ಅಪೊ.ಕ್ರಿ 15 - ಪೊಸ ಒಡಂಬಡಿಕೆ

ಸುನ್ನತಿದ ಬಗೆಟ್ ಚರ್ಚೆ

¹ ಬೊಕ್ಕ ಕೆಲೆವೆರ್ ಯೂದಾಯೊಡ್ದು ಅಂತಿಯೋಕ್ಯಗ್ ಬತ್ತ್‌ದ್, “ನಿಕುಲು ಮೋಶೆನ ನ್ಯಾಯಕಟ್ಟ್‌ದ ನೇಮದ ಪ್ರಕಾರ ಸುನ್ನತಿ ಮಲ್ತೊನುಜರ್ಡ ನಿಕ್ಲೆಗ್ ರಕ್ಷಣೆ ಆವಂದ್,” ಅಂದ್‌ದ್ ಸಹೋದ್ರೆರೆಗ್ ಬೋಧನೆ ಮಲ್ತೊಂದಿತ್ತೆರ್.

² ಐಡ್ದಾವರ ಪೌಲು ಬೊಕ್ಕ ಬಾರ್ನಬಡ ಮಲ್ಲ ತರ್ಕ ಉಂಡಾಂಡ್. ಉಂದೆತ್ತ ಸಂಗತಿಡ್ ಪೌಲುಲಾ ಬಾರ್ನಬೆಲಾ ತನ್ಕುಲೆಡ್ದೇ ಬೇತೆ ಕೆಲೆವೆರೆನ್ಲಾ ಯೆರೂಸಲೇಮುಡಿತ್ತಿ ಅಪೊಸ್ತಲೆರೆ ಬೊಕ್ಕ ಸಭೆತ ಹಿರಿಯೆರ್‌ನ ಕೈತಲ್‌ ಪೋವೊಡು ಅಂದ್‌ದ್ ತೀರ್ಮಾನ ಮಲ್ತೆರ್.

³ ಸಭೆತಾಕುಲು ಅಕ್ಲೆನ್ ಕಡುಪುಡುದು ಕೊರಿ ಬೊಕ್ಕ ಅಕುಲು ಫೊಯಿನೀಕೆ ಬೊಕ್ಕ ಸಮಾರ್ಯದ ದೇಶ ದಾಂಟ್‌ದ್ ಪೋವೊಂದುಪ್ಪುನಗ ಪಿದಯಿದ ಜನೊಕುಲು ಕರ್ತವ ಕಡೆಕ್ಕ್ ತಿರ್ಗುನ ಸಂಗತಿಲೆನ್ ಅಲ್ಪ ಇತ್ತಿನ ಸಹೋದ್ರೆರೆಗ್ ಬುಡ್ಪಾದ್ ಪಂಡ್ದ್ ಅಕ್ಲೆನ್ ಮಾತೆರೆನ್ಲಾ ಸಂತೋಷ ಮಲ್ಪಾಯೆರ್.

⁴ ಅಕುಲು ಯೆರೂಸಲೇಮುಗು ಬತ್ತಿ ಬೊಕ್ಕ ಸಭೆಲಾ ಅಪೊಸ್ತಲೆರ್‌ಲಾ ಸಭೆತ ಹಿರಿಯಾಕುಲುಲಾ ಅಕ್ಲೆನ್ ಸೇರಾವೊಂಡೆರ್. ದೇವೆರ್ ತನ್ಕುಲೆ ಒಟ್ಟುಗು ಇತ್ತ್‌ದ್ ಮಲ್ತ್‌ದಿನ ಕಾರ್ಯೊಲೆನ್ ಪೂರ ಅಕ್ಲೆಗ್ ತೆರಿಪಾಯೆರ್.

⁵ ಆಂಡ ಪರಿಸಾಯೆರೆ ಗುಂಪುದಾಕುಲೆಡ್ ಯೇಸುನು ನಂಬುದಿನ ಕೆಲೆವೆರ್ ಲಕ್ಕ್‌ದ್ ದೇವೆರೆ ಕಡೆಕ್ಕ್ ತಿರ್ಗ್‌ದುಪ್ಪುನ ಪಿದಯಿದ ಜನೊಕುಲೆಗ್ ಸುನ್ನತಿ ಮಲ್ಪಾವೊಡು, ಬೊಕ್ಕ ಮೋಶೆನ ನ್ಯಾಯದ ನಿಯಮೊನು ಕೈಕೊಂದು ನಡಪೆರೆ ಅಕ್ಲೆಗ್ ಅಪ್ಪಣೆ ಕೊರೊಡು ಅಂದ್‌ದ್ ಪಂಡೆರ್.

