ಅಪೊ.ಕ್ರಿ 25 - ಪೊಸ ಒಡಂಬಡಿಕೆಪೌಲು ಚಕ್ರವರ್ತಿಗ್ ಅರ್ಜಿ ಪಾಡಿನವು 1 ಫೆಸ್ತೆ ದೇಶಾಧಿಪತಿ ಆದ್ ಮೂಜಿ ದಿನೊಡ್ದು ಬೊಕ್ಕ ಕೈಸರೆಯಡ್ದ್ ಯೆರೂಸಲೇಮುಗು ಪೋಯೆ. 2 ಅಲ್ಪ ಪ್ರಧಾನಯಾಜಕೆರ್‌ಲಾ ಯೆಹೂದ್ಯೆರೆ ಮುಖ್ಯಸ್ಥೆರ್‌ಲಾ ಪೆಸ್ತನ ಎದುರುಡ್ಲಾ ಪೌಲುನ ವಿರೋಧಾದ್ ದೋಷರೋಪಣೆಲೆನ್ ಆಯಗ್ ಪಂಡೆರ್. 3 ಈ ದಯ ಮಲ್ತ್‌ದ್ ಪೌಲುನು ಯೆರೂಸಲೇಮುಗು ಪಿರ ಕಡಪುಡ್ದು ಕೊರ್ಲ ಅಂದ್‌ದ್ ಫೆಸ್ತನ್ ಕೇನೊಂಡೆರ್. ಅಕುಲು ಪೂರ ಪೌಲುನು ಮಾರ್ಗೊಡು ಕೆರೊಡು ಅಂದ್‌ದ್ ಉಪಾಯ ಮಲ್ತೊಂದಿತ್ತೆರ್. 4 ಆಂಡ ಫೆಸ್ತೆ ಪನ್ಪೆ, “ಪೌಲುನು ಕೈಸರೆಯಡ್ ದೀವೊಡಾಪುಂಡು, ಯಾನೇ ಅಡೆಗ್ ಬೇಗೊಡು ಪೋಪಿನೆಟ್ಟ್ ಉಲ್ಲೆ. 5 ಅಂಚಾಯಿನೆಡ್ದ್ ನಿಕ್ಲೆನ ಮುಖ್ಯಸ್ಥೆರ್ ಎನ್ನೊಟ್ಟುಗು ಬರಡ್. ಆಯೆ ಅಪರಾಧ ಮಲ್ತಿದಿತ್ತೆಡಾ ಕೈಸರೆಯಡೇ ಆಯನ ತಪ್ಪು ತೋಜಾಪಾಲೆ.” ಅಂದ್‌ದ್ ಪಂಡೆ. 6 ಆಯೆ ಅಕ್ಲೆಡೊಪ್ಪ ಎಣ್ಮ ಪತ್ತ್ ದಿನೊಡ್ದು ಹೆಚ್ಚ್ ಉಪ್ಪಂದೆ ಕೈಸರೆಯಗ್‌ ಪೋದು ಮನದಾನಿ ನ್ಯಾಯಾಸನೊಡು ಕುಲ್ಲುದು ಪೌಲುನು ಕನವೊಡು ಅಂದ್‌ದ್ ಅಪ್ಪಣೆ ಮಲ್ತೆ. 7 ಪೌಲು ಬತ್ತಿ ಬೊಕ್ಕ ಯೆರೂಸಲೇಮುಡ್ದು ಬೈದಿನ ಯೆಹೂದ್ಯೆರ್ ಆಯನ ಸುತ್ತ ಉಂತೊಂದು ಅಕ್ಲೆಗ್ ತೀರಂದಿನಾತ್ ಮಲ್ಲ ಮಲ್ಲ ತಪ್ಪುಲೆನ್ ಪಾಡೊಂದಿತ್ತೆರ್, ಆಂಡ ಐಟ್ಟ್ ಒಯಿಕ್‌ಲಾ ಆಧಾರ ಇತ್ತ್‌ಜಿ. 8 ಪೌಲು ಆ ಕೂಡ್ದಿನ ಯೆಹೂದ್ಯನಾಯಕೆರೆಗ್ ಪ್ರತಿವಾದ ಮಲ್ತೊಂದು ಪನ್ಪೆ, “ಯಾನ್ ಯೆಹೂದ್ಯೆರೆನ ನ್ಯಾಯಕಟ್ಟಲೆದ ವಿರೋಧಾದ್ ಆವಡ್, ದೇವಾಲಯದ ವಿರೋಧಾದ್ ಆವಡ್, ಚಕ್ರವರ್ತಿನ ವಿಷಯೊಡಾವಡ್ ವಾ ತಪ್ಪುಲಾ ಮಲ್ತ್‌ದಿಜಿ,” ಅಂದ್‌ದ್ ಪಂಡೆ. 