1 ತಿಮೋಥಿ 2 - ಪೊಸ ಒಡಂಬಡಿಕೆ

ಸಭೆತ ಆರಾಧನೆ

¹ ಮಾತೆಡ್ದ್ ದುಂಬು ಮಾತ ನರಮಾನಿಲೆಗಾದ್ ದೇವೆರೆಡ ನಟ್ಟೊಂದು, ಪ್ರಾರ್ಥನೆ ಮಲ್ತೊಂದು, ಮದ್ಯಸ್ತಿಕೆ ಬೊಕ್ಕ ಉಪಕಾರ ಸ್ತುತಿ ಮಲ್ಪೊಡು ಅಂದ್‌ದ್ ಕೇನೊನ್ವೆ.

² ನಂಕ್ ಸುಖ ಸಮಾಧಾನ ಉಂಡಾದ್ ನಮ ಪೂರ್ತಿ ಭಕ್ತಿಡ್ಲಾ ಮರ್ಯಾದಿಡ್ಲಾ ಜೀವನ ಮಲ್ಪುಲೆಕ್ಕ ಅರಸರೆಗ್ಲಾ ಮಾತ ಅಧಿಕಾರೊಡುಪ್ಪುನಾಕುಲೆಗ್ಲಾ ದೇವೆರೆಡ ನಟ್ಟೊನೊಡು.

³ ಬೊಕ್ಕ ಇಂಚ ಮಲ್ಪುನವು ನಮ ರಕ್ಷಕೆ ಆಯಿ ದೇವೆರೆ ಸನ್ನಿಧಿಡ್ ಎಡ್ಡೆದವುಲಾ ಮೆಚ್ಚಿಗೆದವುಲಾ ಆದುಂಡು.

⁴ ಮಾತ ನರಮಾನಿಲು ರಕ್ಷಣೆ ಹೊಂದುದು ಅಕುಲು ಸತ್ಯದ ಗೇನೊಡು ಸೇರೊಡು ಪನ್ಪಿನ ದೇವೆರೆನ ಚಿತ್ತ.

⁵ ದಾಯೆಗಂದ್ಂಡ ದೇವೆರ್ ಒರಿಯೇ, ದೇವೆರೆನ್ಲಾ ನರಮಾನಿಲೆನ್ಲಾ ಒಂಜಿ ಮಲ್ಪುನ ಮದ್ಯಸ್ತೆಗಾರೆಲಾ ಒರಿಯೇ. ಆಯೆ ನರಮಾನಿ ಆಯಿ ಯೇಸು ಕ್ರಿಸ್ತೆನೇ

⁶ ಆಯೆ ಮಾತೆರೆನ ಬುಡುಗಡೆಗಾದ್ ತನನ್ ಒಚ್ಚಿದ್ ಕೊರಿಯೆ. ಬೊಕ್ಕ ಉಂದು ತಕ್ಕ ಸಮಯೊಡು ಪನೊಡಾಯಿನ ಸಾಕ್ಷಿ ಆದುಂಡು.

⁷ ಈ ಸಾಕ್ಷಿನ್ ಪ್ರಸಿದ್ಧಿ ಮಲ್ಪೆರೆಗಾದ್ ಯಾನ್ ಸಾರಿಯುನಾಯೆಲಾ ಅಪೊಸ್ತಲೆಲಾ ಆದ್ ನಂಬಿಕೆಡ್ಲಾ ಸತ್ಯೊಡ್ಲಾ ಪಿದಯಿದ ಜನೊಕುಲೆಗ್ ಬೋಧಕೆ ಆದ್ ನೇಮಕ ಆತೆ. ಯಾನ್ ಇಂಚಿತ್ತಿನಾಯೆ ಪನ್ಪಿನ ಸುಳ್ಳು ಅತ್ತ್, ಸತ್ಯನೇ.

⁸ ಅಂಚಾದ್ ಅಂಜೊವುಲು ಮಾತ ಜಾಗ್‌ಡ್ ಕೋಪಲಾ, ತರ್ಕದಾಂತಿನಾಕುಲುಲಾ ಆದ್ ಪರಿಶುದ್ಧ ಕೈಕ್ಲೆನ್ ದೆರ್ತ್ತ್‌ದ್ ಪ್ರಾರ್ಥನೆ ಮಲ್ಪೊಡಂದ್‌ದ್ ಎನ ಮನಸಾದುಂಡು.

^9-10 ಅಂಚೆನೇ ಪೊಂಜೊವುಲು ಮರ್ಯಾದಿದಾಕುಲಾದ್, ಡಂಭಾಚಾರೊನು ಬುಡ್ದು ಮರ್ಯಾದಿಗ್ ತಕ್ಕದ ಅಂಗಿನ್ ಪಾಡೊನಡ್. ಅಕುಲು ಕುಜಲ್ ನೆಯ್ಪಿನವು, ಬಂಗಾರ ಮುತ್ತು ದಿಂಜ ಬಿಲೆ ಇತ್ತಿ ಕುಂಟುಲೆಡ್ದ್ ತನ್ಕುಲೆನ್ ಅಲಂಕಾರ ಮಲ್ತೊನಂದೆ, ದೇವೆರೆನ ಭಕ್ತಿಡ್ ಎಡ್ಡೆಂತಿನ ಕೆಲಸೊಲೆಡ್ ಐತ ಮಲ್ತೊನಡ್.

¹¹ ಪೊಂಜೊವುಲು ಮನಿಪಂದೆ ಇತ್ತ್‌ದ್ ಮಾತೆಟ್ಲಾ ತಗ್ಗ್ ಬಗ್ಗ್‌ದ್ ಇತ್ತ್‌ದ್ ಬೋಧನೆ ಕೇನೊಡು

¹² ಬೋಧನೆ ಮಲ್ಪೆರೆಗಾವಡ್ ಅಂಜೊವುಲೆ ಮಿತ್ತ್ ಅಧಿಕಾರ ತೋಜಾವರೆಗಾವಡ್ ಪೊಂಜೊವುಲೆಗ್ ಅಪ್ಪಣೆ ಯಾನ್ ಕೊರ್ಪುಜಿ. ಅಕುಲು ಮನಿಪರೆ ಬಲ್ಲಿ

¹³ ದಾಯೆಗಂದ್ಂಡ ಆದಾಮುನು ದುಂಬು ಉಂಡು ಮಲ್ತ್‌ದಿನಿ, ಐಡ್ದ್ ಬೊಕ್ಕ ಹವ್ವನ್.

¹⁴ ಅವು ಅತ್ತಂದೆ ಆದಾಮು ಮೋಸೊಗು ಬೂರುಜೆ, ಆಂಡ ಪೊಂಜೊವು ಮೋಸೊಡು ತಿಕೊಂದು ಪಾಪೊಡು ಬೂರಿಯಲ್.

¹⁵ ಆಂಡ ಪೊಂಜೊವುಲು ಮಾರ್ಯಾದಿಡ್ ಇತ್ತ್‌ದ್ ನಂಬಿಕೆಡ್ಲಾ, ಪ್ರೀತಿಡ್ಲಾ, ಪರಿಶುದ್ಧತೆಡ್ಲಾ ನಿಲೆ ಆದಿತ್ತೆರ್ಡ ಜೋಕುಲೆನ್ ಪೆದ್ದುನೆಟ್ಟ್ ರಕ್ಷಣೆ ಹೊಂದುವೆರ್.