2 ಕೊರಿಂಥ್ಯೆರೆಗ್ 5 - ಪೊಸ ಒಡಂಬಡಿಕೆ1 ದಾಯೆಗಂದ್ಂಡ ಈ ಭೂಮಿದ ಮಿತ್ತ್ ನಮ ಶರೀರ ಪನ್ಪಿ ಗುಡಾರ ನಾಶಾಂಡ ದೇವೆರೆಡ್ದ್ ಉಂಡಾಯಿನ ಒಂಜಿ ಇಲ್ಲ್ ಪರಲೋಕೊಡು ಎಂಕ್ಲೆಗುಂಡು ಅಂದ್‌ದ್ ನಂಕ್ ಗೊತ್ತುಂಡು. ಅವು ಕೈಟ್ ಕಟ್ಟ್‌ದಿನವು ಆದುಪ್ಪಂದೆ ನಿತ್ಯದವು ಆದುಂಡು. 2 ಅಂದ್, ಇತ್ತೆ ಈ ಶರೀರೊಡು ಎಂಕುಲು ನರಕೊಂದುಪ್ಪುವ. ಪೊಸ ಕುಂಟು ಪಾಡೊಂಡಿಲೆಕ್ಕ ಪರಲೋಕೊಡುಪ್ಪು ಆ ಇಲ್ಲ್ ಏಪ ತಿಕ್ಕುಂಡು ಅಂದ್‌ದ್ ಬಯಕೊಂದುಲ್ಲ. 3 ಅಂಚಾದ್ ಆ ಕುಂಟು ಪಾಡೊಂಡಿನಪಗ ನಮ ಬತ್ತಲೆತನ ಪೋಪುಂಡು. 4 ಎಂಕುಲು ಭೂಮಿದ ಗುಡಾರೊಡು ಉಪ್ಪುನಾತ್ ದಿನ ದುನ್ನ ತುಂಬೊಂದು ನರಕೊಂದು ಬದುಕುವ. ಅಂಚಾದ್ ಈ ಶರೀರೊಡ್ದು ಬುಡುಗಡೆ ಆವೊಡು ಅಂದ್‌ದ್ ಎಂಕ್ಲೆನ ಆಸೆ ಅತ್ತ್. ಅವತ್ತಂದೆ ಪರಲೋಕದ ಶರೀರೊನು ಪಾಡೊನಿಯೆರೆ ಆಸೆ ಮಲ್ಪುವ. ಅಂಚಾಯಿನೆಡ್ದ್ ಈ ಸೈಪಿನ ಶರೀರೊನು ಜೀವೊಡುಪ್ಪು ಶರೀರೊಗು ಬದಲಾವಣೆ ಮಲ್ಪುವೆ. 5 ಎಂಕ್ಲೆನ್ ಈ ಸ್ಥಿತಿಕ್ಕ್ ತಯಾರ್ ಮಲ್ತ್‌ದ್ ತನ ಪರಿಶುದ್ಧಾತ್ಮೊನು ಸಂಚಿಕಾರ ಆದ್ ಕೊರಿನಾಯೆ ದೇವೆರೇ. 6 ಅಂಚಾಯಿನೆಡ್ದ್ ನಮ ಏಪಲಾ ಧೈರ್ಯೊಡೇ ಉಪ್ಪುವ. ಈ ಶರೀರೊಡು ಉಪ್ಪುನೆಂಗೆ ಕರ್ತವಡ್ ದೂರೊಡುಪ್ಪುವ ಅಂದ್‌ದ್ ಎಂಕುಲು ತೆರಿದ. 7 ನಮ ತೂಪಿನಾಕುಲಾದ್ ಉಪ್ಪಂದೆ ನಂಬುನಕುಲಾದೇ ಬದುಕುವ. 8 ಅಂದ್, ಎಂಕುಲು ಧೈರ್ಯೊಡಿತ್ತ್‌ದ್ ಶರೀರೊನು ಬುಡ್ದು