2 ಕೊರಿಂಥ್ಯೆರೆಗ್ 12 - ಪೊಸ ಒಡಂಬಡಿಕೆ

ಪೌಲುನ ದರ್ಶನೊಲು ಬೊಕ್ಕ ಪ್ರಕಟಣೆಲು

¹ ಪುಗರೊನುನವು ಪ್ರಯೋಜನ ಇಜ್ಜಾಂಡಲಾ ಎಂಕ್ ಪುಗರೊನುನವು ಅವಶ್ಯ ಆದುಂಡು. ಆಂಡ ಕರ್ತವೆ ಎಂಕ್ ಕೊರ್ತಿನ ದರ್ಶನೊಲೆನ್ ಬೊಕ್ಕ ಗುಟ್ಟುದ ಪಾತೆರೊಲೆನ್ ಪನೊಂದುಲ್ಲೆ.

² ಕ್ರಿಸ್ತಡುಪ್ಪು ಒರಿ ನರಮಾನಿ ಪದ್ನಾಲ್ ವರ್ಸದ ಪಿರವುಡು ಆಯನ್ ಮೂಜೆನೇ ಪರಲೋಕೊಗು ದೇವೆರ್ ದೆತ್ತೊಂದು ಪೋಯೆ ಅಂದ್‌ದ್ ಎಂಕ್ ಗೊತ್ತುಂಡು. ಆ ಸಮಯೊಡು ಶರೀರೊಡಿತ್ತಿನಾಯೆ ಆದ್ ಪೋಯೆನಾ, ಶರೀರೊನು ಬುಡ್ತಿನಾಯೆ ಆದ್ ಪೋಯೆನಾ ಯಾನ್ ತೆರಿಯಯೆ. ದೇವೆರೆಗೇ ಗೊತ್ತು.

^3-4 ಆಯನ್ ಪರದೈಸೊಗು ದೇವೆರ್ ದೆತ್ತೊಂದು ಆಯೆ ಅವುಲು ನರಮಾನಿ ಪಾತೆರಿಯೆರೆ ಆವಂದಿನವುಲಾ ಪನಿಯೆರೆ ಬಲ್ಲಿ ಪನ್ಪಿನ ಪಾತೆರೊನ್ಲಾ ಕೇನಿಯೆ. ಆ ಸಮಯೊಡು ಶರೀರೊಡಿತ್ತಿನಾಯೆ ಆದ್ ಪೋಯೆನಾ, ಶರೀರೊನು ಬುಡ್ತಿನಾಯೆ ಆದ್ ಪೋಯೆನಾ ಯಾನ್ ತೆರಿಯಯೆ. ದೇವೆರೆಗೇ ಗೊತ್ತು.

⁵ ಅಂಚಿತ್ತಿ ನರಮಾನಿನ ಸಂಗತಿಡ್ ಯಾನ್ ಪುಗರೊನ್ವೆ; ಆಂಡ ಯಾನ್ ಎನ ಸಂಗತಿಡ್ ಪುಗರೊನುಜಿ. ಅತ್ತಂದೆ ಎನ ಬಲದಾಂತಿ ಸ್ಥಿತಿನೇ ಪುಗರೊನ್ವೆ.

⁶ ಯಾನ್ ಪುಗರೊನಿಯೆರೆ ಮನಸ್ ಮಲ್ತೆಡಲಾ ಯಾನ್ ಆ ಸಂಗತಿಡ್ ಬುದ್ಧಿದಾಂತಿನಾಯೆ ಆವಯೆ; ದಾಯೆ ಪಂಡ ಯಾನ್ ಸತ್ಯೊನೇ ಪನೊಂದುಲ್ಲೆ. ಆಂಡ ಯಾನ್ ಪುಗರೊನುಜಿ. ದಾಯೆಗಂದ್ಂಡ ಏರ್ಲಾ ಎನಡ್ದ್ ತೂಪಿನೆಡ್ದಾವಡ್, ಯಾನ್ ಪನ್ಪಿನೆನ್ ಕೇನುನೆಡ್ದಾವಡ್ ಹೆಚ್ಚಾದ್ ಎನನ್ ಎನ್ನಿಯೆರೆ ಬಲ್ಲಿ.

