1 ತಿಮೋಥಿ 6 - ಪೊಸ ಒಡಂಬಡಿಕೆ1 ದಾಸೆರಾದ್ ಬೊಕ್ಕೊರಿಯನ ಅಧೀನೊಡು ಉಪ್ಪುನಾಕುಲು ತನ್ಕುಲೆನ ಯಜಮಾನೆರೆಗ್ ಮಾತ ಮಾನೊಗು ಯೋಗ್ಯದಾಕುಲು ಅಂದ್‌ದ್ ಎನ್ನಡ್. ಇಜ್ಜಾಂಡ ದೇವೆರೆ ಪುದರ್‌ಗ್ಲಾ ನಮ ಬೋಧನೆಗ್ಲಾ ದೂಷಣೆ ಆವು. 2 ಏರೆಗಾಂಡಲಾ ಕ್ರಿಸ್ತನ್ ನಂಬುನ ಯಜಮಾನೆರ್ ಇತ್ತೆರ್ಡ ಅಕುಲು ಆ ಯಜಮಾನನ್ ಸಹೋದರೆ ಅಂದ್‌ದ್ ಉದಾಸೀನ ಮಲ್ಪಂದೆ, ತನ್ಕುಲೆನ ಬೇಲೆದ ಫಲೊನು ಹೊಂದುನಾಕುಲುಲಾ ನಂಬುನಾಕುಲುಲಾ ಪ್ರೀತಿದಾಕುಲುಲಾ ಆದುಲ್ಲೆರಂದ್‌ದ್ ತೆರಿದ್ ಅಕ್ಲೆ ಸೇವೆನ್ ಹೆಚ್ಚಾದ್ ಮಲ್ಪಡ್. ಈ ಬೋಧನೆ ಕೊರ್ದು ಎಚ್ಚರಿಕೆ ಮಲ್ಪುಲ. ಸುಳ್ಳು ಬೋಧನೆ ಬೊಕ್ಕ ನಿಜವಾಯಿನ ಐಶ್ವರ್ಯ 3 ಏರಾಂಡಲಾ ಒರಿ ಬೇತೆ ಬೋಧನೆ ಕೊರ್ದು ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಸರಿ ಇತ್ತಿ ಪಾತೆರೊಗ್ಲಾ ಭಕ್ತಿಗ್ ತಕ್ಕಾದುಪ್ಪು ಬೋಧನೆಗ್ಲಾ ಒಪ್ಪಿಯಂದೆ ಪೋಂಡ, 4 ಆಯೆ ಒಂಜೆನ್ಲಾ ತೆರಿಯಂದೆ ತರ್ಕಲಾ ಚರ್ಚೆಲಾ ಮಲ್ಪುನಾಯೆ ಆದ್ ಅಹಂಕಾರೊಡು ಕಣ್ಣ್ ತೋಜಂದಿನಾಯೆ ಆದುಲ್ಲೆ. ಉಂದೆಡ್ದಾದ್ ಮಚ್ಚರ, ಲಡಯಿ, ದೂಷಣೆ, ಹಾಳ್ ಸಂಶಯೊಲು ಮಾತ ಪುಟ್ಟುಂಡು. 5 ಅತ್ತಂದೆ ಬುದ್ಧಿಕೆಟ್ಟ್‌ದ್ ಸತ್ಯೊನು ಬುಡ್ತಿನಾಕುಲಾದ್, ದೇವಭಕ್ತಿನ್ ಒಂಜಿ ಲಾಭದ ಉದ್ಯೋಗ ಅಂದ್‌ದ್ ಎನ್ನುನ ಈ ನರಮಾನಿಲೆಡ ನಿತ್ಯದ ಕಚ್ಚಾಟ ಆವೊಂದುಪ್ಪುಂಡು. 6 ತೃಪ್ತಿ ಕೊರ್ಪಿನ ಭಕ್ತಿ ಮಲ್ಲ ಲಾಭ ಇತ್ತಿನವೇ ಆದುಂಡು. 