3 ಯೋಹಾನೆ 1 - ಪೊಸ ಒಡಂಬಡಿಕೆ

^1-2 ಸಭಾ ಹಿರಿಯಾಯೆ ಆದುಪ್ಪು ಯಾನ್ ಸತ್ಯೊಡು ಪ್ರೀತಿ ಮಲ್ಪು ಪ್ರೀಯ ಗಾಯಗ್ ಬರೆಪಿನಿ ದಾನೆಂದ್ಂಡ, ಪ್ರೀತಿದಾಯ, ಈ ಆತ್ಮೊಡು ಎಡ್ಡೆ ಉಪ್ಪುಲೆಕ್ಕನೇ, ಮಾತ ತರೊಟು ಎಡ್ಡೆ ಆವೊಡು, ಬೊಕ್ಕ ಸೌಖ್ಯೊಡು ಉಪ್ಪೊಡಂದ್‌ದ್ ಯಾನ್ ನಟ್ಟೊನ್ವೆ.

³ ಸಹೋದ್ರೆರ್ ಎನ ಕೈತಲ್‌ ಬತ್ತ್‌ದ್, ಈ ಸತ್ಯೊಗು ನಂಬಿಗೆದಾಯೆ ಆದ್ ನಡಪುವ ಬೊಕ್ಕ ನಿನಡುಪ್ಪುನ ಸತ್ಯದ ವಿಚಾರೊಡು ಸಾಕ್ಷಿ ಪನ್ನಗ ಎಂಕ್ ದಿಂಜ ಸಂತೋಷ ಆಂಡ್.

⁴ ಎನ ಜೋಕುಲು ಸತ್ಯೊಡು ನಡತೊಂದುಲ್ಲೆರ್ ಇನ್ಪಿನೆನ್ ಕೇನುನಾತ್ ಮಲ್ಲ ಸಂತೋಷ ಬೇತೆ ದಾಲಾ ಇಜ್ಜಿ.

ಗಾಯನ್ ಪುಗರುನವು

⁵ ಪ್ರೀತಿದಾಯ, ಈ ಸಹೋದರೆರೆಗ್ಲಾ ಗುರ್ತದಾಂತಿನಾಕುಲೆಗ್ಲಾ ಎಡ್ಡೆ ಕಾರ್ಯ ಮಲ್ಪುನೆಟ್ಟ್ ನಂಬಿಗೆದಾಯೆ ಆದ್ ನಡತೊಂದ.

⁶ ಅಕುಲು ಸಭೆತ ಎದುರು ಈ ಮಲ್ತಿನ ಪ್ರೀತಿಗ್ ಸಾಕ್ಷಿ ಪಂಡೆರ್. ದೇವೆರೆಗ್ ಮೆಚ್ಚಿಗೆ ಆಪಿಲೆಕ್ಕ ಅಕುಲು ಪ್ರಯಾಣೊಡು ನನಲಾ ದುಂಬು ಪೋಯೆರೆ ಸಹಾಯ ಮಲ್ಪುಲ.

⁷ ದಾಯೆಗಂದ್ಂಡ, ಅಕುಲು ಕ್ರಿಸ್ತನ ಪುದರ್‌ಡ್ ಪಿದಾಡ್ದೆರ್, ಬೊಕ್ಕ ನಂಬಿಕೆದಾಂತಿನಾಕುಲೆಡ್ದ್ ದಾದಲಾ ದೆತ್ತೊನುಜೆರ್.

⁸ ಇಂಚ ನಮ ಸತ್ಯೊಗು ಪಾಸಾಡಿದಾಕುಲು ಆಪಿಲೆಕ್ಕ ಇಂಚಿತ್ತಿನಾಕುಲೆನ್ ಸೇರಾವೊನುನ ಹಂಗ್‌ಡುಲ್ಲ.

ದಿಯೋತ್ರೆಫೆ ಬೊಕ್ಕ ದೆಮೇತ್ರಿ

⁹ ಯಾನ್ ಸಭೆಕ್ ಕೆಲವು ವಿಚಾರೊನು ಬರೆತೆ. ಆಂಡ ಅಕ್ಲೆಡ್ ನಾಯಕೆ ಆವೊಡು ಅಂದ್‌ದ್ ಆಸೆ ಮಲ್ಪುನ ದಿಯೋತ್ರೆಫೆ ಎಂಕುಲೆ ಅಧಿಕಾರೊನು ಒಪ್ಪಿಯೊನ್ಜೆ.

¹⁰ ಆಯನ ಸಂಗತಿಡ್ ಮಸ್ತ್ ಸಂಗತಿಲೆನ್ ಯಾನ್ ಬತ್ತಿನಪಗ ಆಯನ ನೆನೆಪುಗು ಕನಪೆ. ಬೊಕ್ಕ ಆಯೆ ಎಂಕುಲೆ ಮಿತ್ತ್ ಬೊಡ್ಚಾಂದಿನ ಹಾಳ್ ದೂರುಲೆನ್ ಪಾಡ್ದ್ ಅಪಪ್ರಚಾರ ಮಲ್ತೊಂದುಲ್ಲೆ. ಉಂದು ಮಾತ್ರತ್ತಂದೆ ಆಯೆ ಪ್ರಯಾಣೊಡುಪ್ಪು ಸಹೋದ್ರೆರೆನ್ ತರಕೊನಂದೆ, ಬೇತೆಕ್ಲೆಗ್ಲಾ ಸಹಾಯ ಮಲ್ಪಡೆ ಅಂದ್‌ದ್ ಪನ್ಪೆ. ಅಕುಲು ಒಂಜಿ ವೇಳೆ ಸಹಾಯ ಮಲ್ತೆರ್ಡ ಅಂಚಿತ್ತಿನಾಕುಲೆನ್ ಸಭೆಡ್ದ್ ಪಿದಯಿ ಪಾಡ್ವೆ.

¹¹ ಪ್ರೀತಿದಾಯ, ಈ ಪಡಿಕೆಂತಿನ ನಡತೆಡ್ ನಡಪಂದೆ, ಎಡ್ಡೆಂತಿನೆಕ್ಕ್ ಸರಿಯಾದ್ ನಡಪುಲ. ಎಡ್ಡೆಂತಿನೆನ್ ಮಲ್ಪುನಾಕುಲು ದೇವೆರೆ ಜೋಕುಲು, ಪಡಿಕೆಂತಿನೆನ್ ಮಲ್ಪುನಾಕುಲು ದೇವೆರೆನ್ ತೆರಿಯಂದಿನಾಕುಲು ಆದುಲ್ಲೆರ್.

¹² ದೆಮೇತ್ರಿಯನ ವಿಚಾರೊಡು ಮಾತೆರ್ಲಾ ಎಡ್ಡೆಂತಿನೆನೇ ಸಾಕ್ಷಿ ಪನ್ಪೆರ್. ಅವು ಸತ್ಯಲಾ ಆದುಂಡು. ಎಂಕುಲುಲಾ ಆಯ ವಿಚಾರೊಡು ಅವೆನೇ ಪನ್ಪ, ಬೊಕ್ಕ ಎಂಕುಲು ಸತ್ಯನೇ ಪಾತೆರ್‌ವ ಅಂದ್‌ದ್ ಈ ತೆರಿದ.

ಕಡೆತ ಪಾತೆರೊಲು

¹³ ನಿಕ್ಕ್ ಬರೆವೆರೆ ಎಂಕ್ ಮಸ್ತ್ ಸಂಗತಿಲು ಉಂಡು, ಆಂಡ ಶಾಯಿಡ್ಲಾ ಪೆನ್ನ್‌ಡ್ಲಾ ಬರೆವೆರೆ ಎಂಕ್ ಮನಸ್ ಇಜ್ಜಿ.

¹⁴ ದಾಯೆಗಂದ್ಂಡ ಯಾನ್ ಬೇಗೊಡು ನಿನನ್ ತೂವೆರೆಗ್ ಉಲ್ಲೆ ಇನ್ಪಿ ಭರವಸೆ ಎಂಕುಂಡು, ಅಪಗ ನಮ ಎದುರೆದುರಾದ್ ಕುಲ್ಲುದು ಪಾತೆರ್‌ಗ.

¹⁵ ಸಮಾಧಾನ ನಿನ ಒಟ್ಟುಗು ಉಪ್ಪಡ್. ನಿನ ಸ್ನೇಹಿತೆರ್ ನಿಕ್ಕ್ ವಂದನೆ ತೆರಿಪಾದೆರ್. ಅಲ್ಪ ಉಪ್ಪು ಪ್ರತಿಯೊರಿಯಗ್ಲಾ ಪುದರ್ ಪುದರಾದ್ ವಂದನೆ ಮಲ್ಪುಲ. ಆಮೆನ್.