1 ತಿಮೋಥಿ 1 - ಪೊಸ ಒಡಂಬಡಿಕೆಪೌಲಡ್ದ್ ವಂದನೆಲು 1 ನಮ ರಕ್ಷಕೆ ಆದುಪ್ಪು ದೇವೆರೆಡ್ದ್‌ಲಾ ನಮ ನಿರೀಕ್ಷೆಗ್ ಆಧಾರ ಆದುಪ್ಪು ಕ್ರಿಸ್ತ ಯೇಸುಡ್ದ್‌ಲಾ ಅಪ್ಪಣೆಗ್ ಸರಿಯಾದ್ ನೇಮಕವಾಯಿನ ಯೇಸು ಕ್ರಿಸ್ತನ ಅಪೊಸ್ತಲೆ ಪೌಲು, 2 ನಂಬಿಕೆಡ್ ನಿಜ ಮಗೆ ಆದುಪ್ಪು ತಿಮೋಥಿಗ್ ಬರೆಪಿನಿ ದಾನೆಂದ್ಂಡ, ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ನಮ ಕರ್ತವೆ ಆದುಪ್ಪು ಕ್ರಿಸ್ತ ಯೇಸುಡ್ದ್‌ಲಾ ನಿಕ್ಕ್ ದಯಲಾ ಕರುಣೆಲಾ ಸಮಾಧಾನಲಾ ಆವಡ್. ಸುಳ್ಳು ಬೋಧಕೆರೆ ಬಗೆಟ್ ಎಚ್ಚರಿಕೆ 3 ಯಾನ್ ಮಕೆದೋನ್ಯೊಗು ಪೋನಗ ಈ ಎಫೆಸಡೆ ಇತ್ತ್‌ದ್ ಅಲ್ಪ ಉಪ್ಪುನ ಕೆಲೆವೆರೆಗ್, ನಿಕುಲು ಬೇತೆ ಬೋಧನೆನ್ ಮಲ್ಪೆರೆ ಬಲ್ಲಿ ಪಂಡ್ದ್‌ಲಾ 4-5 ಅಂಚೆನೇ, ಕಟ್ಟುಕತೆಕ್ಲೆಗ್ಲಾ ಕೊಡಿಮುದೆಲ್ ಇಜ್ಜಂದಿನ ಸಂತಾನ ಪಟ್ಟಿಲೆಗ್ಲಾ ಗೇನ ಕೊರಿಯೆರೆ ಬಲ್ಲಿ ಪಂಡ್ದ್, ದುಂಬು ಯಾನ್ ನಿಕ್ಕ್ ಅಪ್ಪಣೆ ಕೊರ್ತಿ ಲೆಕ್ಕನೇ ಇತ್ತೆಲಾ ಪನೊಂದುಲ್ಲೆ. ಇಂಚಿತ್ತಿನವು ದುಂಬಗ್ ತರ್ಕ ಪುಟ್ಟಾವುನವು ಅತ್ತಂದೆ ದೇವೆರ್ ಮಲ್ಪೊಡಿತ್ತಿ ಕೆಲಸೊಲೆಗ್ ಬಳಕೆ ಆಪುಜಿ. ಅವು ನಂಬಿಕೆಡ್ದ್ ಸಾದ್ಯ ಆಪುಂಡು. ಶುದ್ಧ ಹೃದಯ, ಎಡ್ಡೆ ಮನಸಾಕ್ಷಿ, ಕಪಟದಾಂತಿ ನಂಬಿಕೆ, ಇಂಚಿತ್ತಿನೆಡ್ದ್ ಉಂಡಾಯಿ ಪ್ರೀತಿಯೇ ದೇವೆರೆ ಪಾತೆರದ ಬೋಧನೆ ಆದುಂಡು. 6 ಕೆಲೆವೆರ್ ಈ ಮುಖ್ಯ ವಿಷಯೊಲೆಡ್ದ್ ತತ್ತ್‌ದ್ ಪೋದು ಬೊಡ್ಚಾವಂದಿನ ತರ್ಕೊಲೆಗ್ ಬೂರ್ದೆರ್. 7 ಅಕುಲು ನ್ಯಾಯಕಟ್ಟ್‌ದ ಬೋಧಕೆರ್ ಅಂದ್‌ದ್ ತೋಜಾವೊನಿಯೆರೆ ಆಸೆ ಮಲ್ಪುವೆರ್. ಆಂಡ ಅಕುಲು ತನ್ಕುಲು ಮಲ್ಪುನ ಬೋಧನೆನ್ಲಾ ಪಾತೆರುನ ವಿಷಯೊನ್ಲಾ ತೆರಿಯಂದಿನಾಕುಲಾದುಲ್ಲೆರ್. 