ಅಪೊ.ಕ್ರಿ 4 - ಪೊಸ ಒಡಂಬಡಿಕೆ

ಹಿರಿಸಭೆತ ಎದುರು ಪೇತ್ರೆಲಾ ಯೋಹಾನೆಲಾ

¹ ಅಪೊಸ್ತಲೆರ್ ಜನೊಕುಲೆ ಒಟ್ಟುಗು ಪಾತೆರೊಂದುಪ್ಪುನಗ ಯಾಜಕೆರ್‌ಲಾ ಸದ್ದುಕಾಯೆರ್‌ಲಾ ದೇವಾಲಯ ಕಾಪುನ ಸಿಪಾಯಿಲೆನ ಮುಖ್ಯಸ್ಥೆಲಾ ಅವುಲು ಬತ್ತೆರ್.

² ಸೈತಿನಾಕುಲು ಜೀವೊಡು ಲಕ್ಕುವೆರ್ ಇನ್ಪಿನೆನ್ ಯೇಸುನ ದೃಷ್ಟಾಂತೊಡ್ದು ಇರ್ವೆರ್ ಅಪೊಸ್ತಲೆರ್ ಜನೊಕುಲೆ ನಡುಟು ಸಾರಿಯೊಂದುಪ್ಪುನೆನ್ ತೂದು ಅಕ್ಲೆಗ್ ಗರ್ವ ಬತ್ತ್ಂಡ್.

³ ಅಪಗ ಬೈಯ ಆದುಪ್ಪುನೆಡ್ದಾವರ ಅಕುಲು ಅಕ್ಲೆನ್ ಪತ್ತ್‌ದ್ ಮನದಾನಿ ಮುಟ್ಟ ಪಾರೊಡು ದೀಯೆರ್.

⁴ ಆಂಡ ಪೇತ್ರೆ ಬೊಕ್ಕ ಯೋಹಾನನ ಬೋಧನೆನ್ ಕೇಂಡ್ದ್ ಮಸ್ತ್ ಜನ ನಂಬಿಯೆರ್. ಅಂಜೊವುಲೆ ಸುಮಾರ್ ಐನ್ ಸಾರ ಮುಟ್ಟ ಇತ್ತೆರ್.

⁵ ಮನದಾನಿ ಯೆಹೂದ್ಯೆರೆನ ಅಧಿಕಾರಿಲು, ಹಿರಿಯೆರ್‌ಲು, ಶಾಸ್ತ್ರಿಲು ಯೆರೂಸಲೇಮುಡು ಸೇರ್ದ್ ಬತ್ತೆರ್.

⁶ ಅಕ್ಲೆ ಒಟ್ಟುಗು ಪ್ರಧಾನಯಾಜಕೆ ಆಯಿ ಅನ್ನ, ಕಾಯಫೆ, ಯೋಹಾನೆ, ಅಲೆಕ್ಸಾಂದ್ರೆ, ಪ್ರಧಾನಯಾಜಕ ಸಂತಾನದಾಕುಲು ಮಾತೆರ್ಲಾ ಇತ್ತೆರ್.

⁷ ಅಕುಲು ಪೇತ್ರೆ ಬೊಕ್ಕ ಯೋಹಾನನ್ ನಡುಟು ಉಂತಾದ್, “ನಿಕುಲು ಆ ಕುಂಟನ್ ವಾ ಬಲೊಟು ಇಜ್ಜಾಂಡ ವಾ ಪುದರ್‌ಡ್ ಉಂದೆನ್ ಮಲ್ತರ್,” ಅಂದ್‌ದ್ ಕೇಂಡೆರ್.

