2 ಕೊರಿಂಥ್ಯೆರೆಗ್ 2 - ಪೊಸ ಒಡಂಬಡಿಕೆ

¹ ಆಂಡ ಯಾನ್ ಕುಡೊರ ನಿಕ್ಲೆನಡೆಗ್ ಬನ್ನಗ ದುಃಖೊಡು ಬರ್ಪುಜಿ ಅಂದ್‌ದ್ ತೀರ್ಮಾನ ಮಲ್ತೊಂಡೆ.

² ದಾಯೆಗಂದ್ಂಡ, ಯಾನ್ ನಿಕ್ಲೆಗ್ ದುಃಖ ಪುಟ್ಟಾಂಡ ಎಂಕ್ ಸಂತೋಷ ಕೊರ್ಪಿನಾಯೆ ಏರುಲ್ಲೆರ್? ಎನಡ್ದ್ ದುಃಖ ಆಯಿನಾಕುಲು ನಿಕುಲೇ ಅತ್ತಾ?

³ ಅಂಚಾಯಿನೆಡ್ದ್ ಯಾನ್ ಬತ್ತಿನಪಗ ಎಂಕ್ ಸಂತೋಷ ಕೊರ್ಪಿನಾಕುಲೆಡ್ದೇ ದುಃಖ ಉಂಡಾವೆರೆ ಬಲ್ಲಿ ಅಂದ್‌ದ್ ಉಂದೆನ್ ಪತ್ರಿಕೆಡ್ ನಿಕ್ಲೆಗ್ ಬರೆದ್ ತೆರಿಪಾದೆ; ಎನ ಸಂತೋಷ ನಿಕ್ಲೆನ ಮಾತೆರೆನ ಸಂತೋಷ ಅಂದ್‌ದ್ ನಿಕ್ಲೆ ಮಾತೆರೆ ಸಂಗತಿಡ್ ಎಂಕ್ ಭರವಸ ಉಂಡು,

⁴ ನಿಕ್ಲೆ ಮಿತ್ತ್ ಎಂಕುಪ್ಪು ಮಸ್ತ್ ಪ್ರೀತಿನ್ ನಿಕುಲು ತೆರಿಯೊನೊಡು ಪಂಡ್ದೇ ಯಾನ್ ಮಸ್ತ್ ಕಣ್ಣೀರ್ ಬುಡ್ದು ಉಡಲ್‌ಡಾಪಿ ಮಾಮಲ್ಲ ಸಂಕಟೊಡ್ಲಾ ಬೇನೆಡ್ಲಾ ನಿಕ್ಲೆಗ್ ಬರೆಯೆ. ಆಂಡ ನಿಕ್ಲೆಗ್ ದುಃಖ ಆವೊಡು ಅಂದ್‌ದ್ ಅತ್ತ್.

ಪಾಪಿಲೆಗ್ ಕ್ಷಮಾಪಣೆ

⁵ ಆಂಡ ನಿಕ್ಲೆಡ್ ಏರಾಂಡಲಾ ದುಃಖ ಕೊರಿನಾಯೆ ಉಲ್ಲೆಡ, ಆಯೆ ಎಂಕ್ ಮಾತ್ರ ದುಃಖೊನು ಕೊರಂದೆ, ಒಂಜಿ ರೀತಿಡ್ ನಿಕ್ಲೆ ಮಾತೆರೆಗ್ಲಾ ದುಃಖ ಕೊರ್ತಿನಾಯೆ ಆದುಲ್ಲೆ. ಆ ದುಃಖ ಮಾತೆರೆಡ್ಲಾ ಉಂಡಾಂಡ್ ಅಂದ್‌ದ್ ಯಾನ್ ಪನ್ಪುಜಿ.

⁶ ಇಂಚಿತ್ತಿನಾಯಗ್ ನಿಕ್ಲೆಡ್ ಹೆಚ್ಚಾಯಿನ ಜನೊಕುಲೆಡ್ದ್ ಆಯಿನ ಆ ಶಿಕ್ಷೆನೇ ಯಾವು.

⁷ ಅಂಚಾದ್ ನನಲಾ ಆಯಗ್ ಮಾಪು ಮಲ್ತ್‌ದ್ ಆದರಿಪುಲೆ. ಇಜ್ಜಾಂಡ ಆಯೆ ದುಃಖೊಡೇ ಮುರ್ಕುದು ಪೋವೆ.

⁸ ಅವೆಡ್ದಾವರ ಆಯಗ್ ನಿಕ್ಲೆನ ಪ್ರೀತಿ ತೋಜಾವೊಡು ಅಂದ್‌ದ್ ನಿಕ್ಲೆಡ ನಟ್ಟೊನ್ವೆ.

⁹ ನಿಕುಲು ಮಾತ ವಿಷಯೊಲೆಡ್ ನಿಕ್ಲೆನ್ ಪರೀಕ್ಷೆ ಮಲ್ತ್‌ದ್ ವಿಧೇಯರಾದುಲ್ಲರಾ ಅಂದ್‌ದ್ ತೆರಿಯೊನೊಡು ಪನ್ಪಿ ಉದ್ದೇಶೊಡು ಇಂಚ ಬರೆಯೆ.

