2 ಕೊರಿಂಥ್ಯೆರೆಗ್ 8 - ಪೊಸ ಒಡಂಬಡಿಕೆಬಡ ಕ್ರೈಸ್ತೆರ್ ಕೊರ್ಪಿನ ಸಹಾಯ 1 ಬೊಕ್ಕ ಸಹೋದ್ರೆರೇ, ಮಕೆದೋನ್ಯೊದ ಸಭೆತಾಕುಲು ಪಡೆತಿನ ದೇವೆರೆ ದಯತ ಸಂಗತಿಡ್ ನಿಕ್ಲೆಗ್ ತೆರಿಪಾವೆ, 2 ಅಕ್ಲೆಗ್ ಮಸ್ತ್ ಭಂಗ ಇತ್ತ್ಂಡಲಾ ಅಕ್ಲೆಡ ಸಂತೋಷ ದಿಂಜಿದಿತ್ತಿನೆಡ್ದ್ ಬಡತನದ ಮದ್ಯೊಡ್ಲಾ ಎಡ್ಡೆ ಮನಸ್‌ಡ್ ಕೊರಿಯೆರ್. 3 ತನ್ಕುಲೆಗ್ ಸಾದ್ಯ ಆಪಿನಾತ್ ಮಾತ್ರತ್ತಂದೆ ಅವ್ವೆಡ್ದ್‌ಲಾ ಹೆಚ್ಚಾದ್ ಶಕ್ತಿ ಮೀರ್‌ದ್ ತನ್ಕುಲಾದೇ ಕೊರಿಯೆರ್. ಉಂದೆಕ್ಕ್ ಯಾನೇ ಸಾಕ್ಷಿ. 4 ದೇವಜನೊಕುಲೆಗ್ ಸಹಾಯ ಮಲ್ಪುನ ಈ ದಯತ ಕಾರ್ಯೊಡು ಪಾಲ್‌ದಾರೆರಾಪಿಲೆಕ್ಕ ಅಪ್ಪಣೆ ಆವೊಡು ಅಂದ್‌ದ್ ಮಸ್ತ್ ನಟ್ಟೊಂಡೆರ್. 5 ಉಂದೆನ್ ಎಂಕುಲು ಎನ್ನಿಲೆಕ್ಕ ಅಕುಲು ಮಲ್ತಿನತ್ತ್. ಅಕುಲು ಸುರುಕ್ಕು ತನ್ಕುಲೆನೇ ಕರ್ತವಗ್ ಒಚ್ಚಿದ್ ಕೊರಿಯೆರ್. ಬೊಕ್ಕ ದೇವೆರೆ ಚಿತ್ತದ ಪ್ರಕಾರ ಎಂಕುಲೆಗ್ಲಾ ಒಪ್ಪಿಸಾಯೆರ್. 6 ಉಂದೆಡ್ದಾದ್ ನಿಕ್ಲೆಡ್ ದುಂಬು ಈ ದಯತ ಕಾರ್ಯೊನು ತೀತಡ್ದ್ ಸುರು ಮಲ್ತಿನೆನ್ ಆಯೆ ಅವೆನ್ ನಿಕ್ಲೆಡ್ ತೀರಿಸಾವಡ್ ಅಂದ್‌ದ್ ಎಂಕುಲು ಆಯಡ ಕೇನೊಂಡ. 7 ಆಂಡ ನಿಕುಲು ನಂಬಿಕೆಡ್, ಪಾತೆರೊಡು, ಗೇನೊಡು, ಮಾತ ಆಸಕ್ತಿಡ್, ನಿಕುಲು ಎಂಕ್ಲೆಗ್ ತೋಜಾವು ಪ್ರೀತಿಡ್ ಉಂದು ಮಾತೆಟ್ಟ್ ಎಂಚ ಹೆಚ್ಚಿಗೆದಾಕುಲಾದ್ ಉಲ್ಲರಾ, ಅಂಚೆನೇ ಈ ದಾನದ ಕಾರ್ಯೊಡ್ಲಾ ಹೆಚ್ಚಿಗೆದಾಕುಲಾದ್ ತೋಜಾವೊನ್ಲೆ. 8 ಉಂದೆನ್ ಯಾನ್ ನಿಕ್ಲೆಗ್ ಅಪ್ಪಣೆ ಅಂದ್‌ದ್ ಪನಂದೆ, ಬೇತೆಕ್ಲೆನ ಆಸಕ್ತಿದ ಎದುರು ನಿಕ್ಲೆನ ಪ್ರೀತಿಲಾ ನಿಜನೇ ಅಂದ್‌ದ್ ಪರೀಕ್ಷೆ ಮಲ್ಪೊಡಂದ್‌ದ್ ಪನ್ಪೆ. 