2 ಪೇತ್ರೆ 3 - ಪೊಸ ಒಡಂಬಡಿಕೆ

ಕರ್ತವೆ ಕುಡೊರ ಬರ್ಪಿನ ವಾಗ್ದಾನ

¹ ಪ್ರೀತಿದಾಕುಲೇ, ನಿಕ್ಲೆಗ್ ಇತ್ತೆ ಬರೆಪಿನವು ರಡ್ಡನೆ ಪತ್ರಿಕೆ. ಈ ರಡ್ಡ್ ಪತ್ರಿಕೆಡ್ಲಾ ಯಾನ್ ನಿಕ್ಲೆನ ಕಪಟದಾಂತಿ ಉಡಲ್‌ನ್ ಉತ್ತೇಜನ ಮಲ್ತೊಂದುಲ್ಲೆ.

² ಪರಿಶುದ್ಧ ಪ್ರವಾದಿಲು ದುಂಬು ಪಂಡಿ ಪಾತೆರೊಲೆನ್ ಬೊಕ್ಕ ಕರ್ತವೆಲಾ ರಕ್ಷಕೆಲಾ ಆಯಿನಾಯೆ ನಿಕ್ಲೆಗ್‌ ಅಪೊಸ್ತಲೆರೆಡ್ದ್ ಕೊರ್ತಿನ ಅಪ್ಪಣೆನ್ಲಾ ನಿಕುಲು ನೆನೆಪು ಮಲ್ತೊಂದುಪ್ಪುಲೆ.

³ ದುಂಬತ್ತ ಉಂದೆನ್ ತೆರಿಯೊನ್ಲೆ, ಕಡೆ ದಿನೊಕುಲೆಡ್ ತನ್ಕುಲೆ ಹಾಳ್ ಆಸೆದ ಲೆಕ್ಕ ನಡಪುನ ಚೇಷ್ಠೆಗಾರೆರ್ ಮಸ್ಕಿರಿ ಮಲ್ತೊಂದು ತೋಜಿದ್ ಬರುವೆರ್.

⁴ “ಯೇಸು ಕುಡೊರ ಬರ್ಪಿನ ವಾಗ್ದಾನ ದಾನೆ ಆಂಡ್? ನಮ ಅಮ್ಮಾಡ್ಲು ನಿದ್ರೆ ಮಲ್ತ್‌ದಿನ ದಿನೊಡ್ದಿಂಚಿ ಇನಿ ಮುಟ್ಟಲಾ ಲೋಕ ಆದಿಡ್ದ್ ಇತ್ತಿಲೆಕ್ಕನೆ ಉಂಡತ್ತಾ?” ಅಂದ್‌ದ್ ಪನುವೆರ್.

⁵ ಆದಿಡ್ ಇತ್ತಿನ ಭೂಮ್ಯಾಕಾಶೊಲು ದೇವೆರೆ ವಾಕ್ಯೊಡ್ದು ನೀರ್‌ಡ್ ಉಂಡಾದ್, ಆ ನೀರ್‌ಡೇ ಉಂತುದಿನೆನ್, ಅಕುಲು ತೆರಿದಿತ್ತ್ಂಡಲಾ ಬೋಡಂದ್ದೇ ಮದತ್‌ದ್ ಬುಡ್ಪೆರ್.

⁶ ಆ ನೀರ್‌ಡ್ದೇ ಆ ಕಾಲೊಡು ಜಲಪ್ರಳಯೊಡು ಲೋಕ ನಾಶ ಆದ್ ಪೋಂಡು.

⁷ ಆಂಡ ಇತ್ತೆ ಉಪ್ಪು ಭೂಮ್ಯಾಕಾಶೊಲು ಅವ್ವೇ ವಾಕ್ಯದ ಬಲೊಡ್ದು ತೂಟು ನಾಶ ಆವೆರೆಗಾದ್ ದೀತಿನಾದುಂಡು. ಅವು ನ್ಯಾಯತೀರ್ಪುದ ದಿನೊಕಾದ್ ಬೊಕ್ಕ ದೇವೆರೆ ಭಕ್ತಿದಾಂತಿನಾಕುಲೆನ ನಾಶನೊಗಾದ್ ದೀತ್ತ್ಂಡ್.

