2 ಕೊರಿಂಥ್ಯೆರೆಗ್ 7 - ಪೊಸ ಒಡಂಬಡಿಕೆ1 ಪ್ರೀತಿದಾಕುಲೇ, ಈ ವಾಗ್ದಾನೊಲು ನಂಕುಪ್ಪುನೆಡ್ದ್, ನಮ ಶರೀರದ ಬೊಕ್ಕ ಆತ್ಮದ ಮೈಲೆನ್ ಶುದ್ಧ ಮಲ್ತೊಂದು, ಪರಿಶುದ್ಧೆರಾಪಿಲೆಕ್ಕ ದೇವೆರೆ ಪೋಡಿಗೆಡ್ ಉಪ್ಪೆರೆ ಪ್ರಯತ್ನ ಮಲ್ಪುಗ. ಪೌಲುನ ಸಂತೋಷ 2 ನಿಕ್ಲೆ ಉಡಲ್‌ಡ್ ಎಂಕ್ಲೆಗ್ ಜಾಗ್ ಕೊರ್ಲೆ; ಎಂಕುಲು ನಿಕ್ಲೆಗ್ ಏರೆಗ್ಲಾ ಅನ್ಯಾಯ ಮಲ್ತ್‌ದಿಜ; ಏರೆನ್ಲಾ ಹಾಳ್ ಮಲ್ತ್‌ದಿಜ; ಏರೆಗ್ಲಾ ಮೋಸ ಲಾಭ ಮಲ್ತ್‌ದಿಜ. 3 ನಿಕ್ಲೆನ್ ದೂಷಣೆ ಮಲ್ಪೊಡು ಅಂದ್‌ದ್ ಉಂದೆನ್ ಪನ್ಪುಜಿ. ಒಟ್ಟುಗೇ ಸೈಯೆರೆಗ್ಲಾ ಒಟ್ಟುಗೇ ಬದುಕೆರೆಗ್ಲಾ ನಿಕುಲು ಎಂಕುಲೆ ಉಡಲ್‌ಡ್ ಉಲ್ಲರ್ ಅಂದ್‌ದ್ ಯಾನ್ ದುಂಬೇ ಪಂಡ್ದಿತ್ತೆ. 4 ಎಂಕ್ ನಿಕ್ಲೆಡ್ ಎಡ್ಡೆ ಭರವಸೆ ಉಂಡು; ನಿಕ್ಲೆ ಸಂಗತಿಡ್ ಹೆಮ್ಮೆ ಉಂಡು. ಎಂಕುಲೆ ಮಾತ ಸಂಕಟೊಲೆಡ್ಲಾ ಆಧಾರಣೆಡ್ದ್ ದಿಂಜಿದುಲ್ಲ ಬೊಕ್ಕ ಮಾತ ಭಂಗೊಲೆಡ್ದ್‌ಲಾ ಎನ ಸಂತೋಷ ಹೆಚ್ಚಾಪುಂಡು. 5 ಎಂಕುಲು ಮಕೆದೋನ್ಯೊಗು ಬತ್ತಿನಪಗ ಎಂಕುಲೆ ಶರೀರೊಗು ಸುಖ ಇಜ್ಜಾಂಡ್. ಮಾತ ಕಡೆಟ್ಲಾ ಭಂಗ ಆಂಡ್. ಪಿದಯಿಡ್ ಲಡಾಯಿಲು; ಉಲಯಿಡ್ ಪೋಡಿಗೆ ಇತ್ತ್ಂಡ್. 6 ಆಂಡ ಕುಗ್ಗು ಪೋಯಿನಾಕುಲೆನ್ ಆದರಿಪುನ ದೇವೆರ್, ತೀತೆ ಬರ್ಪಿನೆಡ್ದ್ ಎಂಕ್ಲೆನ್ ಆದರಿತೆ. 