9 ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದಯೊನು ನಿಕುಲು ತೆರಿದರತ್ತಾ? ಆಯೆ ಐಶ್ವರ್ಯೊಡಿತ್ತೆಡಲಾ ತಾನ್ ಬಡತನೊಡು ಸೇರಿನೆಡ್ದ್ ನಿಕುಲು ಐಶ್ವರ್ಯವಂತೆರ್ ಆವೊಡು ಅಂದ್‌ದ್ ನಿಕ್ಲೆಗಾದ್ ಬಡವೆ ಆಯೆ. 10 ಈ ದಾನದ ಕಾರ್ಯದ ಸಂಗತಿಡ್ ಎನ ಅಭಿಪ್ರಾಯ ತೆರಿಪಾವೆ, ಉಂದು ನಿಕ್ಲೆನ ಎಡ್ಡೆಗಾದ್ರ; ಅವೆನ್ ಒಂಜಿ ವರ್ಸದ ಪಿರವು ನಿಕುಲು ಸುರು ಮಲ್ಪೆರೆ ತೊಡಗಿಯರ್. ಅವೆನ್ ದುಂಬು ಕೊನೊದು ಕಾರ್ಯರೂಪೊಗು ಕನವೆರೆ ಪ್ರಯತ್ನ ಮಲ್ಪುಲೆ. 11 ಇತ್ತೆ ಅವೆನೇ ಪೂರ್ತಿ ಮಲ್ಪುಲೆ. ನಿಕ್ಲೆಡ್ ಈ ಕಾರ್ಯೊಗಾದ್ ಆಸಕ್ತಿ ಸುರುಟ್ಟು ತೋಜಿದ್ ಬತ್ತಿಲೆಕ್ಕನೇ ನಿಕ್ಲೆಡ್ ಇತ್ತಿನೆಟ್ಟ್ ಅವೆನ್ ತೀರಿಸಾಲೆ. 12 ದಾಯೆಗಂದ್ಂಡ ಕೊರ್ಪಿನ ಮನಸ್ ನಿಕ್ಲೆಡ ಇತ್ತ್ಂಡ, ಒರಿ ತನ್ಕ್ ಇತ್ತಿನೆಟ್ಟ್ ಕೊರಡ್ ಅವು ಸ್ವೀಕಾರ ಆಪುಂಡು. ತನಡ್ ದಾಂತಿನೆನ್ ದೇವೆರ್ ಕೇನುಜೆ. 13 ಬೇತೆಕ್ಲೆಗ್ ಭಂಗ ಪರಿಹಾರ, ನಿಕ್ಲೆಗ್ ಭಂಗ ಆವೊಡು ಅಂದ್‌ದ್ ಆಸೆ ಅತ್ತ್; ಮಾತೆರ್ಲಾ ಒಂಜೇಲೆಕ್ಕ ಉಪ್ಪೊಡು ಅಂದ್‌ದ್ ಎನ ಆಸೆ. 14 ಈ ಕಾಲೊಡು ನಿಕ್ಲೆ ಸಮೃದ್ಧಿ ಅಕ್ಲೆನ ಕೊರತೆಡ್ ಸಹಾಯ ಆಪುಂಡು. ದುಂಬಗ್ ಅಕ್ಲೆನ ಸಮೃದ್ಧಿ ನಿಕ್ಲೆನ ಕೊರತೆಡ್ ಸಹಾಯ ಆವು; ಇಂಚ ಮಾತೆರ್ಲಾ ಒಂಜೇಲೆಕ್ಕ ಉಪ್ಪೊಡು. 15 “ಮಸ್ತ್ ಕೂಡಾಯಿನಾಯಗ್ ದಾಲ ಹೆಚ್ಚಾತಿಜಿ; ಕಡಿಮೆ ಕೂಡಾಯಿನಾಯಗ್ ದಾಲಾ ಕಡಿಮೆ ಆತಿಜಿ.” ಅಂದ್‌ದ್ ಶಾಸ್ತ್ರೊಡು ಬರೆತಿಲೆಕ್ಕ ಆಪುಂಡು. ತೀತೆ ಬೊಕ್ಕ ಆಯನ ಜತೆಸೇವಕೆರ್ 16 ನಿಕ್ಲೆ ಸಂಗತಿಡ್ ಎಂಕುಪ್ಪುನ ಉಂದೇ ಉಮೇದ್‌ನ್ ದೇವೆರ್ ತೀತನ ಉಡಲ್‌ಡ್ಲಾ ಕೊರಿನೆಕ್ಕಾದ್ ದೇವೆರೆಗ್ ಉಪಕಾರ ಸ್ತುತಿ. 