ಅಪೊ.ಕ್ರಿ 13 - ಪೊಸ ಒಡಂಬಡಿಕೆ

ಸುವಾರ್ತೆ ಸಾರಿಯೆರೆ ಪೌಲು ಮಲ್ತಿನ ಸುರುತ್ತ ಪ್ರಯಾಣ

¹ ಅಂತಿಯೋಕ್ಯದ ಸಭೆಟ್ ಕೆಲವು ಪ್ರವಾದಿಲುಲಾ ಬೋಧಕೆರ್‌ಲಾ ಇತ್ತೆರ್; ಅಕುಲು ಏರೇರ್ ಪಂಡ ಬಾರ್ನಬೆ, ನೀಗರ್ ಪನ್ಪಿ ಸಿಮೆಯೋನು, ಕುರೇನ್ಯದ ಲೂಕ್ಯೆ, ಉಪರಾಜೆ ಆಯಿ ಹೆರೋದನ ತಾಂಕ್‌ದಿನ ಮೆಗ್ಯೆ ಆಯಿ ಮೆನಹೇನೆ, ಸೌಲು ಮೊಕುಲೇ.

² ಮೊಕುಲು ಕರ್ತವಗ್ ಆರಾಧನೆ ಮಲ್ತ್‌ದ್ ಉಪವಾಸ ಮಲ್ತೊಂದುಪ್ಪುನಗ ಪರಿಶುದ್ಧಾತ್ಮೆ ಅಕ್ಲೆಗ್ ಪಂಡಿನಿ, “ಯಾನ್ ವಿಶೇಷ ಆದಿತ್ತಿನ ಕಾರ್ಯೊಗು ಬಾರ್ನಬನ್ಲಾ ಸೌಲುನ್ಲಾ ಅಜತ್ ದೆತ್ತೊಂದೆ ಆ ಕೆಲಸೊಗಾದ್ ಅಕ್ಲೆನ್ ಬೇತೆ ಮಲ್ಪುಲೆ.”

³ ಐಡ್ದಾವರ ಸಭೆತಾಕುಲು ಉಪವಾಸ ಇತ್ತ್‌ದ್ ಪ್ರಾರ್ಥನೆ ಮಲ್ತ್‌ದ್ ಇರ್ವೆರೆನ ಮಿತ್ತ್‌ಲಾ ಕೈ ದೀದ್ ಅಕ್ಲೆನ್ ಕಡಪುಡ್ದು ಕೊರಿಯೆರ್.

ಕುಪ್ರ ದ್ವೀಪದ ಎಲುಮೆ ಮಂತ್ರವಾದಿ

⁴ ಇಂಚ ಅಕುಲು ಪರಿಶುದ್ಧಾತ್ಮಡ್ದ್ ಕಡಪುಡ್ದಿನಾಕುಲಾದ್ ಸೆಲೂಕ್ಯಗ್ ಬತ್ತೆರ್; ಅಲ್ತ್‌ಡ್ದ್ ಕಡಲ ಸಾದಿ ಆದ್ ಕುಪ್ರದ್ವೀಪೊಗು ಪೋಯೆರ್.

⁵ ಸಲಾಮಿಸ್ ಪನ್ಪಿ ಜಾಗ್‌ಗ್ ಬತ್ತಿನಪಗ ಯೆಹೂದ್ಯೆರೆನ ಸಭಾಮಂದಿರೊಲೆಡ್ ದೇವೆರೆ ಪಾತೆರೊನು ಸಾರಿಯೆರ್. ಮಾರ್ಕೆ ಪನ್ಪಿ ಯೋಹಾನೆ ಸಹಾಯಕೆ ಆದ್ ಅಕ್ಲೆನ ಒಟ್ಟುಗು ಇತ್ತೆ.

