ಅಪೊ.ಕ್ರಿ 23 - ಪೊಸ ಒಡಂಬಡಿಕೆ1 ಅಪಗ ಪೌಲು ಹಿರಿಸಭೆನ್ ದೃಷ್ಟಿ ದೀದ್, ಸಹೋದ್ರೆರೇ, “ಯಾನ್ ಈ ದಿನ ಮುಟ್ಟ ಎಡ್ಡೆ ಮನಸ್‌ಡ್ ದೇವೆರೆ ಎದುರು ನಡತೊಂದು ಬೈದೆ,” ಪಂಡೆ. 2 ಐಕ್ ಪ್ರಧಾನಯಾಜಕೆ ಆದುಪ್ಪುನ ಅನನೀಯೆ ಆಯನ ಬಾಯಿಗ್ ಪೆಟ್ಟ್ ಪಾಡ್ಲೆ ಅಂದ್‌ದ್ ಕೈತಲ್‌ ಉಂತುದಿತ್ತಿನಾಕುಲೆಗ್ ಅಪ್ಪಣೆ ಕೊರ್ನಗ 3 ಪೌಲು ಆಯಗ್, “ಸುಣ್ಣ ಪಾಡ್ದಿ ಗೋಡೆನೇ, ದೇವೆರ್ ನಿಕ್ಕ್ ಹಾಕುವೆ. ಈ ನ್ಯಾಯಕಟ್ಟ್‌ದ ಪ್ರಕಾರ ಎನನ್ ವಿಚಾರಣೆ ಮಲ್ಪೆರೆಗ್ ಕುಲ್ಲೊಂದು ಐತ ವಿರೋಧಾದ್ ಎಂಕ್ ಪೆಟ್ಟ್ ಹಾಕ್ಯೆರೆ ಅಪ್ಪಣೆ ಕೊರ್ಪನಾ?” ಅಂದ್‌ದ್ ಪಂಡೆ. 4 ಕೈತಲ್‌ ಉಂತುದಿನಾಕುಲು, “ದೇವೆರ್ ನೇಮಕ ಮಲ್ತಿನ ಪ್ರಧಾನಯಾಜಕಗ್ ಈ ನೆರ್ಪನಾ?” ಪಂಡೆರ್. 5 ಐಕ್ ಪೌಲು, “ಸಹೋದ್ರೆರೇ ಪ್ರಧಾನಯಾಜಕೆ ಅಂದ್‌ದ್ ಎಂಕ್ ತೆರಿದಿಜ್ಜಾಂಡ್, ‘ನಿನ ಜನೊಕುಲೆನ ಅಧಿಪತಿ ಆದುಪ್ಪುನಾಯನ ಸಂಗತಿಡ್ ಪಡಿಕೆಂತಿನೆನ್ ಪಾತೆರಿಯೆರೆ ಬಲ್ಲಿ,’ ಅಂದ್‌ದ್ ಬರೆತ್ಂಡತ್ತಾ?” ಅಂದ್‌ದ್ ಪಂಡೆ. 6 ಸಭೆತಾಕುಲೆಡ್ ಒಂಜಿ ಪಾಲ್ ಸದ್ದುಕಾಯೆರ್‌ಲಾ ಒಂಜಿ ಪಾಲ್ ಪರಿಸಾಯೆರ್‌ಲಾ ಉಪ್ಪುನೆನ್ ಪೌಲು ತೆರಿದ್, “ಸಹೋದ್ರೆರೇ, ಯಾನ್ ಪರಿಸಾಯೆ! ಯಾನ್ ಪರಿಸಾಯನ ಮಗೆ; ಸೈತಿನಾಕುಲು ಲಕ್ಕ್‌ದ್ ಬರ್ವೆರ್ ಪನ್ಪಿ ನಿರೀಕ್ಷೆದ ಸಂಗತಿಡ್ ಎನನ್ ತೀರ್ಪು ಮಲ್ಪುವೆರ್!” ಅಂದ್‌ದ್ ಬುಲ್ತುದು ಪಂಡೆ. 7 ಉಂದೆನ್ ಆಯೆ ಪಂಡಿನಪಗ ಪರಿಸಾಯೆರೆಗ್ಲಾ ಸದ್ದುಕಾಯೆರೆಗ್ಲಾ ಲಡಯಿ ಸುರು ಆಂಡ್; ಸಭೆಟ್ ಭೇದ ಉಂಡಾಂಡ್. 