⁸ ಪ್ರೀತಿದಾಕುಲೇ, ಕರ್ತವಗ್ ಒಂಜಿ ದಿನ ಸಾರ ವರ್ಸದ ಲೆಕ್ಕಲಾ, ಸಾರ ವರ್ಸೊಲು ಒಂಜಿ ದಿನತ ಲೆಕ್ಕಲಾ ಉಂಡು ಇನ್ಪಿನೆನ್ ಮಾತ್ರ ಮದಪಡೆ.

⁹ ಕರ್ತವೆ ತಾನ್ ಮಲ್ತಿ ವಾಗ್ದಾನೊನು ತೀರಿಸಾವೆರೆ ತಡ ಮಲ್ಪುವೆ ಅಂದ್‌ದ್ ಕೆಲೆವೆರ್ ಅರ್ಥ ಮಲ್ತೊನುಲೆಕ್ಕ ಆಯೆ ತಡ ಮಲ್ಪುನಾಯೆ ಅತ್ತ್. ಏರ್ಲಾ ನಾಶ ಆಪಿನೆಟ್ಟ್ ಆಯಗ್ ಮನಸಿಜ್ಜಿ. ಮಾತೆರ್ಲಾ ಪಶ್ಚಾತಾಪ ಪಡೆವೊಡು ಅಂದ್‌ದ್ ಮನಸಿತ್ತಿನಾಯೆ ಆದ್, ನಿಕ್ಲೆನ ಸಂಗತಿಡ್ ದಿಂಜ ತಾಳ್ಮೆಡ್ ಉಲ್ಲೆ.

¹⁰ ಆಂಡ ಕಲ್ವೆ ಬರ್ಪಿಲೆಕ್ಕನೇ, ಕರ್ತವ ದಿನಲ ಬರ್ಪುಂಡು. ಆ ದಿನೊಟು ಬಾನೊಲು ಮಲ್ಲ ಗೌಜಿಡ್ದ್ ಆಳಿದ್ ಪೋವು. ಸೂರ್ಯೆ, ಚಂದ್ರೆ, ನಕ್ಷತ್ರೊಲು ಪೊತ್ತುದು ನಾಶಾದ್ ಪೋವು, ಭೂಮಿಲಾ ಐಟ್ಟುಪ್ಪು ಮಾತ ಕೆಲಸೊಲು ಪೊತ್ತುದು ಪೋವು.

^11-12 ಉಂದು ಮಾತ ಕೆಲಸೊಲು ಇಂಚ ಲಯ ಆದ್ ಪೋಪಿನೆಡ್ದಾವರ ನಿಕುಲು ದೇವೆರೆ ದಿನ ಬರ್ಪಿನೆನ್ ಕಾತೊಂದು ಸಾದಿನ್ ತೂವೊಂದು ಪರಿಶುದ್ಧ ನಡತೆಡ್ಲಾ ಭಕ್ತಿಡ್ಲಾ ದಿಂಜಿದುಪ್ಪೊಡತ್ತಾ. ಆ ದಿನೊಟು ಬಾನೊಲು ತೂ ಪತ್ತ್‌ದ್ ನಾಶಾದ್ ಪೋವು. ಸೂರ್ಯೆ, ಚಂದ್ರೆ, ನಕ್ಷತ್ರೊಲು ಪೊತ್ತುದು ಕರದ್ ಪೋವು.

¹³ ಆಂಡ ನಮ ದೇವೆರೆ ವಾಗ್ದಾನೊನು ನಂಬೊಂದು ಪೊಸ ಬಾನೊನ್ಲಾ ಪೊಸ ಭೂಮಿನ್ಲಾ ಎದುರು ತೂವೊಂದುಲ್ಲ. ಐಟ್ಟ್ ದೇವೆರೆ ನೀತಿ ನಿಲೆ ಆದುಂಡು.