⁶ ಅಕುಲು ಆ ದ್ವೀಪೊಲೆಡ್ ಪ್ರಯಾಣ ಮಲ್ತ್‌ದ್ ಪಾಫೊಸ್ ಪನ್ಪಿ ಊರು ಮುಟ್ಟಿಯೆರ್, ಅಲ್ಪ ಒರಿ ಸುಳ್ಳು ಪ್ರವಾದಿಲಾ ಮಂತ್ರವಾದಿಲಾ ಆದಿತ್ತಿನ ಬಾರ್‌ಯೇಸು ಪನ್ಪಿ ಯೆಹೂದ್ಯನ್ ತೂಯೆರ್.

⁷ ಬುದ್ಧಿವಂತೆ ಆದಿತ್ತಿ ಸೆರ್ಗ್ಯ ಪೌಲು ಪನ್ಪಿನ ರಾಜ್ಯಪಾಲನ ಕೈತಲ್‌ ಏಪಲಾ ಇತ್ತೆ. ಆಯೆ ದೇವೆರೆ ಪಾತೆರೊನು ಕೇನಿಯೆರೆ ಬಾರ್ನಬೆ ಸೌಲೆರೆನ್ ಲೆತ್ತ್‌ದಿತ್ತೆ.

⁸ ಆಂಡ ಮಂತ್ರವಾದಿ ಆದಿತ್ತಿನ ಎಲುಮೆ, ಅಕ್ಲೆನ್ ವಿರೋಧ ಮಲ್ತೆ. ರಾಜ್ಯಪಾಲಗ್ ಯೇಸುನು ನಂಬಂದಿಲೆಕ್ಕ ಅಡ್ಡಿ ಮಲ್ಪೆರೆಲಾ ಪ್ರಯತ್ನ ಮಲ್ತೆ. ಎಲುಮೆ ಪನ್ಪಿ ಪುದರ್‌ಗ್ ಮಂತ್ರವಾದಿ ಪಂಡ್ದೆ ಅರ್ಥ.

⁹ ಅಪಗ ಸೌಲು ಇನ್ಪಿ ಪೌಲು ಪರಿಶುದ್ಧಾತ್ಮೆ ದಿಂಜಿದಿನಾಯೆ ಆದ್ ದೃಷ್ಟಿ ದೀದ್ ಆಯೆನೇ ತೂಯೆ,

¹⁰ “ಮಾತ ಮೋಸೊಡು ಮಾತ ವಂಚನೆಡ್ ದಿಂಜಿದಿನಾಯ, ಸೈತಾನನ ಮಗ, ಮಾತ ನೀತಿಗ್ ವಿರೋಧ ಇತ್ತಿನಾಯ ಈ ಕರ್ತವನ ಸರಿಯಾಯಿನ ಸಾದಿನ್ ಮೊಡಂಕ್ ಮುಲ್ಪುನೆನ್ ಬುಡ್ಪುಜನಾ?

¹¹ ಇಂದಾ, ಕರ್ತವೆ ನಿನ ವಿರೋಧಾದ್ ಕೈ ದೆರ್ತ್ತ್‌ದೆ; ಈ ಕುರುಡೆ ಆದ್ ಒಂತೆ ಸಮಯ ಸೂರ್ಯನ ಬೊಲ್ಪುನು ತೂವಂದೆ ಉಪ್ಪುವ,” ಅಂದ್‌ದ್ ಪಂಡೆ. ಆ ಗಳಿಗೆಡೇ ಆಯಗ್ ಕಣ್ಣ್ ಕತ್ತಲೆ ಆಂಡ್; ಕೈ ಪತ್ತುನಾಕುಲು ಏರಾಂಡಲಾ ತಿಕ್ಕುವೆರಾ ಅಂದ್‌ದ್ ನಾಡೊಂದು ತಿರ್ಗಿಯೆ.

¹² ರಾಜ್ಯಪಾಲೆ ಈ ಸಂಗತಿನ್ ತೂದು ಕರ್ತವ ಬೋಧನೆಡ್ ಅಚ್ಚಿರ ಪಡೆದ್ ನಂಬುನಾಯೆ ಆಯೆ.