8 ದಾಯೆಗ್ ಪಂಡ ಸೈತಿನಾಕುಲು ಲಕ್ಕ್‌ದ್ ಬರ್ಪುಜೆರ್ ಪಂಡ್ದ್‌ಲಾ ದೂತೆ ಆವಡ್ ಶರೀರದಾಂತಿ ಆತ್ಮ ಆವಡ್ ಇಜ್ಜಿ ಪಂಡ್ದ್‌ಲಾ ಸದ್ದುಕಾಯೆರ್ ಪನ್ಪೆರ್; ಆ ರಡ್ಡ್‌ಲಾ ಉಂಡು ಅಂದ್‌ದ್ ಪರಿಸಾಯೆರ್ ಒಪ್ಪಿಯೊನುವೆರ್. 9 ಅಪಗ ಮಲ್ಲ ಗಲಾಟೆ ಆಂಡ್. ಪರಿಸಾಯೆರ್‌ನ ಗುಂಪುದಕುಲಾಯಿನ ಶಾಸ್ತ್ರಿಲೆಡ್ ಕೆಲೆವೆರ್ ಲಕ್ಕ್‌ದ್, “ಈ ನರಮಾನಿಡ ಎಂಕ್ಲೆಗ್ ಪಡಿಕೆಂತಿನವು ದಾಲಾ ತೋಜಿದ್ ಬರ್ಪುಜಿ; ಆತ್ಮ ಆವಡ್ ದೂತೆ ಆವಡ್ ಆಯಡ ಪಾತೆರ್‌ದ್ ಉಪ್ಪೊಲಿ,” ಅಂದ್‌ದ್ ತರ್ಕ ಮಲ್ತೆರ್. 10 ಲಡಯಿ ಜೋರಾನಗ ಅಕುಲು ಪೌಲುನು ಒಯಿತ್‌ದ್ ರಡ್ಡ್ ತುಂಡು ಮಲ್ಪೆರ್ ಪಂಡ್ದ್ ಶತಾಧಿಪತಿ ಪೋಡಿದ್ ಸಿಪಾಯಿಲೆಗ್ ನಿಕುಲು ಪೋದು ಅಕ್ಲೆ ನಡುಡ್ದು ಆಯನ್ ಬಲವಂತೊಡು ಪತ್ತ್‌ದ್ ಕೋಟೆದ ಉಲಯಿ ಕನವೊಡು ಅಂದ್‌ದ್ ಅಪ್ಪಣೆ ಕೊರಿಯೆ. 11 ಆ ದಿನತ ರಾತ್ರೆಡ್ ಕರ್ತವೆ ಪೌಲುನ ಕೈತಲ್‌ ಉಂತೊಂದು, “ಧೈರ್ಯೊಡುಪ್ಪುಲ; ಈ ಯೆರೂಸಲೇಮುಡು ಎನ ಸಂಗತಿಲೆನ್ ಪೂರ ಸಾಕ್ಷಿಯಾದ್ ಪಂಡಿಲೆಕ್ಕನೇ ರೋಮಾಪುರೊಟ್ಟುಲಾ ಸಾಕ್ಷಿ ಪನೊಡಾವು,” ಪಂಡೆ. ಪೌಲುನು ಕೆರಿಯೆರೆ ಉಪಾಯ ಮಲ್ತಿನವು 12 ಪುಲ್ಯ ಆಯಿನೆಡ್ದ್ ಬೊಕ್ಕ ಯೆಹೂದ್ಯೆರ್ ಕುತಂತ್ರ ಮಲ್ತ್‌ದ್ ನಮ ಪೌಲುನು ಕೆರ್ಪಿನ ಮುಟ್ಟ ನುಪ್ಪು ನೀರ್ ಮುಟ್ಟುಜ ಅಂದ್‌ದ್ ಕಠಿಣ ಶಪತ ಮಲ್ತೊಂಡೆರ್. 13 ಇಂಚ ಮಲ್ತಿನಾಕುಲೆಡ್ ಸುಮಾರ್ ನಲ್ಪ ಜನೊಡ್ದು ಹೆಚ್ಚ್ ಇತ್ತೆರ್. 