17 ಆಯೆ ನಿಕ್ಲೆ ಕೈತಲ್‌ ಪೋವೊಡು ಅಂದ್‌ದ್ ಎಂಕುಲು ಕೇನೊಂಡಿನಪಗ ಸ್ವೀಕಾರ ಮಲ್ತಿನಿ ಮಾತ್ರತ್ತಂದೆ, ನಿಕ್ಲೆ ಕೈತಲ್‌ ಬರಿಯೆರೆಗ್ ತಾನಾದೇ ಮಸ್ತ್ ಆಸಕ್ತಿಡ್ ಪಿದಾಡ್ದಿತ್ತೆ. 18 ಆಯ ಒಟ್ಟುಗು ಬೊಕ್ಕೊರಿ ಸಹೋದ್ರನ್ ಕಡಪುಡುದ; ಈ ಸಹೋದರೆ ಸುವಾರ್ತೆ ಸಾರಿದ್ ಮಾತ ಸಭೆಕ್ಲೆಡ್ ಪುದರ್ ದೆತ್ತೊಂದಿನಾಯೆ ಆದುಲ್ಲೆ. 19 ಮಾತ್ರತ್ತಂದೆ ಈ ದಯತ ಕೆಲಸೊಗಾದ್ ಎಂಕುಲೆಡೊಪ್ಪ ಬರಿಯೆರೆಗ್ ಸಭೆತಾಕುಲುಲಾ ಆಯನ್ ಅಜತ್‌ದ್ ದೆತ್ತೊಂಡೆರ್, ಈ ದಯತ ಕಾರ್ಯೊಡ್ದಾದ್ ಕರ್ತವಗ್ ಮೈಮೆ ಬೊಕ್ಕ ಎಂಕ್ಲೆಡಿತ್ತಿ ಉಮೇದ್ ತೋಜುಂಡು. 20 ಎಂಕುಲು ಕಾಣಿಕೆ ಕೂಡಾವುನ ಈ ಸೇವೆಡ್ ಏರ್ಲಾ ಎಂಕ್ಲೆನ್ ದೂರಂದಿಲೆಕ್ಕ ಎಂಕುಲು ಎಚ್ಚರಿಕೆಡ್ ಉಲ್ಲ. 21 ದಾಯೆಗಂದ್ಂಡ ಕರ್ತವ ದೃಷ್ಟಿಡ್ ಮಾತ್ರತ್ತಂದೆ ನರಮಾನಿಲೆ ದೃಷ್ಟಿಡ್ಲಾ ಎಡ್ಡೆಂತಿನೆನ್ ಮಲ್ಪುನವೇ ಎಂಕ್ಲೆನ ಉದ್ದೇಶ. 22 ಬೊಕ್ಕ ಮೊಕ್ಲೆಡೊಪ್ಪ ಎಂಕುಲು ನನೊರಿ ಸಹೋದ್ರನ್ ಕಡಪುಡಿಯ. ಎಂಕುಲು ಮಸ್ತ್ ಸರ್ತಿ, ಮಸ್ತ್ ಕಾರ್ಯೊಡು ಆಯನ್ ಪರೀಕ್ಷೆ ಮಲ್ತ್‌ದ್ ಆಯೆ ಆಸಕ್ತೆ ಅಂದ್‌ದ್ ತೆರಿದುಲ್ಲ. ಇತ್ತೆ ನಿಕ್ಲೆ ಮಿತ್ತ್ ಉಪ್ಪು ಭರವಸೊಡ್ದಾದ್ ಆಯೆ ನನಲಾ ಹೆಚ್ಚಾದ್ ಆಸಕ್ತಿದಾಯೆ ಆದುಲ್ಲೆ. 23 ಏರಾಂಡಲಾ ತೀತನ ಸಂಗತಿಡ್ ಕೇನ್ವೆರ್ಡ, ಆಯೆ ಎನ ಪಾಲ್‌ದಾರೆಲಾ ನಿಕ್ಲೆನ ಸೇವೆಗಾದ್ ಎಂಕ್ ಜತೆಸೇವಕೆಲಾ ಆದುಲ್ಲೆ. ಆಯನೊಟ್ಟುಗು ಬರ್ಪಿ ಬಾಕಿ ಸಹೋದರೆರೆ ಸಂಗತಿಡ್ ಕೇನ್ವರ್ಡ, ಅಕುಲು ಸಭೆಲೆಡ್ದ್ ಕಡಪುಡ್ದಿನಾಕುಲು ಕ್ರಿಸ್ತಗ್ ಮೈಮೆ ಕನಪಿನಾಕುಲುಲಾ ಆದುಲ್ಲೆರ್. 24 ಅಂಚಾದ್ ಮೊಕ್ಲೆನ್ ಪ್ರೀತಿಡ್ ತೂವೊನ್ಲೆ ಬೊಕ್ಕ ನಿಕ್ಲೆನ್ ಎಂಕುಲು ಪುಗರ್‌ದಿನಿ ನಿಜ ಅಂದ್‌ದ್ ಉಂದೆಡ್ದ್ ಸಭೆಕ್ ತೋಜಾಪಾದ್ ಕೊರ್ಲೆ. |
New Life Literature