೆರ್.

²² ಈ ಅಧಿಪತಿಲು ಸೆರೆಮನೆಗ್ ಬತ್ತ್‌ದ್ ತೂನಗ ಅಪೊಸ್ತಲೆರ್ ಇಜ್ಜಾಂದಿನೆನ್ ತೂದು, ಪಿರ ಬತ್ತ್‌ದ್ ಹಿರಿಸಭೆತ್ತ ನಾಯಕೆರೆಗ್ ತೆರಿಪಾಯೆರ್.

²³ ಸೆರೆಮನೆತ ಬಾಕಿಲ್ ಬದ್ರೊಡು ಮುಚ್ಚಿದಿತ್ತ್‌ಂಡ್, ಬಾಕಿಲ್‌ಗ್ ಬೀಗ ಪಾಡ್ದ್‌ಲಾ ಇತ್ತ್ಂಡ್. ಜೈಲ್ ಕಾಪುನಾಕುಲು ಬಾಕಿಲ್‌ದ ಕೈತಲೇ ಉಂತುದಿನೆನ್ಲಾ ತೂಯ. ಆಂಡ ಬಾಕಿಲ್ ಜತ್ತ್‌ದ್ ತೂನಗ ಉಲಯಿ ಒರಿಲಾ ತೋಜಿಜೆರ್ ಅಂದ್‌ದ್ ಪಂಡೆರ್.

²⁴ ದೇವಾಲಯದ ಅಧಿಪತಿಲಾ ಪ್ರಧಾನಯಾಜಕೆರ್‌ಲಾ ಈ ಪಾತೆರೊಲೆನ್ ಕೇಂಡ್ದ್ ಗಲಿಬಿಲಿ ಆದ್ ಉಂದೆಡ್ದ್ ನನ ದಾನೆ ಆಪುಂಡಾ ಅಂದ್‌ದ್ ಪೋಡಿಯೆರ್.

²⁵ ಅಪಗ ಒರಿ ಬತ್ತ್‌ದ್, “ತೂಲೆ, ನಿಕುಲು ಸೆರೆಮನೆಟ್ ದೀತಿನ ಆ ಜನೊಕುಲು ದೇವಾಲಯೊಡು ಉಂತುದು ಜನೊಕುಲೆಗ್ ಬೋಧನೆ ಮಲ್ತೊಂದುಲ್ಲೆರ್,” ಅಂದ್‌ದ್ ಅಕ್ಲೆಗ್ ತೆರಿಪಾಯೆ.

²⁶ ಅಪಗ ಮುಖ್ಯಸ್ಥೆ ಅಧಿಪತಿ ಒಟ್ಟುಗು ಪೋದು ಅಪೊಸ್ತಲೆರೆನ್ ಲೆತ್ತೊಂದು ಬತ್ತೆ. ಆಂಡ ತನ್ಕುಲೆಗ್ ಜನೊಕುಲು ಕಲ್ಲ್ ದಕ್ಕೆರ್ ಅಂದ್‌ದ್ ಪೋಡಿದ್ ಬಲಾತ್ಕಾರ ಮಲ್ತ್‌ಜೆರ್.

²⁷ ಅಕ್ಲೆನ್ ಲೆತ್ತೊಂದು ಬತ್ತ್‌ದ್ ಹಿರಿಸಭೆತ ದುಂಬು ಉಂತಾಯೆರ್. ಪ್ರಧಾನಯಾಜಕೆ ಅಪೊಸ್ತಲೆರೆಗ್ ಪನ್ಪೆ

²⁸ ನಿಕುಲು ಈ ಪುದರ್‌ಡ್ ಬೋಧನೆ ಕೊರಿಯೆರೆ ಬಲ್ಲಿ ಅಂದ್‌ದ್ ಎಂಕುಲು ನಿಕ್ಲೆಗ್ ಅಪ್ಪಣೆ ಕೊರ್ತ ಅತ್ತಾ ಆಂಡಲಾ ನಿಕುಲು ಯೆರೂಸಲೇಮುನು ನಿಕ್ಲೆನ ಬೋಧನೆಡ್ದ್ ದಿಂಜಾಯರ್, ಬೊಕ್ಕ ಆ ನರಮಾನಿನ ನೆತ್ತೆರ್‌‌ಗ್ ಎಂಕುಲೇ ಜವಾಬ್ದಾರೆರ್ ಅಂದ್‌ದ್ ನಿಕುಲು ಪನೊಂದುಲ್ಲರ್ ಅಂದ್‌ದ್ ಪಂಡಿನೆಕ್ಕ್,

