2 ಪೇತ್ರೆ 2 - ಪೊಸ ಒಡಂಬಡಿಕೆಸುಳ್ಳು ಬೋಧಕೆರ್ 1 ಇಸ್ರಾಯೇಲ್ ಜನೊಕುಲೆ ನಡುಟು ಸುಳ್ಳು ಪ್ರವಾದಿಲು ಇತ್ತಿಲೆಕ್ಕ ನಿಕ್ಲೆ ನಡುಟ್ಲಾ ಸುಳ್ಳು ಬೋಧಕೆರ್ ಉಪ್ಪೆರ್. ಅಕುಲು ನಾಶನೊಗು ನಡಪುಡುನ ದುರ್ಬೋಧನೆಲೆನ್ ಗುಟ್ಟುಡು ಕಲ್ಪಾವೆರ್. ತನ್ಕುಲೆನ್ ಕ್ರಯೊಕು ದೆತ್ತೊಂದಿ ಯಜಮಾನನ್ಲಾ ಅರೆಂಜುನಾಕುಲಾದುಲ್ಲೆರ್. ಈ ರೀತಿಡ್ ತನ್ಕುಲೆ ಮಿತ್ತ್ ನಾಶನೊನು ಬೇಗನೆ ಬರ್ಪಾವೊನ್ವೆರ್. 2 ಅಕ್ಲೆನ ನಾಶನದ ಬೋಧನೆಲೆನ್ಲಾ ನಾಚಿಗೆದ ಕಾರ್ಯೊಲೆನ್ಲಾ ಮಸ್ತ್ ಜನ ಬೆರಿ ಪತ್ತುವೆರ್, ಬೊಕ್ಕ ಈ ಬೋಧಕೆರೆಡ್ದಾದ್ ಸತ್ಯದ ಮಾರ್ಗೊಗು ದೂಷಣೆ ಆಪುಂಡು. 3 ಅಕುಲು ದುರಾಶೆಡ್ ಕೂಡ್ದಿನಕುಲಾದ್ ನಿಕ್ಲೆನ ದುಡ್ಡುನು ಒಯ್ಪೆರೆಗಾದ್ ಸುಳ್ಳುನು ಕಲ್ಪನೆ ಮಲ್ತ್‌ದ್ ಪನ್ಪೆರ್, ಆಂಡ ದೇವೆರ್ ಅಕ್ಲೆನ್ ಏಪನೇ ದೋಷಿಲಂದ್‌ದ್ ನ್ಯಾಯತೀರ್ಪು ಮಲ್ತ್‌ದೆ. ಬೊಕ್ಕ ಅಕ್ಲೆನ ನಾಶನ ತಡದಾಂತೆ ಬರ್ಪುಂಡು. 4 ದಾಯೆಗಂದ್ಂಡ, ದೇವೆರ್ ಪಾಪ ಮಲ್ತಿನ ದೂತೆರೆನ್ಲಾ ಬುಡ್ತುಜೆ. ಆಯೆ ಅಕ್ಲೆನ್ ಸಂಕಲೆಡ್ ಕಟ್ಟ್‌ದ್ ನರಕೊಗು ಕತ್ತಲೆದ ಗುಂಡಿಗ್ ಪಾಡಿಯೆ. ಅಲ್ಪ ಅಕುಲು ನ್ಯಾಯತೀರ್ಪುದ ದಿನೊನು ಕಾತೊಂದುಲ್ಲೆರ್. 5 ಬೊಕ್ಕ ದೇವೆರ್ ಆದಿಡ್ ಭಕ್ತಿದಾಂತಿನ ಲೋಕೊನ್ಲಾ ಅಂಚೆನೇ ಬುಡಂದೆ ಅಕ್ಲೆ ಮಿತ್ತ್ ಜಲಪ್ರಳಯ ಬರ್ಪಿಲೆಕ್ಕ ಮಲ್ತೆ. ಆಂಡ ನೀತಿನ್ ಸಾರಿನ ನೋಹನ್ಲಾ ಆಯನ ಕುಟುಂಬಡೊಪ್ಪ ಒರಿದಿ ಏಳ್ ಜನೊಕುಲೆನ್ ಮಾತ್ರ ಒರಿಪಾಯೆ. 