ಅಪೊ.ಕ್ರಿ 11 - ಪೊಸ ಒಡಂಬಡಿಕೆ

ಯೆಹೂದ್ಯ ಕ್ರೈಸ್ತೆರ್ ಅಡ್ಡಿ ಮಲ್ಪುನಗ ಪೇತ್ರೆ ವಿರೋಧಾದ್ ಪನ್ಪಿನವು

¹ ಪಿದಯಿದ ಜನೊಕುಲುಲಾ ದೇವೆರೆ ಪಾತೆರೊನು ಸ್ವೀಕಾರ ಮಲ್ತೆರ್ ಪನ್ಪಿನ ಸುದ್ಧಿ ಅಪೊಸ್ತಲೆರೆಗ್ಲಾ ಯೂದಾಯೊಡಿತ್ತಿನ ಸಹೋದರೆರೆಗ್ಲಾ ತೆರಿಂಡ್.

^2-3 ಪೇತ್ರೆ ಯೆರೂಸಲೇಮುಗು ಬತ್ತಿನಪಗ ಕೆಲವು ಯೆಹೂದ್ಯೆರ್, “ಈ ಸುನ್ನತಿ ಮಲ್ಪಂದಿನಾಕುಲೆಡೊಪ್ಪ ಸೇರ್ದ್ ಅಕ್ಲೆನ ಒಟ್ಟುಗು ವಣಸ್ ಮಲ್ತ ಅತ್ತಾ,” ಅಂದ್‌ದ್ ಆಯಡ ತರ್ಕ ಮಲ್ತೆರ್.

⁴ ಅಪಗ ಪೇತ್ರೆ ನಡತಿನ ಸಂಗತಿಲೆನ್ ಅಕ್ಲೆಗ್ ಕ್ರಮೊಟು ವಿವರಿಸಾದ್ ಪಂಡೆ.

⁵ “ಯಾನ್ ಯೊಪ್ಪ ಪೇಂಟೆಡ್ ಪ್ರಾರ್ಥನೆ ಮಲ್ತೊಂದುಪ್ಪುನಗ ದೇವೆರೆನ ಒಂಜಿ ದರ್ಶನ ಆಂಡ್. ಅವು ದಾನೆ ಪಂಡ ಬಾನೊಡ್ದು ಒಂಜಿ ನಾಲ್ ಮೂಲೆಲಿತ್ತಿ ಮಲ್ಲ ಮಂದ್ರಿದ ಲೆಕ್ಕನೆ ಇತ್ತಿನ ಜೋಳಿಗೆ ಜತ್ತ್‌ದ್ ಯಾನಿತ್ತಿನಡೆಗ್ ಬತ್ತ್ಂಡ್.

⁶ ಅವು ಎಂಚಿನ ಅಂದ್‌ದ್ ಸರಿಯಾದ್ ತೂನಗ ನೆಲತ್ತ ಮಿತ್ತ್ ಪರಪುನ ಪಶುಕುಲುಲಾ ಕಾಡ್‌ಮೃಗೊಲುಲಾ ಕ್ರಿಮಿಕೀಟೊಲುಲಾ ಬಾನೊಡು ರಾಪಿನ ಪಕ್ಕಿಲೆನ್ಲಾ ತೂಯೆ.

⁷ ಬೊಕ್ಕ ಪೇತ್ರಾ, ‘ಲಕ್ಕ್‌ದ್ ಕುತ್ತುದು ತಿನ್ಲ,’ ಅಂದ್‌ದ್ ಎಂಕ್ ಪನ್ಪಿನ ಸ್ವರೊನು ಕೇಂಡೆ.

⁸ ಆಂಡ ಯಾನ್, ‘ಬೊಡ್ಚಿ ಕರ್ತವಾ, ಪೇಸಿಗೆದ ಅಶುದ್ಧದ ವಸ್ತು ಏಪಲಾ ಎನ ಬಾಯಿಗ್ ಪೋತುಜಿ,’ ಪಂಡೆ.

