2 ಕೊರಿಂಥ್ಯೆರೆಗ್ 4 - ಪೊಸ ಒಡಂಬಡಿಕೆಮಣ್ಣ್ದ ಪಾತ್ರೆಲೆಡ್ ಆತ್ಮೀಕ ದ್ರವ್ಯೊಲು 1 ಅಂಚಾಯಿನೆಡ್ದ್, ಈ ಸೇವೆ ಎಂಕ್ಲೆಗ್ ದೇವೆರೆ ಕರುಣೆಡ್ ತಿಕ್ಕಿನೆಡ್ದ್ ಧೈರ್ಯ ತತ್ತ್‌ದ್ ಪೋಪುಜ. 2 ಆಂಡ ನಾಚಿಗೆ ಪುಟ್ಟಾವುನ ಬೊಕ್ಕ ದೆಂಗ್ದಿನ ಕಾರ್ಯೊಲೆನ್ ಬುಡ್ದು, ತಂತ್ರೊಡು ನಡತೊನಂದೆ, ದೇವೆರೆ ಪಾತೆರೊಗು ಬೆರಕೆ ಮಲ್ಪಂದೆ, ಸತ್ಯೊನು ಎಡ್ಡೆ ರೀತಿಡ್ ಬೋಧನೆ ಮಲ್ತೊಂದು ಎಂಕ್ಲೆನ್ ದೇವೆರೆ ದುಂಬು ಮಾತ ನರಮಾನಿಲೆ ಉಡಲ್‌ಡ್ ಸಜ್ಜನೆರಾದ್ ತೋಜಿದ್ ಬರ್ಪಿಲೆಕ್ಕ ನಡತೊಂದುಲ್ಲ. 3 ಆಂಡ ಎಂಕುಲು ಸಾರಿಯುನ ಸುವಾರ್ತೆ ಕೆಲೆವೆರೆಗ್ ಬೊಕ್ಕಲಾ ಮದೆ ಆದಿತ್ತ್ಂಡ ಅವು ನಾಶನ ಆಪಿನಾಕುಲೆಗ್ ಮದೆ ಆದುಂಡು. 4 ದೇವೆರೆ ಪ್ರತಿರೂಪ ಆಯಿ ಕ್ರಿಸ್ತ ಮೈಮೆ ಪನ್ಪಿ ಸುವಾರ್ತೆದ ಬೊಲ್ಪು ಮಿಂಚಂದಿಲೆಕ್ಕ, ಈ ಲೋಕದ ದೇವೆರಾದುಪ್ಪು ಸೈತಾನೆ ನಂಬಿಕೆದಾಂತಿನಾಕುಲೆನ ಮನಸ್‌ನ್ ಮಂದ ಮಲ್ತ್‌ದೆ. 5 ದಾಯೆಗಂದ್ಂಡ ಎಂಕುಲು ಎಂಕ್ಲೆನೇ ಸಾರಿಯೊನಂದೆ, ಯೇಸು ಕ್ರಿಸ್ತೆ ಕರ್ತವೆ ಪಂಡ್ದ್‌ಲಾ ಯೇಸುಗಾದ್ ನಿಕ್ಲೆನ ಸೇವಕೆರ್ ಪಂಡ್ದ್‌ಲಾ ಸಾರಿಯುವ. 6 ದಾಯೆಗ್ ಪಂಡ, “ಕತ್ತಲೆದ ಉಲಯಿಡ್ದ್ ಬೊಲ್ಪು ಆವಡ್,” ಪಂಡಿ ದೇವೆರ್, ಕ್ರಿಸ್ತನ ಮೋನೆಡ್ ತೋಜುನ ಮೈಮೆದ ಗೇನ ಪನ್ಪಿ ಬೊಲ್ಪು ಉಂಡಾಪಿಲೆಕ್ಕ ದೇವೆರ್ ತಾನೇ ಎಂಕ್ಲೆನ ಉಡಲ್‌ಡ್ ಬೊಲ್ಪು ಕೊರಿಯೆ. 7 ಇಂಚಿತ್ತಿ ಮಲ್ಲ ಬಲ ಎಂಕ್ಲೆನವು ಅತ್ತ್, ದೇವೆರೆನವೇ ಅಂದ್‌ದ್ ತೋಜಿದ್ ಬರ್ಪಿಲೆಕ್ಕ ಈ ದ್ರವ್ಯ ಎಂಕ್ಲೆಗ್ ಮಣ್ಣ್‌ದ ಪಾತ್ರೆಲೆಡ್ ಉಂಡು. 