ಕರ್ತವ ಕೈತಲ್‌ ಸೇರಿಯೆರೆ ಬಯಕುವ. 9 ಅಂಚಾದ್ ಎಂಕುಲು ಶರೀರೊಡಿತ್ತ್‌ಂಡಲಾ ಐಡ್ದ್ ಬುಡುಗಡೆ ಆಂಡಲಾ ನಮ ಕರ್ತವಗ್ ಮೆಚ್ಚಿಗೆ ಆದ್ ಉಪ್ಪೊಡಂದ್‌ದ್ ಪೇಚಾಡುವ. 10 ದಾಯೆಗಂದ್ಂಡ ಪ್ರತಿ ಒರಿಲಾ ತನ ಭೂಮಿದ ಶರೀರೊಡು ಮಲ್ತಿನ ಎಡ್ಡೆಂತಿನೆಕಾವಡ್ ಪಡಿಕೆಂತಿನೆಕ್ಕಾವಡ್ ದೇವೆರೆಡ್ದ್ ಪ್ರತಿಫಲ ತಿಕ್ಕುಲೆಕ್ಕ ನಮ ಮಾತೆರ್ಲಾ ಕ್ರಿಸ್ತನ ನ್ಯಾಯಾಸನದ ಎದುರುಡು ಉಂತೊಡಾಪುಂಡು. ಕ್ರಿಸ್ತನ ರಾಯಭಾರಿಲು 11 ಕರ್ತವ ಪೋಡಿಗೆ ಎಂಕ್ಲೆಗುಪ್ಪುನೆಡ್ದ್ ಜನೊಕುಲು ಒಪ್ಪಿಯೊನುಲೆಕ್ಕ ಮಲ್ಪುವ. ದೇವೆರೆಗ್ ಎಂಕ್ಲೆ ಯಥಾರ್ಥತ್ವ ತೆರಿದುಂಡು; ನಿಕ್ಲೆ ಮನಸ್‌ಗ್ಲಾ ಉಂದು ತೆರಿದುಂಡು ಅಂದ್‌ದ್ ಎನ ಭರವಸ ಆದುಂಡು. 12 ಎಂಕ್ಲೆನ್ ಎಂಕುಲು ನಿಕ್ಲೆ ಎದುರುಡು ಕುಡೊರ ಪುಗರೊನುಜ; ಆಂಡ ಎಂಕಲೆಗಾದ್ ಪುಗರೊನಿಯೆರೆ ನಿಕ್ಲೆಗ್ ಅವಕಾಸ ಕೊರ್ಪ; ಇಂಚ ಉಡಲ್‌ಡ್ ಕೊಚ್ಚೊನಂದೆ ಪಿದಯಿಡ್ ಕೊಚ್ಚೊಂದು, ನಿಕುಲು ಉತ್ತರ ಕೊರ್ಪಿಲೆಕ್ಕ ಶಕ್ತೆರಾಪರ್. 13 ಎಂಕುಲೆ ಬುದ್ಧಿ ತತ್ತ್‌ದಿತ್ತ್‌ಂಡ ಅವು ದೇವೆರೆಗಾದುಂಡು; ಎಂಕ್ಲೆಗ್ ಸ್ವಸ್ಥ ಬುದ್ಧಿ ಇತ್ತ್ಂಡ ಅವು ನಿಕ್ಲೆಗಾದುಂಡು. 14 ಕ್ರಿಸ್ತನ ಪ್ರೀತಿ ಎಂಕ್ಲೆಗ್ ಒತ್ತಾಯ ಮಲ್ಪುಂಡು. ದಾಯೆಗಂದ್ಂಡ ಮಾತೆರೆಗಾದ್ ಒರಿ ಸೈತಿನೆಡ್ದಾವರ ಮಾತೆರ್ಲಾ ಸೈತಿ ಲೆಕ್ಕ ಆಂಡ್ ಅಂದ್‌ದ್ ತೆರಿಯೊಂಡ. 15 ಬೊಕ್ಕ ಆಯೆ ಮಾತೆರೆಗಾದ್ ಸೈತಿನೆಡ್ದಾವರ ಬದುಕುನಾಕುಲು ನನ ದುಂಬು ತನ್ಕುಲೆಗಾದ್ ಬದ್‌ಕಂದೆ, ಅಕ್ಲೆಗಾದ್ ಸೈತ್‌ದ್ ಜೀವೊಡು ಲಕ್ಕ್‌ದಿನ ಕ್ರಿಸ್ತಗಾದ್ ಬದುಕುವೆರ್. 