⁹ ಐಕ್, ‘ದೇವೆರ್ ಶುದ್ಧ ಮಲ್ತಿನೆನ್ ಈ ಅಶುದ್ಧ ಅಂದ್‌ದ್ ಪನಡ,’ ಅಂದ್‌ದ್ ರಡ್ಡನೆ ಸರ್ತಿ ಬಾನೊಡ್ದು ಸ್ವರ ಕೇಂಡೆ.

¹⁰ ಇಂಚ ಮೂಜಿ ಸರ್ತಿ ಆಂಡ್. ಐಡ್ದ್ ಬೊಕ್ಕ ಮಾತಲಾ ಕುಡ ಬಾನೊಗು ಏರ್ದ್ ಪೋಂಡು.

¹¹ ಅವ್ವೇ ಗಳಿಗೆಡ್ ಮೂಜಿ ಜನ ಎಂಕುಲು ಇತ್ತಿನ ಇಲ್ಲದ ಎದುರು ಉಂತುದಿತ್ತೆರ್. ಅಕ್ಲೆನ್ ಕೈಸರೆಯಡ್ದ್ ಎನ ಕೈತಲ್‌ ಕಡಪುಡ್ದಿತ್ತೆರ್.

¹² ದೇವೆರೆ ಆತ್ಮೆ ಈ ಸಂಶಯದಾಂತೆ ಅಕ್ಲೆಡೊಪ್ಪ ಪೋಲ ಅಂದ್‌ದ್ ಎಂಕ್ ಪಂಡೆ. ಮೊಕುಲು ಆಜಿ ಜನ ಸಹೋದ್ರೆರ್‌ಲಾ ಎನಡೊಪ್ಪ ಬತ್ತೆರ್.

¹³ ಆ ನರಮಾನಿನ ಇಲ್ಲದುಲಯಿ ಪೋನಗ ಆಯೆ ಎಂಕ್ಲೆಗ್ ತನ ಇಲ್ಲಡ್ ಒರಿ ದೂತೆ ಉಂತುದುಪ್ಪುನೆನ್ ತೂಯೆ. ಆ ದೂತೆ, ‘ಈ ಯೊಪ್ಪೊಗು ನಿನ ಜನೊಕುಲೆನ್ ಕಡಪುಡ್ದು ಪೇತ್ರೆ ಪನ್ಪಿ ಸೀಮೋನುನು ಲೆಪ್ಪುಡಾಲ;

¹⁴ ಆಯೆ ನಿಕ್ಕ್ ಕೆಲವು ಪಾತೆರ ಪನ್ಪೆ, ಆ ಪಾತೆರೊಡ್ದು ನಿಕ್ಕ್‌ಲಾ ನಿನ ಇಲ್ಲಡುಪ್ಪು ಮಾತೆರೆಗ್ಲಾ ರಕ್ಷಣೆ ಆಪುಂಡು,’ ಅಂದ್‌ದ್ ತೆರಿಪಾಯೆ.

¹⁵ ಯಾನ್ ಪಾತೆರಿಯೆರೆ ಸುರು ಮಲ್ಪುನಗ ಪರಿಶುದ್ಧಾತ್ಮ ವರ ಸುರುಟ್ಟು ನಮ ಮಿತ್ತ್ ಬತ್ತಿಲೆಕ್ಕನೇ ಅಕ್ಲೆ ಮಿತ್ತ್‌ಲಾ ಜತ್ತ್‌ದ್ ಬತ್ತ್ಂಡ್.

¹⁶ ಅಪಗ, ‘ಯೋಹಾನೆ ಜನೊಕುಲೆಗ್ ನೀರ್‌ದ ದೀಕ್ಷಾಸ್ನಾನ ಮಲ್ಪಾಯೆ; ಆಂಡ ನಿಕ್ಲೆಗ್ ಪರಿಶುದ್ಧಾತ್ಮೊಡ್ದು ದೀಕ್ಷಾಸ್ನಾನ ಆವು,’ ಅಂದ್‌ದ್ ಕರ್ತವೆ ಪಂತಿನ ಪಾತೆರೊಲೆನ್ ನೆನೆಪು ಮಲ್ತೆ.