⁶ ಅಪೊಸ್ತಲೆರ್‌ಲಾ ಸಭೆತ ಹಿರಿಯಾಕುಲುಲಾ ಈ ಸಂಗತಿನ್ ವಿಚಾರಣೆ ಮಲ್ಪೆರೆ ಕೂಡ್ದುಪ್ಪುನಗ ಅಕ್ಲೆ ನಡುಟು ಮಸ್ತ್ ತರ್ಕ ನಡತಿ ಬೊಕ್ಕ

⁷ ಪೇತ್ರೆ ಲಕ್ಕ್‌ದ್ ಅಕ್ಲೆಗ್, “ಸಹೋದರೆರೆ, ಪಿದಯಿದ ಜನೊಕುಲು ಎನ ಬಾಯಿಡ್ದ್ ಸುವಾರ್ತೆದ ಪಾತೆರೊನು ಕೇಂಡ್ದ್ ನಂಬೊಡು ಅಂದ್‌ದ್ ದೇವೆರ್ ನಿಕ್ಲೆಡ್ದ್ ಎನನ್ ಅಜತ್‌ದ್ ದೆತ್ತೊಂಡಿನವು ನಿಕ್ಲೆಗ್ ತೆರಿದುಂಡು.

⁸ ಬೊಕ್ಕ ಉಡಲ್‌ನ್ ತೆರಿದಿನಾಯೆ ಆದುಪ್ಪು ದೇವೆರ್ ಎಂಚ ಪರಿಶುದ್ಧಾತ್ಮ ವರೊನು ನಂಕ್ ಕೊರಿಯೆನಾ, ಅಂಚೆನೇ ಅಕ್ಲೆಗ್ಲಾ ಕೊರ್ದು ತನ ಜನೊಕುಲು ಅಂದ್‌ದ್ ಸಾಕ್ಷಿ ಕೊರಿಯೆ

⁹ ಉಂದತ್ತಂದೆ ದೇವೆರ್ ಎಂಕ್ಲೆಗ್ಲಾ ಅಕ್ಲೆಗ್ಲಾ ದಾಲಾ ಭೇದ ಮಲ್ಪಂದೆ, ಅಕುಲು ನಂಬಿನೆಡ್ದ್ ದೇವೆರ್ ಅಕ್ಲೆ ಉಡಲ್‌ನ್ಲಾ ಶುದ್ಧ ಮಲ್ತೆ.

¹⁰ ಇಂಚಾದುಪ್ಪುನಗ ಎಂಕುಲಾವಡ್ ನಮ ಪಿತೃಲಾವಡ್ ತುಂಬೊನಿಯೆರೆ ಆವಂದಿ ಪುದೆನ್ ನಿಕುಲು ಶಿಷ್ಯೆರ್‌ನ ಪುಗೆಲ್‌ದ ಮಿತ್ತ್ ಪಾಡ್ದ್ ದೇವೆರೆನ್ ಪರೀಕ್ಷೆ ಮಲ್ಪುನು ದಾಯೆಗ್?

¹¹ ಕರ್ತವೆ ಆದುಪ್ಪು ಯೇಸುನ ದಯೊಡ್ದೇ ನಮ ರಕ್ಷಣೆ ಹೊಂದುವ ಅಂದ್‌ದ್ ನಂಬುವ ಅತ್ತಾ; ಅಂಚೆನೇ ಅಕುಲುಲಾ ಹೊಂದುವೆರ್,” ಅಂದ್‌ದ್ ಪಂಡೆ.

