2 ತಿಮೋಥಿ 2 - ಪೊಸ ಒಡಂಬಡಿಕೆ

ಕ್ರಿಸ್ತ ಯೇಸುನ ನಂಬಿಗಸ್ತ ಸೈನಿಕೆ

¹ ಎನ ಮಗೆ ಆದುಪ್ಪು ತಿಮೋಥಿ, ಈ, ಕ್ರಿಸ್ತ ಯೇಸುಡು ಉಪ್ಪು ದಯೊಟು ಬಲ ಪಡೆಲ.

² ದಿಂಜ ಸಾಕ್ಷಿಲೆ ಎದುರು ಈ ಎನಡ್ದ್ ಕೇಂಡಿನ ಬೋಧನೆಗ್ ಸರಿಯಾದ್ ಬೇತೆ ಜನೊಕುಲೆಗ್ ಬೋಧನೆ ಮಲ್ಪೆರೆ ಸಾಮರ್ಥ್ಯ ಇತ್ತಿ ನಂಬಿಕೆದ ನರಮಾನಿಲೆಗ್ ಅವೆನ್ ಒಚ್ಚಿದ್ ಕೊರ್ಲ.

³ ಕ್ರಿಸ್ತ ಯೇಸುನ ಎಡ್ಡೆ ಸೈನಿಕನಂಚ ಎನಡೊಪ್ಪ ಕಷ್ಟೊನು ತಾಳೊನ್ಲ.

⁴ ಲಡಯಿಗ್ ಪೋಪಿನ ಸೈನಿಕೆ ಈ ಲೋಕದ ಬೊಡ್ಚಾವಂದಿನ ಕೆಲಸೊಲೆಡ್ ಸೇರಂದೆ ತನನ್ ದಂಡ್‌ಗ್ ಸೇರಾಯಿನಾಯನ್ ಮೆಚ್ಚಾವು ಲೆಕ್ಕ ಪ್ರಯಾಸ ಬರ್ಪೆ ಅತ್ತಾ?

⁵ ಅತ್ತಂದೆ ಏರಾಂಡಲಾ ಓಟದ ಸ್ಪರ್ಧೆಡ್ ಪಾಲ್ ದೆತ್ತೊಂದು, ಐತ ನಿಯಮೊನು ಪಾಲನೆ ಮಲ್ತಿಜೆಡ ಆಯಗ್ ಕಿರೀಟ ತಿಕ್ಕಂದ್.

⁶ ಭಂಗ ಬರ್ಪಿ ಬೆನ್ನಿದಾಯಗ್ ಬೆನ್ನಿದ ಫಲೊಟು ಸುರುತ್ತ ಪಾಲ್ ತಿಕ್ಕೊಡು.

⁷ ಯಾನ್ ಪನ್ಪಿನೆನ್ ಆಲೋಚನೆ ಮಲ್ಪುಲ, ದಾಯೆಗಂದ್ಂಡ ಈ ಮಾತ ಸಂಗತಿಲೆನ್ ತೆರಿಯೊನಿಯೆರೆ ಕರ್ತವೆ ನಿಕ್ಕ್ ಸಹಾಯ ಮಲ್ಪುವೆ.

⁸ ಸೈತಿನಾಕುಲೆಡ್ದ್ ಲಕ್ಕಿನಾಯೆಲಾ ದಾವೀದ್ ಸಂತಾನದಾಯೆಲಾ ಆದುಪ್ಪು ಯೇಸು ಕ್ರಿಸ್ತನ್ ನೆನೆಪು ಮಲ್ತೊನ್ಲ. ಉಂದೇ ಯಾನ್ ಸಾರಿಯುನ ಸುವಾರ್ತೆ ಆದುಂಡು.

⁹ ಬೊಕ್ಕ ಯಾನ್ ಈ ಸುವಾರ್ತೆ ಸಾರಿನೆಡ್ದ್ ದಿಂಜ ಭಂಗ ಬತ್ತಿನಾಯೆ ಆದ್ ದುಷ್ಕರ್ಮಿಲೆಕ್ಕ ಸಂಕಲೆಡ್ ಉಲ್ಲೆ, ಆಂಡ ದೇವೆರೆ ಪಾತೆರೊಗು ಬಂಧನ ಇಜ್ಜಿ.

¹⁰ ಅಂಚಾದ್ ದೇವೆರ್ ಅಜತ್‌ದಿನಾಕುಲು ಎನ ಒಟ್ಟುಗು ಕ್ರಿಸ್ತ ಯೇಸುಡುಪ್ಪು ರಕ್ಷಣೆನ್ ನಿತ್ಯ ಮೈಮೆದೊಟ್ಟುಗು ಹೊಂದೊಡು ಅಂದ್‌ದ್ ಯಾನ್ ಅಕ್ಲೆಗಾದ್ ಮಾತೆನ್ಲಾ ತಾಳೊನ್ವೆ

¹¹ ಈ ಪಾತೆರ ನಂಬಿಕೆದವು ದಾನೆಂದ್ಂಡ: ನಮ ಆಯ ಒಟ್ಟುಗು ಸೈತ್ ಪೋಪಡ, ಆಯ ಒಟ್ಟುಗು ಬದುಕುವ.