7 ನಮ ಲೋಕೊಗು ಬನ್ನಗ ದಾಲಾ ಪತ್ತೊಂದು ಬೈದ್‌ಜ, ಅಂಚೆನೇ ಲೋಕೊಡ್ದು ಪೋನಗ ದಾಲಾ ದೆತ್ತೊಂದು ಪೋಪುಜ. 8 ನಂಕ್ ನುಪ್ಪು ಕುಂಟು ಇತ್ತ್ಂಡ ಯಾವು, ಐಟ್ಟ್ ತೃಪ್ತೆರಾದುಪ್ಪುಗ. 9 ಐಶ್ವರ್ಯವಂತೆ ಆವೊಡು ಅಂದ್‌ದ್ ಆಸೆ ಮಲ್ಪುನಾಕುಲು ಶೋಧನೆಗ್ ಬೂರ್ದು ನಾನಾ ರೀತಿದ ಬುದ್ಧಿದಾಂತಿನ ಬೊಕ್ಕ ನಾಶಾಪಿನ ದುರಾಶೆಲೆಗ್ ತಿಕ್ಕ್‌ದ್ ಬೂರ್ವೆರ್. ಇಂಚಿತ್ತಿ ಆಸೆಲು ನರಮಾನಿಲೆನ್ ಕೇಡ್‌ಗ್ಲಾ ನಾಶೊನೊಗ್ಲಾ ಪಾಡುಂಡು. 10 ದಾಯೆಗಂದ್ಂಡ ಕಾಸ್‌ದಾಸೆ ಮಾತ ದುಷ್ಟತನೊಕು ಬೇರ್ ಆದುಂಡು. ಐಕ್ ಕೆಲೆವೆರ್ ಮನಸ್ ದೀದ್ ಕ್ರಿಸ್ತನ ಮಿತ್ತ್‌ದ ನಂಬಿಕೆಡ್ ಸಾದಿ ತತ್ತ್ ಪೋಯಿನಕುಲಾದ್, ತನ್ಕುಲೆಗ್ ದಿಂಜ ಬೇನೆ ಮಲ್ತೊಂಡೆರ್. ತಿಮೋಥಿಗ್ ಪೌಲನ ಕಡೆ ಆದೇಶೊಲು 11 ಆಂಡ ತಿಮೋಥಿ, ಈ ಒರಿ ದೇವೆರೆ ನರಮಾನಿ. ಈ ಮಾತ ಪಡಿಕೆಂತಿನೆಡ್ದ್ ದೂರ ಪಾರ್ದ್ ನೀತಿಗ್, ಭಕ್ತಿಗ್, ನಂಬಿಕೆಗ್, ಪ್ರೀತಿಗ್, ತಾಳ್ಮೆಗ್, ಸಜ್ಜನಿಗೆಗ್ ಪ್ರಯತ್ನ ಮಲ್ಪುಲ. 12 ಕ್ರಿಸ್ತ ನಂಬಿಕೆದಾಕುಲು ಮಲ್ಪುನ ಎಡ್ಡೆ ಉರ್ಡಾಟೊನು ಮಲ್ಪುಲ, ನಿತ್ಯಜೀವೊನು ಗಟ್ಟಿಯಾದ್ ಪತ್ತೊನ್ಲ. ಐಕಾದ್ರನೆ ದೇವೆರ್ ನಿನನ್ ಲೆತ್ತ್‌ದೆ. ಬೊಕ್ಕ ಈ ದಿಂಜ ಸಾಕ್ಷಿಲೆ ಎದುರುಡು ಎಡ್ಡೆ ಅರಿಕೆ ಮಲ್ತ್‌ದ. 13 ಮಾತ ಸೃಷ್ಟಿಗ್ಲಾ ಜೀವ ಕೊರ್ಪಿನ ದೇವೆರೆ ದುಂಬುಲಾ, ಪೊಂತ್ಯ ಪಿಲಾತನ ಎದುರುಡು ಎಡ್ಡೆ ಅರಿಕೆನ್ ಸಾಕ್ಷಿ ಆದ್ ಕೊರಿನ ಕ್ರಿಸ್ತ ಯೇಸುನ ಎದುರುಡ್ಲಾ ಯಾನ್ ನಿಕ್ಕ್ ಕಂಡಿತಾದ್ ಪನ್ಪಿನಿ ದಾನೆಂದ್ಂಡ, 14 ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ತೋಜಿದ್ ಬನ್ನೆಂಗೆ ಈ ಸುವಾರ್ತೆದ ಅಪ್ಪಣೆನ್ ಕುರೆದಾಂತೆ ತಪ್ಪುದಾಂತೆ ಕೈಕೊನ್ಲ. 15 ಭಾಗ್ಯವಂತೆ ಆಯಿ ಒರಿಯೇ ಸರ್ವತ್ರಾಣಿ ದೇವೆರ್‌ಲಾ, ರಾಜಾದಿರಾಜೆಲಾ ಕರ್ತವೆರೆ ಕರ್ತವೆಲಾ ಆದುಪ್ಪು ಯೇಸು ಬರ್ಪಿನೆನ್ ದೇವೆರ್ ತಕ್ಕ ಸಮಯೊಡು ತೋಜಾವೆ. 