ಅಪೊ.ಕ್ರಿ 18 - ಪೊಸ ಒಡಂಬಡಿಕೆ

ಪೌಲು ಕೊರಿಂಥ್ಯೊಡು ಸುವಾರ್ತೆ ಸಾರುನವು.

¹ ಉಂದೆಡ್ದ್ ಬೊಕ್ಕ ಪೌಲು ಅಥೇನೆನ್ ಬುಡ್ದು ಕೊರಿಂಥ್ಯೊಗು ಪೋಯೆ.

² ಪೊಂತುಡು ಪುಟ್ಟುದಿನ ಅಕ್ವಿಲ ಪನ್ಪಿ ಒರಿ ಯೆಹೂದ್ಯನ್ ಅಲ್ಪ ತೂಯೆ. ಯೆಹೂದ್ಯೆರ್ ಮಾತೆರ್ಲಾ ರೋಮುನು ಬುಡ್ದು ಪೋವೊಡು ಅಂದ್‌ದ್ ಕ್ಲೌದಿಯೆ ಚಕ್ರವರ್ತಿ ಅಪ್ಪಣೆ ಕೊರಿನ ಕಾರಣ ಅಕ್ವಿಲೆಲಾ ಆಯನ ಬೊಡೆದಿ ಪ್ರಿಸ್ಕಿಲಲಾ ಒಂತೆ ದಿನೊಡ್ದು ದುಂಬು ಇತಾಲ್ಯಡ್ದ್ ಅಡೆಗ್ ಬತ್ತಿತ್ತೆರ್. ಪೌಲು ಅಕ್ವಿಲ ಬೊಕ್ಕ ಪ್ರಿಸ್ಕಿಲನ್ ತಿಕ್ಕರೆ ಪೋಯೆ.

³ ಮೊಕ್ಲೆ ಬೇಲೆ ತಂಬು ಮಲ್ಪುನವು. ಅಕ್ಲೆ ಕೈತಲ್‌ ಆಯೆ ಪೋದು ತಾನ್ ಅವ್ವೇ ಬೇಲೆದಾಯೆ ಆದಿತ್ತಿನೆಡ್ದ್ ಅಕ್ಲೆಡೊಪ್ಪ ಇತ್ತ್‌ದ್ ಬೇಲೆ ಮಲ್ತೆ.

⁴ ಆಯೆ ಮಾತ ಸಬ್ಬತ್‌ದಿನೊಟುಲಾ ಸಭಾಮಂದಿರೊಡು ತರ್ಕ ಮಲ್ತ್‌ದ್ ಯೆಹೂದ್ಯೆರೆಗ್ಲಾ ಗ್ರೀಕೆರೆಗ್ಲಾ ಅರ್ಥ ಮಲ್ಪಾವೊಂದಿತ್ತೆ.

⁵ ಸೀಲೆಲಾ ತಿಮೋಥಿಲಾ ಮಕೆದೋನ್ಯೊಡ್ದು ಬತ್ತಿನಪಗ ಪೌಲು ದೇವೆರೆ ಸುವಾರ್ತೆನ್ ಸಾರಿಯುನೆಟ್ಟ್ ಆಸಕ್ತಿ ಇತ್ತಿನಾಯೆ ಆದ್ ಯೇಸುವೇ ಬರೊಡಾಯಿ ಕ್ರಿಸ್ತೆ ಅಂದ್‌ದ್ ಯೆಹೂದ್ಯೆರೆಗ್ ಸಾಕ್ಷಿ ಪಂಡೆ.

⁶ ಅಕುಲು ಆಯಗ್ ವಿರೋಧಾದ್ ದೂಷಣೆ ಮಲ್ಪುನಗ ಆಯೆ ತನ ಕುಂಟು ಕುಡ್ತ್‌ದ್ ಅಕ್ಲೆಗ್, “ನಿಕ್ಲೆ ನೆತ್ತೆರ್ ನಿಕ್ಲೆ ತರೆತ ಮಿತ್ತೆ! ಯಾನ್ ಶುದ್ಧ ಮನಸ್ ಇತ್ತಿನಾಯೆ ಆದ್ ಪಿದಯಿದ ಜನೊಕುಲೆ ಕೈತಲ್‌ ಪೋಪೆ,” ಅಂದ್‌ದ್ ಪಂಡೆ.