⁷ ಎಂಕ್ ತೆರಿಪಾಯಿನ ಗುಟ್ಟುದ ಪಾತೆರೊಲು ಎನನ್ ಹೆಚ್ಚಲ್ಮೆ ಮಲ್ಪಂದಿಲೆಕ್ಕ ದೇವೆರ್ ಎನ ಶರೀರೊಡು ಒಂಜಿ ಮುಳ್ಳು ದೀದಿತ್ತೆ. ಅವು ಮುಳ್ಳು ದಾನೆಂದ್ಂಡ ಯಾನ್ ಮಿತಿ ಮೀರ್‌ದ್ ಹೆಚ್ಚಲ್ಮೆ ಮಲ್ತೊನಂದಿಲೆಕ್ಕ ಎಂಕ್ ಬೇನೆ ಕೊರ್ಪಿನ ಸೈತಾನನ ಒರಿ ದೂತೆನೇ.

⁸ ಮೂಜಿ ಸರ್ತಿ ಅವೆನ್ ಎನಡ್ದ್ ದೆತ್ತ್‌ದ್ ಪಾಡಿಯೆರೆ ಕರ್ತವಡ ನಟ್ಟೊಂಡೆ.

⁹ ಆಂಡ ಯೇಸು ಎಂಕ್ ಪಂಡೆ, “ಎನ ದಯನೇ ನಿಕ್ಕ್ ಯಾವು. ಬಲದಾಂತಿನಪಗನೇ ನಿಕ್ಕ್ ಪೂರ್ತಿ ಬಲ ತಿಕ್ಕುಂಡು.” ಅಂಚಾದ್ ಕ್ರಿಸ್ತನ ಬಲ ಎನಡ ಸ್ಥಿರ ಆಪಿಲೆಕ್ಕ ಯಾನ್ ಎನ ಬಲದಾಂತಿ ಸ್ಥಿತಿಟ್ಟೆ ಮಸ್ತ್ ಸಂತೋಷೊಡು ಪುಗರೊನ್ವೆ.

¹⁰ ಐಡ್ದಾವರ ಕ್ರಿಸ್ತಗ್ ಬೋಡಾದ್ ಎಂಕಾಯಿನ ಬಲಹೀನತೆಡ್, ಅಪಮಾನೊಲೆಡ್, ಭಂಗೊಲೆಡ್, ಇಕ್ಕಟ್ಟ್‌ಡ್ ಯಾನ್ ಸಂತೋಷೊಡುಲ್ಲೆ. ದಾಯೆಗಂದ್ಂಡ ಯಾನ್ ಬಲಹೀನೆ ಆದುಪ್ಪುನಗನೇ ಯಾನ್ ಬಲವಂತೆ ಆದುಲ್ಲೆ.

ಕೊರಿಂಥ್ಯದಾಕುಲೆಗ್ ಪೌಲುನ ಕಾಳಜಿ

¹¹ ಯಾನ್ ಬುದ್ಧಿದಾಂತಿನಾಯಲೆಕ್ಕ ಪಾತೆರಿಯೆ. ನಿಕುಲು ಎನನ್ ಅಂಚ ಆಯೆರೆ ಬಲವಂತ ಮಲ್ತ್‌ದರ್. ನಿಕ್ಲೆಡ್ದೇ ಎಂಕ್ ಪುಗರಿಕೆ ಆವೊಡಿತ್ತ್‌ಂಡ್, ದಾಯೆಗಂದ್ಂಡ ಯಾನ್ ದಾಲಾ ಇಜ್ಜಂದಿನಾಯೆ ಆದಿತ್ತ್‌ಂಡಲಾ ಆ ಮಲ್ಲ “ಅಪೊಸ್ತಲೆರೆಡ್ದ್,” ಯಾನ್ ಒಯಿಟ್‌ಲಾ ಕಡಿಮೆದಾಯೆ ಅತ್ತ್.