¹⁰ ನಿಕುಲು ಏರೆಗ್ ಮಾಪು ಮಲ್ಪುವರಾ ಅಕ್ಲೆನ್ ಯಾನ್ಲಾ ಮಾಪು ಮಲ್ಪುವೆ. ಯಾನ್ ಒವೆನಾಂಡಲಾ ಮಾಪು ಮಲ್ಪೆರೆ ಇತ್ತ್ಂಡ ಅವು ಕ್ರಿಸ್ತನ ಸನ್ನಿಧಿಡ್ ನಿಕ್ಲೆಗಾದೆ ಮಾಪು ಮಲ್ತ್‌ದೆ.

¹¹ ದಾಯೆಗಂದ್ಂಡ ಸೈತಾನನ ತಂತ್ರೊಲೆನ್ ನಮ ತೆರಿಯಂದಿನಾಕುಲತ್ತ್, ಆಯೆ ನಮನ್ ವಂಚನೆ ಮಲ್ತ್‌ದ್ ನಂಕ್ ನಷ್ಟ ಮಲ್ಪೆರೆ ಬಲ್ಲಿ ಅಂದ್‌ದ್ ತೂವೊನೊಡು.

ಪೌಲುಗು ತ್ರೋವೊಡು ಆಯಿನ ತಳಮಳ

¹² ಕ್ರಿಸ್ತನ ಸುವಾರ್ತೆನ್ ಸಾರಿಯೆರೆಗಾದ್ ತ್ರೋವೊಗು ಬನ್ನಗ ಕರ್ತವ ದಯೊಡ್ದು ಎಂಕ್ ಒಂಜಿ ಎಡ್ಡೆ ಸಂದರ್ಭ ಉಂಡಾಂಡ್.

¹³ ಆಂಡಲಾ ಎನ ಸಹೋದರೆ ಆಯಿ ತೀತೆ ಎಂಕ್ ತಿಕ್ಕಂದಿನೆಡ್ದ್ ಎನ ಆತ್ಮೊಗು ಸಮಾಧಾನ ಇಜ್ಜಾಂದೆ ಅಲ್ಪ ಇತ್ತಿನಾಕುಲೆನ್ ಬುಡ್ದು ಮಕೆದೋನ್ಯೊಗು ಬತ್ತೆ.

ಕ್ರಿಸ್ತಡ್ದ್ ಜಯ

¹⁴ ಕ್ರಿಸ್ತನ ಅನ್ಯೊನ್ಯತೆಡ್ ನಮನ್ ಏಪಲಾ ಜಯತ ಉಮೇದ್‌ಡ್ ನಡಪಾವೆ. ಬೊಕ್ಕ ಆಯನ ಬುದ್ಧಿದ ಕಮ್ಮೆನೊನು ನಮ ಕಡೆಡ್ದ್ ಮಾತ ಜಾಗ್‌ಲೆಗ್ ಪೋಪುಂಡು. ಐಕ್ ದೇವೆರೆಗ್ ಉಪಕಾರ ಸ್ತುತಿ.

¹⁵ ದಾಯೆಗಂದ್ಂಡ ರಕ್ಷಣೆಡ್ ಉಪ್ಪುನಾಕುಲೆಗ್ಲಾ ನಾಶನೊಡು ಉಪ್ಪುನಾಕುಲೆಗ್ಲಾ ಎಂಕುಲು ದೇವೆರೆ ಎದುರುಡು ಕ್ರಿಸ್ತನ ಕಮ್ಮೆನ ಆದುಲ್ಲ.

¹⁶ ಆಂಡ ಎಂಕುಲು ನಾಶನೊಡು ಉಪ್ಪುನಾಕುಲೆಗ್ ಮರಣೊನು ಪುಟ್ಟಾವುನ ಮರಣದ ವಾಸನೆ ಆದುಲ್ಲ. ರಕ್ಷಣೆಡ್ ಉಪ್ಪುನಾಕುಲೆಗ್ ಜೀವೊನು ಪುಟ್ಟಾವುನ ಜೀವದ ಕಮ್ಮೆನ ಆದುಲ್ಲ. ಇಂಚಿತ್ತಿ ಕಾರ್ಯೊಲೆನ್ ಮಲ್ಪೆರೆ ಏರ್ ಯೋಗ್ಯೆರ್?

¹⁷ ಆಂಡ ಎಂಕುಲು ದೇವೆರೆ ಪಾತೆರೊನು ಬೆರಕೆ ಮಲ್ಪುನು ವ್ಯಾಪಾರದಾಕುಲೆ ಲೆಕ್ಕ ಉಪ್ಪಂದೆ ಯಥಾರ್ಥ ಆದ್ ದೇವೆರೆಡ್ದ್ ಬತ್ತಿಲೆಕ್ಕನೇ ಯೇಸು ಕ್ರಿಸ್ತನ ಅನ್ಯೊನ್ಯತೆಡ್ ಇತ್ತೊಂದು ದೇವೆರೆ ಉಪಸ್ಥಿತಿಟ್ಟೇ ಪಾತೆರೊಂದೆ ಉಪ್ಪುವ.