ಪೌಲು ಪಿಸಿದ್ಯದ ಅಂತಿಯೋಕ್ಯಡ್

¹³ ಐಡ್ದ್ ಬೊಕ್ಕ ಪೌಲುಲಾ ಆಯನ ಒಟ್ಟುಗು ಇತ್ತಿನಾಕುಲುಲಾ ಪಾಫೊಸ್ ಪನ್ಪಿ ಊರುನು ಬುಡ್ದು ಕಡಲ್ದ ಸಾದಿಡ್‌ ಪಂಫುಲ್ಯ ದೇಶೊಗು ಸೇರ್ದಿನ ಪೆರ್ಗಗ್ ಬತ್ತೆರ್; ಯೋಹಾನೆ ಅಕ್ಲೆನ್ ಬುಡ್ದು ಪಿರ ಯೆರೂಸಲೇಮುಗು ಪೋಯೆ.

¹⁴ ಐಡ್ದ್ ಬೊಕ್ಕ ಅಕುಲು ಪೆರ್ಗಡ್ದ್ ಪ್ರಯಾಣ ಮಲ್ತ್‌ದ್ ಪಿಸಿದ್ಯ ದೇಶೊಗು ಸೇರ್ದಿನ ಅಂತಿಯೋಕ್ಯ ಪೇಂಟೆಗ್ ಬತ್ತೆರ್. ಸಬ್ಬತ್‌ದಿನೊಟು ಅಕುಲು ಸಭಾಮಂದಿರೊಲೆಗ್ ಪೋದು ಕುಲ್ಲೊಂಡೆರ್.

¹⁵ ಮೋಶೆನ ನ್ಯಾಯಕಟ್ಟ್‌ಡ್ ಬೊಕ್ಕ ಪ್ರವಾದಿಲೆನ ಗ್ರಂಥದ ಪಾರಾಯಣ ಓದಿ ಬೊಕ್ಕ ಸಭಾಮಂದಿರದ ನಾಯಕೆರ್, “ಸಹೋದರೆರೆ ಮೂಲು ಇತ್ತಿನ ಜನೊಕುಲೆಗ್ ಸಹಾಯ ಆಪಿನಂಚ ಉಮೇದದ ಪಾತೆರ ನಿಕ್ಲೆಡಿತ್ತ್‌ಂಡ ಪನ್ಲೆ,” ಅಂದ್‌ದ್ ಅಕ್ಲೆಗ್ ಪಂಡ್ದ್ ಕಡಪುಡಿಯೆರ್.

¹⁶ ಅಪಗ ಪೌಲು ಲಕ್ಕ್‌ದ್ ಕೈ ತೋಜಾಪಾದ್ ಇಂಚ ಪಂಡೆ, “ಎನ ಇಸ್ರಾಯೇಲ್‌ದ ಸಹೋದರೆರೆ, ಬೊಕ್ಕ ನಿಜ ದೇವೆರೆಗ್ ಪೋಡಿಯು ಪಿದಯಿದ ಜನೊಕುಲೇ, ಕೇನ್ಲೆ.

¹⁷ ಇಸ್ರಾಯೇಲ್ಯೆರೆನ ದೇವೆರ್ ನಮ ಪಿತೃಲೆನ್ ಅಜತ್ ದೆತ್ತೊಂದು ನಮ ಜನೊಕುಲು ಐಗುಪ್ತ ದೇಶೊಡು ಪರದೇಶಿಲು ಆದುಪ್ಪುನಗ ತನ ಜನೊಕುಲೆನ್ ವೃದ್ಧಿಗ್ ಕನತೆ. ದೇವೆರ್ ತನ ಬಲಶಕ್ತಿಡ್ ಅಕ್ಲೆನ್ ಆ ದೇಶೊಡ್ದು ಪಿದಯಿ ಕನತೆ.

¹⁸ ಮರುಭೂಮಿಡ್ ನಲ್ಪ ವರ್ಸ ಮುಟ್ಟ ಕಾಡ್‌ಡ್ ಅಕ್ಲೆನ ಪಿರಿಪಿರಿನ್ ಸಹಿಸೊಂಡೆ.

