1 ತಿಮೋಥಿ 4 - ಪೊಸ ಒಡಂಬಡಿಕೆಸುಳ್ಳು ಬೋಧಕೆರ್ 1 ಬರ್ಪಿನ ದಿನೊಕುಲೆಡ್ ಕೆಲೆವೆರ್ ಮೋಸ ಮಲ್ಪುನ ಆತ್ಮೊಲೆ ಪಾತೆರೊಗ್ಲಾ ದೆವ್ವೊಲೆ ಬೋಧನೆಗ್ಲಾ ಮನಸ್ ಕೊರ್ಪಿನಾಕುಲಾದ್ ಕ್ರಿಸ್ತ ನಂಬಿಕೆಡ್ದ್ ತತ್ತ್ ಪೋಯಿನಾಕುಲಾದ್ ಉಪ್ಪುವೆರ್ ಅಂದ್‌ದ್ ದೇವೆರಾತ್ಮ ಸ್ಪಷ್ಟಾದ್ ತೆರಿಪಾವೊಂದುಂಡು. 2 ಸುಳ್ಳು ಬೋಧಕೆರ್ ಬತ್ತ್‌ದ್ ಸ್ವಂತ ಮನಸ್‌ಡ್ ಕಪಟದಾಕುಲಾಂಡಲಾ ತನ್ಕುಲು ನೀತಿವಂತೆರ್ ಅಂದ್‌ದ್ ತೋಜಾವೊನ್ವೆರ್. 3 ಜನೊಕುಲೆನ್ ಮರ್ಲ್ ಮಲ್ಪುನಾಕುಲಾದ್ ಅಕುಲು ಮದ್ಮೆ ಆವೆರೆ ಬಲ್ಲಿ ಪಂಡ್ದ್‌ಲಾ, ಕೆಲವು ತಿನಸ್‌ಲೆನ್ ತಿನಿಯೆರೆ ಬಲ್ಲಿ ಪಂಡ್ದ್‌ಲಾ ಪನ್ಪೆರ್. ಆಂಡ ಏರ್ ದೇವೆರೆನ್ ನಂಬುನಾಕುಲಾದ್ ಸತ್ಯೊನು ತೆರಿಯೊಂದಿನಾಕುಲಾದ್ ಉಲ್ಲೆರಾ ಅಕುಲು ದೇವೆರೆಗ್ ಉಪಕಾರ ಸ್ತುತಿ ಮಲ್ತ್‌ದ್ ತಿನರೆಗಾದ್ ದೇವೆರ್ ಮಾತ ತರತ ತಿನಸ್‌ಲೆನ್ ಉಂಡು ಮಲ್ತ್‌ದೆ. 4 ದೇವೆರ್ ಉಂಡು ಮಲ್ತಿನವು ಮಾತಲಾ ಎಡ್ಡೆಂತಿನವು ಆಯಿನೆಡ್ದ್, ದೇವೆರೆಗ್ ಉಪಕಾರ ಸ್ತುತಿ ಮಲ್ತ್‌ದ್ ದೆತ್ತೊಂಡ, ಒವೆನ್ಲಾ ಬೊಡ್ಚಿ ಅಂದ್‌ದ್ ಪನಿಯೆರೆ ಬಲ್ಲಿ. 5 ದಾಯೆಗಂದ್ಂಡ ದೇವೆರೆ ಪಾತೆರೊಡ್ದುಲಾ ಪ್ರಾರ್ಥನೆಡ್ದ್‌ಲಾ ಅವು ಶುದ್ಧ ಆಪುಂಡು. ಕ್ರಿಸ್ತ ಯೇಸುನ ಎಡ್ಡೆ ಸೇವಕೆ 6 ಈ ಸಂಗತಿಲೆನ್ ಸಹೋದ್ರೆರೆಗ್ ತೆರಿಪಾಂಡ, ಈ ಕೈಕೊಂದು ನಡಪುನ ಕ್ರಿಸ್ತ ನಂಬಿಕೆದ ಬೊಕ್ಕ ಎಡ್ಡೆ ಬೋಧನೆದ ಪಾತೆರೊಲೆಡ್ ಬಲವಾದ್ ಉಂತುದಿನಾಯೆ ಆದ್ ಕ್ರಿಸ್ತ ಯೇಸುನ ಒರಿ ಎಡ್ಡೆ ಸೇವಕೆ ಆದುಪ್ಪುವ. 7 ಬಜೀ ಅಜ್ಜಿಕತೆತ ಲೆಕ್ಕ ಲೋಕದ ಕತೆಕ್ಲೆನ್ ದೂರ ಮಲ್ತ್‌ದ್ ಐತ ಪಗತೆಗ್ ದೇವಭಕ್ತಿಡ್ ಉಪ್ಪೆರೆ ನಿನನ್ ತಯಾರ್ ಮಲ್ತೊನ್ಲ. 8 ದಾಯೆಗಂದ್ಂಡ ಶರೀರದ ವ್ಯಾಯಾಮ ಒಂತೆದೆಕ್ ಪ್ರಯೋಜನ, ಆಂಡ ದೇವೆರೆ ಭಕ್ತಿ ಮಾತ ಸಂಗತಿಡ್ಲಾ ಪ್ರಯೋಜನದವು ಆದಿತ್ತ್‌ದ್ ಈ ಲೋಕೊಡ್ಲಾ ನನ ದುಂಬದ ಲೋಕೊಡ್ಲಾ ಜೀವ ಕೊರ್ಪಿನ ವಾಗ್ದಾನ ಆದುಂಡು. 