ಅಪೊ.ಕ್ರಿ 16 - ಪೊಸ ಒಡಂಬಡಿಕೆಪೌಲು ತಿಮೋಥಿನ್ ಸೇರಾವೊನ್ನವು 1 ಐಡ್ದ್ ಬೊಕ್ಕ ಆಯೆ ದೆರ್ಬೆಗ್ಲಾ ಲುಸ್ತ್ರೊಗ್ಲಾ ಬತ್ತೆ. ಲುಸ್ತ್ರೊಡು ತಿಮೋಥಿ ಪನ್ಪಿನ ಒರಿ ಶಿಷ್ಯೆ ಇತ್ತೆ. ಇಂಬ್ಯನ ಅಪ್ಪೆ ಕರ್ತವನ್ ನಂಬುನ ಯೆಹೂದಿ ಆದಿತ್ತಲ್. ಆಯನ ಅಮ್ಮೆ ಗ್ರೀಕೆ ಆದಿತ್ತೆ. 2 ತಿಮೋಥಿನ ಸಂಗತಿಡ್ ಲುಸ್ತ್ರೊಡ್ಲಾ ಇಕೋನ್ಯಡ್ಲಾ ಇತ್ತಿನ ಸಹೋದ್ರೆರ್ ಎಡ್ಡೆ ಸಾಕ್ಷಿ ಪನೊಂದಿತ್ತೆರ್. 3 ಪೌಲು ತಿಮೋಥಿನ್ ತನ ಒಟ್ಟುಗು ಲೆತ್ತೊಂದು ಪೋವೊಡು ಅಂದ್‌ದ್ ಆಲೋಚನೆ ಮಲ್ತ್‌ದ್ ಯೆಹೂದ್ಯೆರೆಗಾದ್ ಆಯಗ್ ಸುನ್ನತಿ ಮಲ್ಪಾಯೆ. ದಾಯೆಗ್ ಪಂಡ ಆಯನ ಅಮ್ಮೆ ಗ್ರೀಕೆ ಅಂದ್‌ದ್ ಮಾತೆರೆಗ್ಲಾ ಗೊತ್ತಿತ್ತ್ಂಡ್. 4 ಐಡ್ದ್ ಬೊಕ್ಕ ಅಕುಲು ಊರೂರುಗು ಪೋವೊಂದುಪ್ಪುನಗ ಯೆರೂಸಲೇಮುಡಿತ್ತಿ ಅಪೊಸ್ತಲೆರ್‌ಲಾ ಸಭೆತ ಹಿರಿಯಾಕುಲುಲಾ ನಿರ್ಧಾರ ಮಲ್ತ್‌ದಿನ ಆಚಾರೊಲೆನ್ ಅಕ್ಲೆಗ್ ತೆರಿಪಾದ್ ಅವೆನ್ ಕೈಕೊನೊಂದು ನಡಪುಡೊಡು ಅಂದ್‌ದ್ ಪಂಡೆರ್. 5 ದಿನ ಪೋಯಿಲೆಕ್ಕ ಸಭೆಕುಲು ಕ್ರಿಸ್ತ ನಂಬಿಕೆಡ್ ಬಲ ಪಡೆದ್ ಸಭೆತ ಸಂಖ್ಯೆ ಹೆಚ್ಚಾವೊಂದು ಪೋಂಡು. ಪೌಲುನ ತ್ರೋವೊಡು ದರ್ಶನ 6 ಆಸ್ಯ ದೇಶೊಡು ವಾಕ್ಯ ಪನಿಯೆರೆ ಬಲ್ಲಿ ಅಂದ್‌ದ್ ಪರಿಶುದ್ಧಾತ್ಮೆ ತಡೆತಿನೆಡ್ದ್ ಅಕುಲು ಫ್ರುಗ್ಯ ಬೊಕ್ಕ ಗಲಾತ್ಯ ದೇಶೊನು ಕಡತ್‌ದ್ ಪೋನಗ 7 ಮೂಸ್ಯ ದೇಶದ ಕೈತಲಾನಗ ಬಿಥೂನ್ಯೊಗು ಪೋಯೆರೆ ಪ್ರಯತ್ನ ಮಲ್ತೆರ್. ಅಲ್ಪಲಾ ಯೇಸುನ ಆತ್ಮೆ ಅಕ್ಲೆನ್ ಪೋವರೆ ಬುಡ್ಜಿ. 