2 ಕೊರಿಂಥ್ಯೆರೆಗ್ 3 - ಪೊಸ ಒಡಂಬಡಿಕೆ

ಪೊಸ ಒಡಂಬಡಿಕೆದ ಸೇವಕೆರ್

¹ ಎಂಕ್ಲೆನೇ ಎಂಕುಲು ಪುಗರೊನಿಯೆರೆ ಕುಡ ಸುರು ಮಲ್ತೊಂದುಲ್ಲನಾ? ಇಜ್ಜಾಂಡ ಕೆಲೆವೆರೆಗ್ ಬೋಡಾಪಿಲೆಕ್ಕ ನಿಕ್ಲೆಗ್ ತೋಜಾವೆರೆಗಾದ್ ಪ್ರಮಾಣ ಪತ್ರ ಎಂಕ್ಲೆಗ್ ಅಗತ್ಯನಾ? ಅತ್ತ್‌ಡ ಅಂಚಿತ್ತಿ ಪತ್ರಿಕೆಲೆನ್ ನಿಕ್ಲೆಡ್ದ್ ದೆತ್ತೊನೊಡಾ?

² ನಿಕುಲೇ ಎಂಕ್ಲೆನ ಪುಗರಿಕೆದ ಪತ್ರ, ಅವು ಎಂಕುಲೆ ಉಡಲ್‌ಡೇ ಬರೆತ್ಂಡ್, ಆ ಪತ್ರೊನು ಮಾತೆರ್ ತೆರಿದೆರ್, ಮಾತೆರ್ಲಾ ಓದುವೆರ್.

³ ನಿಕುಲು ಎಂಕುಲೆ ಸೇವೆಡ್ದ್ ಆಯಿ ಕ್ರಿಸ್ತನ ಪತ್ರ ಆದುಲ್ಲರ್ ಅಂದ್‌ದ್ ತೋಜುವರ್. ಅವು ಶಾಯಿಡ್ ಬರೆತಿನವು ಅತ್ತ್, ಜೀವ ಇತ್ತಿ ದೇವೆರೆ ಆತ್ಮೊಡ್ದೇ ಬರೆತಿನವು. ಕಲ್ಲ್‌ದ ಪಲಯಿದ ಮಿತ್ತ್ ಅತ್ತ್ ನರಮಾನಿನ ಉಡಲ್‌ಡ್ ಬರೆತಿನವು ಆದುಂಡು.

⁴ ಇಂಚಿತ್ತಿ ಭರವಸ ಯೇಸು ಕ್ರಿಸ್ತಡ್ದೇ ನಂಕ್ ದೇವೆರೆ ಮಿತ್ತ್ ಉಂಡು.

⁵ ಎಂಕ್ಲೆಡ್ದೇ ಒವ್ವಾಂಡಲಾ ಉಂಡಾಂಡ್ ಪನಿಯೆರೆಗ್ ಎಂಕ್ಲೆಡ್ ಸಾಮರ್ಥ್ಯ ಇಜ್ಜಿ. ಎಂಕ್ಲೆನ ಸಾಮರ್ಥ್ಯ ದೇವೆರೆಡ್ದೇ ಬೈದಿನವು.

⁶ ಎಂಕ್ಲೆನ್ ಆಯೆ ಪೊಸ ಒಡಂಬಡಿಕೆದ ಎಡ್ಡೆ ಸೇವಕೆರಾದ್ ಮಲ್ತೆ. ಅವು ಬರೆತಿನ ನಿಯಮೊಲು ಆದುಪ್ಪಂದೆ ದೇವೆರಾತ್ಮದ ಸಮ್ಮಂಧ ಆದುಂಡು. ಬರೆತಿನ ನಿಯಮೊಲು ಮರಣೊನು ಕೊರೊಂದುಪ್ಪುಂಡು; ಆಂಡ ದೇವೆರಾತ್ಮ ಜೀವೊನು ಕೊರೊಂದುಪ್ಪುಂಡು.

⁷ ಮರಣದಂಡನೆ ಕೊರ್ಪಿನ ನ್ಯಾಯಕಟ್ಟಲೆದ ಸೇವೆ ಕಲ್ಲ್‌ದ ಪಲಯಿದ ಮಿತ್ತ್ ಬರೆತಿ ಅಕ್ಷರದ ಮಿತ್ತ್ ಆದಾರವಾದಿತ್ತ್ಂಡಲಾ ಆ ನ್ಯಾಯಕಟ್ಟಲೆ ದೇವೆರೆ ಮೈಮೆಡ್ದ್ ಬತ್ತಿನೆಡ್ದ್ ಮೋಶೆನ ಮೋನೆಡಿತ್ತಿನ ಬೊಲ್ಪುನು ಇಸ್ರಾಯೇಲ್ಯೆರೆಗ್ ತೂಯೆರೆ ಆಯಿಜಿ. ಆತ್ ಮೈಮೆಡಿತ್ತ್‌ಂಡಲಾ ಐತ ಬೊಲ್ಪು ಮಾಜಿದ್ ಪೋದಿತ್ತ್‌ಂಡ್.