¹² ನಮ ಭಂಗೊನು ತಾಳೊನ್ವಡ, ಆಯ ಒಟ್ಟುಗು ಆಳುವ. ಬೊಕ್ಕ ನಮ ಯೇಸುನು ಆರೆಂಜುವಡ, ಆಯೆಲಾ ನಮನ್ ಆರೆಂಜುವೆ,

¹³ ನಮ ಆಯಗ್ ಅಪನಂಬಿಕೆದಾಕುಲು ಆದಿತ್ತ್‌ಂಡಲಾ ಆಯೆ ನಂಬಿಗಸ್ತೆ ಆದುಲ್ಲೆ, ದಾಯೆಗಂದ್ಂಡ ಆಯೆ ತನ ಸ್ವಭಾವೊಡು ಬದಲಾಪುಜೆ.

ಮೆಚ್ಚಿಗೆ ಪಡೆತಿ ಸೇವಕೆ

¹⁴ ಈ ಸಂಗತಿಲೆನ್ ಮಾತೆರೆಗ್ ನೆನೆಪು ಪುಟ್ಟಾಲ, ಕೇನುನಾಕುಲೆಗ್ ತೊಂದರೆ ಆಪಿನತ್ತಂದೆ, ವಾ ಪ್ರಯೋಜನೊಗ್ಲಾ ಬರಂದಿ ತರ್ಕೊಲೆನ್ಲಾ ಮಲ್ಪೆರೆ ಬಲ್ಲಿ ಅಂದ್‌ದ್ ಅಕ್ಲೆಗ್ ದೇವೆರೆ ಸನ್ನಿಧಿಡ್ ಅಪ್ಪಣೆ ಕೊರ್ಪೆ.

¹⁵ ಈ ದೇವೆರೆ ದೃಷ್ಟಿಡ್ ಮೆಚ್ಚಿಗೆದಾಯೆ ಆದ್ ತೋಜಿದ್ ಬರಿಯೆರೆ ಪ್ರಯಾಸ ಮಲ್ಪುಲ. ನಾಚಿಗೆಗ್ ಗುರಿ ಆವಂದಿಲೆಕ್ಕಲಾ ಸತ್ಯದ ಪಾತೆರೊನು ಸರಿಯಾದ್ ಬೋಧನೆ ಮಲ್ಪುನಾಯೆಲಾ ಆದುಪ್ಪುಲ.

¹⁶ ಲೋಕದ ಹರಟೆ ಪಾತೆರೊಲೆಗ್ ದೂರ ಆದುಪ್ಪುಲ. ದಾಯೆಗ್ ಪಂಡ್ಂಡ ಅಂಚಿನ ಪಾತೆರೊಗು ಮನಸ್ ಕೊರ್ಪಿನಾಕುಲು ಹೆಚ್ಚೆಚ್ಚಾದ್ ಭಕ್ತಿದಾಂತಿನಾಕುಲಾದ್ ಪೋಪೆರ್

¹⁷ ಇಂಚಿನ ವ್ಯರ್ಥ ಪಾತೆರೊಲು ಗಾಯದಲೆಕ್ಕ ಗಜೆಲೊಂದು ಪರಡುಂಡು. ಅಂಚಿತ್ತಿನಾಕುಲೆಡ್ ಹುಮೆನಾಯೆಲಾ ಪಿಲೇತೆಲಾ ಉಲ್ಲೆರ್.

¹⁸ ಮೊಕುಲು ಸತ್ಯದ ಸಾದಿನ್ ಬುಡ್ದು ಸೈತಿನಾಕುಲು ಲಕ್ಕುನವು ಆದ್ ಪೋಂಡು ಪನೊಂದು ಕೆಲೆವೆರೆನ ನಂಬಿಕೆನ್ ಹಾಳ್ ಮಲ್ತೊಂದುಲ್ಲೆರ್.

¹⁹ ಆಂಡಲಾ ದೇವೆರೆ ಬುನಾದಿ ಸ್ಥಿರ ಆದ್ ಉಂತುದುಂಡು. ಬೊಕ್ಕ, “ಕರ್ತವೆ ತನ್ನಾಯೆ ಪನ್ಪಿನೆನ್ ತೆರಿದೆ. ಕರ್ತವನ ಪುದರ್‌ನ್ ಅರಿಕೆ ಮಲ್ಪುನ ಮಾತೆರ್ಲಾ ಅನ್ಯಾಯೊನು ಬುಡ್ದು ಬುಡೊಡು,” ಅಂದ್‌ದ್ ಐಟ್ಟ್ ಬರೆತಿನ ಉಂಡು.

