2 ಕೊರಿಂಥ್ಯೆರೆಗ್ 6 - ಪೊಸ ಒಡಂಬಡಿಕೆ

¹ ಎಂಕುಲು ದೇವೆರೆಡೊಪ್ಪ ಜತೆಸೇವಕೆರಾದುಲ್ಲ. ಅಂಚಾದ್ ನಿಕುಲು ದೇವೆರೆಡ್ದ್ ತಿಕ್ಕ್‌ದಿನ ದಯೊನು ವ್ಯರ್ಥ ಮಲ್ತೊನಡೆ ಅಂದ್‌ದ್ ಎಂಕುಲು ನಟ್ಟೊಂದುಲ್ಲ.

² “ಸರಿ ಸಮಯೊಡು ಯಾನ್ ನಿನ ಲೆಪ್ಪುಗು ಕೆಬಿ ಕೊರಿಯೆ; ರಕ್ಷಣೆದ ದಿನೊಟು ಯಾನ್ ನಿಕ್ಕ್ ಸಹಾಯ ಮಲ್ತೆ.” ಅಂದ್‌ದ್ ದೇವೆರ್ ಪನ್ಪೆ ಅತ್ತಾ. ಇತ್ತೆನೇ ಆ ಸರಿತ್ತ ಸಮಯ; ಇನಿಯೇ ಆ ರಕ್ಷಣೆದ ದಿನ.

³ ಎಂಕುಲೆ ಸೇವೆನ್ ದೂರಂದಿಲೆಕ್ಕ ಎಂಕುಲು ಏರೆಗ್ಲಾ ಅಡ್ಡಿ ಮಲ್ಪುಜ.

⁴ ಆಂಡ ಮಾತ ವಿಷಯೊಲೆಡ್ ಎಂಕ್ಲೆನೇ ದೇವೆರೆ ಸೇವಕೆರ್ ಅಂದ್‌ದ್ ಎಂಕುಲು ತೋಜಾವುನವು. ಎಂಕುಲು ದಿಂಜ ಸಹಿಸೊನೆಟ್ಟ್ ಭಂಗೊಲೆಡ್ ಕೊರತೆಲೆಡ್ ಇಕ್ಕಟ್ಟ್‌ಡ್

⁵ ಪೆಟ್ಟ್‌ಲೆಡ್, ಸೆರೆಮನೆಟ್, ದೊಂಬಿಲೆಡ್, ಭಂಗದ ಕೆಲಸೊಲೆಡ್, ನಿದ್ರೆದಾಂತಿ ಸ್ಥಿತಿಟ್ಟ್, ಉಪವಾಸೊಡ್ಲಾ

⁶ ಎಂಕುಲು ಎಂಕ್ಲೆನ್ ಶುದ್ಧತ್ವೊಡು, ಗೇನೊಡು, ತಾಳ್ಮೆಡ್, ದಯೆಟ್, ಪರಿಶುದ್ಧಾತ್ಮೊಡು, ಕಪಟದಾಂತಿ ಪ್ರೀತಿಡ್,

⁷ ಸತ್ಯ ಪಾತೆರೊಡು, ದೇವೆರೆ ಶಕ್ತಿಡ್ ಎಂಕುಲು ದೇವೆರೆ ಸೇವಕೆರ್ ಅಂದ್‌ದ್ ತೋಜಾವೊನುವ. ದತ್ತ ಬಲತ್ತ ಕೈಟ್‌ ನೀತಿ ಪನ್ಪಿ ಆಯುಧೊಲೆನ್ ಎಂಕುಲು ಪತ್ತೊಂದಿನಾಕುಲಾದುಲ್ಲಾ.

⁸ ಕೆಲೆವೆರ್ ಮಾನ ಕೊರಡ್, ಕೆಲೆವೆರ್ ಹೀನ ಮಲ್ಪಡ್, ಕೆಲೆವೆರ್ ತುಚ್ಚಿಕಾರ ಮಲ್ಪಡ್, ಕೆಲೆವೆರ್ ಪುಗರಡ್, ಎಂಕುಲು ಸತ್ಯ ಪಾತೆರುನಾಕುಲು ಆದಿತ್ತ್‌ಂಡಲಾ ಸುಳ್ಳುಗಾರೆರ್ ಅಂದ್‌ದ್ ಲೆಪ್ಪುವೆರ್.

⁹ ಎಂಕುಲು ಮಾತೆರ್ಲಾ ತೆರಿಯಂದಿನಾಕುಲಾದಿತ್ತ್‌ಂಡಲಾ ತೆರಿದಿನಾಕುಲಾದುಲ್ಲ, ಸೈಪಿನಾಕುಲಾದ್ ತೋಜಿಂಡಲಾ ಬದುಕುನಾಕುಲಾದುಲ್ಲ. ಶಿಕ್ಷೆ ತಿಂದ್‌ಂಡಲಾ ಸೈಯಂದಿನಾಕುಲಾದುಲ್ಲ.

