ಅಪೊ.ಕ್ರಿ 26 - ಪೊಸ ಒಡಂಬಡಿಕೆ

¹ ಅಗ್ರಿಪ್ಪೆ ಪೌಲುಗು, “ಇತ್ತೆ ಈ ನಿನ ಪರವಾದ್ ಪಾತೆರಿಯೆರೆ ನಿಕ್ಕ್ ಅಪ್ಪಣೆ ಉಂಡು,” ಪಂಡ್ದ್ ಪನ್ನಗ ಪೌಲು ಕೈ ದೆರ್ತ್ತ್‌ದ್ ಉತ್ತರ ಕೊರಿಯೆ.

² “ರಾಜಾ ಅಗ್ರಿಪ್ಪ, ಯೆಹೂದ್ಯೆರ್ ಎನ ಮಿತ್ತ್ ಪಾಡ್ದಿನ ಅಪವಾದೊಲೆಗ್‌ ಯಾನ್ ಉತ್ತರ ಕೊರ್ಪೆ. ಇನಿ ನಿನ ಎದುರು ಉಂತೊಂದು ಪ್ರತಿವಾದ ಮಲ್ಪುನ ಈ ಸಂದರ್ಭ ತಿಕ್ಕ್‌ದಿನೆಕ್ಕ್ ಎನನ್ ಭಾಗ್ಯವಂತೆ ಅಂದ್‌ದ್ ಎನ್ನೊನುವೆ.

³ ದಾಯೆಗ್ ಪಂಡ ಯೆಹೂದ್ಯೆರೆಡ ಉಪ್ಪುನ ಮಾತ ಆಚಾರೊಲೆನ್ಲಾ ತರ್ಕೊಲೆನ್ಲಾ ಈ ಸರಿಯಾದ್ ತೆರಿದುಲ್ಲ. ಎನ ಪಾತೆರೊಲೆನ್ ತಾಳ್ಮೆಡ್ದ್ ಕೇನೊಡು ಅಂದ್‌ದ್ ನಟ್ಟೊನ್ವೆ.

⁴ “ಎನ ಇಡೀ ಜೀವಮಾನದ ವಿಷಯೊಲು ಮಾತ ಯೆಹೂದ್ಯೆರೆಗ್ ಗೊತ್ತುಂಡು. ಯಾನ್ ಎಲ್ಲಿಡ್ದಿಂಚಿ ಬದ್‌ಕ್‌ದಿನ ರೀತಿ ಎನ ದೇಶೊಡ್ಲಾ ಯೆರೂಸಲೇಮುಡ್ಲಾ ಮಾತೆರೆಗ್ ತೆರಿದೇ ಉಂಡು;

⁵ ನಮ ಧರ್ಮೊಡಿತ್ತಿನ ಪೂರ ಮತೊನು ಕೈಕೊಂದು ಪರಿಸಾಯೆ ಆದ್ ನಡತೊಂಡೆ ಅಂದ್‌ದ್ ದುಂಬುಡ್ದಿಂಚಿಲಾ ಅಕುಲು ತೆರಿದೆರ್; ಸಾಕ್ಷಿ ಪನಿಯೆರೆ ಅಕ್ಲೆಗ್ ಮನಸಿತ್ತ್‌ಂಡ ಪನೊಲಿ

⁶ ಇತ್ತೆಲಾ ದೇವೆರ್ ನಮ ಪಿತೃಲೆಗ್ ಮಲ್ತ್‌ದಿನ ವಾಗ್ದಾನೊನು ಯಾನ್ ನಿರೀಕ್ಷೆ ಮಲ್ತೊಂದಿತ್ತಿನೆಡ್ದಾವರನೇ ಯಾನ್ ಇತ್ತೆ ವಿಚಾರಣೆಗ್ ಗುರಿ ಆದುಲ್ಲೆ.