14 ಮೊಕುಲು ಪ್ರಧಾನಯಾಜಕನ ಬೊಕ್ಕ ಸಭೆತ ಹಿರಿಯೆರೆ ಕೈತಲ್‌ ಪೋದು, “ಎಂಕುಲು ಪೌಲುನು ಕೆರ್ಪಿನ ಮುಟ್ಟ ಬಾಯಿಡ್ ದಾಲಾ ಪಾಡುಜ ಅಂದ್‌ದ್ ಕಠಿಣ ಶಪತ ಮಲ್ತೊಂದ. 15 ಅಂಚಾಯಿನೆಡ್ದ್ ನಿಕುಲು ಸಭೆತಾಕುಲೆನ ಒಟ್ಟುಗು ಸಹಸ್ರಾಧಿಪತಿ ಕೈತಲ್‌ ಪೋದು ಪೌಲುನ ಸಂಗತಿಲೆನ್ ನನಲಾ ಸೂಕ್ಷ್ಮ ಆದ್ ವಿಚಾರಣೆ ಮಲ್ಪೊಡು ಅಂದ್‌ದ್ ನೆಪ ಪಂಡ್ದ್ ಆಯನ್ ಕೋಟೆಡ್ದ್ ನಿಕ್ಲೆ ಕೈತಲ್‌ ಲೆತ್ತೊಂದು ಬರ್ಪಿಲೆಕ್ಕ ಕೇನೊನೊಡು, ಎಂಕುಲು ಆಯ ಕೈತಲ್‌ ಬರ್ಪಿನೆಕ್ಕ್ ದುಂಬೇ ಆಯನ್ ಕೆರಿಯೆರೆ ತಯಾರಾದುಲ್ಲ,” ಪಂಡೆರ್. 16 ಅಕುಲು ಉಪಾಯ ಮಲ್ತಿನೆನ್ ಪೌಲುನ ಮೆಗ್ದಿನ ಮಗೆ ಕೇಂಡ್ದ್ ಕೋಟೆದ ಉಲಯಿ ಬತ್ತ್‌ದ್ ಪೌಲುಗು ತೆರಿಪಾಯೆ. 17 ಪೌಲು ಶತಾಧಿಪತಿಲೆಡ್ ಒರಿಯನ್ ಲೆಪುಡಾದ್, “ಈ ಜವನ್ಯನ್ ಸಹಸ್ರಾಧಿಪತಿನ ಕೈತಲ್‌ ಲೆತ್ತೊಂದು ಪೋಲ; ಆಯಗ್ ತೆರಿಪಾವೊಡಾಯಿನ ಒಂಜಿ ಪಾತೆರ ಉಂಡು,” ಅಂದ್‌ದ್ ಪಂಡೆ. 18 ಶತಾಧಿಪತಿ ಆಯನ್ ಸಹಸ್ರಾಧಿಪತಿ ಕೈತಲ್‌ ಲೆತ್ತೊಂದು ಪೋದು, “ಕೈದ್ ಆದುಪ್ಪು ಪೌಲು ಎನನ್ ಲೆತ್ತ್‌ದ್ ಈ ಜವನ್ಯನ್ ನಿನ ಕೈತಲ್‌ ಲೆತ್ತೊಂದು ಪೋಪಿಲೆಕ್ಕ ಕೇನೊಂಡೆ, ನಿಕ್ಕ್ ತೆರಿಪಾವೊಡಾಯಿನ ಒಂಜಿ ಪಾತೆರ ಉಂಡು,” ಅಂದ್‌ದ್ ಪಂಡೆ. 19 ಅಪಗ ಸಹಸ್ರಾಧಿಪತಿ ಆಯನ್ ಕೈ ಪತ್ತ್‌ದ್ ಒಂಜಿ ಕಡೆಕ್ಕ್ ಒರಿಯನೇ ಲೆತ್ತೊಂದು ಪೋದು, “ಈ ಎಂಕ್ ಪನೊಡಾಯಿ ಪಾತೆರ ಎಂಚಿನ?” ಅಂದ್‌ದ್ ಕೇಂಡೆ. 20 ಐಕ್ ಆಯೆ, “ಯೆಹೂದ್ಯೆರ್ ಪೌಲುನ ವಿಷಯೊನು ನನಲಾ ಸೂಕ್ಷ್ಮ ಆದ್ ವಿಚಾರಣೆ ಮಲ್ಪೊಡು ಪನ್ಪಿನ ನೆವನ ಕೊರ್ದು, ಈ ಎಲ್ಲೆ ಆಯನ್ ಹಿರಿಸಭೆತ ಕೈತಲ್‌ ಲೆತ್ತೊಂದು ಬರೊಡು ಅಂದ್‌ದ್ ಒಪ್ಪಂದ ಮಲ್ತೊಂದೆರ್. 