2 ಥೆಸಲೋನಿಕೆರೆಗ್‌ 2 - ಪೊಸ ಒಡಂಬಡಿಕೆಅನ್ಯಾಯಗಾರೆ 1 ಸಹೋದ್ರೆರೇ, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ಬರ್ಪಿನೆತ್ತ ವಿಷಯೊಡ್ಲಾ ನಮ ಆಯ ಕೈತಲ್‌ ಒಟ್ಟು ಆಪಿನ ವಿಷಯೊಡ್ಲಾ ನಿಕ್ಲೆಡ ನಟ್ಟೊಂದುಲ್ಲ ದಾನೆಂದ್ಂಡ, 2 ಕರ್ತವೆ ಬರ್ಪಿನ ದಿನ ಕೈತಲಾತ್ತ್ಂಡ್ ಅಂದ್‌ದ್ ಕೆಲೆವೆರ್ ಆತ್ಮೊಡ್ದುಲಾ ಕೆಲೆವೆರ್ ಪಾತೆರೊಡ್ದುಲಾ, ಕೆಲೆವೆರ್ ಎಂಕುಲು ಇಂಚ ಪತ್ರಿಕೆ ಬರೆತ ಪಂಡ್ದ್‌ಲಾ ಪನ್ವೆರ್. ಉಂದೆನ್ ಕೇಂಡ್ದ್ ನಿಕ್ಲೆ ಮನಸ್‌ಡ್ ಬೇಗನೆ ಬುದ್ಧಿಕೆಟ್ಟ್‌ದ್ ಚಂಚಲ ಆವಡೆ. 3 ಏರ್ಲಾ ನಿಕ್ಲೆನ್ ವಾ ವಿಷಯೊಡ್ಲಾ ಮೋಸೊಡು ಪಾಡಂದೆ ಉಪ್ಪಡ್. ದಾಯೆಗಂದ್ಂಡ, ದೇವೆರೆಗ್ ವಿರೋಧ ಆಪಿ ಸಮಯ ಬತ್ತಿ ಬೊಕ್ಕ ನಿತ್ಯನಾಶನ ಕನಪಿನ ಅನ್ಯಾಯಗಾರೆ ಬೈಲ್‌ಗ್ ಬರ ಮುಟ್ಟ ಆ ದಿನ ಬರ್ಪುಜಿ. 4 ಆ ಅನ್ಯಾಯಗಾರೆ ಪ್ರತಿಯೊಂಜೆನ್ ವಿರೋಧ ಮಲ್ತ್‌ದ್ ತಾನೇ ಮಲ್ಲಾಯೆ ಅಂದ್‌ದ್ ಮೆಚ್ಚಾವೊಂದು, ತಾನೇ ದೇವೆರ್ ಪನೊಂದು, ಪೂಜೆಗ್ ತಕ್ಕದಾಯೆ ಅಂದ್‌ದ್ ದೇವೆರೆನ ಗರ್ಭಗುಡಿಟೇ ಕುಲ್ಲುವೆ. 5 ಯಾನ್ ನಿಕ್ಲೆ ಒಟ್ಟುಗು ಉಪ್ಪುನಗ ಈ ಸಂಗತಿನ್ ಪಂಡ್ದಿತ್ತೆ, ಅವು ನಿಕ್ಲೆಗ್ ನೆನೆಪು ಇಜ್ಜಾ? 6 ಆ ನರಮಾನಿ ನೇಮಕ ಆತಿನ ಸಮಯೊಡೇ ತೋಜಿದ್ ಬರ್ಪಿನೆಕ್ಕ್ ಎಂಚಿನ ತಡೆ ಮಲ್ಪುಂಡು ಅಂದ್‌ದ್ ಅವು ನಿಕ್ಲೆಗ್ ತೆರಿದೇ ಉಂಡು. 7 ಅನ್ಯಾಯ ಇತ್ತೆಲಾ ಗುಟ್ಟುಡು ನಡತೊಂದು ಉಂಡು. ಉಂದೆಕ್ಕ್ ಅಡ್ಡಿ ಮಲ್ಪುನಾಯನ್ ದೆತ್ತೊನುನ ಮುಟ್ಟ ಅನ್ಯಾಯದ ಕೆಲಸೊನು ಆಯೆ ಗುಟ್ಟುಡೆ ಮಲ್ತೊಂದುಪ್ಪುವೆ. 8-9 ಐಡ್ದ್ ಬೊಕ್ಕ ಆ ಅನ್ಯಾಯಗಾರೆ ತೋಜಿದ್ ಬರ್ಪೆ. ಅಪಗ ಕರ್ತವೆ ಆದುಪ್ಪು ಯೇಸು ತನ ಬಾಯಿದ ಶ್ವಾಸೊಡ್ದು ಆಯನ್ ಕೆರ್ದ್, ತನ ಮೈಮೆದ ಬೊಲ್ಪುಡು ಬನ್ನಗ ಆಯನ್ ನಾಶ ಮಲ್ಪುವೆ. ಆ ಅನ್ಯಾಯದ ನರಮಾನಿ ಬನ್ನಗ ಸೈತಾನನ ಕಾರ್ಯೊಲು ಬಲೊಟ್ಲಾ ಗುರ್ತ ಕಾರ್ನಿಕೊಲೆಡ್ಲಾ ನಡಪು. 