9 ಫೆಸ್ತೆ ಯೆಹೂದ್ಯೆರೆನ ಪ್ರೀತಿನ್ ಗೆಂದೊನೊಡು ಅಂದ್‌ದ್ ಆಸೆ ಮಲ್ತ್‌ದ್, ಪೌಲುನು, “ಈ ಯೆರೂಸಲೇಮುಗು ಪೋದು ಅಲ್ಪ ಈ ದೋಷರೋಪಣೆದ ಸಂಗತಿಡ್ ಯಾನ್ ಅವುಲೇ ನಿಕ್ಕ್ ತೀರ್ಪು ಕೊರೊಡಾ?” ಪಂಡೆ. 10 ಐಕ್ ಪೌಲು, “ಯಾನ್ ಚಕ್ರವರ್ತಿನ ನ್ಯಾಯಾಸನದ ಎದುರು ಉಂತುದೆ, ಮುಲ್ಪನೇ ಎನ ತೀರ್ಪು ಆವೊಡು. ಯೆಹೂದ್ಯೆರೆಗ್ ಯಾನ್ ಅನ್ಯಾಯ ದಾಲಾ ಮಲ್ತ್‌ದಿಜಿ; ಅವು ನಿಕ್ಲೆಗ್ ಸರಿಯಾದ್ ತೆರಿದೇ ಉಂಡು. 11 ಯಾನ್ ಅನ್ಯಾಯ ಮಲ್ತಿನಾಯೆ ಆದ್ ಮರಣ ದಂಡನೆದ ಶಿಕ್ಷೆಗ್ ಕಾರಣವಾಯಿನ ಒವೆನಾಂಡಲಾ ಮಲ್ತಿನಾಂಡ ಮರಣ ದಂಡನೆ ಶಿಕ್ಷೆ ಬೊಡ್ಚಿ ಪನ್ಪುಜಿ. ಮೊಕುಲು ಎನ ಮಿತ್ತ್ ಪಾಡ್ದಿನ ತಪ್ಪುಲೆಡ್ ಒಂಜಿಲಾ ಸತ್ಯ ಇಜ್ಜಂದಿನೆಡ್ದ್ ಎನನ್ ಒಚ್ಚಿದ್ ಕೊರಿಯೆರೆ ಒರಿಯಗ್ಲಾ ಅಧಿಕಾರ ಇಜ್ಜಿ. ಯಾನ್ ಚಕ್ರವರ್ತಿನ ಎದುರುಡೇ ಪರಿಶೋಧನೆ ಮಲ್ಪುವೆ,” ಅಂದ್‌ದ್ ಪಂಡೆ. 12 ಅಪಗ ಫೆಸ್ತೆ ತನ ಸಭೆತಾಕುಲೆ ಒಟ್ಟುಗು ಆಲೋಚನೆ ಮಲ್ತಿ ಬೊಕ್ಕ ಪೌಲುಗು, “ಚಕ್ರವರ್ತಿ ನಿನ ಪರಿಶೋಧನೆ ಮಲ್ಪೊಡು ಅಂದ್‌ದ್ ಈ ಕೇನೊಂದು ಇತ್ತಿನೆಡ್ದಾವರ ಯಾನ್ ನಿನನ್ ಚಕ್ರವರ್ತಿ ನಡೆಗೇ ಕಡಪುಡ್ದು ಕೊರ್ಪೆ,” ಅಂದ್‌ದ್ ಪಂಡೆ. ಅಗ್ರಿಪ್ಪ ರಾಜನ ಎದುರು ಪೌಲುನ ಸಾಕ್ಷಿ 13 ಒಂತೆ ದಿನ ಕರಿಬೊಕ್ಕ ರಾಜೆ ಅಗ್ರಿಪ್ಪೆಲಾ ಬೆರ್ನಿಕೆಲಾ ಫೆಸ್ತನ್ ಸ್ವಗತ ಮಲ್ಪೆರೆ ಕೈಸರೆಯಗ್‌ ಬತ್ತೆರ್. 14 ಅವುಲು ಅಕುಲು ಸುಮಾರ್ ದಿನ ಮುಟ್ಟ ಇತ್ತೆರ್. ಫೆಸ್ತೆ ಪೌಲುನ ವಿಷಯೊಲೆನ್ ರಾಜಗ್ ಈ ರೀತಿಡ್ ತೆರಿಪಾಯೆ, “ಫೇಲಿಕ್ಸೆ ಬುಡ್ದು ಪೋತಿನ ಒರಿ ಸೆರೆಮನೆಟ್ ಉಲ್ಲೆ. 