8 ಅಪಗ ಅಕುಲು ಮೂಸ್ಯ ಕಡತ್‌ದ್ ತ್ರೋವೊಗು ಬತ್ತೆರ್. 9 ಅಲ್ಪ ರಾತ್ರೆಡ್ ಪೌಲುಗು ಒಂಜಿ ದರ್ಶನ ಆಂಡ್; ಮಕೆದೋನ್ಯ ದೇಶದ ಒರಿ ನರಮಾನಿ ಉಂತೊಂದು, “ಈ ಮಕೆದೋನ್ಯೊಗು ಬತ್ತ್‌ದ್ ಎಂಕ್ಲೆಗ್ ಸಹಾಯ ಮಲ್ಪೊಡು,” ಅಂದ್‌ದ್ ನಟ್ಟೊಂಡೆ. 10 ಆಯಗ್ ದರ್ಶನ ಆಯಿ ಬೊಕ್ಕ ಆ ಸೀಮೆದಾಕುಲೆಗ್ ಸುವಾರ್ತೆನ್ ಸಾರಿಯೆರೆ ದೇವೆರ್ ಎಂಕ್ಲೆನ್ ಲೆತ್ತ್‌ದೆ ಅಂದ್‌ದ್ ಅಪಗನೆ ಮಕೆದೋನ್ಯೊಗು ಪಿದಾಡ್ದ್ ಪೋಪಿನ ಪ್ರಯತ್ನ ಮಲ್ತ. ಲುದ್ಯನ ಪರಿವರ್ತನೆ 11 ಎಂಕುಲು ತ್ರೋವೊಡ್ದು ಕಡಲ್ಡ್ ಪ್ರಯಾಣ ಮಲ್ತ್‌ದ್ ಸೀದ ಸಮೊಥ್ರೊ ದ್ವೀಪೊಗು ಬತ್ತ್‌ದ್ ಮನದಾನಿ ನೆಯಾಪೊಲಿಗ್ ಸೇರಿಯ. 12 ಅಲ್ತ್‌ಡ್ದ್ ಫಿಲಿಪ್ಪಿಗ್ ಮುಟ್ಟಿಯ. ಅವು ರೋಮಾಪುರದಾಕುಲೆನ ವಶೊಟು ಇತ್ತಿನ ಜಾಗ್ ಅವು ಮಕೆದೋನ್ಯೊಡು ಒಂಜಿ ಮಲ್ಲ ಪಟ್ಟಣಲಾ ಆದುಂಡು. ಈ ಊರುಡು ಎಂಕುಲು ಒಂತೆ ದಿನ ಇತ್ತ. 13 ತುದೆ ಬರಿಟ್ಟ್ ದೇವೆರೆನ ಪ್ರಾರ್ಥನೆ ಮಲ್ಪುನ ಜಾಗ್ ಉಪ್ಪು ಅಂದ್‌ದ್ ಎನ್ನ್‌ದ್ ಸಬ್ಬತ್‌ದಿನೊಟು ಊರ ಬಾಕಿಲ್‌ದ ಪಿದಯಿ ಪೋದು ಅಲ್ಪ ಸೇರ್ದ್ ಬೈದಿನ ಪೊಂಜೊವುಲೆ ಒಟ್ಟುಗು ಕುಲ್ಲುದು ಪಾತೆರಿಯ. 14 ಲುದ್ಯ ಪನ್ಪಿ ಒರ್ತಿ ಪೊಂಜೊವು ಇತ್ತಲ್. ಆಲ್ ನೇರೊಲ್ ಬಣ್ಣದ ಕುಂಟುಲೆನ್ ಮಾರುನಾಲ್‌ಲಾ ಥುವತೈರ ಪನ್ಪಿ ಊರುದ ದೇವೆರೆನ ಭಕ್ತೆದಿ ಆದಿತ್ತಲ್. ಪೌಲು ಪಂಡಿನ ಪಾತೆರೊಲೆಗ್ ಮನಸ್ ಕೊರಿಯೆರೆ ಕರ್ತವೆ ಆಲೆನ ಉಡಲ್‌ಡ್ ಕಾರ್ಯ ಮಲ್ತೆ 15 ಆಲ್‌ಲಾ ಆಲೆನ ಇಲ್ಲದಾಕುಲುಲಾ ನೀರ್‌ದ ದೀಕ್ಷಾಸ್ನಾನ ಮಲ್ತೊಂಡಿ ಬೊಕ್ಕ ಆಲ್, “ಯಾನ್ ಕರ್ತವನ್ ನಂಬುನಾಲ್ ಪಂಡ್ದ್ ನಿಜವಾದ್ ಎನ್ನ್‌ವರ್ಡ, ಎನ ಇಲ್ಲಗ್ ಬತ್ತ್‌ದ್ ಉಪ್ಪುಲೆ,” ಅಂದ್‌ದ್ ನಟ್ಟೊಂದು ಒತ್ತಾಯ ಮಲ್ತಲ್. ಪೌಲುಲಾ ಸೀಲೆಲಾ ಸೆರೆಮನೆಟ್ 16 ಎಂಕುಲು ಪ್ರಾರ್ಥನೆ ನಡಪುನ ಜಾಗ್‌ಗ್ ಪೋವೊಂದುಪ್ಪುನಗ ಬಲ್ಮೆದ ಆತ್ಮ ಇತ್ತಿ ಒರ್ತಿ ಚಾಕ್ರಿದಾಲ್ ಎಂಕುಲೆ ಎದುರು ಬತ್ತಲ್. ಆಲ್ ಬಲ್ಮೆ ಪನ್ಪಿನೆಡ್ದ್ ಆಲೆನ ಯಜಮಾನಗ್ ಮಸ್ತ್ ಕಾಸ್ ಆವೊಂದಿತ್ತ್ಂಡ್. 17 ಪೌಲುಲಾ ಎಂಕುಲುಲಾ ಪೋವೊಂದುಪ್ಪುನಗ ಆಲ್ ಪಿರವುಡ್ದು ಬತ್ತ್‌ದ್, ಈ ನರಮಾನಿಲು ಪರಾತ್ಪರನ ದೇವೆರೆನ ಸೇವಕೆರ್; ನಿಕ್ಲೆಗ್ ರಕ್ಷಣೆದ ಮಾರ್ಗೊನು ಸಾರುವೆರ್ ಅಂದ್‌ದ್ ಬೊಬ್ಬೆ ಪಾಡೊಂದಿತ್ತಲ್. 18 ಇಂಚ ದಿಂಜ ದಿನ ಮಲ್ತೊಂದಿತ್ತಲ್. ಪೌಲು ಬಾರಿ ಬೇಜಾರಾದ್ ಪಿರ ತಿರ್ಗ್‌ದ್ ಆ ಆತ್ಮೊಗು ಆಲೆನ್ ಬುಡ್ದು ಪೋಲ ಅಂದ್‌ದ್ ಯೇಸು ಕ್ರಿಸ್ತನ ಪುದರ್‌ಡ್ ಅಪ್ಪಣೆ ಕೊರಿನೆಟ್ಟ್, ಅವ್ವೆ ಗಳಿಗೆಡ್ ಬುಡ್ದು ಪೋಂಡು. 19 ಆಲೆನ ಯಜಮಾನಗ್ ತನ್ಕ್ ಬರ್ಪಿನ ಲಾಭದ ನಿರೀಕ್ಷೆ ತತ್ತ್‌ಂಡ್ ಅಂದ್‌ದ್ ಪೌಲನ್ಲಾ ಸೀಲನ್ಲಾ ಪತ್ತ್‌ದ್ ಪೇಂಟೆದ ಅಧಿಕಾರಿನ ಕೈತಲ್‌ ಒಯ್ತೊಂದು ಪೋಯೆರ್. 