²⁰ ಮಲ್ಲ ಇಲ್ಲಡ್ ಬೊಳ್ಳಿ ಬಂಗಾರ್‌ದ ಬಾಜನೊಲು ಮಾತ್ರ ಅತ್ತಂದೆ ಮರತ ಬಾಜನೊಲು ಬೊಕ್ಕ ಮಣ್ಣ್‌ದ ಬಾಜನೊಲು ಉಪ್ಪುಂಡು. ಐತ ಕೆಲವು ಬಾಜನೊಲು ಎಡ್ಡೆ ಬಳಕೆಗ್ಲಾ ಕೆಲವು ಸಮಾನ್ಯ ಬಳಕೆಗ್ಲಾ ಬರ್ಪುಂಡು.

²¹ ಅಂಚಾದ್ ಒರಿ ಹಾಳ್ ನಡತೆದಾಯನ ಸಹವಾಸೊನು ಬುಡ್ದು ತನನ್ ಶುದ್ಧ ಮಲ್ತೊಂಡೆಡ ಆಯೆ ಎಡ್ಡೆ ಬಳಕೆಗ್ ತಕ್ಕದಾಯೆ ಆದುಪ್ಪುವೆ. ಆಯೆ ದೇವೆರೆ ಸೇವೆಗ್ ಒಚ್ಚಿದ್ ಕೊರ್ತಿನಾಯೆ ಆದ್ ತನ ಯಜಮಾನಗ್ ಪ್ರಯೋಜನದಾಯೆಲಾ, ಮಾತ ಎಡ್ಡೆ ಕಾರ್ಯೊಲೆನ್ ಮಲ್ಪೆರೆಗ್ ತಯಾರಾದುಪ್ಪುವೆ.

²² ಜವ್ವನ ಪ್ರಾಯದ ಇಚ್ಚೆಲೆಡ್ದ್ ದೂರ ಇತ್ತ್‌ದ್, ನೀತಿನ್, ನಂಬಿಕೆನ್, ಪ್ರೀತಿನ್ ಸಮಾಧಾನೊನು ಸಂಪಾದನೆ ಮಲ್ಪೆರೆಗಾದ್ ಶುದ್ಧ ಉಡಲ್‌ಡ್ದ್ ಕರ್ತವನ್ ಅರಿಕೆ ಮಲ್ಪುನಾಕುಲೆಡೊಪ್ಪ ಈಲಾ ಪ್ರಯತ್ನ ಮಲ್ಪುಲ.

²³ ಬುದ್ಧಿದಾಂತಿ ವ್ಯರ್ಥ ತರ್ಕೊಲು ಅವು ಲಡಯಿಗ್ ಕಾರಣಾದುಂಡು ಪನ್ಪಿನೆನ್ ಈ ತೆರಿದ್ ಐತ ಸುದ್ಧಿಗ್ ಪೋವಡ.

²⁴ ಕರ್ತವ ಸೇವಕೆ ಲಡಯಿ ಮಲ್ಪಂದೆ, ಮಾತೆರೆಗ್ ದಯ ತೋಜಾವುನಾಯೆಲಾ, ಬೋಧನೆ ಮಲ್ಪೆರೆ ತಕ್ಕದಾಯೆಲಾ, ತಾಳ್ಮೆಡ್ ಉಪ್ಪುನಾಯೆಲಾ ಆದುಪ್ಪೊಡು.

²⁵ ಎದುರುಂತುನಾಕುಲೆನ್ ನಿಧಾನೊಡು ತಿದ್ದುನಾಯೆ ಆದುಪ್ಪೊಡು. ಒಂಜಿ ವೇಳೆ ದೇವೆರ್ ಎದುರುಂತುನಾಕುಲೆನ ಮನಸ್‌ನ್ ತನ ಕಡೆಕ್ಕ್ ತಿರ್ಗಾದ್ ಅಕ್ಲೆಗ್ ಸತ್ಯದ ಗೇನೊನು ಕೊರಿಯೆರೆ ಯಾವು.

²⁶ ಸೈತಾನನ ಬಲೆಟ್ ತಿಕೊಂದು ಒಂಜಿ ವೇಳೆ ಮೊಕುಲು ತಪ್ಪಾವೊಂದು ದೇವೆರೆ ಚಿತ್ತದ ಪ್ರಕಾರ ಸ್ವಸ್ಥ ಬುದ್ಧಿಗ್ ಬರಿಯೆರೆ ಯಾವು.