¹² ನಿಜ ಅಪೊಸ್ತಲೆರೆ ಲಕ್ಷಣೊಲು ಪಂಡ್ಂಡ ಗುರ್ತೊಲು, ಕಾರ್ನಿಕೊಲು, ಬಲತ್ತ ಕಾರ್ಯೊಲು, ಮಾತ ಸಜ್ಜನಿಗೆಡ್ ನಿಕ್ಲೆ ಮದ್ಯೊಡು ಮಲ್ತೆ.

¹³ ಯಾನ್ ನಿಕ್ಲೆಗ್ ದಾಲಾ ದುನ್ನ ಆದಿತ್ತಿಜಿ ಪನ್ಪಿನೆನ್ ಬುಡುಂಡ ನಿಕುಲು ಬೇತೆ ವಾ ಸಭೆಕ್ಲೆಡ್ದ್‌ಲಾ ಕಡಿಮೆದಾಕುಲು ಅತ್ತತ್ತಾ? ಈ ಅನ್ಯಾಯೊಗಾದ್ ಎನನ್ ಮಾಪು ಮಲ್ಪುಲೆ.

¹⁴ ಯಾನ್ ಮೂಜನೇ ಸರ್ತಿ ನಿಕ್ಲೆ ಕೈತಲ್‌ ಬರಿಯೆರೆ ತಯಾರಾದುಲ್ಲೆ; ಅಪಗಲಾ ನಿಕ್ಲೆಗ್ ದಾಲಾ ದುನ್ನ ಆದುಪ್ಪುಜಿ. ದಾಯೆ ಪಂಡ ನಿಕ್ಲೆ ಸೊತ್ತುನು ಬಯಕಂದೆ ನಿಕ್ಲೆನೇ ಯಾನ್ ಬಯಕುವೆ. ಜೋಕುಲು ಅಪ್ಪೆಅಮ್ಮೆಗಾದ್ ಆಸ್ತಿ ಕೂಡಾವುನತ್ತ್; ಅಪ್ಪೆಅಮ್ಮೆ ಜೋಕಲೆಗಾದ್ ಆಸ್ತಿ ಕೂಡಾದ್ ದೀಪಿನವೇ.

¹⁵ ನಿಕ್ಲೆ ಆತ್ಮ ರಕ್ಷೆಣೆಗಾದ್ ಆತಿ ಸಂತೊಸೊಡು ಎನನೇ ಕೊರೊಂದುಲ್ಲೆ. ಯಾನ್ ನಿಕ್ಲೆನ್ ಹೆಚ್ಚಾದ್ ಪ್ರೀತಿ ಮಲ್ಪುನಗ ನಿಕುಲು ಎನನ್ ಕಡಿಮೆ ಪ್ರೀತಿ ಮಲ್ಪುವರಾ?

¹⁶ ಅವು ಎಂಚಲಾ ಆವಡ್. ಯಾನ್ ನಿಕ್ಲೆಗ್ ದುನ್ನ ಆದಿತ್ತಿಜಿಡಲಾ, ನಿಕುಲು ಆಯೆ ಉಪಾಯೊಡು ಎಂಕ್ಲೆನ್ ಸುಲಿಗೆ ಮಲ್ತೆ ಅಂದ್‌ದ್ ಪನುವರ್. ಅಂಚಿತ್ತಿನೆನ್ ಯಾನ್ ಮಲ್ತ್‌ದೆನಾ?

¹⁷ ಯಾನ್ ನಿಕ್ಲೆ ಕೈತಲ್‌ಗ್ ಕಡಪುಡಿನಾಕುಲೆಡ್ ಏರೆಡ್ದಾಂಡಲಾ ನಿಕ್ಲೆನ್ ವಂಚನೆ ಮಲ್ತ್‌ದ್ ದಾಲಾಂಡಲಾ ದೋಚಿಯೆನಾ?