¹² ಗುಂಪುಗು ಸೇರ್ದಿನಾಕುಲು ಮಾತೆರ್ಲಾ ಈ ಪಾತೆರೊಲೆನ್ ಕೇಂಡ್ದ್ ಮನಿಪಂದೆ ಇತ್ತ್‌ದ್ ಬಾರ್ನಬೆಲಾ ಪೌಲುಲಾ ತನ್ಕುಲೆಡ್ದ್ ದೇವೆರ್ ಪಿದಯಿದ ಜನೊಕುಲೆ ನಡುಟು ಮಲ್ತಿನ ಮಾತ ಗುರ್ತೊಲೆನ್ಲಾ ಕಾರ್ನಿಕೊಲೆನ್ಲಾ ಪನ್ಪಿನೆನ್ ಕೆಬಿ ಕೊರ್ದು ಕೇಂಡೆರ್.

¹³ ಅಕುಲು ಪಂಡ್ದ್ ಮುಗಿತಿ ಬೊಕ್ಕ ಯಾಕೋಬು ಪಂಡೆ, “ಸಹೋದರೆರೆ, ಯಾನ್ ಪನ್ಪಿನೆನ್ ಕೇನ್ಲೆ.

¹⁴ ದೇವೆರ್ ಸುರುಟ್ಟು ಪಿದಯಿದ ಜನೊಕುಲೆನ್ ಕರುಣೆ ಮಲ್ತ್‌ದ್ ತನ ಪುದರ್‌ಗಾದ್ ಅಕ್ಲೆಡ್ದ್ ಒಂಜಿ ಪ್ರಜೆನ್ ಅಜತ್‌ದಿನ ರೀತಿನ್ ಸಿಮೆಯೋನೆ ಬುಡ್ಪಾದ್ ಪಂಡೆ.

¹⁵ ಉಂದು ಪ್ರವಾದಿಲು ಬರೆತಿ ಪಾತೆರೊಲೆಗ್ ಸಮ ಬೂರುಂಡು.

¹⁶ ‘ಉಂದೆಡ್ದ್ ಬೊಕ್ಕ ಯಾನ್ ಪಿರ ಬತ್ತ್‌ದ್ ದಾವೀದನ ಬೂರ್ದು ಪೋತಿ ಗುಡಾರೊನು ಕುಡ ಕಟ್ಟುವೆ. ಚಲ್ಲಾಪಿಲ್ಲಿ ಆತಿನೆನ್ ಸರಿ ಮಲ್ತ್‌ದ್ ಅವೆನ್ ಸರ್ತ ಉಂತಾವೆ.

¹⁷ ನರಮಾನಿಲೆಡ್ದ್ ಒರಿದಿ ಜನೊಕುಲುಲಾ ಅಂದ್ಂಡ ಎನ ಪುದರ್ ಏರೇ ಮಿತ್ತ್ ಉಂಡಾ ಆ ಮಾತ ಪಿದಯಿದ ಜನೊಕುಲುಲಾ ಕರ್ತವನ್ ನಾಡುನಾಕುಲಾವೊಡು ಅಂದ್‌ದ್ ಕರ್ತವೆ ಪನ್ಪೆ ಅಂದ್‌ದ್ ಬರೆತ್ಂಡ್.

¹⁸ ಆದಿಡ್ದೆ ಈ ಕಾರ್ಯೊಲೆನ್ ಮಾತ ತೆರಿಪಾದುಂಡು.’

¹⁹ ಇಂಚಾದುಪ್ಪುನಗ ಎನ ಅಭಿಪ್ರಾಯ ದಾನೆ ಪಂಡ, ಪಿದಯಿದ ಜನೊಕುಲೆಡ್ ದೇವೆರೆ ಕಡೆಕ್ಕ್ ತಿರ್ಗುನಾಕುಲೆಗ್ ಅಡ್ಡಿ ಮಲ್ಪೆರೆ ಬಲ್ಲಿ.

²⁰ ಆಂಡ ಮೂರ್ತಿಲೆಗ್ ಅರ್ಪಣೆ ಮಲ್ತ್‌ದಿನ ನೈವೇದ್ಯೊನು ತಿನೊಡ್ಚಿ, ಲೈಂಗಿಕ ಪಾಪೊಲೆನ್ ಮಲ್ಪೊಡ್ಚಿ, ಕಂಟೆಲ್ ಪೀಂಟಾದ್ ಕೆರ್ತಿನ ಪ್ರಾಣಿಲೆನ ನೆತ್ತೆರ್‌‌ನ್ಲಾ ಮಾಸೊನ್ಲಾ ತಿರಸ್ಕಾರ ಮಲ್ಪೊಡು ಅಂದ್‌ದ್ ನಮ ಅಕ್ಲೆಗ್ ಕಾಕಜಿ ಬರೆದ್ ಅಪ್ಪಣೆ ಕೊರ್ಕ.