10 ಬೊಕ್ಕ ನಾಶಾದ್ ಪೋಪಿನಾಕುಲೆನ್ ಆಯೆ ಅನ್ಯಾಯದ ವಂಚನೆಡ್ ತಿಕ್ಕಾವೆ. ದಾಯೆಗಂದ್ಂಡ, ಅಕುಲು ಸತ್ಯದ ಮಿತ್ತ್ ಪ್ರೀತಿ ದೀವಂದಿನೆಡ್ದಾವರ ರಕ್ಷಣೆ ಹೊಂದಂದೆ ನಾಶ ಆಪೆರ್. 11 ಆ ಕಾರಣೊಡ್ದಾವರ, ದೇವೆರ್ ಅಕ್ಲೆಗ್ ಸುಳ್ಳುನು ನಂಬಿಯೆರೆ ಭ್ರಮೆನ್ ಕಡಪುಡ್ದು ಆ ಸುಳ್ಳುನು ನಂಬಿಯೆರೆ ಅಕ್ಲೆನ್ ಬುಡ್ಪೆ. 12 ಉಂದೆಡ್ದ್ ಅಕುಲು ಸತ್ಯೊನು ನಂಬಂದೆ, ಇಂಚಿನ ಅನ್ಯಾಯೊಡು ಸಂತೋಷ ಮಲ್ಪುನಾಕುಲಾದ್ ನ್ಯಾಯತೀರ್ಪುಗು ಗುರಿ ಆಪೆರ್. ರಕ್ಷಣೆಗಾದ್ ನಿಕುಲು ಅಜತ್‌ದಿನಾಕುಲು 13 ಆಂಡ ಕರ್ತವಗ್ ಪ್ರೀತಿ ಇತ್ತಿ ಸಹೋದ್ರೆರೇ, ದೇವೆರ್ ಸುರುಡ್ದು ನಿಕ್ಲೆನ್ ಪರಿಶುದ್ಧಾತ್ಮಡ್ ಶುದ್ಧ ಮಲ್ತ್‌ದ್ ಸತ್ಯದ ನಂಬಿಕೆಡ್ ತಿಕ್ಕು ರಕ್ಷಣೆಗ್ ಆದಿಡ್ದ್ ಅಜತ್‌ದ್ ದೆತ್ತೊಂಡಿನೆಡ್ದ್ ಎಂಕುಲು ನಿಕ್ಲೆನ ಸಂಗತಿಡ್ ದೇವೆರೆಗ್ ಏಪಲಾ ಉಪಕಾರ ಮಲ್ಪುನವು ಅಗತ್ಯ ಆದುಂಡು. 14 ಎಂಕ್ಲೆನ ಸುವಾರ್ತೆಡ್ದ್ ದೇವೆರ್ ನಿಕ್ಲೆನ್ ರಕ್ಷಣೆಗ್ ಲೆತ್ತೆ, ಐಡ್ದಾವರ ನಿಕುಲು ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಮೈಮೆಡ್ ಪಾಲ್‌ದಾರೆರಾದುಲ್ಲರ್. 15 ಅಂಚಾದ್ ಸಹೋದ್ರೆರೇ, ನಿಕುಲು ಎಂಕುಲೆ ಪಾತೆರೊಡ್ದುಲಾ ಪತ್ರಿಕೆಡ್ದ್‌ಲಾ ನಿಕ್ಲೆಗ್ ಕಲ್ಪಾದಿನ ಸತ್ಯೊನು ಪತ್ತೊಂದು ಐತ ಮಿತ್ತ್ ಗಟ್ಟಿಯಾದ್ ಉಂತುಲೆ. 16 ನಮ ಅಮ್ಮೆ ಆದುಪ್ಪು ದೇವೆರ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆಲಾ ನಮನ್ ಮಸ್ತ್ ಪ್ರೀತಿ ಮಲ್ತ್‌ದ್ ದಯೊಟು ನಂಕ್ ನಿತ್ಯದ ಆಧಾರಣೆನ್ಲಾ, ಎಡ್ಡೆ ನಿರೀಕ್ಷೆನ್ಲಾ ಕೊರ್ದು 17 ನಿಕ್ಲೆನ ಉಡಲ್‌ನ್ ಸಂತೈಸಿದ್ ಮಾತ ಎಡ್ಡೆ ಕೆಲಸೊಡ್ಲಾ ಪಾತೆರೊಡ್ಲಾ ಗಟ್ಟಿ ಮಲ್ಪಡ್. |
New Life Literature