⁷ ನಮ ಪದ್ರಾಡ್ ಗೋತ್ರದಾಕುಲು ರಾತ್ರೆ ಪಗೆಲ್ ಸೇವೆ ಮಲ್ತೊಂದು ಆ ವಾಗ್ದಾನದ ಫಲ ತಿಕ್ಕು ಇನ್ಪಿ ನಿರೀಕ್ಷೆಡ್ ಉಲ್ಲೆರ್; ರಾಜೆರೇ, ಆ ನಿರೀಕ್ಷೆದ ವಿಷಯೊಡೇ ಯೆಹೂದ್ಯೆರ್ ಎನ ಮಿತ್ತ್ ದೋಷಾರೋಪಣೆ ಮಲ್ಪುವೆರ್.

⁸ ದೇವೆರ್ ಸೈತಿನಾಕುಲೆನ್ ಲಕ್ಕಾವೆಡ ಉಂದು ನಂಬೆರೆ ತೀರಂದಿ ಸಂಗತಿ ಅಂದ್‌ದ್ ನಿಕುಲು ದಾಯೆಗ್ ತೀರ್ಪು ಮಲ್ಪುವರ್?

⁹ “ನಜರೇತ್‌ದ ಯೇಸು ಪುದರ್‌ಗ್ ವಿರೋಧಾದ್ ನಡಪೊಡು ಅಂದ್‌ದ್ ಯಾನ್ಲಾ ಯೋಚನೆ ಮಲ್ತೊಂದಿತ್ತೆ.

¹⁰ ಯೆರೂಸಲೇಮುಡು ಅಂಚೆನೇ ಮಲ್ತೆ. ಪ್ರಧಾನಯಾಜಕೆರೆಡ್ದ್ ಅಧಿಕಾರೊನು ದೆತ್ತೊಂದು ದೇವಜನೊಕುಲೆಡ್ ಮಸ್ತ್ ಜನೊನು ಸೆರೆಮನೆಟ್ ಪಾಡಾದ್ ಅಕ್ಲೆ ಮರಣದ ತೀರ್ಪಾನಗ ಎನ ಒಪ್ಪಿಗೆನ್ ತೆರಿಪಾಯೆ.

¹¹ ಮಾತ ಸಭಾಮಂದಿರೊಲೆಡ್ಲಾ ಯಾನ್ ದಿಂಜ ಸರ್ತಿ ಅಕ್ಲೆನ್ ದಂಡ್ಯಾದ್ ಅಕ್ಲೆಡ್ದ್ ದೂಷಣೆದ ಪಾತೆರೊಲೆನ್ ಪನ್ಪಾವುನೆಟ್ ಪ್ರಯತ್ನೊನು ಮಲ್ತೆ. ಉಂದು ಅತ್ತಂದೆ ಪರ ಊರುಗು ಪೋದು ಭಂಗ ಕೊರಿಯೆ.

ಪೌಲುನ ಮತಾಂತರ ಪನ್ಪಿನವು

¹² “ಈ ಉದ್ದೇಶೊಡ್ದೇ ಯಾನ್ ಪ್ರಧಾನಯಾಜಕೆರೆಡ್ದ್ ಅಧಿಕಾರಲಾ ಅಪ್ಪಣೆಲಾ ದೆತ್ತೊಂದು ದಮಸ್ಕದ ಸಾದಿಡ್ ಪೋವೊಂದುಪ್ಪುನಗ

¹³ ಓ ರಾಜಾ, ಮಧ್ಯಾಹ್ನದ ಪೊರ್ತುಡು ಪರಲೋಕೊಡ್ದು ಉಂಡಾಯಿನ ಒಂಜಿ ಬೊಲ್ಪು ಎನ ಸುತ್ತಲಾ ಎನ ಒಟ್ಟುಗು ಪ್ರಯಾಣ ಮಲ್ತೊಂದಿತ್ತಿನಾಕುಲೆನ ಸುತ್ತಲಾ ಸೂರ್ಯಡ್ದ್‌ಲಾ ಹೆಚ್ಚಿತ್ತಿನ ಬೊಲ್ಪುನು ತೂಯೆ.