8 ನ್ಯಾಯಕಟ್ಟ್ ಎಡ್ಡೆ ಅಂದ್‌ದ್ ನಮ ತೆರಿದ, ಆಂಡ ಅವೆನ್ ಉದ್ದೇಶೊಗು ಸರಿಯಾದ್ ಉಪಯೋಗ ಮಲ್ಪೊಡು. 9-10 ಈ ನ್ಯಾಯಕಟ್ಟ್ ನೀತಿವಂತೆರೆಗ್ ಅತ್ತ್, ಆಂಡ ಅನ್ಯಾಯಗಾರೆರ್, ಅವಿಧೇಯೆರ್, ಭಕ್ತಿಹೀನೆರ್, ಪಾಪಿಷ್ಟೆರ್, ಲೋಕದಾಕುಲು, ನೀಚೆರ್, ತನ್ಕುಲೆ ಅಪ್ಪೆಅಮ್ಮಾಡ್ಲೆಗ್ ಪೆಟ್ಟು ಪಾಡುನಾಕುಲು, ಮಾನ್ಯ ಕೆರ್ಪಿನಾಕುಲು, ಹಾದ್ರದಾಕುಲು, ಪುರುಷಗಾಮಿಲು, ಗುಲಾಮೆರೆ ವ್ಯಾಪಾರ ಮಲ್ಪುನಾಕುಲು, ಸುಳ್ಳುಗಾರೆರ್, ಪಾತೆರ ತತ್ತಿನಾಕುಲು, ಎಡ್ಡೆ ಬೋಧನೆಗ್ ವಿರೋಧಾದ್ ಬೇತೆ ಒವಾಂಡಲಾ ಮಲ್ಪುನಾಕುಲು, ಇಂಚಿತ್ತಿನ ನೀತಿಕೆಟ್ಟಿನಾಕುಲೆಗಾದ್ ಅವು ನೇಮಕ ಆತ್ಂಡ್. 11 ಬೊಕ್ಕ ಯಾನ್ ನಿಕ್ಕ್ ಪನ್ಪಿನ ಈ ಉಪದೇಶ ಭಾಗ್ಯವಂತೆ ಆದುಪ್ಪು ದೇವೆರೆನ ಮೈಮೆದ ಬೊಲ್ಪುನು ಪ್ರಕಾಶ ಮಲ್ಪುನ ಸುವಾರ್ತೆಗ್ ಸರಿಯಾದ್ ಉಂಡು. ಎಂಕ್ ಈ ಸುವಾರ್ತೆದ ಸೇವೆದ ಜವಾಬ್ದಾರಿ ಕೊರ್ದುಂಡು. ದೇವೆರೆ ಕರುಣೆಗಾದ್ ಪೌಲನ ಉಪಕಾರ ಸ್ತುತಿ 12-13 ಎನನ್ ಬಲ ಪಡೆಪಾಯಿನ ನಮ ಕರ್ತವೆ ಆದುಪ್ಪು ಕ್ರಿಸ್ತ ಯೇಸುಗು ಯಾನ್ ಉಪಕಾರ ಪನ್ಪೆ. ಎನನ್ ಆಯೆ ನಂಬಿಗಸ್ತೆ ಅಂದ್‌ದ್ ಗೆನ್ತ್‌ದ್ ಆಯನ ಸೇವೆಗ್ ಅಜತ್ ದೆತ್ತೊನಿಯೆ. ದುಂಬು ಯೇಸುನು ದೂಷಣೆ ಮಲ್ಪುನಾಯೆಲಾ ಭಂಗ ಬರ್ಪಾವುನಾಯೆಲಾ ಬಲಾತ್ಕಾರ ಮಲ್ಪುನಾಯೆಲಾ ಆದಿತ್ತೆ. ಆಂಡ ಅವೆನ್ ಯಾನ್ ಅಪನಂಬಿಕೆಡ್ ತೆರಿಯಂದೆ ಮಲ್ತಿನೆಡ್ದ್ ಆಯೆ ಎಂಕ್ ಕರುಣೆ ತೋಜಾಯೆ. 