¹⁰ ದುಃಖ ಮಲ್ತೊಂದಿತ್ತ್‌ಂಡಲಾ ಏಪಲಾ ಸಂತೋಷ ಮಲ್ತೊಂದಿತ್ತಿನಾಕುಲು ಆದುಲ್ಲ. ಬಡವೆರಾಂಡಲಾ ಮಸ್ತ್ ಜನೊಕುಲೆಗ್ ಐಶ್ವರ್ಯವಂತೆರಾದ್ ಮಲ್ಪುನಾಕುಲು ಆದುಲ್ಲ. ದಾಲಾ ದಾಂತಿನಾಕುಲಾಂಡಲಾ ಮಾತಲಾ ಇತ್ತಿನಾಕುಲಾದುಲ್ಲ.

¹¹ ಕೊರಿಂಥದಾಕುಲೇ, ಎಂಕುಲು ನಿಕ್ಲೆಡ ಸತ್ಯಾದ್ ಪಾತೆರೊಂದೆ ಉಪ್ಪುವ, ಎಂಕುಲೆ ಉಡಲ್ ನಿಕ್ಲೆಗ್ ಜತ್ತ್‌ದ್‌ಂಡ್.

¹² ಎಂಕುಲು ನಿಕ್ಲೆಗ್ ತೋಜಾವುನ ಪ್ರೀತಿನ್ ಉಂತಾದಿಜ; ಆಂಡ ನಿಕುಲು ನಿಕ್ಲೆ ಉಡಲ್‌ಡ್ ಎಂಕ್ಲೆಗ್ ತೋಜಾವುನ ಪ್ರೀತಿನ್ ಕಡಿಮೆ ಮಲ್ತೊಂಡರ್.

¹³ ಎನ ಜೋಕುಲೆಗ್ ಪಂಡಿಲೆಕ್ಕ ಪನ್ಪೆ, ನಿಕುಲುಲಾ ನಿಕ್ಲೆ ಉಡಲ್‌ನ್ ಜಪ್ಪುಲೆ.

ಜೀವ ಇತ್ತಿ ದೇವೆರೆ ಆಲಯ

¹⁴ ನಂಬಿಕೆದಾಂತಿನಾಕುಲೆಡೊಪ್ಪ ಒಟ್ಟಾವಡೆ. ದಾಯೆಗಂದ್ಂಡ ನೀತಿಗ್ಲಾ ಅನ್ಯಾಯೊಗ್ಲಾ ಪಾಲ್ ಉಂಡಾ? ಬೊಲ್ಪುಗ್ಲಾ ಕತ್ತೆಲೆಗ್ಲಾ ಸಮ್ಮಂಧ ಉಂಡಾ?

¹⁵ ಕ್ರಿಸ್ತಗ್ಲಾ ಸೈತಾನಗ್ಲಾ ಒಪ್ಪಂದ ಮಲ್ಪೊಲಿಯಾ? ನಂಬುನಾಯಗ್ಲಾ ನಂಬಂದಿನಾಯಗ್ಲಾ ಪಾಲ್‌ದಾರಿಕೆ ಉಂಡಾ?

¹⁶ ದೇವೆರೆ ಇಲ್ಲ್‌ಗ್ಲಾ ಮೂರ್ತಿಲೆಗ್ಲಾ ಒಪ್ಪಂದ ದಾನೆ? ದಾಯೆಗಂದ್ಂಡ ನಮ ಜೀವಸ್ವರೂಪೆ ಆದುಪ್ಪು ದೇವೆರೆ ಇಲ್ಲ್ ಆದುಲ್ಲತ್ತಾ. “ಯಾನ್ ಅಕ್ಲೆಡೊಪ್ಪ ಇತ್ತ್‌ದ್ ಅಕ್ಲೆನ್ ನಡಪಾವೆ. ಯಾನ್ ಅಕ್ಲೆ ದೇವೆರಾದುಲ್ಲೆ, ಅಕುಲು ಎನ ಜನೊಕುಲಾದುಪ್ಪುವೆರ್,” ಅಂಚ ದೇವೆರ್ ಪನ್ತೆರತ್ತಾ.

¹⁷ “ಅಂಚಾದ್ ಪಿದಯಿದ ಜನೊಕುಲೆ ಮದ್ಯೊಡ್ದು ಪಿದಾಡ್ದ್ ಅಕ್ಲೆಡ್ದ್ ಪ್ರತ್ಯೇಕಾದುಪ್ಪುಲೆ ಅಂದ್‌ದ್ ಕರ್ತವೆ ಪನ್ಪೆ. ಅಶುದ್ಧವಾಯಿನೆನ್ ಒವೆನ್ಲಾ ಮುಟ್ಟಡೆ, ಅಪಗ ಯಾನ್ ನಿಕ್ಲೆನ್ ಸೇರಾವೊನ್ವೆ.

¹⁸ ಬೊಕ್ಕ, ಯಾನ್ ನಿಕ್ಲೆಗ್ ಅಮ್ಮೆ ಆದುಪ್ಪುವೆ; ನಿಕುಲು ಎನ ಮಗೆಲಾ ಮಗಲ್ಲಾ ಆದುಪ್ಪುವರ್ ಅಂದ್‌ದ್ ಸರ್ವತ್ರಾಣಿ ಆದುಪ್ಪು ಕರ್ತವೆ ಪನ್ಪೆ.”