¹⁴ ಎಂಕುಲು ಮಾತ ನೆಲಕ್ ಬೂರ್ನಗ, ‘ಸೌಲಾ, ಸೌಲಾ, ಎಂಕ್ ದಾಯೆಗ್ ಭಂಗ ಕೊರ್ಪ? ಮುಳ್ಳುದ ಕೋಲುಗು ತೊರ್ಪುನವು ನಿಕ್ಕ್ ಕಷ್ಟ,’ ಅಂದ್‌ದ್ ಇಬ್ರಿಯ ಭಾಷೆಡ್ ಪನ್ಪಿನ ಸ್ವರೊನು ಕೇಂಡೆ.

¹⁵ ಅಪಗ ಯಾನ್, ‘ಕರ್ತವಾ, ಈ ಏರ್?’ ಪನ್ನಗ ಕರ್ತವೆ ಪಂಡಿನಿ, ‘ಈ ಏರೆಗ್ ಭಂಗ ಕೊರ್ಪನಾ, ಅವ್ವೇ ಯೇಸು ಯಾನ್.

¹⁶ ಈ ಲಕ್ಕ್‌ದ್ ಉಂತುಲ. ನಿನನ್ ಎನ ಸೇವಕೆ ಆದ್‌ಲಾ ಸಾಕ್ಷಿ ಆದ್‌ಲಾ ನೇಮಕ ಮಲ್ಪೆರೆಗಾದೇ ನಿಕ್ಕ್ ತೋಜಿದ್ ಬತ್ತೆ. ಯಾನ್ ಇತ್ತೆಲಾ ನನ ದುಂಬು ನಿಕ್ಕ್ ಕೊರಿಯೆರೆ ಉಪ್ಪುನ ದರ್ಶನೊಲೆಡ್ಲಾ ನಿಕ್ಕ್ ತೋಜಿದ್ ಬತ್ತಿನ ಸಂಗತಿಡ್ಲಾ ಈ ಸಾಕ್ಷಿ ಆದುಪ್ಪೊಡು.

¹⁷ ನಿನನ್ ಯಾನ್ ಇಸ್ರಾಯೇಲ್ ಜನೊಕುಲೆನ ಕೈಡ್ದ್‌ಲಾ ಪಿದಯಿದ ಜನೊಕುಲೆನ ಕೈಡ್ದ್‌ಲಾ ಬುಡ್ಪಾವೆ.

¹⁸ ಅಕುಲು ಕತ್ತಲೆಡ್ದ್ ಬೊಲ್ಪುಗ್ಲಾ ಸೈತಾನ ಅಧಿಕಾರೊಡ್ದು ದೇವೆರೆ ಕಡೆಕ್ಲಾ ತಿರ್ಗ್‌ದ್ ಎನಡ ನಂಬಿಕೆ ದೀಪಿನೆಡ್ದ್ ಪಾಪ ಪರಿಹಾರೊನ್ಲಾ ಪರಿಶುದ್ಧೆರ್ ಆಯಿನಾಕುಲೆಡೊಪ್ಪ ಪಾಲ್‌ಲಾ ತಿಕ್ಕುಲೆಕ್ಕ ಅಕ್ಲೆನ ಕಣ್ಣ್‌ಲೆನ್ ಜಪ್ಪೊಡು ಅಂದ್‌ದ್ ಅಕ್ಲೆನ ಕೈತಲ್‌ ನಿನನ್ ಕಡಪುಡ್ವೆ,’ ಅಂದ್‌ದ್ ಪಂಡೆ.

ಪೌಲು ಆಯನ ಕೆಲಸೊನು ತೆರಿಪಾವುನವು

¹⁹ “ಅಂಚಾಯಿನೆಡ್ದ್ ಅಗ್ರಿಪ್ಪ ರಾಜೆರೇ, ಪರಲೋಕೊಡ್ದು ಎಂಕ್ ಉಂಡಾಯಿನ ಆ ದರ್ಶೊನೊಗು ಯಾನ್ ಎದುರುಂತುಜಿ