14 ನಮ ಕರ್ತವನ ದಯ ಹೆಚ್ಚಾಯಿನೆಡ್ದ್, ಕ್ರಿಸ್ತ ಯೇಸುಡ್ದು ಬರ್ಪಿನ ನಂಬಿಕೆಲಾ ಪ್ರೀತಿಲಾ ಎನಡ ಏತೋ ಹೆಚ್ಚಾಂಡ್. 15 ಕ್ರಿಸ್ತ ಯೇಸು ಪಾಪಿಷ್ಟೆರೆನ್ ರಕ್ಷಣೆ ಮಲ್ಪೆರೆ ಲೋಕೊಗು ಬತ್ತೆ ಇನ್ಪಿ ಪಾತೆರ ನಂಬಿಕೆದವುಲಾ ದೆತ್ತೊನುನೆಕ್ಕ್ ಯೋಗ್ಯದವುಲಾ ಆದುಂಡು. ಆ ಪಾಪಿಲೆಡ್ ಯಾನೇ ದುಂಬುದಾಯೆ. 16 ಆಯೆ ಪಾಪಿಯಾಯಿ ಎಂಕ್ ಕರುಣೆ ತೋಜಾದ್, ಎನ ಮಿತ್ತ್ ತನ ಪರಿಪೂರ್ಣ ಆದುಪ್ಪು ತಾಳ್ಮೆನ್ ತೋಜಪಾಯೆ. ಇಂಚ ಕ್ರಿಸ್ತ ಯೇಸುಡು ನಂಬಿಕೆ ದೀದ್ ನಿತ್ಯಜೀವ ಪಡೆಪಿನ ಮಾತೆರೆಗ್ಲಾ ಮಾದ್ರಿ ಆದುಪ್ಪರೆ ಎಂಕ್ ಈ ಕರುಣೆ ತಿಕ್ಕ್ಂಡ್. 17 ನಿತ್ಯೊಗು ರಾಜ್ಯ ಆಳುನ ಅರಸುಲಾ, ನಾಶಾವಂದಿನಾಯೆಲಾ ಕಣ್ಣ್‌ಗ್ ತೋಜಂದಿನಾಯೆಲಾ ಆದುಪ್ಪು ಒರಿಯೇ ದೇವೆರೆಗ್ ಏನಿತ್ಯೇನಿಗ್ಲಾ ಮಾನಲಾ ಮೈಮೆಲಾ ಆವಡ್, ಆಮೆನ್. ತಿಮೋಥಿನ ಜವಾಬ್ದಾರಿಲು 18 ಮಗೆ ಆಯಿ ತಿಮೋಥಿ, ನಿನ ವಿಷಯೊಡು ದುಂಬು ಪನ್ತಿ ಪ್ರವಾದನೆಲೆನ್ ಯಾನ್ ಎನ್ನ್‌ದ್ ಈ ಐಟ್ಟ್ ಧೈರ್ಯವಂತೆ ಆದ್, ಎಡ್ಡೆ ಯುದ್ದ ಮಲ್ಪೊಡು ಇನ್ಪಿ ಅಪ್ಪಣೆನ್ ನಿಕ್ಕ್ ಕೊರ್ಪೆ. 19 ನಂಬಿಕೆನ್ಲಾ, ಎಡ್ಡೆ ಮನಸಾಕ್ಷಿನ್ಲಾ ಗಟ್ಟಿಡ್ ಪತ್ತೊನ್ಲ. ಕೆಲೆವೆರ್ ಅಕ್ಲೆನ ಎಡ್ಡೆ ಸಾಕ್ಷಿನ್ ಬುಡ್ದು ಕ್ರಿಸ್ತ ನಂಬಿಕೆದ ಸಂಗತಿಡ್ ದರಿದ್ ಪೋತಿ ಕಪ್ಪಲ್‌ದ ಲೆಕ್ಕ ನಷ್ಟ ಆತಿನಾಕುಲೆ ಲೆಕ್ಕ ಉಲ್ಲೆರ್. 20 ಅಕ್ಲೆಡ್ ಹುಮೆನಾಯೆಲಾ ಅಲೆಕ್ಸಾಂದ್ರೆಲಾ ಇಂಚಿತ್ತಿನಾಕುಲೇ. ಮೊಕುಲು ದೇವೆರೆನ್ ದೂಷಣೆ ಮಲ್ಪೆರೆ ಬಲ್ಲಿ ಪನ್ಪಿನೆನ್ ಕಲ್ಪುಲೆಕ್ಕ ಮೊಕ್ಲೆನ್ ಸೈತಾನಗ್ ಒಪ್ಪಿಸಾದ್ ಕೊರಿಯೆ. |
New Life Literature