¹⁷ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಮಿತ್ತ್ ನಂಬಿಕೆ ದೀತಿನಕುಲಾದುಪ್ಪು ನಂಕ್ ನಂಬಿಕೆದ ವರೊನು ಕೊರ್ತಿಲೆಕ್ಕ ಅಕ್ಲೆಗ್ಲಾ ಆ ವರೊನು ಕೊರ್ದುಪ್ಪುನಗ ದೇವೆರೆನ್ ತಡೆಯೆರೆ ಎಂಕ್ ಸಾದ್ಯನಾ?”

¹⁸ ಇಂಚ ಪಂಡಿನ ಪಾತೆರೊಲೆನ್ ಆ ಯೆಹೂದ್ಯೆರ್ ಕೇಂಡ್ದ್ ತರ್ಕ ಮಲ್ಪುನೆನ್ ಉಂತಾಯೆರ್. ಅಂಚಾಂಡ, “ದೇವೆರ್ ಪಿದಯಿದ ಜನೊಕುಲೆಗ್ಲಾ ಜೀವ ಕೊರೊಡು ಅಂದ್‌ದ್ ಅಕ್ಲೆ ಉಡಲ್‌ಡ್ಲಾ ಪಶ್ಚಾತಾಪ ಕೊರಿಯೆ,” ಅಂದ್‌ದ್ ದೇವೆರೆನ್ ಪುಗರಿಯೆರ್.

ಅಂತಿಯೋಕ್ಯದ ಸಭಾಕೂಟ

¹⁹ ಸ್ತೇಫನನ್ ಕೆರ್ದ್ ಉಂಡಾಯಿನ ಭಂಗೊಡ್ದು ದಿಕ್ಕ್ ಪಾಲಾಯಿನಾಕುಲು ಫೊಯಿನೀಕೆ, ಕುಪ್ರ ಅಂತಿಯೋಕ್ಯ ಊರುಲೆ ಮುಟ್ಟ ಪ್ರಯಾಣ ಮಲ್ತ್‌ದ್ ಯೆಹೂದ್ಯೆರೆಗ್ ಮಾತ್ರ ದೇವೆರೆ ಪಾತೆರೊನು ತೆರಿಪಾವೊಂದಿತ್ತೆರ್.

²⁰ ಅಕ್ಲೆಡ್ ಕೆಲೆವೆರ್ ಕುಪ್ರ ದ್ವೀಪದಾಕುಲು, ಕೆಲೆವೆರ್ ಕುರೇನ್ಯೆರ್ ಅಂತಿಯೋಕ್ಯಗ್ ಬತ್ತ್‌ದ್ ಗ್ರೀಕೆರೆಡಲಾ ಪಾತೆರ್‌ದ್ ಕರ್ತವೆ ಆದುಪ್ಪು ಯೇಸುನ ಸುವಾರ್ತೆನ್ ಸಾರಿಯೆರ್.

²¹ ಕರ್ತವ ಸಹಾಯ ಇತ್ತಿನೆಡ್ದ್ ಮಸ್ತ್ ಜನ ನಂಬುದು ಕರ್ತವ ಕಡೆಕ್ಕ್ ತಿರ್ಗೊಂಡೆರ್.

²² ಮೊಕ್ಲೆನ ಸುದ್ಧಿ ಯೆರೂಸಲೇಮುಡಿತ್ತಿ ಸಭೆತಾಕುಲೆಗ್ ಗೊತ್ತಾಯಿನೆಡ್ದ್ ಅಕುಲು ಬಾರ್ನಬನ್ ಅಂತಿಯೋಕ್ಯಗ್ ಕಡಪುಡಿಯೆರ್.