6 ದೇವೆರ್ ಸೋದೋಮು ಗೊಮೋರ ಪಟ್ಟಣೊಲೆಗ್ ತೀರ್ಪು ಕೊರ್ದು ಅಕ್ಲೆನ್ ಪೊತ್ತಾದ್ ಬೊನ್ಯ ಮಲ್ತೆ. ಭಕ್ತಿದಾಂತಿನಾಕುಲೆಗ್ ಆಪಿನ ಅವಸ್ಥೆ ದಾನೆ ಆವು ಇನ್ಪಿನೆಕ್ಕ್ ಅಕ್ಲೆನ್ ಒಂಜಿ ಮಾದ್ರಿ ಆದ್ ಮಲ್ತೆ. 7 ಆಂಡ ಅವ್ವೇ ಸಂಧರ್ಬೊಡು ಆ ದುಷ್ಟೆರೆ ನಾಚಿಗೆದಾಂತಿನ ಸ್ವಭಾವೊಡ್ದು ದುಃಖೊಡಿತ್ತಿ ನೀತಿವಂತೆ ಆಯಿ ಲೋಟನ್ ಐಡ್ದ್ ತಪ್ಪಾಯೆ. 8 ದಾಯೆಗಂದ್ಂಡ, ಆ ನೀತಿವಂತೆ ಅಕ್ಲೆ ನಡುಟುಪ್ಪುನಗ ತಾನ್ ದಿನಾಲ ತೂಪಿನ, ಕೇನುನ ಅನ್ಯಾಯ ಕೆಲಸೊಲೆಡ್ದಾದ್ ನೀತಿವಂತೆ ಆದುಪ್ಪು ಲೋಟನ ಉಡಲ್‌ಗ್ ದುಃಖ ಆವೊಂದಿತ್ತ್ಂಡ್ 9 ಕರ್ತವೆ ಭಕ್ತೆರೆನ್ ಶೋಧನೆಡ್ದ್ ಒರಿಪಾವೆರೆಗ್ಲಾ ನೀತಿಕೆಟ್ಟಿನಾಕುಲೆಗ್ ಶಿಕ್ಷೆ ಕೊರಿಯೆರೆಗಾದ್ ಕಡೆ ನ್ಯಾಯತೀರ್ಪುದ ದಿನ ಮುಟ್ಟ ದೀವೆರೆಗ್ಲಾ ತೆರಿದಿನಾಯೆ ಆದುಲ್ಲೆ. 10 ಮುಖ್ಯಾದ್ ಬಂಡ್‌ತನೊನು ಆಸೆ ಮಲ್ತೊಂದು ಈ ಶರೀರದ ಇಚ್ಚೆ ಆಸೆಲೆಗ್ ಬೋಡಾದ್ ಬದ್‌ಕ್‌ದ್ ದೇವೆರೆನ ಅಧಿಕಾರೊನು ಅಸಡ್ಡೆ ಮಲ್ಪುನಾಕುಲೆಗ್ ಈ ರೀತಿ ಶಿಕ್ಷೆ ಕೊರ್ಪೆ. ಇಂಚಿತ್ತಿನಾಕುಲು ಏರೆಗ್ಲಾ ಪೋಡಿಯಂದೆ ಕುಸಿ ಬತ್ತಿಲೆಕ್ಕ ನಡಪುನಾಕುಲಾದ್ ಮೈಮೆದ ಜಾಗ್‌ಡಿತ್ತಿನಾಕುಲೆನ್ ಪೋಡಿಗೆದಾಂತೆ ದೂಷಿಪುವೆರ್. 11 ದೂತೆರ್ ಶಕ್ತಿಡ್ಲಾ ಬಲೊಟ್ಲಾ ಆ ಸುಳ್ಳು ಪ್ರವಾದಿಲೆಡ್ದ್ ಶ್ರೇಷ್ಠದಾಕುಲು ಆದಿತ್ತ್‌ಂಡಲಾ ಕರ್ತವನ ಎದುರು ಉಂತುನಗ ಅಕ್ಲೆನ್ ದೂಷಿದ್ ತೀರ್ಪು ಮಲ್ಪುಜೆರ್. 