¹⁹ ದೇವೆರ್ ಕಾನಾನ್ ದೇಶೊಡಿತ್ತಿನ ಪಿದಯಿದ ಜನೊಕುಲೆನ ಏಳ್ ರಾಜ್ಯೊಲೆನ್ ನಾಶ ಮಲ್ತ್‌ದ್ ತನ ಜನೊಕುಲೆಗ್ ಹಕ್ಕಾದ್ ಕೊರಿಯೆ.

²⁰ ಈತಾನಗ ಸುಮಾರ್ ನಾನ್ನೂತೈವ ವರ್ಸ ದಾಂಟ್ಂಡ್. “ಉಂದಾಯಿನೆಡ್ದ್ ಬೊಕ್ಕ ಪ್ರವಾದಿ ಆದುಪ್ಪು ಸಮುವೇಲ್‌ನ ಕಾಲದ ಮುಟ್ಟ ನ್ಯಾಯಾಧಿಪತಿಲೆನ್ ಕೊರಿಯೆ.

²¹ ಐಡ್ದ್ ಬೊಕ್ಕ ಅಕುಲು ಎಂಕ್ಲೆಗ್ ಅರಸು ಬೋಡು ಅಂದ್‌ದ್ ಕೇನೊನ್ನಗ ದೇವೆರ್ ಅಕ್ಲೆಗ್ ಬೆನ್ಯಾಮೀನ್ ಕುಲತ ಕೀಷುನ ಮಗೆ ಆದುಪ್ಪು ಸೌಲುನು ಕೊರಿಯೆ. ಆಯೆ ನಲ್ಪ ವರ್ಸ ಆಳಿಯೆ.

²² ಐಡ್ದ್ ಬೊಕ್ಕ ದೇವೆರ್ ಸೌಲುನು ದೆತ್ತ್ ಪಾಡ್ದ್ ದಾವೀದನ್ ಅಕ್ಲೆ ಮಿತ್ತ್ ಅರಸು ಆದ್ ಮಲ್ತೆ. ‘ಇಸ್ಸಾಯನ ಮಗೆ ದಾವೀದೆ ಎಂಕ್ ತಿಕ್ಕಿಯೆ, ಎನ ಮೆಚ್ಚಿಕೆದಾಯೆ ಆದುಲ್ಲೆ. ಆಯೆ ಎನ ಮನಸ್‌ಗ್ ಒಪ್ಪಿಯುನಾಯೆ, ಎನ ಆಸೆಲೆನ್ ತೀರಿಸಾವುನಾಯೆ,’ ಅಂದ್‌ದ್ ಆಯನ ಸಂಗತಿಡ್ ಸಾಕ್ಷಿ ಪಂಡೆ.

²³ ಆಯನ ಸಂತಾನೊಡ್ದು ದೇವೆರ್ ತನ ಒಡಂಬಡಿಕೆ ಮಲ್ತಿ ಲೆಕ್ಕನೇ ಇಸ್ರಾಯೇಲ್ಯೆರೆಗ್ ಯೇಸು ಪನ್ಪಿ ಒರಿ ರಕ್ಷಕನ್ ಕೊರಿಯೆ.

²⁴ ಯೇಸು ಬರ್ಪಿನೆಕ್ಕ್ ದುಂಬೇ ಯೋಹಾನೆ ಇಸ್ರಾಯೇಲ್ ಜನೊಕುಲೆಗ್ ಮಾತೆರೆಗ್ಲಾ ನಿಕ್ಲೆನ ಪಾಪೊಗಾದ್ ಪಶ್ಚಾತಾಪ ಪಡೆದ್ ದೇವೆರೆ ಕಡೆಕ್ಕ್ ತಿರ್ಗ್‌ದ್ ನೀರ್‌ದ ದೀಕ್ಷಾಸ್ನಾನ ಮಲ್ತೊನೊಡು ಅಂದ್‌ದ್ ಸಾರಿಯೆ.