²¹ ದಾಯೆಗ್ ಪಂಡ ಆದಿ ಕಾಲೊಡ್ದು ಮಾತ ಊರುಲೆಡ್ ಮೋಶೆನ ಗ್ರಂಥೊಲೆನ್ ಬೋಧನೆ ಮಲ್ಪುನಾಕುಲು ಉಲ್ಲೆರ್; ಅವು ಪ್ರತಿ ಸಬ್ಬತ್‌ದಿನೊಟು ಸಭಾಮಂದಿರೊಲೆಡ್ ಪಾರಾಯಣ ಆಪುಂಡತ್ತಾ,” ಅಂದ್‌ದ್ ಪಂಡೆ.

ಪಿದಯಿದ ಜನೊಕುಲುಲೆಗ್ ಕಾಕಜಿ

²² ಅಪಗ ಅಪೊಸ್ತಲೆರ್ ಸಭೆತ ಹಿರಿಯೆರ್ ಮಾತ ಸಭೆತ ಒಪ್ಪಿಗೆಡ್ ತನ್ಕುಲೆಡ್ ಕೆಲೆವೆರೆನ್ ಅಜತ್‌ದ್ ಪೌಲು ಬಾರ್ನಬಡೊಪ್ಪ ಅಂತಿಯೋಕ್ಯಗ್ ಕಡಪುಡುನ ಎಡ್ಡೆ ಅಂದ್‌ದ್ ತೀರ್ಮಾನ ಮಲ್ತೆರ್. ಆ ಕಾರಣೊಡ್ದು ಸಹೋದ್ರೆರೆಡ್ ಮುಖ್ಯ ಆದಿತ್ತಿನ ಬಾರ್ಸಬೆ ಪನ್ಪಿನ ಯೂದನ್ಲಾ ಸೀಲನ್ಲಾ ಅಜತ್‌ದ್ ಅಕ್ಲೆನ ಒಟ್ಟುಗು ಕಡಪುಡ್ದು ಕೊರಿಯೆರ್.

²³ ಮೊಕ್ಲೆ ಕೈಟ್ ಅಕುಲು ಬರೆದ್ ಕಡಪುಡಿನಿ ದಾನೆಂದ್ಂಡ, ಸಹೋದ್ರೆರ್ ಆದುಪ್ಪುನ ಅಪೊಸ್ತಲೆರ್‌ಲಾ ಹಿರಿಯೆರ್‌ಲಾ ಅಂತಿಯೋಕ್ಯ, ಸುರಿಯ, ಕಿಲಿಕ್ಯಡುಪ್ಪುನ ಪಿದಯಿದ ಜನೊಕುಲೆಡ್ದ್ ಸಹೋದ್ರೆರ್ ಆಯಿನಾಕುಲೆಗ್ ಮಲ್ಪುನ ವಂದನೆಲು.

²⁴ ನಮ ಸಮುದಾಯೊಡ್ದು ಪೋತಿನ ಕೆಲೆವೆರ್ ಎಂಕ್ಲೆಡ್ದ್ ದಾಲಾ ಅಪ್ಪಣೆ ದೆತ್ತೊನಂದೆ ನಿಕುಲು ಸುನ್ನತಿ ಮಲ್ಪೊಡು ಬೊಕ್ಕ ನ್ಯಾಯಕಟ್ಟ್‌ನ್ ಕೈಕೊನೊಡು ಪಂಡ್‌ದ್ ಅಕ್ಲೆ ಪಾತೆರೊಡ್ದು ನಿಕ್ಲೆಡ ಗಲಿಬಿಲಿ ಪುಟ್ಟಾದ್ ನಿಕ್ಲೆ ಉಡಲ್‌ನ್ ತಳಮಳ ಮಲ್ತೆರ್ ಅಂದ್‌ದ್ ಎಂಕ್ಲೆಗ್ ತೆರಿಂಡ್.