²⁹ ಪೇತ್ರೆಲಾ ಬಾಕಿದ ಅಪೊಸ್ತಲೆರ್‌ಲಾ, “ಎಂಕುಲು ನರಮಾನಿಲೆಡ್ದ್ ಹೆಚ್ಚ್ ದೇವೆರೆಗ್ ಒಳಗಾದುಪ್ಪೊಡು.

³⁰ ನಿಕುಲು ಮರತ ಕಂಬೊಗು ನೇಲಾದ್ ಕೆರ್ತಿನ ಯೇಸುನು ಎಂಕ್ಲೆ ಪಿತೃಲೆನ ದೇವೆರ್ ಲಕ್ಕಾಯೆ.

³¹ ಇಸ್ರಾಯೇಲ್ಯೆರೆಗ್ ಪಶ್ಚಾತಾಪೊನ್ಲಾ ಪಾಪ ಪರಿಹಾರೊನ್ಲಾ ಕೊರಿಯೆರೆ ಬೋಡಾದ್ ದೇವೆರೆ ತನ್ನ ಬಲತ್ತ ಕೈಡ್ದ್ ಮಿತ್ತ್‌ದ ಸ್ಥಾನೊಗು ಏರಾದ್ ಆಯನ್ ನಾಯಕೆಲಾ, ರಕ್ಷಕೆಲಾ ಮಲ್ತೆ.

³² ಈ ಕಾರ್ಯೊಲೆಗ್ ಎಂಕುಲು ಸಾಕ್ಷಿಲು; ದೇವೆರ್ ತನ್ಕ್ ಒಳಗಾದುಪ್ಪುನಾಕುಲೆಗ್ ಕೊರಿ ಪರಿಶುದ್ಧಾತ್ಮೆಲಾ ಸಾಕ್ಷಿ ಆದುಲ್ಲೆ,” ಅಂದ್‌ದ್ ಪಂಡೆರ್.

³³ ಯೆಹೂದ್ಯ ನಾಯಕೆರ್ ಉಂದೆನ್ ಕೇಂಡ್ದ್ ಭಯಂಕರ ಕೋಪೊಡು ಅಕ್ಲೆನ್ ಕೆರೊಡು ಅಂದ್‌ದ್ ಆಲೋಚನೆ ಮಲ್ತೆರ್;

³⁴ ಆಂಡ ಮಾತ ಜನೊಕುಲೆಡ್ ಮಾನ ಪಡೆತಿನ ನ್ಯಾಯಶಾಸ್ತ್ರಿಯಾಯಿನ ಗಮಲಿಯೇಲ್ ಪನ್ಪಿನ ಒರಿ ಪರಿಸಾಯೆ ಹಿರಿಸಭೆಟ್ಟ್ ಲಕ್ಕ್‌ದ್ ಈ ನರಮಾನಿಲೆನ್ ಒಂತೆ ಪೊರ್ತು ಪಿದಯಿ ಕಡಪುಡೊಡು ಅಂದ್‌ದ್ ಅಪ್ಪಣೆ ಕೊರಿಯೆ.

³⁵ ಐಡ್ದ್ ಬೊಕ್ಕ ಹಿರಿಸಭೆತಾಕುಲೆಗ್ ಎನ ಇಸ್ರಾಯೇಲ್ ಸಹೋದ್ರೆರೇ, ನಿಕುಲು ಈ ನರಮಾನಿಲೆಗ್ ಎಂಚಿನ ಮಲ್ಪೆರೆ ತೂಪರ ಆ ಸಂಗತಿಡ್ ಎಚ್ಚರಿಕೆ ಆದುಪ್ಪುಲೆ.