21 ಈ ಅಕ್ಲೆನ ಪಾತೆರೊಗು ಕೆಬಿ ಕೊರಡ; ದಾಯೆಗ್ ಪನ್ನಗ ನಲ್ಪೊಡ್ದು ಜಾಸ್ತಿ ನರಮಾನಿಲು ಆಯನ್ ಕೆರ್ಪಿ ಮುಟ್ಟ ನುಪ್ಪು ನೀರ್ ಮುಟ್ಟುಜ ಅಂದ್‌ದ್ ಆಜ ಪಾಡೊಂದು ಆಯಗಾದ್ ನೋಟ ಪಾಡೊಂದುಲ್ಲೆರ್. ಇತ್ತೆ ಅಕುಲು ನಿನ ಅಪ್ಪಣೆನ್ ಎದುರು ತೂವೊಂದು ತಯಾರಾದುಲ್ಲೆರ್,” ಅಂದ್‌ದ್ ಪಂಡೆ. 22 ಅಪಗ ಸಹಸ್ರಾಧಿಪತಿ ಆ ಜವನ್ಯಗ್, “ಈ ವಿಷಯೊನು ಎಂಕ್ ತೆರಿಪಾಯ ಅಂದ್‌ದ್ ಏರೆಗ್ಲಾ ಪನೊಡ್ಚಿ ಅಂದ್‌ದ್ ಕಂಡಿತಾದ್ ಅಪ್ಪಣೆ ಕೊರ್ದು,” ಆಯನ್ ಕಡಪುಡ್ದು ಬುಡಿಯೆ. ಪೌಲುನು ಫೆಲಿಕ್ಷನಡೆ ಕಡಪುಡುನವು 23 ಆಯೆ ಶತಾಧಿಪತಿಲೆಡ್ ಇರ್ವೆರೆನ್ ಲೆತ್ತ್‌ದ್, “ರಾತ್ರೆ ಒಂರ್ಬ ಗಂಟೆಗ್ ಕೈಸರೆಯ ಮುಟ್ಟ ಪೋಪಿಲೆಕ್ಕ ಇರ್ನೂದು ಸಿಪಾಯಿಲೆನ್ ಎಲ್ಪ ಕುದುರೆ ಸವಾರಿನಾಕುಲೆನ್ ಇರ್ನೂದು ಭರ್ಜಿದಾಕುಲೆನ್ ತಯಾರ್ ಮಲ್ಪುಲೆ. 24 ಬೊಕ್ಕ ಕುದುರೆಲೆನ್ ತಯಾರ್ ಮಲ್ತ್‌ದ್ ಪೌಲುನು ಲೆತ್ತೊಂದು ದೇಶಾಧಿಪತಿ ಆದುಪ್ಪುನ ಫೇಲಿಕ್ಸ್ ಕೈತಲ್‌ ಜಾಗ್ರತೆಡ್ ಲೆತ್ತೊಂದು ಪೋವೊಡು,” ಅಂದ್‌ದ್ ಪಂಡೆ. 25 ಆಯೆ ಈ ರೀತಿಡ್ ಒಂಜಿ ಕಾಕಜಿನ್ ಬರೆಯೆ. 26 “ಮಾನ್ಯ ದೇಶಾಧಿಪತಿ ಆದುಪ್ಪುನ ಫೇಲಿಕ್ಸ್‌ಗ್ ಕ್ಲೌದಿಯೆ ಲೂಸಿಯೆ ಮಲ್ಪುನ ವಂದನೆ 27 ಯೆಹೂದ್ಯೆರ್ ಈ ನರಮಾನಿನ್ ಪತ್ತ್‌ದ್ ಕೆರೊಡಂದ್ದುಪ್ಪುನಗ ಯಾನ್ ಸಿಪಾಯಿಲೆಡೊಪ್ಪ ಪೋದು ಆಯನ್ ರೋಮಾಪುರತ್ತ ಮೂಲದಾಯೆ ಅಂದ್‌ದ್ ತೆರಿದ್ ಆಯನ್ ತಪ್ಪಾಯೆ, 28 ಉಂದತ್ತಂದೆ ಆಯನ ಮಿತ್ತ್ ತಪ್ಪು ಪಂಡಿನ ಕಾರಣೊನು ತೆರಿಯೊಡು ಅಂದ್‌ದ್ ಎನ್ನ್‌ದ್ ಆಯನ್ ಅಕ್ಲೆನ ಹಿರಿಸಭೆಕ್ ಲೆತ್ತೊಂದು ಪೋಯೆ. 