⁷ ಪೌಲು ಆ ಜಾಗ್‌ನ್ ಬುಡ್ದು ದೇವೆರೆಗ್ ಪೋಡಿಯುನಾಯೆ ಆದಿತ್ತಿನ ತೀತ ಯುಸ್ತ ಪನ್ಪಿನಾಯನ ಇಲ್ಲಗ್ ಪೋಯೆ. ಆಯನ ಇಲ್ಲ್ ಸಭಾಮಂದಿರದ ಬರಿಟ್ಟೇ ಇತ್ತ್ಂಡ್.

⁸ ಸಭಾದ್ಯಕ್ಷೆ ಆದುಪ್ಪು ಕ್ರಿಸ್ಪೆ ತನ ಇಡೀ ಇಲ್ಲ್‌ದಾಕುಲೆಡೊಪ್ಪ ಕರ್ತವಡ್ ನಂಬಿಕೆ ದೀಯೆ. ಬೊಕ್ಕ ಕೊರಿಂಥ್ಯೆರೆಡ್ ಮಸ್ತ್ ಜನ ಪೌಲು ಪನ್ಪಿನ ಬೋಧನೆನ್ ಕೇಂಡ್ದ್ ನಂಬುದು ನೀರ್‌ದ ದೀಕ್ಷಾಸ್ನಾನ ಮಲ್ತೊಂಡೆರ್.

⁹ ಕರ್ತವೆ ರಾತ್ರೆಡ್ ಪೌಲುಗು ದರ್ಶನ ಕೊರ್ದು, “ಈ ಪೋಡ್ಯಡ; ಪಾತೆರೊಂದೆ ಉಪ್ಪುಲ, ಆಂಡ ಮನಿಪಂದೆ ಕುಲ್ಲೊಡ್ಚಿ.

¹⁰ ಯಾನ್ ನಿನಡೊಪ್ಪ ಉಲ್ಲೆ; ಏರ್ಲಾ ನಿಕ್ಕ್ ಕೈ ದೆರ್ಪಾಯೆರ್, ನಿಕ್ಕ್ ನಷ್ಟ ಆವಂದ್. ಈ ಪಟ್ಟಣೊಡು ಎನನ್ ನಂಬುನಾಕುಲು ಮಸ್ತ್ ಜನ ಉಲ್ಲೆರ್,” ಅಂದ್‌ದ್ ಪಂಡೆ.

¹¹ ಆಯೆ ಒಂಜಿ ವರ್ಸ ಆಜಿ ತಿಂಗೊಲು ಅಲ್ಪನೇ ಇತ್ತೊಂದು ಆ ಜನೊಕುಲೆಗ್ ದೇವೆರೆ ಪಾತೆರೊನು ಬೋಧನೆ ಮಲ್ತೊಂದಿತ್ತೆ.

¹² ಗಲ್ಲಿಯೋನೆ ಅಖಾಯ ಪ್ರದೇಶದ ಅಧಿಪತಿ ಆದುಪ್ಪುನಗ ಯೆಹೂದ್ಯೆರ್ ಒಗ್ಗಟ್ಟಾದ್ ಪೌಲುನು ಪತ್ತ್‌ದ್ ನ್ಯಾಯಾಸನದ ಎದುರು ಕನತೆರ್.

¹³ “ಇಂಬೆ ನ್ಯಾಯಕಟ್ಟ್‌ಗ್ ವಿರೋಧಾದ್ ದೇವೆರೆನ ಪೂಜೆ ಮಲ್ಪುನೆಕ್ಕ್ ಜನೊಕುಲೆಗ್ ಒತ್ತಾಯ ಮಲ್ಪುವೆ,” ಅಂದ್‌ದ್ ದೂರು ಪಂಡೆರ್.

¹⁴ ಪೌಲು ಪ್ರತಿವಾದ ಮಲ್ಪೊಡು ಪಂಡ್ದುಪ್ಪುನಗ ಗಲ್ಲಿಯೋನೆ ಯೆಹೂದ್ಯೆರೆಗ್, “ಓ ಯೆಹೂದ್ಯೆರೇ, ದಾಲಾ ಒಂಜಿ ಅನ್ಯಾಯ ಇಜ್ಜಿಡ ದುಷ್ಟಕಾರ್ಯೊಲು ಆತ್ಂಡ ಯಾನ್ ನಿಕ್ಲೆ ಪಾತೆರೊನು ತಾಳ್ಮೆಡ್ ಕೇನುನವು ನ್ಯಾಯ ಆದುಂಡು.