^25-26 ನಮ ಕೆಲೆವೆರೆನ್ ಅಜತ್‌ದ್ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಗಾದ್ ಜೀವದ ಹಂಗ್‌ನ್ ಬುಡ್ತಿನ ನಮ ಪ್ರೀತಿದ ಬಾರ್ನಬೆ ಪೌಲೆರೆನ ಒಟ್ಟುಗು ನಿಕ್ಲೆ ಕೈತಲ್‌ ಕಡಪುಡುನವು ಎಡ್ಡೆ ಅಂದ್‌ದ್ ಎಂಕುಲು ಮಾತ ಒಂಜೇ ಮನಸಾದ್ ತೀರ್ಮಾನ ಮಲ್ತ.

²⁷ ಅಂಚಾಯಿನೆಡ್ದ್ ಯೂದನ್ಲಾ ಸೀಲನ್ಲಾ ಕಡಪುಡ್ದು ಕೊರ್ತ. ಅಕುಲು ಈ ವಿಚಾರೊಲೆನ್ ಬಾಯಿ ಪಾತೆರೊಡು ನಿಕ್ಲೆಗ್ ತೆರಿಪಾವೆರ್.

^28-29 ಮೂರ್ತಿಲೆಗ್ ಅರ್ಪಣೆ ಮಲ್ತ್‌ದಿನ ನೈವೇದ್ಯೊನು ತಿನೊಡ್ಚಿ, ಲೈಂಗಿಕ ಪಾಪೊಲೆನ್ ಮಲ್ಪೊಡ್ಚಿ, ಕಂಟೆಲ್ ಪೀಂಟಾದ್ ಕೆರ್ತಿನ ಪ್ರಾಣಿಲೆನ ನೆತ್ತೆರ್‌‌ನ್ಲಾ ಮಾಸೊನ್ಲಾ ತಿರಸ್ಕಾರ ಮಲ್ಪುನವು ಅಗತ್ಯದವು ಆದುಂಡು. ಉಂದೆಡ್ದ್ ಹೆಚ್ಚ್ ದುನ್ನೊನು ನಿಕ್ಲೆನ ಮಿತ್ತ್ ಪಾಡಿಯೆರೆ ಬಲ್ಲಿ ಅಂದ್‌ದ್ ಪರಿಶುದ್ಧಾತ್ಮಗ್ಲಾ ನಂಕ್‌ಲಾ ಎಡ್ಡೆ ಅಂದ್‌ದ್ ತೋಜ್ಂಡ್. ನಿಕುಲು ಎಚ್ಚರಿಕೆ ಆದಿತ್ತ್‌ದ್ ಉಂದೆತ್ತ ಕೈತಲ್‌ ಪೋಯಿಜರ್ಡ ನಿಕ್ಲೆಗ್ ಎಡ್ಡೆ ಆವು, ಎಡ್ಡೆ ಆವಡ್.

³⁰ ಅಪಗ ಅಕುಲು ಅಪ್ಪಣೆ ದೆತ್ತೊಂದು ಯೆರೂಸಲೇಮುಡ್ದು ಪಿದಾಡ್ದ್ ಅಂತಿಯೋಕ್ಯಗ್ ಪೋಯೆರ್. ಅಲ್ಪದ ಭಕ್ತಿಸಭೆನ್ ಒಟ್ಟು ಕೂಡಾದ್ ಆ ಕಾಕಜಿನ್ ಕೊರಿಯೆರ್.

³¹ ಅಕುಲು ಅವೆನ್ ಓದುದು ಆಧಾರಣೆದ ಪಾತೆರೊನು ಕೇಂಡ್ದ್ ಸಂತೋಷ ಮಲ್ತೆರ್.

³² ಯೂದೆಲಾ ಸೀಲೆಲಾ ಮೊಕುಲೇ ಪ್ರವಾದಿಲಾದಿತ್ತಿನೆಡ್ದ್ ಸಹೋದ್ರೆರೆನ್ ದಿಂಜ ಪಾತೆರೊಡ್ದು ಉಮೇದ್ ಕೊರ್ದು ಬಲ ಪಡೆಪಾಯೆರ್.