¹⁸ ತೀತನ್ ನಿಕ್ಲೆನಡೆಗ್ ಪೋವೆರೆ ಯಾನ್ ಒತ್ತಾಯ ಮಲ್ತೆ. ಆಯನೊಟ್ಟುಗು ಬೊಕ್ಕೊರಿ ಸಹೋದ್ರನ್ಲಾ ಕಡಪುಡಿಯೆ. ತೀತೆ ನಿಕ್ಲೆನ್ ವಂಚನೆ ಮಲ್ತ್‌ದ್ ದಾಲಾಂಡಲಾ ದೋಚಿಯೆನಾ? ಎಂಕುಲು ಇರ್ವೆರ್‌ಲಾ ಒಂಜೇ ಆತ್ಮಡ್ದ್ ಪ್ರೇರಣೆ ಆದ್ ಒಂಜೇ ಹೆಜ್ಜೆಡ್ ನಡತಿಜನಾ?

¹⁹ ಎಂಕುಲು ಇತೊರ್ತು ನಿಕ್ಲೆನ ಎದುರುಡು ಪ್ರತಿವಾದ ಮಲ್ಪುವ ಅಂದ್‌ದ್ ನಿಕುಲು ಎನ್ನುವರಾ? ದೇವೆರೆ ಸನ್ನಿಧಿಡ್ ಕ್ರಿಸ್ತಡ್ ಇತ್ತಿನಾಕುಲಾದ್ ಪಾತೆರುನಾಕುಲಾದುಲ್ಲ. ಪ್ರೀತಿದಾಕುಲೆ, ಮಾತಲಾ ನಿಕ್ಲೆನ್ ಭಕ್ತಿವೃದ್ಧಿ ಮಲ್ಪುನೆಕ್ಕಾದ್ ಪನ್ಪ.

²⁰ ಯಾನ್ ಬತ್ತಿನಪಗ ನಿಕುಲು ಯಾನ್ ಎನ್ನಿಲೆಕ್ಕ ತೋಜುವರಾ ಇಜ್ಜಾ, ಯಾನ್ ನಿಕುಲು ಎನ್ನಿಲೆಕ್ಕ ತೋಜುವೆನಾ ಇಜ್ಜಾ ಎಂಕ್ ಪೋಡಿಗೆ ಉಂಡು. ಒಂಜಿ ವೇಳೆ ನಿಕ್ಲೆಡ್ ಲಡಯಿ, ಮಚ್ಚರ, ಕೋಪ, ಸ್ವಾರ್ಥ, ಅವಮಾನ, ಚಾಡಿ ಪನ್ಪಿನವು, ಸೊರ್ಕು, ಗಲಿಬಿಲಿ ಪುಟ್ಟಾವುಂಡು ಪನ್ಪಿನ ಪೋಡಿಗೆ ಎಂಕುಂಡು.

²¹ ಯಾನ್ ಕುಡೊರ ಬನ್ನಗ ಎನ ದೇವೆರ್ ನಿಕ್ಲೆ ಎದುರುಡು ಎನನ್ ತಗ್ಗಾವೆ. ದಾಯೆಗ್ ಪಂಡ ನಿಕ್ಲೆ ನಡುಟು ದುಂಬುದಲೆಕ್ಕ ಪಾಪ ಮಲ್ತ್‌ದ್ ಬಂಡ್‌ತನ, ಹಾದ್ರ, ಸೂಳೆಗಾರಿಕೆ ಮಲ್ತ್‌ದ್‌ಲಾ ಪಶ್ಚಾತಾಪ ಮಲ್ಪಂದಿನ ಮಸ್ತ್ ಜನೊಕುಲೆ ಸಂಗತಿಡ್ ದುಃಖ ಮಲ್ಪೊಡಾವು ಪನ್ಪಿನ ಪೋಡಿಗೆ ಎಂಕುಂಡು.