1 ಥೆಸಲೋನಿಕೆರೆಗ್‌ 5 - ಪೊಸ ಒಡಂಬಡಿಕೆತಯಾರಾದುಪ್ಪುಲೆ! ಕರ್ತವೆ ಕುಡೊರ ಬರ್ಪೆ 1 ಆಮೆನ್.ಸಹೋದ್ರೆರೇ, ಈ ಸಂಗತಿಲು ಆಪಿನ ಕಾಲೊಲು ಬೊಕ್ಕ ಗಳಿಗೆದ ಸಂಗತಿಡ್ ನಿಕ್ಲೆಗ್ ಬರೆಪಿನ ಅಗತ್ಯ ಇಜ್ಜಿ. 2 ರಾತ್ರೆಡ್ ಕಲ್ವೆ ಬರ್ಪಿಲೆಕ್ಕನೇ, ಕರ್ತವ ದಿನಲ ಬರ್ಪುಂಡು ಅಂದ್‌ದ್ ನಿಕುಲು ಸರಿಯಾದ್ ತೆರಿದರತ್ತಾ. 3 ಜನೊಕುಲು ಸಮಾಧಾನೊಡ್ಲಾ ಪೋಡಿಗೆದಾಂತೆಲಾ ಉಲ್ಲ ಅಂದ್‌ದ್ ಪನೊಂದುಪ್ಪುನಪಗನೇ, ಬಂಜಿನಲೆಗ್ ಪೆದ್ಪಿಬೇನೆ ಬರ್ಪಿಲೆಕ್ಕ ಅಕ್ಲೆ ಮಿತ್ತ್ ನಾಶನ ಬರು. ಐಡ್ದ್ ತಪ್ಪಾವೆರೆ ಸಾದ್ಯೆನೇ ಇಜ್ಜಿ. 4 ಸಹೋದ್ರೆರೇ, ಕಲ್ವೆ ಬರ್ಪಿಲೆಕ್ಕನೇ ಆ ದಿನ ನಿಕ್ಲೆ ಮಿತ್ತ್ ಬರಿಯೆರೆ ಬಲ್ಲಿ. ಕಾರಣ ನಿಕುಲು ಕತ್ತಲೆಡ್ ಇತ್ತಿನಾಕುಲತ್ತ್. 5 ನಿಕುಲು ಬೊಲ್ಪುದಾಕುಲುಲಾ ಪಗೆಲ್‌ದಾಕುಲುಲಾ ಆದುಲ್ಲರ್, ನಮ ರಾತ್ರೆದಾಕುಲುಲಾ ಅತ್ತ್, ಕತ್ತಲೆದಾಕುಲುಲಾ ಅತ್ತ್. 6 ಐಡ್ದಾವರ ನಮ ಬೇತೆಕ್ಲೆ ಲೆಕ್ಕ ನಿದ್ರೆಡ್ ಜೆತೊಂದುಪ್ಪುನ ಬೊಡ್ಚಿ. ನಮ ಎಚ್ಚರಿಕೆಡಿತ್ತ್‌ದ್ ಸ್ವಸ್ಥಚಿತ್ತೊಡುಪ್ಪುಗ. 7 ನಿದ್ರೆ ಮಲ್ಪುನಾಕುಲು ರಾತ್ರೆಡ್ ನಿದ್ರೆ ಮಲ್ಪುವೆರ್, ಅಮಲಾಪಿನಾಕುಲು ರಾತ್ರೆಡ್ ಅಮಲಾಪೆರತ್ತಾ. 8 ನಮ ದಿನೊಕು ಸೇರ್ದಿನಾಕುಲು ಬೊಲ್ಪುದಾಕುಲು ಆದಿತ್ತಿನೆಡ್ದಾವರ ಸ್ವಸ್ಥಚಿತ್ತೊಡು ಉಪ್ಪೊಡು. ನಂಬಿಕೆ ಬೊಕ್ಕ ಪ್ರೀತಿ ಪನ್ಪಿ ತಿಗಲೆದ ಕವಚೊನ್ಲಾ ರಕ್ಷಣೆದ ಭರವಸ ಪನ್ಪಿನ ಟೊಪ್ಪಿನ್ಲಾ ಪಾಡೊಂದು ಎಚ್ಚರಿಕೆಡುಪ್ಪುಗ. 