²⁰ ಸುರುಟ್ಟು ದಮಸ್ಕದಾಕುಲೆಗ್, ಐಡ್ದ್ ಬೊಕ್ಕ ಯೆರೂಸಲೇಮುಡ್ಲಾ ಯೂದಾಯದ ಮಾತ ಪ್ರದೇಶಡುಪ್ಪುನಾಕುಲೆಗ್ಲಾ ಪಿದಯಿದ ಜನೊಕುಲೆಗ್ಲಾ ನಿಕುಲು ದೇವೆರೆ ಕೈತಲ್‌ ತಿರ್ಗ್‌ದ್ ಪಶ್ಚಾತಾಪೊಗು ಯೋಗ್ಯವಾಯಿನ ಕಾರ್ಯೊಲೆನ್ ಮಲ್ಪೊಡು ಅಂದ್‌ದ್ ಸಾರಿಯೆ.

²¹ ಈ ಕಾರಣೊಡ್ದು ಯೆಹೂದ್ಯೆರ್ ದೇವಾಲಯೊಡು ಎನನ್ ಪತ್ತ್‌ದ್ ಕೆರಿಯೆರೆ ಪ್ರಯತ್ನ ಮಲ್ತೆರ್.

²² ಆಂಡ ಯಾನ್ ದೇವೆರೆ ಸಹಾಯೊಡ್ದು ಈ ದಿನತ ಮುಟ್ಟಲಾ ಮೂಲು ಉಂತುದು ಎಲ್ಯಾಕ್ಲೆಗ್ಲಾ ಮಲ್ಲಾಕ್ಲೆಗ್ಲಾ ಸಾಕ್ಷಿ ಪನ್ಪಿನಾಯೆ ಆದುಲ್ಲೆ. ಪ್ರವಾದಿಲುಲಾ ಮೋಶೆಲಾ ದುಂಬು ತೆರಿಪಾದಿನ ಸಂಗತಿಲೆನೇ ಪನೊಂದುಲ್ಲೆ ಬೇತೆ ದಾಲಾ ಪನ್ಪಿನಾಯೆ ಅತ್ತ್.

²³ ಈ ಸಂಗತಿಲು ದಾನೆ ಪಂಡ್ಂಡ ಕ್ರಿಸ್ತೆ ಭಂಗ ಪಡೆದ್ ಸೈಯೊಡಾಂಡ್, ಬೊಕ್ಕ ಆಯೆ ಸೈತಿನಾಕುಲೆ ಉಲಯಿಡ್ದ್ ಸುರುತ್ತಾಯೆ ಆದ್ ಲಕ್ಕ್‌ದ್ ಯೆಹೂದ್ಯೆರೆಗ್ಲಾ ಪಿದಯಿದ ಜನೊಕುಲೆಗ್ಲಾ ಬೊಲ್ಪುನು ಸಾರಿಯುನಾಯೆ ಆಯೆ.”

²⁴ ಇಂಚ ಪೌಲು ವಾದ ಮಲ್ಪೊಂದುಪ್ಪುನಗ ಫೆಸ್ತೆ ಮಲ್ಲ ಸ್ವರೊಟ್ಟು ಪೌಲೋ, “ಈ ಮರ್ಲಾತ ಈ ಕಲ್ಪುನ ಶಾಸ್ತ್ರೊಲು ನಿನನ್ ಮರ್ಲ್ ಮಲ್ತ್ಂಡ್,” ಅಂದ್‌ದ್ ಪಂಡೆ.

²⁵ ಐಕ್ ಪೌಲು, “ಶ್ರೀಮಾನ್ ಮಹಾ ಫೆಸ್ತೆ, ಯಾನ್ ಮರ್ಲ್ ಆತಿಜಿ; ಸ್ವಸ್ಥ ಬುದ್ಧಿ ಇತ್ತಿನಾಯೆ ಆದ್ ಸತ್ಯವಾಯಿನ ಪಾತೆರೊಲೆನ್ ಪನೊಂದುಲ್ಲೆ.