⁸ ಅಪಗ ಪೇತ್ರೆ ಪರಿಶುದ್ಧಾತ್ಮೊಡ್ದು ದಿಂಜಿದ್ ಅಕ್ಲೆಗ್, “ಜನೊಕುಲೆ ಅಧಿಕಾರಿಲೇ, ಹಿರಿಯಾಕುಲೇ,

⁹ ಒರಿ ಕುಂಟಗ್ ಆಯಿ ಉಪಕಾರೊಗಾದ್ ಆಯಗ್ ಒಯಿಡ್ದ್ ಗುಣ ಆಂಡ್ ಅಂದ್‌ದ್ ನಿಕುಲು ಎಂಕ್ಲೆಡ ಇನಿ ಕೇನುನಾಂಡ,

¹⁰ ನಿಕ್ಲೆಗ್ ಮಾತೆರೆಗ್ಲಾ ಇಸ್ರಾಯೇಲ್ ಜನೊಕುಲೆಗ್ಲಾ ತೆರಿಯೊಡು ಅಂದ್‌ದ್ ಎನ ಆಸೆ. ನಿಕುಲು ಕ್ರುಸ್ಸುಗ್ ಪತ್ತಾಯಿ ಬೊಕ್ಕ ದೇವೆರ್ ಸೈತಿನಾಕುಲೆಡ್ದ್ ಲಕ್ಕಾಯಿನ ನಜರೇತ್‌ದ ಯೇಸು ಕ್ರಿಸ್ತ ಪುದರ್‌ಡೇ ಈ ನರಮಾನಿ ಗುಣ ಆದ್ ನಿಕ್ಲೆ ಎದುರುಡು ಉಂತುದೆ.

¹¹ ‘ಇಲ್ಲ್ ಕಟ್ಟ್‌ನಾಕುಲಾದುಪ್ಪು ನಿಕುಲು ಬೊಡ್ಚಿಂದ್‌ದ್ ಬುಡ್ತಿನ ಕಲ್ಲ್ ಆಯೆನೇ, ಆಯೆನೇ ಮೂಲೆದ ತರೆಕಲ್ಲಾಯೆ.’

¹² ಬರೊಡಾಯಿ ರಕ್ಷಣೆ ಏರೆಡ್ದ್‌ಲಾ ತಿಕ್ಕುಜಿ; ಆ ಪುದರ್‌ಡೇ ಅತ್ತಂದೆ ಬಾನದ ತಿರ್ತ್ ಕೊರ್ತಿನ ಬೇತೆ ವಾ ಪುದರ್‌ಡ್ಲಾ ನಂಕ್ ರಕ್ಷಣೆ ಆಪುಜಿ ಅಂದ್‌ದ್ ಪಂಡೆ.”

¹³ ಪೇತ್ರೆ ಬೊಕ್ಕ ಯೋಹಾನೆ ಧೈರ್ಯೊಡು ಪಾತೆರುನೆನ್ ತೂದು ಅಕುಲು ವಿದ್ಯೆ ಇಜ್ಜಂದಿನ ಸದಾರಣದಾಕುಲು ಅಂದ್‌ದ್ ತೆರಿದ್ ಅಚ್ಚಿರ ಆಯೆರ್. ಮೊಕುಲು ಯೇಸುನ ಒಟ್ಟುಗು ಇತ್ತಿನಾಕುಲು ಅಂದ್‌ದ್ ಗುರ್ತ ಪತ್ತಿಯೆರ್.

¹⁴ ಬೊಕ್ಕ ಗುಣ ಆತಿನಾಯೆ ಅಕ್ಲೆ ಒಟ್ಟುಗು ಉಂತುದುಪ್ಪುನೆನ್ ತೂದು ಎದುರು ಪಾತೆರಂದೆ ಇತ್ತೆರ್.

¹⁵ ಐಡ್ದ್ ಬೊಕ್ಕ ಸಭೆಡ್ದ್ ಒಂತೆ ಪಿದಯಿ ಪೋಲೆ ಅಂದ್‌ದ್ ಅಕ್ಲೆಗ್ ಅಪ್ಪಣೆ ಕೊರ್ದು,

¹⁶ “ಮೊಕ್ಲೆನ್ ನಮ ದಾನೆ ಮಲ್ಪುಗ? ಮೊಕುಲು ಈತ್ ಮಲ್ಲ ಕಾರ್ನಿಕೊನು ಮಲ್ತಿನೆಡ್ದ್ ಯೆರೂಸಲೇಮುಡು ಮಾತೆರೆಗ್ಲಾ ಗೊತ್ತಾತ್ತ್ಂಡ್, ಅವು ಆತಿಜಿ ಅಂದ್‌ದ್ ಪನಿಯೆರೆ ಆಪುಜಿ.