9 ಈ ಪಾತೆರ ನಂಬಿಕೆದವುಲಾ, ದೆತ್ತೊನುನೆಕ್ಕ್ ತೀರಾ ಯೋಗ್ಯದವುಲಾ ಆದುಂಡು. 10 ಉಂದೆಕ್ಕಾದ್ ಎಂಕುಲು ಭಂಗ ಬತ್ತ್‌ದ್ ಪ್ರಯಾಸೊಡು ಬೇಲೆ ಮಲ್ತೊಂದುಲ್ಲ, ದಾಯೆಗಂದ್ಂಡ ಮಾತ ನರಮಾನಿಲೆಗ್, ಮುಖ್ಯಾದ್ ನಂಬುನಾಕುಲೆಗ್ ರಕ್ಷಕೆ ಆಯಿ ಜೀವ ಇತ್ತಿ ದೇವೆರೆ ಮಿತ್ತ್ ನಮ ಭರವಸೆ ದೀತಿನಾಕುಲಾದುಲ್ಲ. 11 ಈ ಮಾತ ಸಂಗತಿಲೆಗ್ ಅಪ್ಪಣೆ ಕೊರ್ದು ಬೋಧನೆ ಮಲ್ಪುಲ. 12 ಈ ಜವ್ವನೆ ಅಂದ್‌ದ್ ಏರ್ಲಾ ನಿನನ್ ಅಸಡ್ಡೆ ಮಲ್ಪಂದೆ ಏರೆಗ್ಲಾ ಅವಕಾಸ ಕೊರಂದೆ ನಿನ ಪಾತೆರೊಡು, ನಡತೆಡ್, ಪ್ರೀತಿಡ್, ನಂಬಿಕೆಡ್, ಶುದ್ಧತೆಡ್ ನಂಬುನಾಕುಲೆಗ್ ಈಯೇ ಮಾದ್ರಿ ಆದುಪ್ಪುಲ. 13 ಯಾನ್ ಬನ್ನಮುಟ್ಟ ವಾಕ್ಯ ಓದುನೆಟ್ಲಾ ಬೋಧನೆ ಕೊರ್ಪಿನೆಟ್ಟ್‌ಲಾ ಬುದ್ಧಿ ಪನ್ಪಿನೆಟ್ಲಾ ಉಮೇದ್‌ಡುಪ್ಪುಲ. 14 ನಿನಡ ಉಪ್ಪುನ ಆತ್ಮೀಕ ವರೊಕ್ಲೆನ್ ಅಸಡ್ಡೆ ಮಲ್ಪಡ. ಸಭಾ ಹಿರಿಯೆರ್ ಅಕ್ಲೆಗ್ ದೇವೆರೆಡ್ ಆಯಿ ಪ್ರವಾದನೆಡ್ದ್ ನಿನ ಮಿತ್ತ್ ಕೈ ದೀಯಿನೆಡ್ದ್ ಅವು ನಿಕ್ಕ್ ತಿಕ್ಕ್‌ಂಡತ್ತಾ. 15 ನಿನ ಕಾರ್ಯೊಲೆನ್ ಗೇನ ಕೊರ್ದು ಪೂರ ಮಲ್ಪುಲ, ನಿನ ಕೆಲಸೊಲೆಡ್ ಪೂರ್ತಿಯಾದ್ ತೊಡಗ್‌ಲ. ಇಂಚ ಈ ಬಲಪುನೆನ್ ಮಾತೆರ್ಲಾ ತೂವಡ್. 16 ಅತ್ತಂದೆ ನಿನ ಬಗೆಟ್ಲಾ ಈ ಕೊರ್ಪಿ ಬೋಧನೆದ ಬಗೆಟ್ಲಾ ಜಾಗ್ರತೆಡುಪ್ಪುಲ. ಈ ಐಟ್ಟೇ ನಿಲೆ ಆದುಪ್ಪುಲ, ಅಪಗ ಈ ನಿನನ್ಲಾ ಬೊಕ್ಕ ನಿನ ಬೋಧನೆನ್ ಕೇನುನಾಕುಲೆನ್ಲಾ ರಕ್ಷಣೆ ಮಲ್ಪುವ. |
New Life Literature