¹⁵ ಆಂಡ ನಿಕ್ಲೆ ಉಲಯಿ ಉಪ್ಪು ಬೋಧನೆ, ಪುದರ್, ನ್ಯಾಯಕಟ್ಟ್ ಉಂದೆತ್ತ ತರ್ಕ ಇತ್ತ್ಂಡಲಾ ಅವೆನ್ ನಿಕುಲೇ ತೂವೊನ್ಲೆ. ಇಂಚಿನ ಸಂಗತಿಲೆನ್ ನ್ಯಾಯತೀರ್ಪು ಮಲ್ಪೆರೆ ಎಂಕಂತು ಮನಸಿಜ್ಜಿ,” ಅಂದ್‌ದ್ ಕಡಪುಡಿಯೆ.

¹⁶ ಅಕ್ಲೆನ್ ನ್ಯಾಯಾಸನೊಡ್ದು ಪಿದಯಿ ಪಾಡಿಯೆ.

¹⁷ ಅಪಗ ಜನೊಕುಲು ಮಾತೆರ್ಲಾ ಸಭಾದ್ಯಕ್ಷೆ ಆದುಪ್ಪುನ ಸೋಸ್ಥೆನನ್ ಪತ್ತ್‌ದ್ ನ್ಯಾಯಾಸನದ ಎದುರುಡೆ ಪೆಟ್ಟ್ ಪಾಡಿಯೆರ್. ಗಲ್ಲಿಯೋನೆ ಅವೆನ್ ಒಂಜೆನ್ಲಾ ಗೇನೊಗು ದೆತ್ತೊಂಡಿಜೆ.

ಅಂತಿಯೋಕ್ಯಗ್ ಪಿರ ಪೋಪಿನವು

¹⁸ ಪೌಲು ಕೊರಿಂಥ್ಯೊಡು ಒಂತೆ ಸಮಯ ಇತ್ತ್‌ದ್, ತನ ಸಹೋದ್ರೆರೆಡ್ದ್ ಅಪ್ಪಣೆ ದೆತ್ತೊಂದು ತನ್ಕ್ ಒಂಜಿ ಪರಕೆ ಇತ್ತಿನೆಡ್ದ್ ಕೆಂಕ್ರೇಯಡ್ ತರೆಕುಜಲ್ ದೆತ್ತ್‌ದ್ ಬೊಕ್ಕ ಕಪ್ಪಲ್ ಮಿತ್ತಾರ್ದ್ ಪ್ರಿಸ್ಕಿಲ ಬೊಕ್ಕ ಅಕ್ವಿಲೆ ಒಟ್ಟುಗು ಸುರಿಯಗ್ ಪೋಯೆ.

¹⁹ ಆಯೆ ಎಫೆಸಗ್ ಮುಟ್ಟುನಗ ಅಕ್ಲೆನ್ ಅಲ್ಪನೇ ಬುಡಿಯೆ ತಾನ್ ಸಭಾಮಂದಿರೊಗು ಪೋದು ಯೆಹೂದ್ಯೆರೆ ಒಟ್ಟುಗು ತರ್ಕ ಮಲ್ತೆ.

²⁰ ಅಕುಲು ಆಯನ್ ನನಲಾ ಒಂತೆ ಸಮಯ ಉಪ್ಪೊಡು ಅಂದ್‌ದ್ ಕೇನೊನ್ನಗ ಆಯೆ ಒಪ್ಪಂದೆ

²¹ “ದೇವೆರೆನ ಚಿತ್ತ ಆಂಡ ಕುಡ ನಿಕ್ಲೆನ ಕೈತಲ್‌ ಬರ್ಪೆ,” ಅಂದ್‌ದ್ ಅಕ್ಲೆಡ್ದ್ ಅಪ್ಪಣೆ ದೆತ್ತೊಂದು ಅಲ್ತ್‌ಡ್ದ್ ಪೋಯೆ. ಐಡ್ದ್ ಬೊಕ್ಕ ಎಫೆಸಡ್ದ್ ಕಡಲ್ ಪ್ರಯಾಣ ಮಲ್ತ್‌ದ್

²² ಕೈಸರೆಯಗ್‌ ಮುಟ್ಟಿಯೆ. ಬೊಕ್ಕ ಯೆರೂಸಲೇಮುಗು ಪೋದು ಸಭೆಕ್ ವಂದಿತ್‌ದ್ ಅಂತಿಯೋಕ್ಯಗ್ ಬತ್ತೆ.