¹⁷ ಆಂಡ ಈ ಪುದರ್ ಜನೊಕುಲೆ ಉಲಯಿ ನನಲಾ ಪರಡಂದಿಲೆಕ್ಕ ದುಂಬಗ್ ಆ ಯೇಸುನ ಪುದರ್‌ನ್ ದೆರ್ತ್ತ್‌ದ್ ನನ ಮಿತ್ತ್ ಏರೆ ಒಟ್ಟುಗುಲಾ ಪಾತೆರಿಯೆರೆ ಬಲ್ಲಿ ಅಂದ್‌ದ್ ಅಕ್ಲೆನ್ ಪೋಡಿಯಾಗ,” ಪಂಡ್ದ್ ಪಂಡೆರ್.

¹⁸ ಅಕ್ಲೆನ್ ಕುಡ ಉಲಯಿ ಲೆತ್ತ್‌ದ್, ಯೇಸುನ ಪುದರ್‌ಡ್ ದಾಲಾ ಪನಿಯೆರೆ ಬಲ್ಲಿ, ಬೋಧನೆಲಾ ಮಲ್ಪೆರೆ ಬಲ್ಲಿ ಅಂದ್‌ದ್ ಅಕ್ಲೆಗ್ ಅಪ್ಪಣೆ ಕೊರಿಯೆರ್.

¹⁹ ಐಕ್ ಪೇತ್ರೆ ಬೊಕ್ಕ ಯೋಹಾನೆ ಅಕ್ಲೆಗ್, “ಎಂಕುಲು ನಿಕ್ಲೆನ ಪಾತೆರೊನು ಕೇನೊಡಾ ಇಜ್ಜಿಂಡ ದೇವೆರೆ ಪಾತೆರೊನು ಕೇನೊಡಾ? ನೆಟ್ಟ್ ಒವು ದೇವೆರೆಗ್ ಸರಿ ಆದುಂಡು ಅಂದ್‌ದ್ ನಿಕುಲೇ ತೀರ್ಪು ಮಲ್ತೊನ್ಲೆ.

²⁰ ಎಂಕುಲು ಎಂಚಲಾ ಮನಿಪಂದೆ ಕುಲ್ಲಯ. ಎಂಕುಲು ತೂಯಿನ ಬೊಕ್ಕ ಕೇಂಡಿನ ಸಂಗತಿಲೆನ್ ಪನೊಡೇ ಆಪುಂಡು,” ಅಂದ್‌ದ್ ಉತ್ತರ ಕೊರಿಯೆರ್.

²¹ ನಡತಿನ ಕಾರ್ಯೊಗಾದ್ ಜನೊಕುಲು ದೇವೆರೆನ್ ಪುಗರೊಂದು ಇತ್ತಿನೆಡ್ದ್ ಅಪೊಸ್ತಲೆರೆಗ್ ನಿಂದನೆ ಮಲ್ಪೆರೆ ಆವಂದೆ ಅಕ್ಲೆನ್ ಪೋಡಿಗಟ್ಟಾದ್ ಬುಡ್ದು ಬುಡಿಯೆರ್.

²² ಈ ಮಲ್ಲ ಕಾರ್ನಿಕೊಡ್ದು ಗುಣ ಆಯಿನ ನರಮಾನಿಗ್ ನಲ್ಪ ವರ್ಸೊಡ್ದು ಹೆಚ್ಚ್ ಪ್ರಾಯ ಆದಿತ್ತ್ಂಡ್.

²³ ಅಕ್ಲೆನ್ ಬುಡಿ ಬೊಕ್ಕ ಅಕುಲು ತನ್ಕುಲೆ ಜನೊಕುಲೆ ಕೈತಲ್‌ಗ್ ಬತ್ತ್‌ದ್ ಪ್ರಧಾನಯಾಜಕೆರ್‌ಲಾ ಹಿರಿಯೆರ್‌ಲಾ ಪನ್ತಿನ ಪ್ರತಿ ಒಂಜಿ ಪಾತೆರೊಲೆನ್ ತೆರಿಪಾಯೆರ್.