7 ಆಯೆ ಬತ್ತಿನೆಡ್ದ್ ಮಾತ್ರ ಅತ್ತ್, ನಿಕ್ಲೆಡ್ದ್ ಆಯಗ್ ಮಸ್ತ್ ಆಧರಣೆ ತಿಕ್ಕ್‌ದ್ಂಡ್ ಪಂಡ್ದ್ ಪಂಡಿನೆಡ್ದ್‌ಲಾ ಎಂಕ್ಲೆಗ್ ಸಮಾಧಾನ ಕೊರಿಯೆ, ನಿಕ್ಲೆ ಆಸೆಲಾ, ನಿಕುಲು ಮಲ್ತಿನ ದುಃಖಲಾ, ಎನ ಕಡೆಕ್ಕ್ ನಿಕ್ಲೆಡಿತ್ತಿನ ಆಸಕ್ತಿನ್ ತೆರಿಪಾಯಿನೆಡ್ದ್‌ಲಾ ಎಂಕ್ ಮಸ್ತ್ ಸಂತೋಷ ಆಂಡ್. 8 ಯಾನ್ ಬರೆತಿ ಪತ್ರಿಕೆಡ್ ನಿಕ್ಲೆಗ್ ದುಃಖ ಆಂಡಲಾ ಎಂಕ್ ಪಶ್ಚಾತಾಪ ಇಜ್ಜಿ. ಅವು ಒಂತೆ ಸಮಯ ನಿಕ್ಲೆನ್ ದುಃಖ ಮಲ್ತ್ಂಡ್ ಅಂದ್‌ದ್ ಯಾನ್ ದುಂಬು ಪಶ್ಚಾತಾಪ ಪಡೆದಿತ್ತ್‌ಂಡಲಾ ಇತ್ತೆ ಸಂತೋಷ ಮಲ್ಪುವೆ. 9 ಇತ್ತೆ ಎಂಕ್ ಸಂತೋಷ ಆಂಡ್, ನಿಕ್ಲೆಗ್ ದುಃಖ ಆಂಡ್ ಪನ್ಪಿನೆಕ್ಕಾದ್ ಅತ್ತ್; ಆಂಡ ನಿಕ್ಲೆ ದುಃಖ ನಿಕ್ಲೆನ್ ಪಶ್ಚಾತಾಪೊಗು ನಡಪುಡಿನೆಕ್ಕಾದ್, ನಿಕುಲು ದೇವೆರೆ ಚಿತ್ತದ ಪ್ರಕಾರ ದುಃಖ ಮಲ್ತಿನೆಡ್ದ್ ಎಂಕ್ಲೆಡ್ದ್ ನಿಕ್ಲೆಗ್ ದಾಲಾ ನಷ್ಟ ಆದುಪ್ಪುಜಿ. 10 ದೇವೆರೆ ಚಿತ್ತಾನುಸಾರ ದುಃಖ ಮನಸ್‌ನ್ ತಿರ್ಗಾದ್ ರಕ್ಷಣೆಗ್ ಕಾರಣ ಆಪುಂಡು; ಐಟ್ಟ್ ಪಶ್ಚಾತಾಪ ಬರ್ಪುಂಡು: ಆಂಡ ಲೋಕದ ರೀತಿದ ದುಃಖ ಮರಣೊಗು ಕಾರಣ ಆಪುಂಡು. 11 ದೇವೆರೆ ಚಿತ್ತಾನುಸಾರ ದುಃಖ ನಿಕ್ಲೆಗಾಯಿನೆಡ್ದ್, ನಿಕ್ಲೆಗ್ ಎಂಚಿತ್ತಿ ಆಸಕ್ತಿ, ನಿಕ್ಲೆನ್ ನಿರಾಪರಾಧಿ ಮಲ್ತೊನಿಯೆರೆ ಎಂಚಿತ್ತಿ ಉಮೇದ್, ಎಂಚಿತ್ತಿ ಕೋಪ, ಎಂಚಿತ್ತಿ ಎಚ್ಚರಿಕೆ, ಎಂಚಿತ್ತಿ ಮನೊವ್ಯಥೆ, ಎಂಚಿತ್ತಿ ಕಾಳಜಿ, ತಪ್ಪು ಮಲ್ತಿನಾಕುಲೆಗ್ ಶಿಕ್ಷೆ ಕೊರಿಯೆರೆಗ್ ಎಂಚಿತ್ತಿ ಕಟ್ಟ್‌ನಿಟ್ಟ್ ಉಂಡಾಂಡ್; ಉಂದೆಟ್ಟ್ ಮಾತ ನಿಕುಲು ನಿರಾಪರಾಧಿಲು ಅಂದ್‌ದ್ ಮಾತ ರೀತಿಡ್ಲಾ ತೋಜಾವೊನಿಯೆರೆ ಪ್ರಯಾಸ ಬುಡಿಯರ್. 12 ಯಾನ್ ನಿಕ್ಲೆಗ್ ಬರೆಯಿನವು ಅನ್ಯಾಯ ಮಲ್ತಿನಾಯಗಾದ್ ಅತ್ತ್, ಅತ್ತ್‌ಡ ಅನ್ಯಾಯ ಸಹಿಸೊನುನಾಯಗಾದ್‌ಲಾ ಅತ್ತ್, ಆಂಡ ದೇವೆರೆಡ್ ಎಂಕ್ಲೆಗ್ ನಿಕ್ಲೆ ಕಡೆಕ್ಕ್ ಉಪ್ಪುನ ಆಸಕ್ತಿ ನಿಕ್ಲೆಗ್ ತೋಜಿದ್ ಬರಡ್ ಅಂದ್‌ದ್ ಮಾತ್ರ. 13 ಉಂದೆಕ್ಕಾದೆ ಎಂಕುಲೆಗ್ಲಾ ಆಧರಣೆ ಆಂಡ್. ಅವ್ವೇ ಅತ್ತಂದೆ ನಿಕ್ಲೆಡ್ದಾದ್ ತೀತಗ್ ಮಸ್ತ್ ಆತ್ಮ ಸಂತೋಷ ಉಂಡಾಂಡ್ ಪಂಡಿನೆನ್ ಯಾನ್ ತೆರಿದ್ ಎಂಕುಲೆಗ್ಲಾ ಮಸ್ತ್ ಸಂತೋಷ ಆಂಡ್. 14 ಯಾನ್ ನಿಕ್ಲೆ ವಿಚಾರ ಆಯಡ ದಾದಾಂಡಲಾ ಪುಗರೊಂದಿತ್ತೆಡಲಾ ಐಕಾದ್ ಎಂಕ್ ನಾಚಿಗೆ ಆಯಿಜಿ. ಯಾನ್ ನಿಕ್ಲೆಡ ಏಪಲಾ ಸತ್ಯನೇ ಪಂಡಿಲೆಕ್ಕ ಯಾನ್ ತೀತನ ಎದುರು ಪುಗರೊಂಡಿನವುಲಾ ಸತ್ಯನೇ ಆದ್ ತೋಜಿದ್ ಬತ್ತ್ಂಡ್. 15 ಆಯನ್ ನಿಕುಲು ಪೋಡಿದ್ ನಡ್‌ಗ್‌ದ್ ಸೇರಾವೊಂಡಿನೆಟ್ಟ್ ನಿಕ್ಲೆ ವಿಧೇಯತೆ ತೋಜಿದ್ ಬತ್ತ್ಂಡ್. ಆಯೆ ಅವೆನ್ ನೆನಪು ಮಲ್ಪುನಗ ಆಯನ ಉಡಲ್‌ಡ್ ನಿಕ್ಲೆ ಮಿತ್ತ್ ಇತ್ತಿನ ಕನಿಕರ ಜಾಸ್ತಿ ಆಂಡ್. 16 ಅಂಚಾದ್ ಎಂಕ್ ನಿಕ್ಲೆಡ ಮಾತ ಸಂಗತಿಡ್ ಭರವಸ ಇತ್ತಿನೆಡ್ದ್ ಯಾನ್ ಸಂತೋಷ ಮಲ್ಪುವೆ. |
New Life Literature