²⁵ ಯೋಹಾನೆ ತನ ಸೇವೆನ್ ತೀರಿಸಾನಗ ಜನೊಕುಲೆಗ್, ‘ನಿಕುಲು ಎನನ್ ಏರ್ ಅಂದ್‌ದ್ ಎನ್ನುವರ್? ಯಾನ್ ಆಯೆ ಅತ್ತ್, ಆಂಡ ಇಂದಾ, ಎನ ಬೆರಿಯೆ ಒರಿ ಬರ್ಪೆ, ಆಯ ಕಾರ್‌ದ ಜೋಡುದ ಪಟ್ಟಿನ್ ಗಿರ್ಪೆರೆಗ್ಲಾ ಯಾನ್ ತಕ್ಕದಾಯೆ ಅತ್ತ್,’ ಅಂದ್‌ದ್ ಪಂಡೆ.

²⁶ “ಸಹೋದ್ರೆರೇ, ಅಬ್ರಹಾಮುನ ಸಂತಾನದಾಕುಲೇ, ಬೊಕ್ಕ ನಿಕ್ಲೆಡ್ ದೇವೆರೆಗ್ ಪೋಡಿಯುನಾಕುಲೇ ಈ ರಕ್ಷಣೆದ ಪಾತೆರೊನು ಕಡಪುಡ್ದಿನಿ ನಂಕಾದೇ.

²⁷ ಯೆರೂಸಲೇಮುಡು ಉಪ್ಪು ಯೆಹೂದ್ಯೆರ್‌ಲಾ ಅಕ್ಲೆನ ಅಧಿಕಾರಿನಾಕುಲುಲಾ ಯೇಸು ರಕ್ಷಕೆ ಅಂದ್‌ದ್ ಅರ್ಥ ಮಲ್ತಿಜೆರ್. ಪ್ರತೀ ಸಬ್ಬತ್‌ದಿನೊಟು ಪಾರಾಯಣ ಆಪಿನ ಪ್ರವಾದಿಲೆನ ಪಾತೆರೊಲೆನ್ ಅರ್ಥ ಮಲ್ತೊನಂದೆ ಆಯನ್ ಅಪರಾಧಿ ಅಂದ್‌ದ್ ತೀರ್ಪು ಮಲ್ತೆರ್. ಅಂಚ ಮಲ್ತಿನೆಡ್ದ್ ಆ ಪ್ರವಾದಿಲು ಪಂತಿನ ಪಾತೆರೊಲು ಕೊಡಿಮುಟ್ಟುಂಡು.

²⁸ ಮರಣದ ದಂಡನೆಗ್ ಕಾರಣ ದಾಲಾ ತಿಕ್ಕಿಜಿಡಲಾ ಆಯನ್ ಕೆರ್ಪಾವೊಡು ಅಂದ್‌ದ್ ಪಿಲಾತನ್ ಕೇನೊಂಡೆರ್.

²⁹ ಆಯನ ಸಂಗತಿಡ್ ಶಾಸ್ತ್ರೊಡು ಬರೆದುಪ್ಪುನೆನ್ ಮಾತ ಮಲ್ತಿ ಬೊಕ್ಕ ಆಯನ್ ಮರತ ಕಂಬೊಡ್ದು ಜಪುಡಾದ್ ಸಮಾಧಿಡ್ ದೀಯೆರ್.

³⁰ ಆಂಡ ದೇವೆರ್ ಆಯನ್ ಸೈತಿನಾಕುಲೆಡ್ದ್ ಲಕ್ಕಾಯೆ,

³¹ ಬೊಕ್ಕ ಆಯೆ ಗಲಿಲಾಯೊಡ್ದು ಯೆರೂಸಲೇಮುಗು ಯೇಸುನ ಒಟ್ಟುಗು ಇತ್ತಿನಾಕುಲೆಗ್ ಮಸ್ತ್ ದಿನ ಮುಟ್ಟ ತೋಜಾವೊಂಡೆ. ಅಕುಲು ಇತ್ತೆ ಜನೊಕುಲೆ ದುಂಬು ಆಯಗ್ ಸಾಕ್ಷಿ ಆದುಲ್ಲೆರ್.