12 ಆಂಡ ಸ್ವಾಭಾವಿಕ ಆದ್ ಬೋಂಟೆಗ್ಲಾ ಕೆರಿಯೆರೆಗ್ಲಾ ಪುಟ್ಟುದಿನ ಬುದ್ಧಿದಾಂತಿನ ಪ್ರಾಣಿಲೆಕ್ಕ ಈ ದುರ್ಮಾರ್ಗೊಡು ಉಪ್ಪುನಾಕುಲು ತನ್ಕುಲೆಗ್ ತೆರಿಯಂದಿ ವಿಚಾರೊಡು ದೂಷಣೆ ಮಲ್ತೊಂದುಪ್ಪುವೆರ್. ಮೊಕುಲು ತನ್ಕುಲೆ ಹಾಳ್‌ತನೊಡ್ದಾದ್ ತನ್ಕುಲೇ ಹಾಳಾದ್ ಪೋಪೆರ್. 13 ಅಕುಲು ಬಜೀ ವೈಭೋಗೊಡು ಪಗೆಲ್‌ನ್ ಕಳೆವುನೇ ಸುಖ ಅಂದ್‌ದ್ ಎನ್ನುನಾಕುಲಾದುಲ್ಲೆರ್. ಮೊಕುಲು ನಿಕ್ಲೆಡೊಪ್ಪ ಲೇಸ್‌ಡ್ ಸೇರ್ದುಪ್ಪುನಗ ಅಕುಲು ದಗಲ್‌ಬಾಜಿಲು ಆದಿತ್ತ್‌ದ್ ಉನ್ಪಿನೆಟ್ಟ್ ಪರ್ಪಿನೆಟ್ಟ್ ಕುರೆಪಟ್ಟ್‌ಗ್ಲಾ ಅನ್ಯಾಯೊಗ್ಲಾ ಕಾರಣ ಆದುಪ್ಪುವೆರ್. 14 ಅಕುಲು ಕಣ್ಣ್ ದೃಷ್ಟಿಡೇ ವ್ಯಭಿಚಾರ ಮಲ್ಪುನಾಕುಲು, ಅಕ್ಲೆನ ಪಾಪದ ಆಸೆಗ್ ತೃಪ್ತಿಯೇ ಆವಂದ್, ಸ್ಥಿರದಾಂತಿನಾಕುಲೆನ್ ತಿಕ್ಕಾದ್ ಪಾಡುನಾಕುಲು, ದುಡ್ಡುದ ಆಸೆಡ್ ಮುರ್ಕುಪೋತಿ ಉಡಲ್‌ದಾಕುಲು, ಶಾಪದ ಬಾಲೆಲು ಆದುಲ್ಲೆರ್. 15 ಅಕುಲು ಸರ್ತ ಸಾದಿಡ್ದ್ ತೇಲಾದ್ ಬೆಯೋರನ ಮಗೆ ಬಿಳಾಮನ ಮಾರ್ಗೊಡು ಸಾಗ್‌ದ್ ತತ್ತ್‌ದ್ ಪೋತೆರ್. ಈ ಬಿಳಾಮೆ ಅನ್ಯಾಯೊಡು ತಿಕ್ಕುನ ದುಡ್ಡುನು ಪ್ರೀತಿ ಮಲ್ತೆ. 16 ಆಂಡ ಆಯನ ಅಕ್ರಮೊಗು ಖಂಡನೆ ಆಂಡ್. ಬಾಯಿಬರಂದಿ ಕತ್ತೆ ನರಮಾನಿ ಸ್ವರೊಟ್ಟು ಪಾತೆರ್‌ದ್ ಆ ಪ್ರವಾದಿನ ಮರ್ಲ್ ಬುದ್ಧಿಗ್ ಅಡ್ಡಿ ಮಲ್ತ್ಂಡ್. 