²³ ಪೌಲು ಅಂತಿಯೋಕ್ಯಡ್ ಒಂತೆ ಸಮಯ ಇತ್ತ್‌ದ್ ಗಲಾತ್ಯ ದೇಶೊಡ್ಲಾ ಫ್ರುಗ್ಯಡ್ಲಾ ಪ್ರಯಾಣ ಮಲ್ತೊಂದು ಶಿಷ್ಯೆರೆನ್ ಬಲ ಪಡೆಪಾಯೆ.

ಅಪೊಲ್ಲೋಸುನ ಬಗೆಟ್ ಪನ್ಪಿನವು

²⁴ ಅಲೆಕ್ಸಾಂದ್ರಿಯಡ್ ಪುಟ್ಟುದಿನ ಅಪೊಲ್ಲೋಸೆ ಪನ್ಪಿ ಒರಿ ಯೆಹೂದ್ಯೆ ಎಫೆಸಗ್ ಬತ್ತೆ. ಆಯೆ ಪಾತೆರೊಡು ಬಾರಿ ಬಿರ್ಸೆ ಆದಿತ್ತ್‌ದ್ ಶಾಸ್ತ್ರೊಡು ಬಿರ್ಸೆ ಆದಿತ್ತೆ.

²⁵ ಆಯೆ ಕರ್ತವ ಮಾರ್ಗೊಡು ಬೋಧನೆ ಪಡೆತಿನಾಯೆ ಆದಿತ್ತೆ. ಬೊಕ್ಕ ಆತ್ಮೊಡು ಚುರುಕು ಮನಸ್ ಇತ್ತಿನಾಯೆ ಆದಿತ್ತ್‌ದ್ ಯೋಹಾನನ ನೀರ್‌ದ ದೀಕ್ಷಾಸ್ನಾನ ತೆರಿದಿನಾಯೆ ಆದಿತ್ತ್‌ಂಡಲಾ ಯೇಸುನ ಸಂಗತಿಲೆನ್ ಸೂಕ್ಷ್ಮಾದ್ ಪಂಡ್ದ್ ಬೋಧನೆ ಮಲ್ತೊಂದಿತ್ತೆ.

²⁶ ಆಯೆ ಸಭಾಮಂದಿರೊಡು ಧೈರ್ಯೊಡು ಪಾತೆರೊಂದಿತ್ತೆ. ಆಯನ ಪಾತೆರೊಲೆನ್ ಪ್ರಿಸ್ಕಿಲ ಬೊಕ್ಕ ಅಕ್ವಿಲೆ ಕೇಂಡ್ದ್ ಆಯನ್ ತನ್ಕುಲೆ ಇಲ್ಲಗ್ ಲೆತ್ತೊಂದು ಪೋದು ದೇವೆರೆ ಮಾರ್ಗೊನು ಆಯಗ್ ನನಲಾತ್ ಸೂಕ್ಷ್ಮಾದ್ ಬುಡ್ಪಾದ್ ಪಂಡೆರ್.

²⁷ ಐಡ್ದ್ ಬೊಕ್ಕ ಅಖಾಯಗ್ ಪೋವೊಡು ಅಂದ್‌ದ್ ಅಪೊಲ್ಲೋಸ್ ಮನಸ್ ಉಪ್ಪುನಗ ಸಹೋದ್ರೆರ್ ಆಯಗ್ ಉಮೇದ್ ಕೊರ್ದು ಅಲ್ಪ ಇತ್ತಿನ ಶಿಷ್ಯೆರೆಗ್ ಅಪೊಲ್ಲೋಸುನು ಎದುಕೊನೊಡು ಅಂದ್‌ದ್ ಕಾಕಜಿ ಬರೆದ್ ಕೊರಿಯೆರ್. ಆಯೆ ಅವುಲು ಮುಟ್ಟುದು, ದಯ ಹೊಂದುದು ನಂಬುನಾಕುಲೆಗ್ ದಿಂಜ ಸಹಾಯ ಮಲ್ತೆ.

²⁸ ಆಯೆ ಜನೊಕುಲೆಗ್ ಯೇಸು ಒರಿಯೇ ಕ್ರಿಸ್ತೆ ಅಂದ್‌ದ್ ಶಾಸ್ತ್ರದ ಆಧಾರೊಡು ತೋಜಾದ್ ಜನೊಕುಲೆನ ಎದುರುಡು ಬಲವಾದ್ ಯೆಹೂದ್ಯೆರೆನ್ ಕಂಡಿಸಾದ್ ದೇವೆರೆನ್ ನಂಬುನಾಕುಲೆಗ್ ಸಹಾಯ ಮಲ್ತೆ.