¹⁴ ಅಂಚಾಯಿನೆಡ್ದ್ ಪ್ರೀತಿದಾಕುಲೇ, ನಿಕುಲು ಉಂದೆನ್ ಮಾತ ಎದುರು ತೂಪಿನಾಕುಲು ಆದುಪ್ಪುನೆಡ್ದ್ ಆಯ ದುಂಬು ಸಮಾಧಾನೊಡು ಶುದ್ಧದಾಕುಲುಲಾ ದೋಷದಾಂತಿನಾಕುಲುಲಾ ಆದ್ ತೋಜಿದ್ ಬರ್ಪಿಲೆಕ್ಕ ಪೇಚಾಡ್ಲೆ.

¹⁵ ನಮ ಕರ್ತವನ ದಿಂಜ ತಾಳ್ಮೆ ಎಂಕುಲೆ ರಕ್ಷಣೆಗ್ ಬೋಡಾದ್ ಉಂಡು ಅಂದ್‌ದ್ ಎನ್ನ್‌ಲೆ. ಉಂದೇ ಆಲೋಚನೆಡ್ ಎಂಕುಲೆ ಪ್ರೀತಿದ ಸಹೋದರೆ ಪೌಲುಲಾ ತನ್ಕ್ ದೇವೆರ್ ಕೊರ್ತಿನ ಗೇನೊಗು ಸರಿ ಆದ್ ನಿಕ್ಲೆಗ್ ಬರೆಯೆ.

¹⁶ ಆಯೆ ತನ ಮಾತ ಪತ್ರಿಕೆಡ್ಲಾ ಈ ವಿಚಾರೊಡು ಬರೆನಗ ಇಂಚ ಪಂಡೆ, ಆ ಪತ್ರಿಕೆಲೆಡುಪ್ಪು ಕೆಲವು ಪಾತೆರೊಲು ತೆರಿಯೊನಿಯೆರೆ ಕಷ್ಟ ಉಂಡು. ತೆರಿಯಂದಿನಾಕುಲುಲಾ ಚಂಚಲ ಮನಸ್‌ದಾಕುಲುಲಾ ಬೇತೆ ಶಾಸ್ತ್ರೊಲೆಗ್ ಎಂಚ ತಪ್ಪು ಅರ್ಥ ಮಲ್ತೊಂಡೆರಾ ಅಂಚೆನೆ ಉಂದೆಕ್ಲಾ ತಪ್ಪು ಅರ್ಥ ಮಲ್ತೊಂದು ತನ್ಕುಲೆಗೇ ನಾಶನೊನು ಬರ್ಪಾವೊನ್ವೆರ್.

¹⁷ ಅಂಚಾಯಿನೆಡ್ದ್ ಪ್ರೀತಿದಾಕುಲೇ, ನಿಕುಲು ಈ ಸಂಗತಿಲೆನ್ ದುಂಬೇ ತೆರಿದಿನೆಡ್ದಾವರ ದುಷ್ಟೆರೆ ಮೋಸೊಡು ತಿಕೊಂದು ದೃಢವಾಯಿನ ನಂಬಿಕೆನ್ ಬುಡ್ದು ಪಿರ ಬೂರಂದಿಲೆಕ್ಕ ನಿಕ್ಲೆನ್ ಕಾತೊನ್ಲೆ.

¹⁸ ಆಂಡ ನಮ ಕರ್ತವೆಲಾ ರಕ್ಷಕೆಲಾ ಆದುಪ್ಪು ಯೇಸು ಕ್ರಿಸ್ತನ ದಯೊಟುಲಾ ಗೇನೊಡುಲಾ ಬಲಪುಲೆ, ಆಯಗ್ ಇತ್ತೆಲಾ ಏನಿತ್ಯೇನಿಗ್ಲಾ ಮೈಮೆ ಆವಡ್, ಆಮೆನ್.