²⁴ ಅಕುಲು ಕೇಂಡ್ದ್ ಒಂಜೇ ಮನಸಾದ್ ಮಲ್ಲ ಸ್ವರೊಟ್ಟು ದೇವೆರೆಡ ಇಂಚ ನಟ್ಟೊಂಡೆರ್, “ಸರ್ವತ್ರಾಣಿ ಕರ್ತವಾ, ಬಾನೊನು, ಭೂಮಿನ್ ಕಡಲ್‌ನ್ ಐಟ್ಟುಪ್ಪು ಮಾತೆನ್ಲಾ ಉಂಡು ಮಲ್ತಿನಾಯೆನೇ,

²⁵ ನಮ ಪಿತೃ ಆದಿತ್ತಿನ ದಾವೀದೆ ನಿನ ಸೇವಕೆ ಪರಿಶುದ್ಧಾತ್ಮೊಡ್ದು ಈ ಪಾತೆರೊಲೆನ್ ಬರೆತೆ. ‘ಪಿದಯಿದ ಜನೊಕುಲು ದಾಯೆಗ್ ಬೊಬ್ಬೆ ಪಾಡುನು? ಈ ದೇಶದ ಜನೊಕುಲು ದಾಯೆಗ್ ವ್ಯರ್ಥಕಾರ್ಯೊಲೆನ್ ಆಲೋಚನೆ ಮಲ್ಪುವೆರ್?

²⁶ ಕರ್ತವಗ್ಲಾ ಆಯ ಅಭಿಷೇಕ ಮಲ್ತಿನ ಕ್ರಿಸ್ತಗ್ಲಾ ವಿರೋಧಾದ್ ಭೂಮಿದ ಅರಸುಲು ಲಕ್ಕ್‌ದ್ ಉಂತಿಯೆರ್ ಅಧಿಕಾರಿಲು ಒಟ್ಟುಗು ಕೂಡೊಂಡೆರ್.’

²⁷ ಆ ಪಾತೆರೊಗು ಸರಿಯಾದ್ ಹೆರೋದ ರಾಜೆಲಾ ಪೊಂತ್ಯ ಪಿಲಾತೆಲಾ ಪಿದಯಿದ ಜನೊಕುಲುಲಾ ಇಸ್ರಾಯೇಲ್ ಜನೊಕುಲುಲಾ ಒಟ್ಟಾದ್ ಸೇರ್ದ್ ಈ ಅಭಿಷೇಕ ಮಲ್ತ್‌ದಿನ ನಿನ ಪರಿಶುದ್ಧ ಸೇವಕೆ ಆಯಿ ಯೇಸುನು ವಿರೋಧ ಮಲ್ತಿನಪಗ ಈ ಸಂಗತಿಲು ನಿಜವಾದ್‌ಲಾ ಆದಿತ್ತ್ಂಡ್.

²⁸ ನಿನ ಕೈಲಾ ನಿನ ಆಲೋಚನೆಲಾ ದುಂಬು ನೇಮಕ ಮಲ್ತ್‌ದಿನೆನೇ ನಡಪುಡಿಯೆರ್.

^29-30 ಕರ್ತವಾ ಇತ್ತೆ ಈ ಅಕ್ಲೆನ ಪೋಡಿಯಾಟಿಕೆನ್ ತೂದು ನಿನ ಪರಿಶುದ್ಧ ಸೇವಕೆ ಆದುಪ್ಪು ಯೇಸುನ ಪುದರ್‌ಡ್ ಸೀಕ್‌ಲೆ ಪರಿಹಾರೊನ್ಲಾ ಗುರ್ತೊನ್ಲಾ ಕಾರ್ನಿಕೊಲೆನ್ಲಾ ಉಂಡಾಪಿಲೆಕ್ಕ ನಿನ ಕೈ ನೀಡಿನಲ್ಪ ನಿನ ದಾಸೆರ್ ನಿನ ಪಾತೆರೊಲೆನ್ ಧೈರ್ಯೊಡು ಪನ್ಪಿಲೆಕ್ಕ ಮಲ್ಪುಲ,” ಅಂದ್‌ದ್ ಪಂಡೆರ್.