⁸ ಇಂಚ ಉಪ್ಪುನಗ ಪೊಸ ರೀತಿಡ್ ದೇವೆರಾತ್ಮದ ಸೇವೆಲು ಏತೋ ಹೆಚ್ಚ್‌ದ ಮೈಮೆದವು ಆದುಪ್ಪೊಡತ್ತಾ?

⁹ ಜನೊಕುಲೆನ್ ತೀರ್ಪು ಮಲ್ಪುನ ಪರ ರೀತಿದ ಸೇವೆಲು ಮೈಮೆದವು ಆದಿತ್ತ್ಂಡ, ಜನೊಕುಲೆನ್ ನೀತಿವಂತೆರ್ ಮಲ್ಪುನ ಪೊಸ ರೀತಿದ ಸೇವೆಲು ಐಡ್ದ್‌ಲಾ ಹೆಚ್ಚ್ ಮೈಮೆದವು ಆದುಂಡು.

¹⁰ ನಿಜಾದ್ ಪೊಸ ರೀತಿದ ಮೈಮೆ ಹೆಚ್ಚ್ ಮೈಮೆದವು ಆದಿತ್ತಿನೆಡ್ದ್ ಆ ಪರ ರೀತಿದ ಮೈಮೆಗ್ ಹೋಲಿಕೆ ಮಲ್ತ್ಂಡ ಅವು ದಾಲಾ ಮೈಮೆದಾಂತಿನವು ಆದುಂಡು.

¹¹ ಮಾಜಿದ್ ಪೋಪಿನವು ಈತ್ ಮೈಮೆದವು ಆದಿತ್ತ್ಂಡ ಏಪೊಗ್ಲಾ ಒರಿಯುನವು ಐಡ್ದ್‌ಲಾ ಹೆಚ್ಚ್ ಮೈಮೆದವು ಆದುಪ್ಪೊಡತ್ತಾ.

¹² ಅಂಚಾಂಡ ಇಂಚಿತ್ತಿ ಭರವಸೆ ಎಂಕ್ಲೆಗ್ ಉಪ್ಪುನೆಡ್ದಾದ್, ಎಂಕುಲು ಧೈರ್ಯೊಡುಪ್ಪುವ.

¹³ ಎಂಕುಲು ಮೋಶೆ ಲೆಕ್ಕ ಅತ್ತ್; ಮಾಜಿದ್ ಪೋಪಿನ ಮೈಮೆದ ಅಂತ್ಯೊನು ಇಸ್ರಾಯೇಲ್ಯೆರ್ ತೂವಂದಿಲೆಕ್ಕ ಆಯೆ ತನ ಮೋನೆಗ್ ಮುಸ್ಕುನು ಪಾಡೊಂದಿತ್ತೆ.

¹⁴ ಆಂಡ, ಅಕ್ಲೆನ ಉಡಲ್ ಮಂದ ಆದ್ ಪೋಂಡು; ಈ ದಿನ ಮುಟ್ಟಲಾ ಪರ ಒಡಂಬಡಿಕೆದ ಪಾರಾಯಣ ಆನಗ ಆ ಮುಸ್ಕು ದೆರ್ಪಂದೆ ಉಂಡು. ಆಂಡ ಅವೆನ್ ಕ್ರಿಸ್ತಡ್ದ್ ದೆತ್ತ್ ಪಾಡಿಯೆರೆ ಸಾದ್ಯ ಆಂಡ್.

¹⁵ ಇನಿಕ್ಲಾ ಮೋಶೆನ ಗ್ರಂಥೊಲೆನ್ ಓದುನಗ ಈ ಮುಸ್ಕು ಅಕ್ಲೆ ಉಡಲ್‌ದ ಮಿತ್ತ್ ಪಾಡ್ದುಂಡು.

¹⁶ ಏರಾಂಡಲಾ ಕರ್ತವ ಕಡೆಕ್ಕ್ ತಿರ್ಗ್‌ಂಡನೇ ಆ ಮುಸ್ಕು ದೆತ್ತ್ ಪಾಡ್ದಿನವು ಆಪುಂಡು.

¹⁷ ದಾಯೆಗಂದ್ಂಡ, “ಕರ್ತವೆ,” ದೇವೆರಾತ್ಮೆ ಆದುಲ್ಲೆ; ಕರ್ತವ ಆತ್ಮೆ ಓಲ್ ಉಲ್ಲೆನಾ ಅಕ್ಲೆಗ್ ಬುಡುಗಡೆ ಉಂಡು.

¹⁸ ನಮ ಮಾತೆರ್ಲಾ ಮುಸುಕು ಇಜ್ಜಂದಿನ ಮೋನೆಡ್ ಕರ್ತವನ ಮೈಮೆದ ಬೊಲ್ಪುನು ತೋಜಾವ. ಆಯೆ ನಮನ್ ಕರ್ತವಲೆಕ್ಕ ಬದಲಾವಣೆ ಮಲ್ಪುವೆ. ಒಂಜಿ ಮೈಮೆಡ್ದ್ ಬೊಕ್ಕೊಂಜಿ ಮೈಮೆದ ರೂಪೊಗು ಸೇರಾವೆ. ಉಂದು ಆಪಿನಿ ಆತ್ಮೆ ಆದುಪ್ಪು ಕರ್ತವಡ್ದ್.