20 ಅಕ್ಲೆನ್ ಅಧಿಪತಿಲೆ ಎದುರು ಕನತ್‌ದ್, “ಈ ನರಮಾನಿಲು ಯೆಹೂದ್ಯೆರ್, ನಮ ಊರುನು ಬಾರಿ ಗಲಿಬಿಲಿ ಮಲ್ಪುವೆರ್. 21 ಮೊಕುಲು ಯೆಹೂದ್ಯೆರ್ ಆದಿತ್ತ್‌ದ್ ಎಂಕುಲು ರೋಮಾಯೆರ್ ಮಲ್ಪೆರೆ ಆವಂದಿ ಆಚಾರೊಲೆನ್ ಮಲ್ಪೊಡು ಅಂದ್‌ದ್ ಸಾರುವೆರ್.” 22 ಬೊಕ್ಕ ಜನೊಕುಲೆನ ಗುಂಪು ಕೂಡ್ದು ಅಕ್ಲೆಗ್ ವಿರೋಧಾದ್ ಲಕ್ಕಿಯೆರ್; ಬೊಕ್ಕ ಅಧಿಪತಿಲು ಅಕ್ಲೆನ ಕುಂಟುನು ಪರ್ತ್‌ದ್ ದೆತ್ತ್‌ದ್ ಚಾಟಿಡ್ ಪೆಟ್ಟ್ ಪಾಡಿಯೆರೆ ಅಪ್ಪಣೆ ಕೊರಿಯೆರ್. 23 ಅಕ್ಲೆಗ್ ದಿಂಜ ಪೆಟ್ಟ್ ಕೊರಿ ಬೊಕ್ಕ ಸೆರೆಮನೆಟ್ ಪಾಡಾಯೆರ್. ಮೊಕ್ಲೆನ್ ಜಾಗ್ರತೆಡ್ ಕಾಪೊಡು ಅಂದ್‌ದ್ ಸೆರೆಮನೆತ ಅಧಿಕಾರಿಗ್ ಅಪ್ಪಣೆ ಕೊರಿಯೆರ್. 24 ಅಧಿಕಾರಿ ಅಪ್ಪಣೆ ಕೊರಿ ಲೆಕ್ಕ ಅಕ್ಲೆನ್ ಸೆರೆಮನೆತ ಉಲಯಿದ ಕೋಣೆಡ್ ಪಾಡ್ದ್ ಅಕ್ಲೆನ ಕಾರ್ ಕೋಳೊಡು ತಿಕ್ಕಾದ್ ಬಿಗಿತೆರ್. 25 ನಡು ರಾತ್ರೆಡ್ ಪೌಲುಲಾ ಸೀಲೆಲಾ ಪ್ರಾರ್ಥನೆ ಮಲ್ಪುನಾಕುಲಾದ್ ದೇವೆರೆಗ್ ಸ್ತುತಿಪದ ಪನ್ನೊಂದಿತ್ತೆರ್; ಬೇತೆ ಸೆರೆಮನೆಟಿತ್ತಿ ಜನೊಕುಲು ಮನಸ್ ಕೊರ್ದು ಕೇನೊಂದಿತ್ತೆರ್. 26 ಅಪಗನೆ ಮಲ್ಲ ಭೂಕಂಪ ಆಂಡ್. ಸೆರೆಮನೆತ ಬುನಾದಿ ಅದ್‌ರ್ಂಡ್. ಬಾಕಿಲ್ ಜತ್ತ್ಂಡ್ ಮಾತೆರೆನ ಕೈಕಾರ್‌ಗ್ ಕಟ್ಟ್‌ದಿನ ಮರತ ತುಂಡು ಕದೆಲ್‌ದ್ ಬೂರುಂಡು. 