16 ಅಂಚಾಯಿನೆಡ್ದ್ ನನ ದುಂಬು ಎಂಕುಲು ಏರೆನ್ಲಾ ಲೋಕದ ರೀತಿಡ್ ತೆರಿಯುಜ; ಕ್ರಿಸ್ತನ್ ಎಂಕುಲು ಲೋಕದ ರೀತಿಡ್ ತೆರಿಯೊಂಡಲಾ ನನ ಅಂಚ ಮಲ್ಪುಜ. 17 ಅಂಚಾದ್ ಏರಾಂಡಲಾ ಕ್ರಿಸ್ತಡ್ ಉಲ್ಲೆಡ, ಆಯೆ ಪೊಸ ಸೃಷ್ಟಿ ಆದುಲ್ಲೆ; ಪರತ್ತ್‌ದವು ಕಡತ್‌ದ್ ಪೋಂಡು, ಇಂದಾ ಮಾತಲಾ ಪೊಸತಾಂಡ್. 18 ಬೊಕ್ಕ ಉಂದು ಮಾತಲಾ ದೇವೆರೆಡ್ದೇ ಉಂಡಾಯಿನವು. ಆಯೆ ನಮನ್ ಕ್ರಿಸ್ತಡ್ ತನ್ಕ್ ರಾಜಿ ಮಲ್ತೊಂದು ರಾಜಿ ಮಲ್ಪುನ ಸೇವೆನ್ ಎಂಕ್ಲೆಗ್ ಕೊರ್ತೆ. 19 ಅವು ದಾನೆಂದ್ಂಡ ದೇವೆರ್ ನರಮಾನಿನ ಪಾಪೊಲೆನ್ ಅಕ್ಲೆ ಲೆಖ್ಖೊಗು ದೆತ್ತೊನಂದೆ, ಲೋಕೊನು ಕ್ರಿಸ್ತಡ್ ತನ್ಕ್ ರಾಜಿ ಮಲ್ತೊಂಡೆ ಪನ್ಪಿನವೇ. ಆ ರಾಜಿದ ಸೇವೆನ್ ಸಾರಿಯೆರೆ ಎಂಕ್ಲೆನ್ ನೇಮಕ ಮಲ್ತ್‌ದೆ. 20 ಎಂಕುಲು ಕ್ರಿಸ್ತನ ರಾಯಭಾರಿಲು ಆದುಲ್ಲ. ಅಂಚಾದ್ ದೇವೆರೇ ಎಂಕ್ಲೆ ಪಗತೆಗ್ ನಟ್ಟೊನ್ವೆ. “ನಿಕುಲು ದೇವೆರೆಡೊಪ್ಪ ರಾಜಿ ಮಲ್ತೊನ್ಲೆ,” ಅಂದ್‌ದ್ ಕ್ರಿಸ್ತನ ಪುದರ್‌ಡ್ ನಿಕ್ಲೆಡ ನಟ್ಟೊನ್ವ. 21 ದೇವೆರ್ ಪಾಪದಾಂತಿನ ಕ್ರಿಸ್ತನ್ ಎಂಕ್ಲೆಗಾದ್ ಪಾಪಿಯಾದ್ ಮಲ್ತೆ. ನಮ ಕ್ರಿಸ್ತಡ್ದ್ ನೀತಿವಂತೆರ್ ಆವೊಡು ಅಂದ್‌ದ್ ದೇವೆರ್ ಇಂಚ ಮಲ್ತೆರ್. |
New Life Literature