²⁶ ಅಗ್ರಿಪ್ಪ ರಾಜೆ ಈ ಸಂಗತಿಲೆನ್ ತೆರಿದಿನಾಯೆ; ಆಯನ ಎದುರು ಧೈರ್ಯೊಡು ಪಾತೆರ್‌ವೆ. ಉಂದೆಕ್ಲೆಡ್ ಒಂಜಾಂಡಲಾ ಆಯಗ್ ಗೊತ್ತಿಜ್ಜಾಂದಿನವು ಇಜ್ಜಿ ಅಂದ್‌ದ್ ನಂಬುವೆ. ದಾಯೆಗ್ ಪಂಡ ಉಂದು ಕೋಂಟುಡು ನಡತಿನ ಸಂಗತಿ ಅತ್ತ್.

²⁷ ಅಗ್ರಿಪ್ಪ ರಾಜೆರೆ, ಪ್ರವಾದಿಲೆನ್ ಈ ನಂಬುವನಾ? ಈ ನಂಬುವ ಪಂಡ್ದ್ ಯಾನ್ ತೆರಿದೆ.”

²⁸ ಐಕ್ ಅಗ್ರಿಪ್ಪೆ ಪೌಲುಗು ಪನ್ಪೆ, “ಒಂತೆ ಸಮಯೊಡೇ ಎನನ್ ಪುಸ್‌ಲಾಯಿಸಿದ್ ಕ್ರೈಸ್ತೆ ಮಲ್ಪುವನಾ?” ಅಂದ್‌ದ್ ಕೇಂಡೆ.

²⁹ ಐಕ್ ಪೌಲು ಉತ್ತರ ಕೊರ್ದು, “ಒಂತೆ ಸಮಯೊಡ್ದಾವಡ್ ದಿಂಜ ಸಮಯೊಡ್ದಾವಡ್, ಈ ಮಾತ್ರ ಅತ್ತಂದೆ, ಈ ಪೊರ್ತು ಎನ ಪಾತೆರೊಲೆನ್ ಕೇನುನಾಕುಲು ಮಾತೆರ್ಲಾ ಎನ ಲೆಕ್ಕನೆ ಆವೊಡು ಅಂದ್‌ದ್ ದೇವೆರೆಗ್ ಪ್ರಾರ್ಥನೆ ಮಲ್ತೊಂದುಲ್ಲೆ ಆಂಡ ಈ ಕೋಳೊಲು ಮಾತ್ರ ನಿಕ್ಲೆಗ್ ತಿಕ್ಕಿಯೆರ್ ಬಲ್ಲಿ,” ಅಂದ್‌ದ್ ಪಂಡೆ.

³⁰ ಐಡ್ದ್ ಬೊಕ್ಕ ರಾಜೆಲಾ ದೇಶಾಧಿಪತಿಲಾ ಬೆರ್ನಿಕೆಲಾ ಅಕ್ಲೆ ಒಟ್ಟುಗು ಕುಲ್ಲುದಿನಾಕುಲುಲಾ ಲಕ್ಕ್‌ದ್ ಅಂಚಿ ಪೋದು

³¹ “ಈ ನರಮಾನಿನ್ ಮರಣದಂಡನೆಗಾವಡ್ ಸೆರೆಮನೆಟ್ ದೀಯೆರೆಗಾವಡ್ ತಕ್ಕದ ಅನ್ಯಾಯ ಒಂಜಿಲಾ ಮಲ್ತ್‌ದಿಜೆ,” ಅಂದ್‌ದ್ ಒರಿ ಒರಿಯಗ್ ಪಾತೆರೊಂಡೆರ್.

³² ಬೊಕ್ಕ ಅಗ್ರಿಪ್ಪೆ ಫೆಸ್ತಗ್ ಪನ್ಪೆ, “ಈ ನರಮಾನಿ ಚಕ್ರವರ್ತಿಡ್ದೇ ನ್ಯಾಯ ಆವೊಡು ಅಂದ್‌ದ್ ಪನ್ತಿಜಾಂಡ ಆಯನ್ ಬುಡ್ತೊಲಿ,” ಅಂದ್‌ದ್ ಪಂಡೆ.