27 ಸೆರೆಮನೆತ ಅಧಿಕಾರಿ ನಿದ್ರೆಡ್ದ್ ಲಕ್ಕ್‌ದ್ ಸೆರೆಮನೆತ ಮಾತ ಬಾಕಿಲ್ ಜತ್ತ್‌ದುಪ್ಪುನೆನ್ ತೂದು ಕೈದಿಲು ಪೂರ ತಪ್ಪಾವೊಂದು ಬಲ್ತ್ ಪೋಯೆರ್ ಅಂದ್‌ದ್ ಎನ್ನಿಯೆ, ತನ ಕೈಟ್ ಇತ್ತಿನ ಕತ್ತಿನ್ ಪತ್ತೊಂದು ಪ್ರಾಣಹತ್ಯ ಮಲ್ಪೊಡು ಪಂಡ್ದುಪ್ಪುನಗನೆ 28 ಪೌಲು ಆಯಗ್, “ಈ ದಾಲಾ ನಿನ ಜೀವೊಗು ಅಪಾಯ ಮಲ್ತೊನಡ. ಎಂಕುಲು ಮಾತೆರ್ಲಾ ಮೂಲೇ ಉಲ್ಲ,” ಅಂದ್‌ದ್ ಬೊಬ್ಬೆ ಪಾಡ್ದ್ ಪಂಡೆ. 29 ಸೆರೆಮನೆತ ಅಧಿಕಾರಿ ತುಡರ್ ಕನಯೆರೆ ಅಂದ್‌ದ್ ಸೆರೆಮನೆತ ಉಲಯಿ ನಡಗೊಂದು ಪೋದು ಪೌಲು ಸೀಲೆರೆನ ಎದುರು ಬೂರಿಯೆ. 30 ಬೊಕ್ಕ ಅಕ್ಲೆನ್ ಪಿದಯಿ ಲೆತ್ತೊಂದು ಬತ್ತ್‌ದ್, “ಸ್ವಾಮಿಲೇ, ಎಂಕ್ ರಕ್ಷಣೆ ತಿಕ್ಕೊಡಾಂಡ ಯಾನ್ ದಾನೆ ಮಲ್ಪೊಡು,” ಅಂದ್‌ದ್ ಕೇಂಡೆ. 31 ಅಕುಲು, “ಕರ್ತವೆ ಆದುಪ್ಪು ಯೇಸುನ ಮಿತ್ತ್ ನಂಬಿಕೆ ದೀಲ, ಅಪಗ ಈಲಾ ನಿನ ಇಲ್ಲದಾಕುಲುಲಾ ರಕ್ಷಣೆ ಹೊಂದುವರ್,” ಪಂಡ್ದ್ ಉತ್ತರ ಕೊರಿಯೆರ್. 32 ಬೊಕ್ಕ ಅಕುಲು ಆಯನ ಇಲ್ಲಡಿತ್ತಿ ಮಾತೆರೆಗ್ಲಾ ಕರ್ತವ ಪಾತೆರೊನು ತೆರಿಪಾಯೆರ್. 33 ಐಡ್ದ್ ಬೊಕ್ಕ ಆಯೆ ರಾತ್ರೆದ ಅವ್ವೆ ಪೊರ್ತುಡು ಅಕ್ಲೆನ್ ಲೆತ್ತೊಂದು ಪೋದು ಅಕ್ಲೆನ ಗಾಯೊನು ದೆಕ್ಕಿಯೆ. ಬೊಕ್ಕ ಆಯೆಲಾ ಆಯನ ಇಲ್ಲದಾಕುಲು ಮಾತೆರ್ಲಾ ಅಪಗನೆ ನೀರ್‌ದ ದೀಕ್ಷಾಸ್ನಾನ ಮಲ್ತೊಂಡೆರ್. 34 ಐಡ್ದ್ ಬೊಕ್ಕ ಅಕ್ಲೆನ್ ತನ ಇಲ್ಲಗ್ ಲೆತ್ತೊಂದು ಪೋದು ವಣಸ್ ಮಲ್ಪಾಯೆ. ದೇವೆರೆನ್ ನಂಬುನಾಯೆ ಆದ್ ತನ ಇಲ್ಲದಾಕುಲೆ ಸಮೇತ ಸಂತೋಷ ಪಡೆಯೆ. 