17 ಇಂಚಿತ್ತಿನಾಕುಲು ನೀರ್‌ದಾಂತಿ ಗುವೆಲ್‌ದಲೆಕ್ಕಲಾ ಬಿರುಗಾಳಿಡ್ ರಾದ್ ಪೋಪಿ ಮುಗಲ್ಲಾ ಆದುಲ್ಲೆರ್. ಇಂಚಿತ್ತಿನಾಕುಲೆನ ಪಾಲ್‌ಗ್ ಗರ್ಗಂಡ ಕತ್ತಲೆ ದೀತ್ತ್ಂಡ್. 18 ತಪ್ಪು ಸಾದಿಡ್ ನಡಪುನಾಕುಲೆನ ಸಹವಾಸೊಡ್ದು ಇಂಚೊಗು ತಪ್ಪಾವೊಂಡಿನಾಕುಲೆನ ಒಟ್ಟುಗು, ಮೊಕುಲು ಬಂಡ್ ಪಾತೆರೊಂದು, ಮಲ್ಲ ಮಲ್ಲ ಬಂಟ್‌ನ್ ಪುಗರೊಂದು, ಶರೀರದಾಶೆನ್ ಪುಟ್ಟಾದ್ ಅಕ್ಲೆನ್ ತಿಕ್ಕಾವೆರ್. 19 ಅಕ್ಲೆಗ್ ಸ್ವತಂತ್ರ ಕೊರ್ಪಾವ ಅಂದ್‌ದ್ ವಾಗ್ದಾನ ಮಲ್ಪುವೆರ್, ಆಂಡ ತನ್ಕುಲು ಸ್ವತಃ ಪಡಿಕೆಂತಿನೆತ್ತ ಗುಲಾಮೆರಾದುಲ್ಲೆರ್. ಏರಾಂಡಲಾ ಒರಿ ಒಯಿಕ್ ಸೋತು ಪೋದುಪ್ಪುವೆನಾ ಆಯೆ ಐತ ಗುಲಾಮೆ ಆದುಪ್ಪುವೆ. 20 ಕರ್ತವೆಲಾ ರಕ್ಷಕೆಲಾ ಆದುಪ್ಪು ಯೇಸು ಕ್ರಿಸ್ತನ ಗೇನೊನು ಪಡೆವೊಂದು ಲೋಕದ ಕುರೆಪಟ್ಟ್‌ಗ್ ತಪ್ಪಾವೊಂಡಿನಾಕುಲು ಕುಡ ಐಟ್ಟ್ ರೆಂಕೊಂದು ಸೋತು ಪೋಪೆರ್ಡ ಅಕ್ಲೆನ ಕಡೆತ ಸ್ಥಿತಿ ದುಂಬುದೆಡ್ದ್‌ಲಾ ಹೆಚ್ಚ್ ಹಾಳ್ ಆವು. 21 ಅಕುಲು ಆ ನೀತಿದ ಸಾದಿನ್ ತೆರಿಯೊಂದು ತನ್ಕುಲೆಗ್ ನೇಮಕ ಆತಿ ಪರಿಶುದ್ಧ ಅಪ್ಪಣೆಡ್ದ್ ತೇಲಾದ್ ಪೋಪಿನೆಡ್ದ್ ಆ ಸಾದಿನ್ ತೆರಿಯಂದೆ ಉಪ್ಪುನವೇ ಅಕ್ಲೆಗ್ ಎಡ್ಡೆ ಆದಿತ್ತುದು. 22 “ನಾಯಿ ತಾನ್ ಕಕ್ಕಿನೆನ್ ತಿನಿಯೆರೆ ಪಿರ ತಿರ್ಗುಂಡು” ಬೊಕ್ಕ “ದೆಕ್ಕ್‌ದಿ ಪಂಜಿ ಕೆಸರ್‌ಡ್ ಪಿರ ಪೊರೆಲೆರೆ ಪೋಪುಂಡು,” ಇನ್ಪಿ ಸತ್ಯ ಗಾದೆಗ್ ಸಮ ಆದ್ ನಡಪುನಾಕುಲು ಆಯೆರ್. |
New Life Literature