³² ಈ ಸುವಾರ್ತೆನ್ ಎಂಕುಲು ನಿಕ್ಲೆಗ್ ಸಾರಿಯುನಾಕುಲಾದುಲ್ಲ. ದೇವೆರ್ ನಮ ಪಿತೃಲೆಗ್ ಮಲ್ತಿನ ಒಡಂಬಡಿಕೆನ್ ನಂಕಾದ್ ಪೂರ ಮಲ್ತ್‌ದೆರ್.

³³ ದೇವೆರ್ ಯೇಸುನು ಲಕ್ಕಾಯಿನೆಡ್ದಾವರ, ‘ಎಂಕ್ ಈಯೇ ಮಗೆ; ಇನಿ ಯಾನೇ ನಿನನ್ ಪಡೆತೆ,’ ಅಂದ್‌ದ್ ರಡ್ಡನೆ ಕೀರ್ತನೆಲೆಡ್ ಬರೆದುಪ್ಪುನ ಪಾತೆರ ಪೂರ್ತಿ ಆಂಡ್.

³⁴ “ಉಂದು ಅತ್ತಂದೆ ದೇವೆರ್ ಯೇಸುನು ಸೈತಿನಾಕುಲೆಡ್ದ್ ಲಕ್ಕಾಯಿನೆಡ್ದ್ ಆಯೆ ನನ ಏಪಲಾ ಕುರಿಯುನ ಸ್ಥಿತಿಕ್ಕ್ ಸೇರುನಾಯೆ ಅತ್ತ್ ಪನ್ಪಿನ ಸಂಗತಿಡ್ ದೇವೆರ್ ಪನ್ತಿನಿ ದಾನೆಂದ್ಂಡ, ‘ದಾವೀದಗ್ ನಿಜಾದ್ ವಾಗ್ದಾನ ಮಲ್ತ್‌ದಿನ ಪರಿಶುದ್ಧ ಬೊಕ್ಕ ದಯತ ವರೊಲೆನ್ ನಿಕ್ಲೆಗ್ ಕೊರ್ಪೆ. ಅವು ನಂಬಿಕೆಗ್ ತಕ್ಕದವೇ.’

³⁵ ಐಕ್ ಸರಿಯಾದ್ ಆಯೆ, ‘ಈ ನಿನ ಪರಿಶುದ್ಧದಾಯನ ಶರೀರೊನು ಕುರಿಯೆರೆ ಬುಡ್ಪುಜಿ,’ ಅಂದ್‌ದ್ ಬೊಕ್ಕೊಂಜಿ ಕ್ರೀರ್ತನೆಡ್ ಪನ್ತೆ.

³⁶ “ದಾವೀದೆ ಆಂಡಲಾ, ದೇವೆರೆ ಚಿತ್ತೊಗು ಸರಿಯಾದ್ ತನ ಸ್ವಂತ ಜನೊಕುಲೆ ಒಟ್ಟುಗು ಸೇವೆ ಮಲ್ತ್‌ದ್ ನಿದ್ರೆ ಪೋದು ತನ ಪಿತೃಲೆ ಬರಿಟ್ಟ್ ಕೌಂತುದು ಕುರಿಯುನ ಅವಸ್ಥೆನ್ ಪಡೆಯೆ.

³⁷ ಆಂಡ ದೇವೆರೇ ಲಕ್ಕಾಯಿನಾ ಯೇಸುನ ಶರೀರ ಕುರಿಯುನ ಅವಸ್ಥೆನ್ ತೂತುಜಿ.

^38-39 ಅಂಚಾಯಿನೆಡ್ದ್ ಸಹೋದ್ರೆರೇ, ಆಯಡ್ದ್ ಪಾಪೊಲೆ ಪರಿಹಾರ ತಿಕ್ಕುಂಡು ಪನ್ಪಿನವು ನಿಕ್ಲೆಗ್ ಸಾರಿಯೊಂದುಲ್ಲ ಅಂದ್‌ದ್ ತೆರಿದುಪ್ಪಡ್. ಮೋಶೆನ ನ್ಯಾಯಕಟ್ಟ್‌ದ ಮುಖಾಂತ್ರ ನಿಕ್ಲೆಗ್ ಬುಡುಗಡೆ ಆದ್ ನೀತಿವಂತೆರ್ ಅಂದ್‌ದ್ ತೀರ್ಪು ಆಪುಜಿ. ಆಂಡ ಯೇಸುನು ನಂಬುನ ಮಾತೆರ್ಲಾ ಮಾತೆಡ್ದ್ ಬುಡುಗಡೆ ಹೊಂದುದು ನೀತಿವಂತೆರ್ ಅಂದ್‌ದ್ ತೀರ್ಪು ಆಪುಂಡು.