29 ಅಲ್ಪ ಅಕುಲು ತನ್ಕುಲೆ ನ್ಯಾಯಕಟ್ಟ್‌ಲೆನ್ ಪತ್ತೊಂದು ಆಯನ ಮಿತ್ತ್ ತಪ್ಪು ಅಪವಾದನೆ ಪಾಡಿನವು ಅತ್ತಂದೆ ಸೆರೆಮನೆಟ್ ಪಾಡೊಡು ಮರಣ ದಂಡನೆ ಆವೊಡು ಪನ್ಪಿನ ತಕ್ಕದ ದೂರು ಆಯಡ ಒಂಜಿಲಾ ಇಜ್ಜಿ ಅಂದ್‌ದ್ ಎಂಕ್ ತೋಜುಂಡು. 30 ಆಂಡ ಯೆಹೂದ್ಯೆರ್ ಈ ನರಮಾನಿಗ್ ವಿರೋಧಾದ್ ಅಪವಾದ ಮಲ್ತೊಂದುಲ್ಲೆರ್ ಅಂದ್‌ದ್ ಎಂಕ್ ತೆರಿದ್ ಬತ್ತ್ಂಡ್. ಅಪಗನೆ ಯಾನ್ ನಿನ ಕೈತಲ್‌ ಕಡಪುಡ್ದು ತಪ್ಪು ಅಪವಾದನೆ ಮಲ್ಪುನಾಕುಲೆಗ್ ನಿನ ದುಂಬೇ ಆಯಗ್ ವಿರೋಧಾದ್ ಪಾತೆರುಲೆಕ್ಕ ಅಪ್ಪಣೆ ಕೊರ್ತೆ.” 31 ಸಿಪಾಯಿಲು ತನ್ಕುಲೆಗ್ ಅಪ್ಪಣೆ ಆಯಿ ಲೆಕ್ಕ ರಾತ್ರೆ ಪೊರ್ತುಡು ಪೌಲುನು ಅಂತಿಪತ್ರಿ ಮುಟ್ಟ ಲೆತ್ತೊಂದು ಪೋಯೆರ್. 32 ಮನದಾನಿ ಆಯನ್ ಕುದುರೆ ಸವಾರಿನಾಕುಲೆ ಒಟ್ಟುಗು ಪೋಪಿಲೆಕ್ಕ ಮಲ್ತ್‌ದ್ ಬಾಕಿದಾಕುಲು ಕೋಟೆಗ್ ಪಿರ ಬತ್ತೆರ್. 33 ಕುದುರೆ ಸವಾರಿನಾಕುಲು ಕೈಸರೆಯಗ್‌ ಸೇರ್ದ್ ದೇಶಾಧಿಪತಿಗ್ ಕಾಕಜಿನ್ ಕೊರ್ದು ಪೌಲುನು ಆಯನ ದುಂಬು ಉಂತಾಯೆರ್. 34 ದೇಶಾಧಿಪತಿ ಆ ಕಾಕಜಿನ್ ಓದುದು ಪೌಲು ವಾ ಊರುದಾಯೆ ಅಂದ್‌ದ್ ಕೇಂಡ್ದ್ ಆಯೆ ಕಿಲಿಕ್ಯದಾಯೆ ಅಂದ್‌ದ್ ತೆರಿದ್ 35 ನಿನ ಮಿತ್ತ್ ತಪ್ಪು ಅಪವಾದನೆ ಮಲ್ಪುನಾಕುಲು ಬತ್ತಿ ಬೊಕ್ಕ ನಿನ ಕಾರ್ಯೊಲೆನ್ ಪೂರ ವಿಚಾರಣೆ ಮಲ್ಪುವೆ ಅಂದ್‌ದ್ ಆಯನ್ ಹೆರೋದನ ಅರಮನೆಡ್ ದೀದ್ ಕಾಪೊಡು ಅಂದ್‌ದ್ ಅಪ್ಪಣೆ ಕೊರಿಯೆ. |
New Life Literature