16 ಆಯೆ ಒರಿಯೇ ಏಪಲಾ ಸೈಯಂದಿನಾಯೆಲಾ ತೀರಂದಿ ಬೊಲ್ಪುಡು ಉಪ್ಪುನಾಯೆಲಾ ಆದುಲ್ಲೆ. ನರಮಾನಿಲೆಡ್ ಏರ್ಲಾ ಆಯನ್ ತೂತುಜೆರ್, ಏರೆಗ್ಲಾ ಆಯನ್ ತೂವೆರೆ ಆವಂದ್; ಆಯಗ್ ಮಾನಲಾ ನಿತ್ಯ ಬಲಲಾ ಉಪ್ಪಡ್ ಆಮೆನ್. 17 ಈ ಲೋಕದ ಐಶ್ವರ್ಯವಂತೆರೆಗ್ ಅಪ್ಪಣೆ ಕೊರೊಡು ದಾನೆಂದ್ಂಡ, ಅಕುಲು ಅಹಂಕಾರಿಲಾವಂದೆ, ತನ್ಕುಲೆ ಸ್ಥಿರದಾಂತಿ ಐಶ್ವರ್ಯದ ಮಿತ್ತ್ ಭರವಸ ದೀವಂದೆ, ನಮ ಸಂತೋಷಗಾದ್ ನಂಕ್ ಮಾತೆನ್ಲಾ ಧಾರಾಳವಾದ್ ಕೊರ್ಪಿನ ದೇವೆರೆ ಮಿತ್ತ್ ಭರವಸ ದೀವೊಡು. 18 ನಿಜವಾಯಿನ ಜೀವೊನು ಪಡೆವೆರೆ ಬೋಡಾದ್ ಅಕುಲು ಎಡ್ಡೆಂತಿನೆನ್ ಮಲ್ಪುನಾಕುಲುಲಾ ಎಡ್ಡೆ ಕಾರ್ಯೊಲೆಡ್ ಐಶ್ವರ್ಯವಂತೆರ್ಲಾ ದಾನಧರ್ಮ ಮಲ್ಪುನಾಕುಲುಲಾ ಉದಾರ ಮನಸ್‌ದಾಕುಲುಲಾ ಆದುಪ್ಪೊಡು. 19 ತನ್ಕುಲು ನಿತ್ಯಜೀವೊನು ಪತ್ತೊನುಲೆಕ್ಕ ಬರ್ಪಿ ಕಾಲೊಗು ಎಡ್ಡೆ ಬುನಾದಿನ್ ತನ್ಕುಲೆಗ್ ಕೂಡಾವೊನೊಡು ಪಂಡ್ದ್ ಅಕ್ಲೆಗ್ ಅಪ್ಪಣೆ ಕೊರ್ಲ. 20 ಓ ತಿಮೋಥಿ, ಈ ಗೇನದ ಬೋಧನೆ ಅಂದ್‌ದ್ ಭಕ್ತಿದಾಂತಿ ಬೋಧನೆಗ್ ಸಮ್ಮಂಧ ಆದುಪ್ಪು ಪ್ರಪಂಚದ ವ್ಯರ್ಥ ಪಾತೆರೊಲೆಗ್ಲಾ, ತರ್ಕೊಲೆಗ್ಲಾ ದೂರ ಆದ್, ದೇವೆರ್ ನಿಕ್ಕ್ ಒಚ್ಚಿದ್ ಕೊರಿನೆನ್ ಜೋಕೆಡ್ ಕಾಪುಲ. 21 ಕೆಲೆವೆರ್ ಆ ಸುಳ್ಳು ಗೇನೊನು ಪತ್ತೊಂದು ಕ್ರಿಸ್ತಡ್ ದೀತಿನ ನಂಬಿಕೆಡ್ದ್ ತತ್ತ್‌ದ್ ಪೋಯೆರ್. ದೇವೆರೆ ದಯ ನಿಕ್ಲೆಡೊಪ್ಪ ಉಪ್ಪಡ್. |
New Life Literature