^23-24 ಆಯೆ ಎಡ್ಡೆಂತಿನಾಯೆಲಾ ಪರಿಶುದ್ಧಾತ್ಮನ್ ಹೊಂದಿನಾಯೆಲಾ ನಂಬಿಕೆಡ್ ದಿಂಜಿದಿನಾಯೆಲಾ ಆದಿತ್ತೆ. ಅಂಚಾಯಿನೆಡ್ದ್ ಅಡೆಗ್ ಬತ್ತ್‌ದ್ ದೇವೆರೆನ ದಯತ ಕಾರ್ಯೊಲೆನ್ ತೂದು ಸಂತೋಷ ಪಡೆದ್ ನಿಕುಲು ದೃಢ ಮನಸ್‌ಡ್ದ್ ಕರ್ತವಡ್ ನಿಲೆ ಆದುಪ್ಪೊಡು ಅಂದ್‌ದ್ ಮಾತೆರೆಗ್ಲಾ ಉಮೇದ್ ಕೊರಿಯೆ. ಅಪಗ ಮಸ್ತ್ ಜನ ಕರ್ತವಡ್ ಸೇರೊಂಡೆರ್.

²⁵ ಬಾರ್ನಬೆ ಸೌಲುನು ನಾಡುನೆಕ್ಕಾದ್ ತಾರ್ಸೊಗು ಪೋದು ಆಯನ್ ಅಂತಿಯೋಕ್ಯಗ್ ಲೆತ್ತೊಂದು ಬತ್ತೆ.

²⁶ ಐಡ್ದ್ ಬೊಕ್ಕ ಅಕುಲು ಇಡೀ ಒಂಜಿ ವರ್ಸ ಸಭೆಟ್ ಸೇರೊಂದು ಮಸ್ತ್ ಜನೊಕುಲೆಗ್ ಬೋಧನೆ ಮಲ್ತೆರ್. ಶಿಷ್ಯೆರೆಗ್ ಕ್ರೈಸ್ತೆರ್ ಪನ್ಪಿನ ಪುದರ್ ಸುರುಟ್ಟು ಅಂತಿಯೋಕ್ಯಡ್ದ್ ಬತ್ತ್ಂಡ್.

²⁷ ಆ ಕಾಲೊಡು ಪ್ರವಾದಿಲಾದಿತ್ತಿನ ಕೆಲೆವೆರ್ ಯೆರೂಸಲೇಮುಡ್ದು ಅಂತಿಯೋಕ್ಯಗ್ ಬತ್ತೆರ್.

²⁸ ಅಗಬೆ ಪನ್ಪಿನ ಒರಿ ನರಮಾನಿ ಲಕ್ಕ್‌ದ್ ಭೂಮಿದ ಮಿತ್ತ್ ಒಂಜಿ ಮಲ್ಲ ಬರಗಾಲ ಬರ್ಪುಂಡು ಅಂದ್‌ದ್ ಪರಿಶುದ್ಧಾತ್ಮನ ಪ್ರೇರಣೆಡ್ದ್ ಸೂಚನೆ ಕೊರಿಯೆ. ಅವು ಕ್ಲೌದಿಯ ಚಕ್ರವರ್ತಿನ ಕಾಲೊಡು ಆಂಡ್;

²⁹ ಅಪಗ ಆ ಶಿಷ್ಯೆರೆಡ್ ಪ್ರತಿ ಒರಿಲಾ ಯೂದಾಯ ಪ್ರದೇಶೊಡು ನಿಲೆ ಆದಿತ್ತಿನ ಸಹೋದ್ರೆರೆಗ್ ತನ್ಕುಲೆಗ್ ತೀರುನಾತ್ ಕಾಸ್‌ದ ಸಹಾಯ ಮಲ್ಪೊಡು ಅಂದ್‌ದ್ ನಿಚ್ಚಯ ಮಲ್ತೊಂಡೆರ್.

³⁰ ಅಂಚೆನೇ ಮಲ್ತ್‌ದ್ ಅವೆನ್ ಬಾರ್ನಬ ಸೌಲೆರೆನ ಕೈಡ್ದ್ ಸಭೆತ ಹಿರಿಯೆರೆಗ್ ಕೊರ್ದು ಕಡಪುಡಿಯೆರ್.