³³ ಅಲ್ಪ ಒಂತೆ ಸಮಯ ಕರಿಬೊಕ್ಕ ಸಮಾಧಾನದ ಆಶೀರ್ವಾದ ಪಡೆಯೊಂದು ಸಹೋದ್ರೆರೆಡ್ದ್ ಅಪ್ಪಣೆ ದೆತ್ತೊಂದು ಅಕ್ಲೆನ್ ಕಡಪುಡ್ದಿನಾಕುಲೆನ ಕೈತಲ್‌ ಯೆರೂಸಲೇಮುಗು ಪಿರ ಪೋಯೆರ್.

³⁴ ಆಂಡ ಸೀಲಗ್ ಅವುಲು ಉಪ್ಪುನವು ಸಮ ತೋಜುಂಡು.

³⁵ ಆಂಡ ಪೌಲೆಲಾ ಬಾರ್ನಬೆಲಾ ಅಂತಿಯೋಕ್ಯಡೇ ಉಂತುದು ಬೇತೆ ಕೆಲೆವೆರೊಟ್ಟುಗು ಕರ್ತವ ಪಾತೆರೊನು ಬೋಧನೆ ಮಲ್ತೊಂದು ಸುವಾರ್ತೆ ಸಾರೊಂದಿತ್ತೆರ್.

ಸುವಾರ್ತೆ ಸಾರಿಯೆರೆ ಪೌಲು ಮಲ್ತಿನ ರಡ್ಡನೆ ಪ್ರಯಾಣ

³⁶ ಒಂತೆ ದಿನೊಡ್ದು ಬೊಕ್ಕ ಪೌಲು ಬಾರ್ನಬಗ್, “ನಮ ಕರ್ತವ ಪಾತೆರೊನು ಸಾರಿದಿನ ಮಾತ ಊರುಲೆಗ್ ಕುಡೊರ ಪಿರ ಪೋದು ಅಲ್ಪ ಉಪ್ಪುನ ಸಹೋದ್ರೆರ್ ಎಂಚ ಉಲ್ಲೆರ್ ತೂದು ಬರ್ಕ,” ಪಂಡ್ದ್ ಪಂಡೆ.

³⁷ ಐಕ್ ಬಾರ್ನಬೆ ಮಾರ್ಕೆ ಪನ್ಪಿ ಯೋಹಾನನ್ ಒಟ್ಟುಗು ಲೆತ್ತೊಂದು ಪೋವೊಡು ಪಂಡ್ದಿತ್ತೆ.

³⁸ ಆಂಡ ಪೌಲು ನಮ ಒಟ್ಟುಗು ಕೆಲಸೊಗು ಬರಂದೆ ಪಂಫುಲ್ಯೊಡು ನಮನ್ ಬುಡ್ತಿನಾಯನ್ ಲೆತ್ತೊಂದು ಪೋಪಿನವು ಸಮ ಅತ್ತ್ ಅಂದ್‌ದ್ ಎನ್ನಿಯೆ.

³⁹ ನೆತ್ತ ಸಂಗತಿಡ್ ಮಲ್ಲ ತರ್ಕ ಮಲ್ತ್‌ದ್ ಪೌಲುಲಾ ಬಾರ್ನಬೆಲಾ ಬೇತೆ ಬೇತೆ ಆಯೆರ್, ಬಾರ್ನಬೆ ಮಾರ್ಕನ್ ಲೆತ್ತೊಂದು ಕಡಲ್ದ ಸಾದಿಯಾದ್ ಕುಪ್ರದ್ವೀಪೊಗು ಪೋಯೆ.

⁴⁰ ಪೌಲು ಸೀಲನ್ ಅಜತ್‌ದ್ ದೆತ್ತೊಂಡೆ; ಸಹೋದ್ರೆರ್ ಆಯನ್ ದೇವೆರೆ ದಯೊಕು ಒಚ್ಚಿದ್ ಕಡಪುಡ್ದು ಕೊರಿಯೆರ್.

⁴¹ ಬೊಕ್ಕ ಅಲ್ಪಡ್ದ್ ಸುರಿಯ ಕಿಲಿಕ್ಯ ದೇಶೊಲೆಗ್ ಸಂಚಾರ ಮಲ್ತೊಂದು ಸಭೆಕ್ಲೆನ್ ದೃಢ ಮಲ್ತೆರ್.