15 ಯಾನ್ ಯೆರೂಸಲೇಮುಗು ಪೋದುಪ್ಪುನಗ ಯೆಹೂದ್ಯೆರೆನ ಪ್ರಧಾನಯಾಜಕೆರ್‌ಲಾ ಸಭೆತ ಹಿರಿಯೆರ್‌ಲಾ ಆಯನ ಸಂಗತಿಡ್ ಎಂಕ್ ದೂರು ಪಂಡ್ದ್ ಆಯಗ್ ವಿರೋಧಾದ್ ತೀರ್ಪು ಆವೊಡು ಅಂದ್‌ದ್ ಕೇನೊಂಡೆರ್. 16 ಯಾನ್ ಅಕ್ಲೆಗ್, ಅಪರಾಧಿ ದೂರು ಪಂಡಿನಾಕುಲೆಗ್ ಎದುರಾದ್ ಉಂತುದು ತನ ಮಿತ್ತ್ ಆರೋಪ ಮಲ್ತಿನ ತಪ್ಪುಲೆ ಸಂಗತಿಡ್ ಪನಿಯೆರೆ ಇಡೆ ಕೊರಂದೆ ಆಯನ್ ಒಚ್ಚಿದ್ ಕೊರ್ಪಿನವು ರೋಮಾಯೆರ್‌ನ ಕ್ರಮ ಅತ್ತ್ ಅಂದ್‌ದ್ ಪಂಡೆ. 17 ಅಕುಲು ಇಡೆಗ್ ಸೇರ್ದ್ ಬತ್ತಿನಪಗ ಯಾನ್ ಒಂತೆಲಾ ತಡ ಮಲ್ಪಂದೆ ಮನದಾನಿಯೇ ನ್ಯಾಯಾಸನದ ಮಿತ್ತ್ ಕುಲ್ಲುದು ಆ ನರಮಾನಿನ್ ಲೆತ್ತೊಂದು ಬರೊಡಂದ್‌ದ್ ಅಪ್ಪಣೆ ಕೊರಿಯೆ. 18 ದೂರು ಪನ್ಪಿನಾಕುಲು ಆಯನ ವಿರೋಧ ಉಂತುದು ಪಾತೆರಿನಪಗ ಯಾನ್ ಎನ್ನಿನ ದೂರುಲೆಡ್ದ್ ಒಂಜೆನಾಂಡಲಾ ಆಯನ ಮಿತ್ತ್ ಪಾಡ್ದ್ ಇತ್ತ್‌ಜೆರ್ 19 ಆಂಡ ಅಕ್ಲೆನ ಸ್ವಂತ ಧರ್ಮೊಗು ಸಮ್ಮಂಧವಾದಿತ್ತಿನ ವಿಷಯೊಲು ಬೊಕ್ಕ ಸೈತ್ ಪೋತಿ ಒರಿ ಯೇಸು ಬದುಕುವೆ ಅಂದ್‌ದ್ ಪೌಲು ಪನ್ಪಿನೆಕ್ಕಾದ್‌ಲಾ ಅಕ್ಲೆಗ್ ಆಯಡೊಪ್ಪ ತರ್ಕ ಇತ್ತ್ಂಡ್. 20 ಇಂಚಿತ್ತಿ ವಿಷಯೊಲೆನ್ ಎಂಚ ವಿಚಾರಣೆ ಮಲ್ಪೊಡು ಎಂಕ್ ತೆರಿಯಂದೆ ಈ ಯೆರೂಸಲೇಮುಗು ಪೋದು ಅಲ್ಪ ಉಂದೆತ್ತ ಸಂಗತಿಡ್ ವಿಚಾರ ಮಲ್ಪೆರೆ ನಿಕ್ಕ್ ಮನಸುಂಡಾ? ಅಂದ್‌ದ್ ಯಾನ್ ಕೇಂಡೆ. 21 ಆಂಡ ಪೌಲು ಚಕ್ರವರ್ತಿನ ಕೈತಲ್‌ ಪೋಪಿನ ಮುಟ್ಟ ಎನನ್ ಕಾಪೊಡು ಪನ್ನಗ ಯಾನ್ ಆಯನ್ ಕೈಸರನ ಕೈತಲ್‌ಗ್ ಕಡಪುಡುನೆಂಗೆ ಕಾಪೆರೆ ಅಪ್ಪಣೆ ಕೊರಿಯೆ,” ಅಂದ್‌ದ್ ಪಂಡೆ. 