2 ಯೋಹಾನೆ 1 - ಪೊಸ ಒಡಂಬಡಿಕೆ

^1-2 ಸಭಾ ಹಿರಿಯಾಯೆ ಆದುಪ್ಪು ಯಾನ್ ದೇವೆರೆಡ್ದ್ ಅಜತ್‌ದಿನ ಅಪ್ಪಿಯಗ್ಲಾ ಆಲೆನ ಜೋಕುಲೆಗ್ಲಾ, ಈ ಪತ್ರಿಕೆನ್ ಬರೆವೊಂದುಲ್ಲೆ. ಯಾನ್ ನಿಕ್ಲೆನ್ ಸತ್ಯೊಡು ಪ್ರೀತಿ ಮಲ್ತೊಂದುಲ್ಲೆ, ಅತ್ತಂದೆ ಸತ್ಯೊನು ತೆರಿನ ಮಾತೆರ್ಲಾ ನಿಕ್ಲೆನ್ ಪ್ರೀತಿ ಮಲ್ಪುವೆರ್. ದಾಯೆಗಂದ್ಂಡ ಸತ್ಯ ನಮಡ ಉಂಡು, ಬೊಕ್ಕ ನಮ ಒಟ್ಟುಗು ಏಪೊಗ್ಲಾ ಉಪ್ಪುಂಡು.

³ ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ, ಆ ಅಮ್ಮೆ ಮಗೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ದಯಲಾ, ಕರುಣೆಲಾ, ಸಮಾಧಾನಲಾ ನಮಡೊಪ್ಪ ಸತ್ಯೊಡ್ಲಾ ಪ್ರೀತಿಡ್ಲಾ ನಿಲೆ ಆದುಪ್ಪಡ್.

ಸತ್ಯ ಬೊಕ್ಕ ಪ್ರೀತಿ

⁴ ಅಮ್ಮೆರೆಡ್ದ್ ನಂಕ್ ಅಪ್ಪಣೆ ಆಯಿಲೆಕ್ಕನೇ, ಸತ್ಯೊಡು ನಡತೊನುನಾಕುಲು ನಿನ ಜೋಕುಲೆಡ್ ಎಂಕ್ ತೂವೆರೆ ತಿಕ್ಕಿನೆಡ್ದ್ ಎಂಕ್ ದಿಂಜ ಸಂತೋಷ ಆಂಡ್.

⁵ ಪ್ರೀತಿದ ಅಪ್ಪೆ, ನಮ ಒರಿಯನ್ ಒರಿ ಪ್ರೀತಿ ಮಲ್ಪೊಡು ಅಂದ್‌ದ್ ಕುಡ ನೆನೆಪು ಪುಟ್ಟಾವೆರೆಗಾದ್ ಯಾನ್ ಉಂದೆನ್ ಬರೆವೊಂದುಲ್ಲೆ. ಉಂದು ಒಂಜಿ ಪೊಸ ಅಪ್ಪಣೆ ಅತ್ತ್, ನಮ ದುಂಬುಡ್ದಿಂಚಿ ಕೇಂಡಿನವೇ ಆದುಂಡು.

⁶ ನಮ ದೇವೆರೆ ಅಪ್ಪಣೆಗ್ ಸರಿಯಾದ್ ನಡಪುನವೇ ಆಯನ್ ಪ್ರೀತಿ ಮಲ್ಪುನವು ಆದುಂಡು. ಬೊಕ್ಕ ಒರಿಯನ್ ಒರಿ ಪ್ರೀತಿ ಮಲ್ಪೊಡಂದ್‌ದೇ ನಿಕುಲು ದುಂಬುಡ್ದಿಂಚಿ ಕೇಂಡಿನ ಅಪ್ಪಣೆ ಆದುಂಡು.