8 ಮಾತ ಕಡೆಡ್ದ್ ಎಂಕ್ಲೆಗ್ ಭಂಗ ಇತ್ತ್ಂಡಲಾ ಎಂಕುಲು ಸೋತುದು ಪೋತುಜ; ದಿಕ್ಕ್ ತೋಜಂದಿಲೆಕ್ಕ ಇತ್ತ್ಂಡಲಾ ನಿರಾಶೆಗ್ ಬೂರ್ದುಜ. 9 ಭಂಗ ಬತ್ತ್‌ಂಡಲಾ ಕೈ ಬುಡ್ತಿನಾಕುಲಾದ್ ಇಜ್ಜ. ಮರತ್ತ್ ಬೂರ್ದಿನಾಕುಲು ಆಂಡಲಾ ನಾಶ ಆತಿಜ. 10 ಎಂಕುಲೆ ಶರೀರೊಡು ಯೇಸುನ ಜೀವ ತೋಜಿದ್ ಬರ್ಪಿನೆಡ್ದಾವರ ಯೇಸುನ ಮರಣದ ಅನುಭವೊನು ಎಂಕುಲು ಎಂಕ್ಲೆನ ಶರೀರೊಡು ಏಪಲಾ ಅನುಭವ ಮಲ್ತೊಂದುಪ್ಪುವ. 11 ಎಂಚಂದ್ಂಡ ಎಂಕುಲೆ ಸೈಪಿ ಶರೀರೊಡು ಯೇಸುನ ಜೀವ ತೋಜಿದ್ ಬರ್ಪಿನೆಡ್ದಾವರ ಜೀವೊಡುಪ್ಪು ಎಂಕ್ಲೆನ್ ಯೇಸುಗಾದ್ ಏಪಲಾ ಮರಣೊಗು ಒಚ್ಚಿದ್ ಕೊರ್ಪ. 12 ಇಂಚ ಎಂಕ್ಲೆಡ್ ಮರಣ ಕಾರ್ಯ ಮಲ್ಪುಂಡು; ಆಂಡ ನಿಕ್ಲೆಡ್ ಜೀವ ಕಾರ್ಯ ಮಲ್ಪುಂಡು. 13 ಇಂಚ ಇತ್ತ್ಂಡ “ಯಾನ್ ನಂಬಿಯೆ; ಅಂಚಾದ್ ಪಾತೆರಿಯೆ,” ಅಂದ್‌ದ್ ಶಾಸ್ತ್ರೊಡು ಬರೆತಿ ನಂಬಿಕೆದ ಅವ್ವೇ ಆತ್ಮ ಎಂಕ್ಲೆಡುಪ್ಪುನೆಡ್ದ್ ನಂಬಿನಾಕುಲಾದ್ ಪಾತೆರ್‌ವ. 14 ಕರ್ತವೆ ಆದುಪ್ಪು ಯೇಸುನು ಲಕ್ಕಾಯಿನಾಯೆ ಎಂಕ್ಲೆನ್ಲಾ ಯೇಸುಡೊಪ್ಪ ಲಕ್ಕಾದ್ ನಿಕ್ಲೆ ಒಟ್ಟುಗು ತನ ದುಂಬು ಉಂತಾವೆ ಅಂದ್‌ದ್ ಎಂಕುಲು ತೆರಿದ. 15 ಉಂದು ಮಾತಲಾ ನಿಕ್ಲೆಗಾದೆ ಎಂಕ್ಲೆಗ್ ಉಂಡಾಪುಂಡು. ಐಟ್ಟ್ ದೈವ ದಯೆ ಮಸ್ತ್ ಜನೊಕುಲೆಗ್ ಹೆಚ್ಚಾದ್ ತಿಕ್ಕುನೆಡ್ದಾವರ ದೇವೆರೆ ಮೈಮೆಗ್ ಹೆಚ್ಚಾದ್ ಉಪಕಾರ ಸ್ತುತಿ ಉಂಡಾಪುಂಡು. ನಂಬಿಕೆದ ಜೀವನ 16 ಅಂಚಾಯಿನೆಡ್ದ್ ಎಂಕುಲು ಧೈರ್ಯ ತತ್ತ್‌ದ್ ಪೋಪುಜ. ಎಂಕುಲೆ ಶರೀರ ನಾಶಾವೊಂದು ಇತ್ತ್ಂಡಲಾ ಎಂಕುಲೆ ಅಂತರ್ಯ ದಿನ ದಿನ ಪೊಸತ್ತಾವೊಂದು ಬರ್ಪುಂಡು. 17 ದಾಯೆಗಂದ್ಂಡ, ಒಂತೆ ಸಮಯ ಮಾತ್ರ ಹಗುರಾದುಪ್ಪುನ ಎಂಕುಲೆ ಭಂಗ, ನಿತ್ಯ ಮೈಮೆದ ರಾಶಿನ್ ಎಂಕ್ಲೆಗ್ ಉಂಡು ಮಲ್ಪುಂಡು. 18 ಎಂಕುಲು ತೋಜುನ ವಿಷಯೊಲೆನ್ ತೂವಂದೆ, ತೋಜಂದಿನ ವಿಷಯೊಲೆನ್ ತೂವೊಂದುಪ್ಪುನಾಕುಲಾದುಲ್ಲ; ತೋಜುನವು ಒಂತೆ ಸಮಯ ಮಾತ್ರ ಉಪ್ಪುಂಡು; ತೋಜಂದಿನವು ನಿತ್ಯೊಗ್ಲಾ ಉಪ್ಪುಂಡು. |
New Life Literature