22 ಐಕ್ ಅಗ್ರಿಪ್ಪೆ, “ಆ ನರಮಾನಿ ಪನ್ಪಿನೆನ್ ಕೇನಿಯೆರೆ ಎಂಕ್‌ಲಾ ಮನಸುಂಡು,” ಅಂದ್‌ದ್ ಪನ್ನಗ ಫೆಸ್ತೆ, “ಎಲ್ಲೆ ಕೇನೊಲಿ,” ಅಂದ್‌ದ್ ಪಂಡೆ. 23 ಮನದಾನಿ ಅಗ್ರಿಪ್ಪೆ ರಾಜೆಲಾ ಬೆರ್ನಿಕೆ ಬಾರಿ ಆಡಂಭರೊಡು ಬತ್ತ್‌ದ್ ಸಹಸ್ರಾಧಿಪತಿಲೆನ ಬೊಕ್ಕ ಊರುದ ಮುಖ್ಯಸ್ಥೆರ್‌ನ ಒಟ್ಟುಗು ಕಚೇರಿದ ಉಲಯಿ ಸೇರ್‌ನಗ ಫೆಸ್ತೆ ಅಪ್ಪಣೆ ಕೊರಿನೆಡ್ದ್ ಪೌಲುನ್ಲಾ ಲೆತ್ತೊಂದು ಬತ್ತೆರ್. 24 ಫೆಸ್ತೆ ಇಂಚ ಪಂಡೆ, “ಅಗ್ರಿಪ್ಪ ರಾಜೆರೇ, ನಮ ಒಟ್ಟುಗು ಸೇರ್ದ್ ಬೈದಿನ ಮಾತ ಜನೊಕುಲೇ, ಈ ನರಮಾನಿನ್ ತೂವೊಂದುಲ್ಲರತ್ತ. ಇಂಬ್ಯನ ಸಂಗತಿಡ್ ಯೆಹೂದ್ಯೆರ್ ಮಾತೆರ್ಲಾ ಇಂಬೆ ನನ ಮಿತ್ತ್ ಬದುಕೆರೆ ಬಲ್ಲಿ ಅಂದ್‌ದ್ ಅರಬಾಯಿ ದೀವೊಂದು ಯೆರೂಸಲೇಮುಡ್ಲಾ ಕೈಸರೆಯಡ್ಲಾ ಎನನ್ ಕೇನೊಂಡೆರ್. 25 ಇಂಬೆ ಮರಣ ದಂಡನೆದ ಶಿಕ್ಷೆಗ್ ಕಾರಣವಾಯಿನಂಚಿತ್ತಿನೆನ್ ಮಲ್ತ್‌ದಿಜೆ ಅಂದ್‌ದ್ ಎಂಕ್ ಗೊತ್ತಾಂಡ್. ಆಯೆನೇ ಚಕ್ರವತಿಗ್ ವಿಜ್ಞಾಪನೆ ಮಲ್ತೊಂಡಿನೆಡ್ದ್ ಇಂಬ್ಯನ್ ಕಡಪುಡಿಯೆರೆ ತೀರ್ಮಾನ ಮಲ್ತೆ. 26 ಇಂಬ್ಯನ ಸಂಗತಿಡ್ ಚಕ್ರವರ್ತಿಗ್ ಬರೆವೆರೆ ದಾಲಾ ಇಜ್ಜಿ, ಅಂಚಾಯಿನೆಡ್ದ್ ವಿಚಾರಣೆ ಆಯಿ ಬೊಕ್ಕ ಬರೆಯೆರೆ ದಾಲಾಂಡಲಾ ತಿಕ್ಕು ಅಂದ್‌ದ್ ಇಂಬ್ಯನ್ ನಿಕ್ಲೆ ಎದುರು ಮುಖ್ಯವಾದ್ ಅಗ್ರಿಪ್ಪ ರಾಜೆರೇ ಎದುರು ಉಂತಾದೆ. 27 ದಾಯೆಗ್ ಪಂಡ, ಒರಿ ಸೆರೆಮನೆಟುಪ್ಪುನಾಯನ ಮಿತ್ತುಪ್ಪು ಆರೋಪೊಲೆನ್ ತೋಜಾವಂದೆ ಆಯನ್ ಕಡಪುಡ್ದು ಕೊರ್ಪಿನವು ಸಮ ಅತ್ತ್ ಪಂಡ್ದ್ ಎಂಕ್ ತೋಜ್ಂಡ್.” |
New Life Literature