⁷ ಯೇಸು ಕ್ರಿಸ್ತೆ ಶರೀರೊಡು ಬೈದೆ ಇನ್ಪಿನೆನ್ ಅರಿಕೆ ಮಲ್ಪಂದಿ ಮಸ್ತ್ ಮಂದಿ ಮೋಸಗಾರೆರ್ ಲೋಕೊಗು ಪಿದಾಡಿಯೆರ್. ಅಕುಲು ಮೋಸಗಾರೆರ್‌ಲಾ, ಕ್ರಿಸ್ತ ವಿರೋಧಿಲುಲಾ ಆದುಲ್ಲೆರ್.

⁸ ಎಂಕುಲು ಕಷ್ಟ ಮಲ್ತಿನವು ನಷ್ಟ ಆದ್ ಪೋವಂದಿಲೆಕ್ಕ ನಿಕುಲು ಜಾಗ್ರತೆಡುಪ್ಪುಲೆ. ನಿಕುಲು ಪೂರ್ತಿ ಉಡಿಗೆರೆ ತಿಕ್ಕುಲೆಕ್ಕ ಬುಡಂದೆ ಬೆನ್ಲೆ.

⁹ ಏರಾಂಡಲಾ ಕ್ರಿಸ್ತನ ಬೋಧನೆಗ್ ಸರಿಯಾದ್ ನಡಪಂದೆ ದೂರ ಪೋಯೆಡ ಆಯಡ ದೇವೆರ್ ಉಪ್ಪುಜೆ. ಆಂಡ ಕ್ರಿಸ್ತನ ಬೋಧನೆಗ್ ಸರಿಯಾದ್ ನಡಪುನಾಯಡ ಅಮ್ಮೆಲಾ ಉಲ್ಲೆ ಮಗೆಲಾ ಉಲ್ಲೆ.

¹⁰ ಈ ಬೋಧನೆಗ್ ಸರಿಯಾದ್ ನಡಪಂದಿನಾಯೆ ಏರ್ಲಾ ಒರಿ ನಿಕ್ಲೆ ಕೈತಲ್‌ಗ್ ಬರ್ಪೆಡ, ಆಯನ್ ನಿಕ್ಲೆ ಇಲ್ಲಗ್ ಸೇರಾವೊನೊಡ್ಚಿ.

¹¹ ಅಂಚಿತ್ತಿನಾಯಗ್ ಎಡ್ಡೆ ಆವಡ್ ಪಂಡ್ದ್ ಪನ್ಪಿನಾಯೆ ಆಯನ ಹಾಳ್ ಕೆಲಸೊಡು ಪಾಲ್‌ದಾರೆ ಆದುಪ್ಪುವೆ.

ಕಡೆತ ಪಾತೆರೊಲು

¹² ನಿಕ್ಕ್ ಬರೆವೆರೆ ಎಂಕ್ ಮಸ್ತ್ ಸಂಗತಿಲು ಇತ್ತ್ಂಡಲಾ, ಅವೆನ್ ಶಾಯಿಡ್ಲಾ ಪತ್ರಿಕೆಡ್ಲಾ ಬರೆವೆರೆ ಎಂಕ್ ಮನಸ್ ಇಜ್ಜಿ. ಆಂಡ ಯಾನ್ ನಿಕ್ಲೆ ಕೈತಲ್‌ ಬರ್ಪಿನ ಭರವಸ ಎಂಕುಂಡು. ನಿಕ್ಲೆಡೊಪ್ಪ ಎದುರೆದುರಾದ್ ಕುಲ್ಲುದು ಪಾತೆರ್‌ವೆ. ಅಪಗ ನಮ ಸಂತೋಷ ಪೂರ್ತಿ ಆವು.

¹³ ದೇವೆರೆಡ್ದ್ ಅಜತ್‌ದಿನ ನಿನ ಸಹೋದ್ರಿನ ಜೋಕುಲುಲಾ ನಿಕ್ಕ್ ವಂದನೆ ಪನ್ಪೆರ್.