1 ತಿಮೋಥಿ 3 - ಪೊಸ ಒಡಂಬಡಿಕೆ

ಸಭಾಧ್ಯಕ್ಷೆರ್‌ಲಾ ಸಭಾಸೇವೆಕೆರ್‌ಲಾ ಯೋಗ್ಯದಾಕುಲು ಆದುಪ್ಪೊಡು

¹ ಸಭಾಧ್ಯಕ್ಷನ ಉದ್ಯೋಗೊನು ಒರಿ ಪಡೆವೊಡು ಅಂದ್‌ದ್ ಮನಸ್ ಮಲ್ಪುವೆಡ ಆಯೆ ಎಡ್ಡೆ ಕೆಲಸೊನು ಅಪೇಕ್ಷೆ ಮಲ್ಪುನಾಯೆ ಇನ್ಪಿನ ಪಾತೆರ ನಂಬಿಕೆಗ್ ತಕ್ಕದವೇ.

² ಸಭಾದ್ಯಕ್ಷೆ ದೋಷದಾಂತಿನಾಯೆಲಾ ಒಂಜೇ ಬೊಡೆದಿ ಇತ್ತಿನಾಯೆಲಾ ಆದುಪ್ಪೊಡು. ಪರಂದಿನಾಯೆಲಾ ಹದತಾಯೆಲಾ ಮಾನಸ್ತೆಲಾ ಬಿನ್ನೆರೆನ್ ಸುದಾರಿಪುನಾಯೆಲಾ ಬೋಧನೆ ಪನ್ಪುನೆಟ್ ಬಿರ್ಸೆಲಾ ಆದುಪ್ಪೊಡು.

³ ಆಯೆ ಪರ್ದ್ ಅಮಲೇರಿನಾಯೆಲಾ ಲಡಯಿ ಮಲ್ಪುನಾಯೆಲಾ ಆದುಪ್ಪಂದೆ ಸಜ್ಜನೆ ಆದುಪ್ಪೊಡು. ಪೊಕ್ಕಡೆ ತರ್ಕಮಲ್ಪಂದಿನಾಯೆಲಾ ಕಾಸ್‌ದಾಸೆದಾಂತಿನಾಯೆಲಾ ಆದುಪ್ಪೊಡು.

⁴ ಪೂರ್ತಿ ಮಾರ್ಯಾದಿಡ್ ತನ ಜೋಕುಲೆನ್ ಅಧೀನೊಡು ದೀವೊಂದು ಸ್ವಂತ ಇಲ್ಲದಾಕುಲೆನ್ ಪೊರ್ಲುಡು ನಡಪುಡುನಾಯೆ ಆದುಪ್ಪೊಡು.

⁵ ದಾಯೆಗಂದ್ಂಡ ಒರಿ ಸ್ವಂತ ಇಲ್ಲದಾಕುಲೆನ್ ತೂವೆರೆ ತೀರಂದಿನಾಯೆ ದೇವೆರೆ ಸಭೆನ್ ಎಂಚ ತೂವೊನೊಲಿ?

⁶ ಆಯೆ ಪೊಸತ್ತಾದ್ ಸಭೆಕ್ ಸೇರ್ದಿನಾಯೆ ಆದುಪ್ಪರೆ ಬಲ್ಲಿ. ಇಂಚಾಂಡ ಆಯೆ ಅಹಂಕಾರದಾಯೆ ಆದ್ ಸೈತಾನಗ್ ಬರ್ಪಿ ತೀರ್ಪು ಆಯ ಮಿತ್ತ್‌ಲಾ ಬರಿಯೆರೆ ಕಾರಣ ಆವು.

⁷ ಅತ್ತಂದೆ ಆಯೆ ಪಿದಯಿದ ಜನೊಕುಲೆಡ ಎಡ್ಡೆ ಪುದರ್ ದೆತ್ತೊಂದಿನಾಯೆ ಆದುಪ್ಪೊಡು. ಇಜ್ಜಾಂಡ ಆಯೆ ಅವಮಾನೊಗು ಒಳಗಾದ್ ಸೈತಾನನ ಉರ್ಲುಗು ತಿಕ್ಕ್‌ದ್ ಬೂರ್ವೆ.

ಸಭಾಸೇವೆಕೆರ್

⁸ ಅಂಚೆನೇ ಸಭಾಸೇವಕೆರ್‌ ಮಾರ್ಯಾದಿದಾಕುಲು ಆದುಪ್ಪೊಡು ಅತ್ತಂದೆ ಅಕುಲು ರಡ್ಡ್ ಪಾತೆರದಾಕುಲುಲಾ, ಪರ್ಪಿನ ಅಭ್ಯಾಸದಾಕುಲುಲಾ, ದುಡ್ಡುದ ಆಸೆದಾಕುಲುಲಾ ಆದುಪ್ಪಂದೆ;

⁹ ನಂಬುದು ಅರ್ಥ ಮಲ್ತೊಂದಿನ ಸತ್ಯದ ಗುಟ್ಟುನು ಶುದ್ಧ ಮನಸಾಕ್ಷಿಡ್ ಕಾತೊನುನಾಕುಲು ಆದುಪ್ಪೊಡು.