9 ದಾಯೆಗಂದ್ಂಡ, ದೇವೆರ್ ನಮನ್ ಕೋಪೊಗು ಗುರಿ ಆವೊಡು ಅಂದ್‌ದ್ ನೇಮಕ ಮಲ್ಪಂದೆ, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ ರಕ್ಷಣೆನ್ ಸಂಪಾದನೆ ಮಲ್ಪೊಡಂದ್‌ದ್ ನೇಮಕ ಮಲ್ತ್‌ದೆ. 10 ನಮ ಎಚ್ಚರಿಕೆಡಿತ್ತ್‌ಂಡಲಾ ಸರಿ, ನಿದ್ರೆಡಿತ್ತ್‌ಂಡಲಾ ಸರಿ, ತನ ಒಟ್ಟುಗೇ ಬದುಕೊಡು ಅಂದ್‌ದ್ ಆಯೆ ನಂಕಾದ್ ಸೈತೆ. 11 ಅಂಚಾಯಿನೆಡ್ದ್ ನಿಕುಲು ಇತ್ತೆ ಉಪ್ಪುಲೆಕ್ಕನೇ ಒರಿಯಗ್ ಒರಿ ಉಮೇದ್ ಕೊರ್ದು ಒರಿಯನ್ ಒರಿ ಭಕ್ತಿಡ್‌ ವೃದ್ಧಿ ಮಲ್ತೊಂದುಪ್ಪುಲೆ. ಕಡೆತ ಆದೇಶೊಲು ಬೊಕ್ಕ ವಂದನೆಲು 12 ಸಹೋದ್ರೆರೇ, ಎಂಕುಲು ನಿಕ್ಲೆಡ ನಟ್ಟೊಂದುಲ್ಲ ದಾನೆಂದ್ಂಡ, ಏರ್ ನಿಕ್ಲೆಡ್ ಪ್ರಯಾಸ ಮಲ್ತ್‌ದ್ ಕರ್ತವ ಕಾರ್ಯೊಡು ನಿಕ್ಲೆ ಮಿತ್ತ್ ಮುಖ್ಯಸ್ಥೆರಾದ್ ನಿಕ್ಲೆಗ್ ಬುದ್ಧಿ ಪನ್ಪೆರ್ಡ ಅಕ್ಲೆ ಮಿತ್ತ್ ಹೆಚ್ಚಿನ ಗಮನ ಕೊರ್ಲೆ. 13 ಅಕ್ಲೆನ ಬೇಲೆದ ಸಂಗತಿಡ್ ಅಕ್ಲೆನ್ ಪ್ರೀತಿಡ್ ಮಸ್ತ್ ಸನ್ಮಾನ ಮಲ್ಪೊಡು ಅಂದ್‌ದ್ ನಿಕ್ಲೆಡ ನಟ್ಟೊನ್ವ. ನಿಕ್ಲೆನಿಕ್ಲೆ ನಡುಟು ಸಮಾಧಾನೊಡುಪ್ಪುಲೆ. 14 ಸಹೋದ್ರೆರೇ, ಸೋಮಾರಿತನೊಟು ಉಪ್ಪುನಾಕುಲೆಗ್ ಬುದ್ಧಿ ಪನ್ಲೆ, ಮನಸ್ ಕುಂದುದು ಪೋಯಿನಾಕುಲೆಗ್ ಧೈರ್ಯ ಕೊರ್ಲೆ, ಬಲಹೀನೆರೆಗ್ ಆಧಾರ ಕೊರ್ಲೆ, ಮಾತೆರೆ ಒಟ್ಟುಡ್ಲಾ ತೀರುನಾತ್ ತಾಳ್ಮೆಡುಪ್ಪುಲೆ ಅಂದ್‌ದ್ ನಿಕ್ಲೆನ್ ಕೇನೊನ್ವೆ. 15 ಏರ್ಲಾ ಅನ್ಯಾಯ ಮಲ್ತಿನಾಕುಲೆಗ್ ಅನ್ಯಾಯ ಮಲ್ಪೊಡ್ಚಿ. ಏಪಲಾ ನಿಕುಲು ಒರಿ ಒರಿಯಗಾದ್‌ಲಾ ಮಾತೆರೆಗಾದ್‌ಲಾ ಎಡ್ಡೆ ಮಲ್ಪೆರೆ ತೂಲೆ. 