35 ಪುಲ್ಯ ಆಯಿ ಬೊಕ್ಕ ಅಧಿಪತಿಲು, “ಆ ನರಮಾನಿಲೆನ್ ಬುಡ್ದು ಬುಡ್ಲ,” ಅಂದ್‌ದ್ ಸೈನಿಕೆರ್‌ಡ ಪಂಡ್ದ್ ಕಡಪುಡಿಯೆರ್. 36 ಸೆರೆಮನೆತ ನಾಯಕೆರ್ ಈ ಪಾತೆರೊನು ಪೌಲುಗು ತೆರಿಪಾದ್, “ಅಧಿಪತಿಲು ನಿಕ್ಲೆಗ್ ಬುಡುಗಡೆ ಆಂಡ್ ಅಂದ್‌ದ್ ಕಡಪುಡಿಯೆರ್ ಅಂಚಾಯಿನೆಡ್ದ್ ಇತ್ತೆ ನಿಕುಲು ಸಮಾಧಾನೊಡು ಪಿದಾಡ್ದ್ ಪೋಲೆ,” ಅಂದ್‌ದ್ ಪಂಡೆ. 37 ಐಕ್ ಪೌಲು, “ಸೈನಿಕೆರ್‌ಡ ಪನ್ಪೆ, ಅಕುಲು ನೀತಿನ್ಯಾಯ ಕೇನಂದೆ ರೋಮಾಪುರದ ಹಕ್ಕುದಾರೆರಾಯಿನ ಎಂಕ್ಲೆನ್ ಮಾತೆರೆನ ಎದುರುಡು ಹಾಕಾದ್ ಸೆರೆಮನೆಟ್ ಪಾಡ್ಪಾಯೆರ್, ಇತ್ತೆ ಎಂಕ್ಲೆನ್ ಗುಟ್ಟುಡ್ ಪಿದಯಿ ಕಡಪುಡ್ವೆರಾ? ಅಂಚ ಆವೆರೆ ಬಲ್ಲಿ; ಅಕುಲೇ ಬತ್ತ್‌ದ್ ಎಂಕ್ಲೆನ್ ಲೆತ್ತೊಂದು ಪೋವೊಡು,” ಅಂದ್‌ದ್ ಪಂಡೆ. 38 ಸೈನಿಕೆರ್ ಈ ಪಾತೆರೊಲೆನ್ ಅಧಿಪತಿಲೆಗ್ ತೆರಿಪಾಯಿನಗ ರೋಮಾಪುರದ ಹಕ್ಕ್‌ದಾರೆರ್ ಪನ್ಪಿ ಪಾತೆರೊನು ಕೇಂಡ್ದ್ ಪೋಡಿಯೆರ್, 39 ಬೊಕ್ಕ ಅಕ್ಲೆನ ಕೈತಲ್‌ ಪೋದು ಪೊರ್ಲುಡು ಪಾತೆರ್‌ದ್ ಪಿದಯಿ ಲೆತ್ತೊಂದು ಬತ್ತ್‌ದ್ ನಿಕುಲು ಉಂದು ಊರುನು ಬುಡ್ದು ಪೋವೊಡು ಅಂದ್‌ದ್ ನಟ್ಟೊಂಡೆರ್. 40 ಅಪಗ ಪೌಲುಲಾ ಸೀಲೆಲಾ ಸೆರೆಮನೆಡ್ದ್ ಪಿದಾಡ್ದ್ ಲುದ್ಯನ ಇಲ್ಲಗ್ ಬತ್ತ್‌ದ್ ಸಹೋದ್ರೆರೆನ್ ತೂದು ಅಕ್ಲೆಗ್ ಧೈರ್ಯ ಕೊರ್ದು ಪಿದಾಡ್ದ್ ಪೋಯೆರ್. |
New Life Literature