¹⁰ ಅವತ್ತಂದೆ ಮೊಕ್ಲೆನ್ ದುಂಬು ಪರೀಕ್ಷೆ ಮಲ್ತ್‌ದ್ ದೂರುದಾಂತಿನಕುಲಾದ್ ತೋಜುವೆರ್ಡ ಸೇವೆಕೆರೆ ಉದ್ಯೋಗೊನು ನಡಪಾವಡ್.

¹¹ ಅಂಚೆನೇ ಸೇವೆ ಮಲ್ಪುನ ಪೊಂಜೊವುಲು ಮಾರ್ಯಾದಿದಾಕುಲುಲಾ ಚಾಡಿ ಪನಂದಿನಾಕುಲುಲಾ ಹದತಕುಲುಲಾ ಮಾತ ಕೆಲಸೊಲೆಡ್ ನಂಬಿಕೆದಾಕುಲುಲಾ ಆದುಪ್ಪೊಡು.

¹² ಸಭಾಸೇವಕೆರ್ ಒಂಜೇ ಬೊಡೆದಿ ಇತ್ತಿನಾಕುಲುಲಾ ತನ್ಕುಲೆನ ಜೋಕುಲೆನ್ಲಾ ಇಲ್ಲದಕುಲೆನ್ಲಾ ಎಡ್ಡೆಡ್ ನಡಪಾವುನಾಕುಲುಲಾ ಆದುಪ್ಪೊಡು.

¹³ ಸಭಾಸೇವೆಕೆರಾದ್ ಎಡ್ಡೆ ಸೇವೆ ಮಲ್ಪುನಾಕುಲು ಆದಿತ್ತ್ಂಡ, ಎಡ್ಡೆ ಪದವಿನ್ಲಾ ಕ್ರಿಸ್ತ ಯೇಸುಡೊಪ್ಪ ಉಪ್ಪುನ ನಂಬಿಕೆಡ್ ದಿಂಜ ಧೈರ್ಯೊನ್ಲಾ ಸಂಪಾದನೆ ಮಲ್ಪುನಾಕುಲಾದ್ ತೋಜಾವೊನ್ವೆರ್.

ನಂಬಿಕೆದ ಮಲ್ಲ ಮರ್ಮ

¹⁴ ಬೇಗನೆ ನಿನ ಕೈತಲ್‌ಗ್ ಬರ್ಪೆ ಪನ್ಪಿನ ಭರವಸ ಇತ್ತಿನೆಡ್ದ್ ಯಾನ್ ಈ ವಿಷಯೊಲೆನ್ ನಿಕ್ಕ್ ಬರೆಪೆ.

¹⁵ ಆಂಡ ಒಂಜಿ ವೇಳೆ ಯಾನ್ ತಡ ಮಲ್ತೆಡೆಲಾ, ಜೀವ ಇತ್ತಿ ದೇವೆರೆ ಸಭೆ ಪನ್ಪಿ ಇಲ್ಲನ್ ಎಂಚ ನಡಪುಡೊಡು ಅಂದ್‌ದ್ ಗೊತ್ತಾಪಿಲೆಕ್ಕ ಈ ಪತ್ರಿಕೆಡ್ದ್ ನಿಕ್ಕ್ ಗೊತ್ತಾವು. ಈ ಸಭೆ ಸತ್ಯದ ಕಂಬಲಾ ಅಡಿಪಾಯಲಾ ಆದುಂಡು.

¹⁶ ಉಂದತ್ತಂದೆ ನಂಕ್ ಗೊತ್ತಾಪಿಲೆಕ್ಕ ದೇವಭಕ್ತಿಗ್ ಆಧಾರವಾಯಿನ ಸತ್ಯದ ಗುಟ್ಟು, ಅವು ನಿಜಾದ್ ವಿಶೇಷವಾಯಿನ ಆದುಂಡು ಅಂದ್‌ದ್ ನಮ ಒಪ್ಪಿಯೊನ್ವ. ಕ್ರಿಸ್ತೆ ನರಮಾನಿ ರೂಪೊಡು ತೋಜಿಯೆ, ಆತ್ಮ ಸಮ್ಮಂಧೊಡು ಕ್ರಿಸ್ತೆ ನೀತಿವಂತೆ ಅಂದ್‌ದ್ ತೋಜಾದ್ ಕೊರಿಯೆ. ದೂತೆರೆಗ್ ತೋಜಿಯೆ, ಪಿದಯಿದ ಜನೊಕುಲೆ ನಡುಟು ಆಯನ್ ಸಾರಿಂಡ್, ಲೋಕದಾಕುಲು ಆಯನ್ ನಂಬಿಯೆರ್. ಪರಲೋಕದ ಮೈಮೆಡ್ ಆಯನ್ ಮಿತ್ತ್ ದೆತ್ತೊಂಡೆರ್.