⁴⁰ ಇಂಚಾದ್ ಪ್ರವಾದಿಲೆ ಗ್ರಂಥೊಡು ಪಂಡಿನವು ನಿಕ್ಲೆಗ್ ಬರಂದಿಲೆಕ್ಕ ತೂವೊನ್ಲೆ. ಅವು ದಾನೆಂದ್ಂಡ,

⁴¹ ‘ಓ ತಿರಸ್ಕಾರ ಮಲ್ಪುನಾಕುಲೆ, ಸೋದ್ಯ ಆದ್, ನಾಶಾದ್ ಪೋವರ್. ನಿಕ್ಲೆ ದಿನೊಟು ಯಾನ್ ಒಂಜಿ ಕಾರ್ಯೊನು ಮಲ್ಪುವೆ; ಆ ಕಾರ್ಯೊನು ಒರಿ ನಿಕ್ಲೆಗ್ ತೆರಿಪಾಂಡಲಾ ನಿಕುಲು ಅವೆನ್ ನಂಬಂದೆ ಪೋವರ್.’”

⁴² ಪೌಲುಲಾ ಬಾರ್ನಬೆಲಾ ಸಭಾಮಂದಿರೊನು ಬುಡ್ದು ಪೋವೊಂದುಪ್ಪುನಗ ಜನೊಕುಲು ಈ ಪಾತೆರೊಲೆನ್ ಬರ್ಪಿ ಸಬ್ಬತ್‌ದಿನೊಟುಲಾ ಎಂಕ್ಲೆಗ್ ಪನೊಡು ಅಂದ್‌ದ್ ನಟ್ಟೊಂಡೆರ್.

⁴³ ಸಭಾಕೂಟ ಮುಗಿ ಬೊಕ್ಕ ಮಸ್ತ್ ಯೆಹೂದ್ಯೆರ್‌ಲಾ ಯೆಹೂದ್ಯ ಮತ ಸೇರ್ದಿನಾಕುಲೆಡ್ಲಾ ಕೆಲೆವೆರ್ ಪೌಲು ಬಾರ್ನಬನ ಒಟ್ಟುಗು ಪೋಯೆರ್. ಮೊಕುಲು ಅಕ್ಲೆನ ಒಟ್ಟುಗು ಪಾತೆರ್‌ದ್ ದೇವೆರೆನ ದಯೊಟು ನಿಲೆ ಆದುಪ್ಪೊಡು ಅಂದ್‌ದ್ ಅಕ್ಲೆಗ್ ಉಮೇದ್ ಕೊರಿಯೆರ್.

⁴⁴ ಬರ್ಪಿ ಸಬ್ಬತ್‌ಡ್ ಹೆಚ್ಚ್ ಕಮ್ಮಿ ಇಡೀ ಊರು ದೇವೆರೆ ಪಾತೆರೊನು ಕೇನಿಯೆರೆ ಸೇರ್ದ್ ಬತ್ತೆರ್.

⁴⁵ ಆಂಡ ಜನೊಕುಲು ಗುಂಪಾದ್ ಬರ್ಪಿನೆನ್ ತೂದು ಯೆಹೂದ್ಯೆರ್ ನಂಜಿಡ್ ಪೌಲು ಪಂಡಿನ ಪಾತೆರೊಗು ಎದುರು ಪಾತೆರೊಂದು ದೂಷಣೆ ಮಲ್ತೊಂದಿತ್ತೆರ್.