³¹ ಇಂಚ ಪ್ರಾರ್ಥನೆ ಮಲ್ತಿ ಬೊಕ್ಕ ಅಕುಲು ಸೇರ್ದಿತ್ತಿನ ಜಾಗ್ ಅದ್‌ರ್ಂಡ್, ಅಕುಲು ಮಾತೆರ್ಲಾ ಪರಿಶುದ್ಧಾತ್ಮೊಡು ದಿಂಜಿದ್ ದೇವೆರೆ ಪಾತೆರೊನು ಧೈರ್ಯೊಡು ಪನ್ಪಿನಾಕುಲಾಯೆರ್.

ನಂಬುನಾಕುಲೆಡ್ ಆಸ್ತಿನ್ ಪಟ್ಟುನವು

³² ನಂಬುನಾಕುಲೆ ಮಾತೆರೆ ಉಡಲ್‌ಲಾ ಪ್ರಾಣಲಾ ಒಂಜೇ ಆದಿತ್ತ್ಂಡ್. ಒರಿ ಆಂಡಲಾ ಅಕ್ಲೆಡಿತ್ತಿನ ಆಸ್ತಿಡ್ ಒಂಜೆನಾಂಡಲಾ ತನ್ಕುಲೆನ ಅಂದ್‌ದ್ ಪನಂದೆ ಮಾತೆರ್ಲಾ ಅವೆನ್ ಪಟ್ಟೊಂದಿತ್ತೆರ್.

³³ ಬೊಕ್ಕ ಕರ್ತವೆ ಆದುಪ್ಪು ಯೇಸು ಸೈತ್‌ದ್ ಜೀವಾದ್ ಲಕ್ಕ್‌ದ್ ಬೈದೆ ಅಂದ್‌ದ್ ಅಪೊಸ್ತಲೆರ್ ಬಲವಾದ್ ಸಾಕ್ಷಿ ಪನೊಂದಿತ್ತೆರ್. ದೇವೆರೆ ದಯ ಅಕ್ಲೆ ಮಾತರೆ ಮಿತ್ತ್ ಇತ್ತ್ಂಡ್.

³⁴ ಅಕ್ಲೆ ಒಟ್ಟುಗು ಕೊರತೆ ಇತ್ತಿನಾಯೆ ಒರಿಲಾ ಇಜ್ಜಾಂಡ್. ದಾಯೆಗಂದ್ಂಡ ಕಂಡೊಲು ಬೊಕ್ಕ ಇಲ್ಲುಲು ಇತ್ತಿನಾಕುಲು ಮಾತೆರ್ ಅವೆನ್ ಮಾರ್ದ್

³⁵ ಬತ್ತಿ ಕಾಸ್‌ನ್ ಕನತ್‌ದ್ ಅಪೊಸ್ತಲೆರೆನ ಕಾರ್‌ದ ಮುದೆಲ್‌ಡ್ ದೀವೊಂದಿತ್ತೆರ್. ಅವೆನ್ ಪ್ರತಿ ಒರಿಯಗ್ ಆಯಾಯನ ಅಗತ್ಯೊಗು ತಕ್ಕ ಪಟ್ಟ್‌ದ್ ಕೊರೊಂದಿತ್ತೆರ್.

³⁶ ಇಂಚೆನೇ ನಂಬುನಾಕುಲೆಡ್ ಕುಪ್ರದ್ವೀಪೊಡು ಪುಟ್ಟಿ ಯೋಸೇಫು ಇನ್ಪಿ ಒರಿ ಲೇವಿ ಇತ್ತೆ, ಅಪೊಸ್ತಲೆರ್ ಆಯನ್ ಬಾರ್ನಬೆ ಅಂದ್ಂಡ ಸಂತೈಸಿಕೆದ ಮಗೆ ಇನ್ಪಿ ಮೇಲ್‌ಪುದರ್ ಪಾಡಿಯೆರ್.

³⁷ ಆಯೆ ತನ್ಕ್ ಇತ್ತಿ ಜಾಗ್‌ನ್ ಮಾರ್ದ್ ಬತ್ತಿನ ಕಾಸ್‌ನ್ ದುಕನತ್‌ದ್ ಅಪೊಸ್ತಲೆರೆನ ಕಾರ್‌ದಲ್ಪ ದೀಯೆ.