³⁶ ಉಂದೆಡ್ದ್ ದುಂಬು ಥೈದೆ ಪನ್ಪಿನಾಯೆ ಒರಿ ಇತ್ತೆ. ತಾನ್ ಬಾರೀ ಮಲ್ಲ ಜನ ಅಂದ್‌ದ್ ಲಕ್ಕ್‌ದ್ ಆಯನ ಪಕ್ಷೊಗು ನಾಲ್ನೂದು ಜನ ಸೇರೊಂಡೆರ್, ಆಯನ್ ಕೆರಿಯೆರ್, ಬೊಕ್ಕ ಆಯ ಪಕ್ಷದಾಕುಲು ಪಂಡ್ದ್ ಇತ್ತಿನಾಕುಲು ಮಾತೆರ್ಲಾ ದಿಕ್ಕ್ ಪಾಲ್ ಆಯೆರ್.

³⁷ ಆಯಡ್ದ್ ಬೊಕ್ಕ ಖಾನೇಷ್‌ಮಾರಿದ ಕಾಲೊಡು ಗಲಿಲಾಯದ ಯೂದೆ ಲಕ್ಕ್‌ದ್ ಉಂತುದು ಜನೊಕುಲೆನ್ ತನ ಒಟ್ಟುಗು ಸೇರೊನಿಯೆರೆ ಪಂಡೆ. ಆಯೆ ಹಾಳಾದ್ ಪೋಯೆ; ಬೊಕ್ಕ ಆಯ ಪಕ್ಷದಾಕುಲು ಪಂಡ್ದ್ ಇತ್ತಿನಾಕುಲು ಮಾತೆರ್ಲಾ ದಿಕ್ಕ್ ಪಾಲ್ ಆಯೆರ್.

³⁸ ಇಂಚಾದುಪ್ಪುನಗ ನಿಕುಲು ಆ ಜನೊಕುಲೆನ ಸುದ್ಧಿಗ್ ಪೋವೊಡ್ಚಿ. ಅಕ್ಲೆನ್ ಬುಡ್ಲೆ; ದಾಯೆಗಂದ್ಂಡ ಈ ಯೋಚನೆ ದೇವೆರೆನ ಅತ್ತಂದೆ ಜನೊಕುಲೆಡ್ದೆ ಆದಿತ್ತ್ಂಡ ಅವು ಹಾಳಾದ್ ಪೋವು;

³⁹ ಅವು ದೇವೆರೆಡ್ದ್ ಆದಿತ್ತ್ಂಡ ಅವೆನ್ ಹಾಳ್ ಮಲ್ಪೆರೆ ನಿಕ್ಲೆಡ್ದ್ ಆವಂದ್. ನಿಕುಲು ಒಂಜಿ ವೇಳೆ ದೇವೆರೆಡ ನ್ಯಾಯ ಮಲ್ಪುನಾಕುಲಾದ್ ತೋಜಿದ್ ಬರುವರ್ ಅಂದ್‌ದ್ ಪಂಡೆ.

⁴⁰ ಅಕುಲು ಆಯನ ಪಾತೆರೊಗು ಒಪ್ಪಿದ್ ಅಪೊಸ್ತಲೆರೆನ್ ಲೆಪ್ಡಾದ್ ಹಾಕ್‌ದ್ ಯೇಸುನ ಪುದರ್‌ಡ್ ಪಾತೆರಿಯೆರೆ ಬಲ್ಲಿ ಅಂದ್‌ದ್ ಅಪ್ಪಣೆ ಕೊರ್ದು ಅಕ್ಲೆನ್ ಬುಡ್ದು ಬುಡಿಯೆರ್.

⁴¹ ಅಪೊಸ್ತಲೆರ್ ಯೇಸುನ ಪುದರ್‌ಡ್ದ್ ಅವಮಾನ ಪಡೆಯೆರೆ ಯೋಗ್ಯದಾಕುಲು ಅಂದ್‌ದ್ ಸಂತೋಷ ಮಲ್ತ್‌ದ್ ಹಿರಿಸಭೆಡ್ದ್ ಪಿದಾಡ್ದ್ ಪೋಯೆರ್.

⁴² ಅಕುಲು ಪ್ರತಿದಿನ ದೇವಾಲಯೊಡ್ಲಾ ಇಲ್ಲ್ ಇಲ್ಲಡ್ಲಾ ಬೋಧನೆ ಮಲ್ತೊಂದು ಕ್ರಿಸ್ತೆ ಆದುಪ್ಪು ಯೇಸುನ ಸುವಾರ್ತೆನ್ ಸಾರೊಂದಿತ್ತೆರ್.