⁴⁶ ಅಪಗ ಪೌಲುಲಾ ಬಾರ್ನಬೆಲಾ ಧೈರ್ಯೊಡು ಪಾತೆರ್‌ದ್, “ದೇವೆರೆ ಪಾತೆರೊನು ದುಂಬತ್ತ ನಿಕ್ಲೆಗೇ ಪನ್ಪಿನ ಅಗತ್ಯ ಇತ್ತ್ಂಡ್. ಆಂಡ ನಿಕುಲು ಅವೆನ್ ತಿರಸ್ಕಾರ ಮಲ್ತ್‌ದ್ ನಿಕುಲು ನಿತ್ಯಜೀವೊಗು ಸೇರ್ದಿನಾಕುಲತ್ತ್ ಅಂದ್‌ದ್ ತೀರ್ಪು ಮಲ್ತೊನೆಡ್ದ್, ಇಂದಾ, ಎಂಕುಲು ನಿಕ್ಲೆನ್ ಬುಡ್ದು ಪಿದಯಿದ ಜನೊಕುಲೆ ಕೈತಲ್‌ ಪೋಪ.

⁴⁷ ಅಂಚೆನೇ ಕರ್ತವೆ ಎಂಕ್ಲೆಗ್ ಅಪ್ಪಣೆ ಕೊರ್ತೆ; ಎಂಚ ಪಂಡ, ‘ಈ ಲೋಕದ ಕಡೆ ಮುಟ್ಟ ರಕ್ಷಣೆಗಾದ್ ಈ ಉಪ್ಪುಲೆಕ್ಕ ಯಾನ್ ನಿನನ್ ಪಿದಯಿದ ಜನೊಕುಲೆಗ್ ಬೊಲ್ಪು ಆದುಪ್ಪೆರೆ ನೇಮಕ ಮಲ್ತ್‌ದೆ,’” ಪನ್ಪಿನವೇ.

⁴⁸ ಅಲ್ಪ ಇತ್ತಿನ ಪಿದಯಿದ ಜನೊಕುಲು ಈ ಪಾತೆರೊನು ಕೇಂಡ್ದ್ ಸಂತೋಷ ಪಡೆದ್ ದೇವೆರೆ ಪಾತೆರೊನು ಪುಗರಿಯೆರ್; ಬೊಕ್ಕ ನಿತ್ಯಜೀವೊಗು ನೇಮಕ ಆತಿನಾಕುಲು ಮಾತೆರ್ಲಾ ನಂಬಿಯೆರ್.

⁴⁹ ಕರ್ತವ ವಾಕ್ಯೊಲು ಆ ಪ್ರದೇಶೊಡು ಮಾತ ಕಡೆಟ್ಲಾ ಪರಡೊಂದು ಬತ್ತ್ಂಡ್.

⁵⁰ ಆಂಡ ಯೆಹೂದ್ಯೆರ್, ಕೆಲವು ಭಕ್ತಿ ಇತ್ತಿ ಮರ್ಯಾದಿದ ಪೊಂಜೊವುಲೆನ್ಲಾ ಪಟ್ಟಣದ ಮುಖ್ಯಸ್ಥೆರೆನ್ಲಾ ನೋಚಾದ್ ಪೌಲು ಬಾರ್ನಬೆರೆಗ್ ಭಂಗ ಕೊರ್ದು ತನ್ಕುಲೆ ಊರುಡ್ದು ಗಿಡ್ತೆರ್.

⁵¹ ಐಡ್ದಾವರ ಪೌಲು ಬಾರ್ನಬೆ ತನ್ಕುಲೆ ಕಾರ್‌ದ ಧೂಳುನು ಕುಡ್ತ್‌ದ್ ಇಕೋನ್ಯಗ್ ಪೋಯೆರ್.

⁵² ಆಂಡಲಾ ಯೇಸುನ ಶಿಷ್ಯೆರಾಯಿನಾಕುಲು ಸಂತೋಷೊಡ್ಲಾ ಪರಿಶುದ್ಧಾತ್ಮೊಡ್ಲಾ ದಿಂಜಿದಿನಕುಲಾದಿತ್ತೆರ್.