16 ಏಪಲಾ ಸಂತೋಷೊಡುಪ್ಪುಲೆ. 17 ಬುಡಂದೆ ಪ್ರಾರ್ಥನೆ ಮಲ್ಪುಲೆ. 18 ಮಾತ ವಿಷಯೊಡ್ಲಾ ಉಪಕಾರ ಸ್ತುತಿ ಮಲ್ಪುಲೆ. ಉಂದೇ ನಿಕ್ಲೆನ ಸಂಗತಿಡ್ ಕ್ರಿಸ್ತ ಯೇಸುಡ್ದು ತೋಜಿದ್ ಬರ್ಪಿನ ದೇವೆರೆನ ಚಿತ್ತ ಆದುಂಡು. 19 ನಿಕ್ಲೆಡಿತ್ತಿನ ಪರಿಶುದ್ಧಾತ್ಮದ ತೂನು ತೆಕ್ಕಾವಡೆ. 20 ಪ್ರವಾದನೆನ್ ಹೀನ ಮಲ್ಪಡೆ, ಐಕ್ ಸನ್ಮಾನ ಕೊರ್ಲೆ. 21 ಆಂಡ ಮಾತೆನ್ಲಾ ಪರೀಕ್ಷೆ ಮಲ್ತ್‌ದ್, ಐಟ್ಟ್ ಎಡ್ಡೆಂತಿನೆನೇ ಗಟ್ಟಿಯಾದ್ ಪತ್ತೊನ್ಲೆ. 22 ಮಾತ ತರತ ಪಡಿಕೆತನೊಡ್ದು ದೂರ ಉಪ್ಪುಲೆ. 23 ಸಮಾಧಾನದ ದೇವೆರ್ ತಾನೇ ನಿಕ್ಲೆನ್ ಪೂರ್ತಿ ಆದ್ ಪರಿಶುದ್ಧ ಮಲ್ಪಡ್. ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ಬರ್ಪಿನ ಸಮಯೊಡು, ನಿಕ್ಲೆ ಆತ್ಮ, ಪ್ರಾಣ, ಶರೀರ, ತಪ್ಪುದಾಂತೆ ಪರಿಪೂರ್ಣ ಆದ್ ತೋಜುಲೆಕ್ಕ ಕಾಪಡ್. 24 ನಿಕ್ಲೆನ್ ಲೆಪ್ಪುನಾಯೆ ನಂಬಿಗಸ್ತೆ, ಉಂದೆನ್ ಆಯೆನೇ ಮಲ್ಪುವೆ. 25 ಸಹೋದ್ರೆರೇ, ಎಂಕ್ಲೆಗಾದ್ ಪ್ರಾರ್ಥನೆ ಮಲ್ಪುಲೆ. 26 ಪರಿಶುದ್ಧದ ಮುದ್ದು ಕೊರ್ದು ಸಹೋದ್ರೆರೆನ್ ವಂದಿಪುಲೆ. 27 ಈ ಪತ್ರಿಕೆನ್ ಮಾತ ಸಹೋದ್ರೆರೆಗ್ ಓದುದು ತೆರಿಪಾವೊಡು ಅಂದ್‌ದ್ ಕರ್ತವಡ್ ಒತ್ತಾಯ ಮಲ್ಪುವೆ. 28 ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದಯ ನಿಕ್ಲೆಡೊಪ್ಪ ಉಪ್ಪಡ್. ಆಮೆನ್. |
New Life Literature